शङ्करमाहात्म्यम् Shri Shankara Mahatmyam

ईशावास्यमिदं सर्वं चक्षोः सूर्यो अजायत ।इति श्रुतिरुवाचातो महादेवः परावरः ॥ १॥

īśāvāsyamidaṃ sarvaṃ cakṣoḥ sūryo ajāyata |iti śrutiruvācāto mahādevaḥ parāvaraḥ || 1||

अष्टमूर्तैरसौ सूर्यो मूर्तित्वे परिकल्पितः ।नेत्रं त्रिलोचनस्यैकमसौ सूर्यस्तदाश्रितः ॥ २॥

aṣṭamūrtairasau sūryo mūrtitve parikalpitaḥ |netraṃ trilocanasyaikamasau sūryastadāśritaḥ || 2||

यस्य भासा सर्वमिदं विभातीति श्रुतेरिमे ।तमेव भान्तमीशानमनुभान्ति खगादयः ॥ ३॥

yasya bhāsā sarvamidaṃ vibhātīti śruterime |tameva bhāntamīśānamanubhānti khagādayaḥ || 3||

ईशानः सर्वविद्यानां भूतानां चेति च श्रुतेः ।वेदादीनामप्यधीशः स ब्रह्मा कैर्न पूज्यते ॥ ४॥

īśānaḥ sarvavidyānāṃ bhūtānāṃ ceti ca śruteḥ |vedādīnāmapyadhīśaḥ sa brahmā kairna pūjyate || 4||

यस्य संहारकाले तु न किञ्चिदवशिष्यते ।सृष्टिकाले तु पुनः सर्वं स एकः सृजति प्रभुः ॥ ५॥

yasya saṃhārakāle tu na kiñcidavaśiṣyate |sṛṣṭikāle tu punaḥ sarvaṃ sa ekaḥ sṛjati prabhuḥ || 5||

सूर्याचन्द्रमसौ धाता यथापूर्वमकल्पयत् ।इतिश्रुतेर्महादेवः श्रेष्ठोऽर्च्यः सकलार्चितः ॥ ६॥

sūryācandramasau dhātā yathāpūrvamakalpayat |itiśrutermahādevaḥ śreṣṭho'rcyaḥ sakalārcitaḥ || 6||

विश्वं भूतं भवद्भव्यं सर्वं रुद्रात्मकं श्रुतम् ।मृत्युञ्जयस्तारकोऽतः स यज्ञस्य प्रसाधनः ॥ ७॥

viśvaṃ bhūtaṃ bhavadbhavyaṃ sarvaṃ rudrātmakaṃ śrutam |mṛtyuñjayastārako'taḥ sa yajñasya prasādhanaḥ || 7||

विषमाक्षोऽपि समदृक्साशिवोऽपि शिवः स च ।वृषसंस्थोऽप्यतिवृषो गुणात्माप्यगुणोऽमलः ॥ ८॥

viṣamākṣo'pi samadṛksāśivo'pi śivaḥ sa ca |vṛṣasaṃstho'pyativṛṣo guṇātmāpyaguṇo'malaḥ || 8||

यदाज्ञामुद्वहन्त्यत्र शिरसा सासुराः सुराः ।अन्नं वातो वर्ष इतीषवो यस्य स विश्वपाः ॥ ९॥

yadājñāmudvahantyatra śirasā sāsurāḥ surāḥ |annaṃ vāto varṣa itīṣavo yasya sa viśvapāḥ || 9||

भिषक्तमं त्वां भिषजां शृणोमीति श्रुतेरयम् ।स्वभक्तसंसारमहारोगहर्तापि शङ्करः ॥ १०॥

bhiṣaktamaṃ tvāṃ bhiṣajāṃ śṛṇomīti śruterayam |svabhaktasaṃsāramahārogahartāpi śaṅkaraḥ || 10||

इति श्रीवासुदेवानन्दसरस्वतीविरचितं श्रीशङ्करमाहात्म्यं सम्पूर्णम् ।

iti śrīvāsudevānandasarasvatīviracitaṃ śrīśaṅkaramāhātmyaṃ sampūrṇam |