सदाशिवकवचस्तोत्रम् Shri Sadashiva Kavacha Stotram

श्रीदेव्युवाचभगवन्देवदेवेश सर्वाम्नाय प्रपूजित ।सर्वं मे कथितं देव कवचं न प्रकाशितम् ॥ १॥

śrīdevyuvācabhagavandevadeveśa sarvāmnāya prapūjita |sarvaṃ me kathitaṃ deva kavacaṃ na prakāśitam || 1||

प्रासादाख्यस्य मन्त्रस्य कवचं मे प्रकाशय ।सर्वरक्षाकरं देव यदि स्नेहोऽस्ति मां प्रति ॥ २॥

prāsādākhyasya mantrasya kavacaṃ me prakāśaya |sarvarakṣākaraṃ deva yadi sneho'sti māṃ prati || 2||

श्रीभगवानुवाचप्रासादमन्त्रकवचस्य वामदेवऋषिः ।पन्क्तिश्छन्दः । सदाशिवो देवता ।सकलाभीष्टसिद्धये जपे विनियोगः ।शिरो मे सर्वदा पातु प्रासादाख्यः सदाशिवः ।षडक्षरस्वरूपो मे वदनं तु महेश्वरः ॥ ३॥

śrībhagavānuvācaprāsādamantrakavacasya vāmadevaṛṣiḥ |panktiśchandaḥ | sadāśivo devatā |sakalābhīṣṭasiddhaye jape viniyogaḥ |śiro me sarvadā pātu prāsādākhyaḥ sadāśivaḥ |ṣaḍakṣarasvarūpo me vadanaṃ tu maheśvaraḥ || 3||

पञ्चाक्षरात्मा भगवान्भुजौ मे परिरक्षतु ।मृत्युञ्जयस्त्रिबीजात्मा आस्यं रक्षतु मे सदा ॥ ४॥

pañcākṣarātmā bhagavānbhujau me parirakṣatu |mṛtyuñjayastribījātmā āsyaṃ rakṣatu me sadā || 4||

वटमूलं समासीनो दक्षिणामूर्तिरव्ययः ।सदा मां सर्वदः पातु षट्त्रिंशार्णस्वरूपधृक् ॥ ५॥

vaṭamūlaṃ samāsīno dakṣiṇāmūrtiravyayaḥ |sadā māṃ sarvadaḥ pātu ṣaṭtriṃśārṇasvarūpadhṛk || 5||

द्वाविंशार्णात्मको रुद्रो दक्षिणः परिरक्षतु ।त्रिवर्णात्मा नीलकण्ठः कण्ठं रक्षतु सर्वदा ॥ ६॥

dvāviṃśārṇātmako rudro dakṣiṇaḥ parirakṣatu |trivarṇātmā nīlakaṇṭhaḥ kaṇṭhaṃ rakṣatu sarvadā || 6||

चिन्तामणिर्बीजरूपो ह्यर्धनारीश्वरो हरः ।सदा रक्षतु मे गुह्यं सर्वसम्पत्प्रदायकः ॥ ७॥

cintāmaṇirbījarūpo hyardhanārīśvaro haraḥ |sadā rakṣatu me guhyaṃ sarvasampatpradāyakaḥ || 7||

एकाक्षरस्वरूपात्मा कूटव्यापी महेश्वरः ।मार्तण्डभैरवो नित्यं पादौ मे परिरक्षतु ॥ ८॥

ekākṣarasvarūpātmā kūṭavyāpī maheśvaraḥ |mārtaṇḍabhairavo nityaṃ pādau me parirakṣatu || 8||

तुम्बुराख्यो महाबीजस्वरूपः त्रिपुरान्तकः ।सदा मां रणभूमौ च रक्षतु त्रिदशाधिपः ॥ ९॥

tumburākhyo mahābījasvarūpaḥ tripurāntakaḥ |sadā māṃ raṇabhūmau ca rakṣatu tridaśādhipaḥ || 9||

ऊर्ध्वमूर्द्धानमीशानो मम रक्षतु सर्वदा ।दक्षिणास्यं तत्पुरुषः पायान्मे गिरिनायकः ॥ १०॥

ūrdhvamūrddhānamīśāno mama rakṣatu sarvadā |dakṣiṇāsyaṃ tatpuruṣaḥ pāyānme girināyakaḥ || 10||

अघोराख्यो महादेवः पूर्वास्यं परिरक्षतु ।वामदेवः पश्चिमास्यं सदा मे परिरक्षतु ॥ ११॥

aghorākhyo mahādevaḥ pūrvāsyaṃ parirakṣatu |vāmadevaḥ paścimāsyaṃ sadā me parirakṣatu || 11||

उत्तरास्यं सदा पातु सद्योजातस्वरूपधृक् ।इत्थं रक्षाकरं देवि कवचं देवदुर्लभम् ॥ १२॥

uttarāsyaṃ sadā pātu sadyojātasvarūpadhṛk |itthaṃ rakṣākaraṃ devi kavacaṃ devadurlabham || 12||

प्रातःकाले पठेद्यस्तु सोऽभीष्टं फलमाप्नुयात् ।पूजाकाले पठेद्यस्तु कवचं साधकोत्तमः ॥ १३॥

prātaḥkāle paṭhedyastu so'bhīṣṭaṃ phalamāpnuyāt |pūjākāle paṭhedyastu kavacaṃ sādhakottamaḥ || 13||

कीर्तिश्रीकान्तिमेधायुः सहितो भवति ध्रुवम् ।कण्ठे यो धारयेदेतत्कवचं मत्स्वरूपकम् ॥ १४॥

kīrtiśrīkāntimedhāyuḥ sahito bhavati dhruvam |kaṇṭhe yo dhārayedetatkavacaṃ matsvarūpakam || 14||

युद्धे च जयमाप्नोति द्यूते वादे स साधकः ।कवचं धारयेद्यस्तु साधको दक्षिणे भुजे ॥ १५॥

yuddhe ca jayamāpnoti dyūte vāde sa sādhakaḥ |kavacaṃ dhārayedyastu sādhako dakṣiṇe bhuje || 15||

देवा मनुष्या गन्धर्वा वश्यास्तस्य न संशयः ।कवचं शिरसा यस्तु धारयेद्यतमानसः ॥ १६॥

devā manuṣyā gandharvā vaśyāstasya na saṃśayaḥ |kavacaṃ śirasā yastu dhārayedyatamānasaḥ || 16||

करस्थास्तस्य देवेशि अणिमाद्यष्टसिद्धयः ।भूर्जपत्रे त्विमां विद्यां शुक्लपक्षेण वेष्टिताम् ॥ १७॥

karasthāstasya deveśi aṇimādyaṣṭasiddhayaḥ |bhūrjapatre tvimāṃ vidyāṃ śuklapakṣeṇa veṣṭitām || 17||

रजतोदरसंविष्टां कृत्वा वा धारयेत्सुधीः ।संप्राप्य महतीं लक्ष्मीमन्ते मद्देहरूपभाक् ॥ १८॥

rajatodarasaṃviṣṭāṃ kṛtvā vā dhārayetsudhīḥ |saṃprāpya mahatīṃ lakṣmīmante maddeharūpabhāk || 18||

यस्मै कस्मै न दातव्यं न प्रकाश्यं कदाचन ।शिष्याय भक्तियुक्ताय साधकाय प्रकाशयेत् ॥ १९॥

yasmai kasmai na dātavyaṃ na prakāśyaṃ kadācana |śiṣyāya bhaktiyuktāya sādhakāya prakāśayet || 19||

अन्यथा सिद्धिहानिः स्यात्सत्यमेतन्मनोरमे ।तव स्नेहान्महादेवि कथितं कवचं शुभम् ॥ २०॥

anyathā siddhihāniḥ syātsatyametanmanorame |tava snehānmahādevi kathitaṃ kavacaṃ śubham || 20||

न देयं कस्यचिद्भद्रे यदीच्छेदात्मनो हितम् ।यो अर्चयेद्गन्धपुष्पाद्यैः कवचं मन्मुखोदितंतेनार्चिता महादेवि सर्वे देवा न संशयः ॥ २१॥

na deyaṃ kasyacidbhadre yadīcchedātmano hitam |yo arcayedgandhapuṣpādyaiḥ kavacaṃ manmukhoditaṃtenārcitā mahādevi sarve devā na saṃśayaḥ || 21||

इति श्रीभैरवतन्त्रे श्रीसदाशिवकवचं सम्पूर्णम् ।

iti śrībhairavatantre śrīsadāśivakavacaṃ sampūrṇam |