रुद्रमृत्युञ्जयस्तवनं Shri Rudra Mrityunjaya Stavana

श्रीआनन्दभैरव उवाचश्रुतं च साधनं पुण्यं महारुद्रस्य सुन्दरि ।मणिपूरे प्रकाशञ्च कथितं ज्ञाननिर्णयम् ॥ १॥

śrīānandabhairava uvācaśrutaṃ ca sādhanaṃ puṇyaṃ mahārudrasya sundari |maṇipūre prakāśañca kathitaṃ jñānanirṇayam || 1||

अकस्मात् सिद्धिसम्पत्तिं नुतिं वद महाप्रियाम् ।यस्य श्रवणमात्रेण पाठेन योगिनीवशम् ॥ २॥

akasmāt siddhisampattiṃ nutiṃ vada mahāpriyām |yasya śravaṇamātreṇa pāṭhena yoginīvaśam || 2||

श्रीआनन्दभैरवी उवाचपरमानन्ददेवेश योगानामधिप प्रभो ।स्तोत्रं रुद्रस्य वक्ष्यामि सारात्सारं परात्परम् ॥ ३॥

śrīānandabhairavī uvācaparamānandadeveśa yogānāmadhipa prabho |stotraṃ rudrasya vakṣyāmi sārātsāraṃ parātparam || 3||

यज्ज्ञात्वा योगिनः सर्वे षट्चक्रपरिभेदकाः ।आकाशगामिनः सर्वे स्वर्गमोक्षाभिलाषुकाः ॥ ४॥

yajjñātvā yoginaḥ sarve ṣaṭcakraparibhedakāḥ |ākāśagāminaḥ sarve svargamokṣābhilāṣukāḥ || 4||

महादेवसमाः सर्वे देवाश्च स्वर्गभोगिनः ।सर्वरक्षाकरं स्तोत्रं ये पठन्ति निरन्तरम् ॥ ५॥

mahādevasamāḥ sarve devāśca svargabhoginaḥ |sarvarakṣākaraṃ stotraṃ ye paṭhanti nirantaram || 5||

ते यान्ति ब्रह्मसदनं सिद्धमुख्या महीतले ॥ ६॥

te yānti brahmasadanaṃ siddhamukhyā mahītale || 6||

ॐ भजामि शम्भुं सुखमोक्षहेतुं रुद्रं महाशक्तिसमाकुलाङ्गम् ।रौद्रात्मकं चारुहिमांशुशेखरं कालं गणेशं सुमुखाय शङ्करम् ॥ ७॥

oṃ bhajāmi śambhuṃ sukhamokṣahetuṃ rudraṃ mahāśaktisamākulāṅgam |raudrātmakaṃ cāruhimāṃśuśekharaṃ kālaṃ gaṇeśaṃ sumukhāya śaṅkaram || 7||

वर् रौद्रार्थकं रुद्रहिमांशुशेखरं कालं कुलेशं शिवशङ्करञ्चेतिमृत्युञ्जयं जीवनरक्षकं परं शिवं परब्रह्मशरीरमङ्गलम् ।हिमांशुकोटिच्छविमादधानं भजामि पद्मद्वयमध्यसंस्थितम् ॥ ८॥

var raudrārthakaṃ rudrahimāṃśuśekharaṃ kālaṃ kuleśaṃ śivaśaṅkarañcetimṛtyuñjayaṃ jīvanarakṣakaṃ paraṃ śivaṃ parabrahmaśarīramaṅgalam |himāṃśukoṭicchavimādadhānaṃ bhajāmi padmadvayamadhyasaṃsthitam || 8||

सर्वात्मकं कामविनाशमूलं तं चन्द्रचूडं मणिपूरवासिनम् । सर्वार्थकम्चतुर्भुजं ज्ञानसमुद्रयाढ्यं पाशं मृगाक्षं गुणसूत्रव्याप्तम् ॥ ९॥

sarvātmakaṃ kāmavināśamūlaṃ taṃ candracūḍaṃ maṇipūravāsinam | sarvārthakamcaturbhujaṃ jñānasamudrayāḍhyaṃ pāśaṃ mṛgākṣaṃ guṇasūtravyāptam || 9||

धरामयं तेजसमिन्दुकोटिं वायुं जलेशं गगनात्मकं परम् ।भजामि रुद्रं कुललाकिनीगतं सर्वाङ्गयोगं जयदं सुरेश्वरम् ॥ १०॥

dharāmayaṃ tejasamindukoṭiṃ vāyuṃ jaleśaṃ gaganātmakaṃ param |bhajāmi rudraṃ kulalākinīgataṃ sarvāṅgayogaṃ jayadaṃ sureśvaram || 10||

शुक्रं महाभीमनयं पुराणं (महाभीमलयं)प्राणात्मकं व्याधिविनाशमूलम् ।यज्ञात्मकं कामनिवारणं गुरुं (यज्ञार्थकम्)भजामि विश्वेश्वरशङ्करं शिवम् ॥ ११॥

śukraṃ mahābhīmanayaṃ purāṇaṃ (mahābhīmalayaṃ)prāṇātmakaṃ vyādhivināśamūlam |yajñātmakaṃ kāmanivāraṇaṃ guruṃ (yajñārthakam)bhajāmi viśveśvaraśaṅkaraṃ śivam || 11||

वेदागमानामतिमूलदेशं तदुद्भवं भद्रहितं परापरम् । तद्रहितंकालान्तकं ब्रह्मसनातनप्रियं भजामि शम्भुं गगनादिरूढम् ॥ १२॥

vedāgamānāmatimūladeśaṃ tadudbhavaṃ bhadrahitaṃ parāparam | tadrahitaṃkālāntakaṃ brahmasanātanapriyaṃ bhajāmi śambhuṃ gaganādirūḍham || 12||

शिवागमं शब्दमयं विभाकरं भास्वत्प्रचण्डानलविग्रहं ग्रहम् ।ग्रहस्थितं ज्ञानकरं करालं भजामि शम्भुं प्रकृतीश्वरं हरम् ॥ १३॥

śivāgamaṃ śabdamayaṃ vibhākaraṃ bhāsvatpracaṇḍānalavigrahaṃ graham |grahasthitaṃ jñānakaraṃ karālaṃ bhajāmi śambhuṃ prakṛtīśvaraṃ haram || 13||

छायाकरं योगकरं सुखेन्द्रं मत्तं महामत्तकुलोत्सवाढयम् ।योगेश्वरं योगकलानिधिं विधिं विधानवक्तारमहं भजामि ॥ १४॥

chāyākaraṃ yogakaraṃ sukhendraṃ mattaṃ mahāmattakulotsavāḍhayam |yogeśvaraṃ yogakalānidhiṃ vidhiṃ vidhānavaktāramahaṃ bhajāmi || 14||

हेमाचलालङ्कतशुद्धवेशं वराभयादाननिदानमूलम् ।भजामि कान्तं वनमालशोभितं चामूलपद्मामलमालिनं कुलम् ॥ १५॥

hemācalālaṅkataśuddhaveśaṃ varābhayādānanidānamūlam |bhajāmi kāntaṃ vanamālaśobhitaṃ cāmūlapadmāmalamālinaṃ kulam || 15||

स्वयं पुराणं पुरुषेश्वरं गुरुं मिथ्याभयाह्लादविभाविनं भजे ।भावप्रियं प्रेमकलाधरं शिवं गिरीश्वरं चारुपदारविन्दम् ॥ १६॥

svayaṃ purāṇaṃ puruṣeśvaraṃ guruṃ mithyābhayāhlādavibhāvinaṃ bhaje |bhāvapriyaṃ premakalādharaṃ śivaṃ girīśvaraṃ cārupadāravindam || 16||

ध्यानप्रियं ज्ञानगभीरयोगं भाग्यास्पदं भाग्यसमं सुलक्षणम् ।शूलायुघं शूलविभूषिताङ्गं श्रीशङ्करं मोक्षफलक्रियं भजे ॥ १७॥

dhyānapriyaṃ jñānagabhīrayogaṃ bhāgyāspadaṃ bhāgyasamaṃ sulakṣaṇam |śūlāyughaṃ śūlavibhūṣitāṅgaṃ śrīśaṅkaraṃ mokṣaphalakriyaṃ bhaje || 17||

नमो नमो रुद्रगणेभ्य एवं मृत्युञ्जयेभ्यः कुलचञ्चलेभ्यः ।शक्तिप्रियेभ्यो विजयादिभूतये शिवाय धन्याय नमो नमस्ते ॥ १८॥

namo namo rudragaṇebhya evaṃ mṛtyuñjayebhyaḥ kulacañcalebhyaḥ |śaktipriyebhyo vijayādibhūtaye śivāya dhanyāya namo namaste || 18||

बाह्यं त्रिशूलं वरसूक्ष्मभावं विशालनेत्रं तनुमध्यगामिनम् ।महाविपद्दुःखविनाशबीजं प्रज्ञादयाकान्तिकरं भजामि ॥ १९॥

bāhyaṃ triśūlaṃ varasūkṣmabhāvaṃ viśālanetraṃ tanumadhyagāminam |mahāvipadduḥkhavināśabījaṃ prajñādayākāntikaraṃ bhajāmi || 19||

वर् महाविपद्भस्मविलासबीजं शुद्धोदयं शान्तिकरं भजामिपुरान्तकं पूर्णशरीरिणं गुरुं स्मरारिमाद्यं निजतर्कमार्गम् ।अनादिदेवं दिवि दोषघातिनं भजामि पञ्चाक्षरपुण्यसाधनम् ॥ २०॥

var mahāvipadbhasmavilāsabījaṃ śuddhodayaṃ śāntikaraṃ bhajāmipurāntakaṃ pūrṇaśarīriṇaṃ guruṃ smarārimādyaṃ nijatarkamārgam |anādidevaṃ divi doṣaghātinaṃ bhajāmi pañcākṣarapuṇyasādhanam || 20||

दिगम्बरं पद्ममुखं करस्थं स्थितिक्रियायोगनियोजनं भवम् ।भावात्मकं भद्रशरीरिणं शिवं भजामि पञ्चाननमर्कवर्णम् ॥ २१॥

digambaraṃ padmamukhaṃ karasthaṃ sthitikriyāyoganiyojanaṃ bhavam |bhāvātmakaṃ bhadraśarīriṇaṃ śivaṃ bhajāmi pañcānanamarkavarṇam || 21||

मायामयं पङ्कजदामकोमलं दिग्व्यापिनं दण्डधरं हरेश्वरम् ।त्रिपक्षकं त्र्यक्षरबीजभावं त्रिपद्ममूलं त्रिगुणं भजामि ॥ २२॥

māyāmayaṃ paṅkajadāmakomalaṃ digvyāpinaṃ daṇḍadharaṃ hareśvaram |tripakṣakaṃ tryakṣarabījabhāvaṃ tripadmamūlaṃ triguṇaṃ bhajāmi || 22||

विद्याधरं वेदविधानकार्यं कायागतं नीतनिनादतोषम् ।नित्यं चतुर्वर्गफलादिमूलं वेदादिसूत्रं प्रणमामि योगम् ॥ २३॥

vidyādharaṃ vedavidhānakāryaṃ kāyāgataṃ nītaninādatoṣam |nityaṃ caturvargaphalādimūlaṃ vedādisūtraṃ praṇamāmi yogam || 23||

वेदान्तवेद्यं कुलशास्त्रविज्ञं क्रियामयं योगस्वधर्मदानम् ।भक्तेश्वरं भक्तिपरायणं वरं भक्तं महाबुद्धिकरं भजाम्यहम् ॥ २४॥

vedāntavedyaṃ kulaśāstravijñaṃ kriyāmayaṃ yogasvadharmadānam |bhakteśvaraṃ bhaktiparāyaṇaṃ varaṃ bhaktaṃ mahābuddhikaraṃ bhajāmyaham || 24||

गतागतं गम्यमगम्यभावं समुल्लसत्कोटिकलावतंसम् ।भावात्मकं भावमयं सुखासुखं भजामि भर्गं प्रथमारुणप्रभम् ॥ २५॥

gatāgataṃ gamyamagamyabhāvaṃ samullasatkoṭikalāvataṃsam |bhāvātmakaṃ bhāvamayaṃ sukhāsukhaṃ bhajāmi bhargaṃ prathamāruṇaprabham || 25||

बिन्दुस्वरूपं परिवादवादिनं मध्याह्नसूर्यायुतसन्निभं नवम् ।विभूतिदानं निजदानदानं दानात्मकं तं प्रणमामि देवम् ॥ २६॥

bindusvarūpaṃ parivādavādinaṃ madhyāhnasūryāyutasannibhaṃ navam |vibhūtidānaṃ nijadānadānaṃ dānātmakaṃ taṃ praṇamāmi devam || 26||

कुम्भापहं शत्रुनिकुम्भघातिनं दैत्यारिमीशं कुलकामिनीशम् ।प्रीत्यान्वितं चिन्त्यमचिन्त्यभावं प्रभाकराह्लादमहं भजामि ॥ २७॥

kumbhāpahaṃ śatrunikumbhaghātinaṃ daityārimīśaṃ kulakāminīśam |prītyānvitaṃ cintyamacintyabhāvaṃ prabhākarāhlādamahaṃ bhajāmi || 27||

त्रिमूर्तिमूलाय जयाय शम्भवे हिताय लोकस्य वपुर्धराय ।नमो भयाच्छिन्नविघातिने पते नमो नमो विश्वशरीरधारिणे ॥ २८॥

trimūrtimūlāya jayāya śambhave hitāya lokasya vapurdharāya |namo bhayācchinnavighātine pate namo namo viśvaśarīradhāriṇe || 28||

वर् भवाच्छन्ननिघातिने तेतपःफलाय प्रकृतिग्रहाय गुणात्मने सिद्धिकराय योगिने ।नमः प्रसिद्धाय दयातुराय वाञ्छाफलोत्साहविवर्धनाय ते ॥ २९॥

var bhavācchannanighātine tetapaḥphalāya prakṛtigrahāya guṇātmane siddhikarāya yogine |namaḥ prasiddhāya dayāturāya vāñchāphalotsāhavivardhanāya te || 29||

शिवममरमहान्तं पूर्णयोगाश्रयन्तं वर् शिववरहस्तं पुष्पयोगाश्रयन्तम्धरणिधरकराब्जैर्वर्धमानं त्रिसर्गम् ।विसममरणघातं मृत्युपूज्यं जनेशं वर् विसमचरणघातं मृत्युधातं नरेशंविधिगणपतिसेव्यं पूजये भावयामि ॥ ३०॥

śivamamaramahāntaṃ pūrṇayogāśrayantaṃ var śivavarahastaṃ puṣpayogāśrayantamdharaṇidharakarābjairvardhamānaṃ trisargam |visamamaraṇaghātaṃ mṛtyupūjyaṃ janeśaṃ var visamacaraṇaghātaṃ mṛtyudhātaṃ nareśaṃvidhigaṇapatisevyaṃ pūjaye bhāvayāmi || 30||

एतत्स्तोत्रं पठेद्विद्वान् मुनिर्योगपरायणः ।नित्यं जगन्नाथगुरुं भावयित्वा पुनः पुनः ॥ ३१॥

etatstotraṃ paṭhedvidvān muniryogaparāyaṇaḥ |nityaṃ jagannāthaguruṃ bhāvayitvā punaḥ punaḥ || 31||

मणिपूरे वायुनिष्ठो नित्यं स्तोत्रं पठेद् यदि ।जीवन्मुक्तश्च देहान्ते परं निर्वाणमाप्नुयात् ॥ ३२॥

maṇipūre vāyuniṣṭho nityaṃ stotraṃ paṭhed yadi |jīvanmuktaśca dehānte paraṃ nirvāṇamāpnuyāt || 32||

॥ इति श्रीरुद्रयामले उत्तरतन्त्रे महातन्त्रोद्दीपनेरुद्रमृत्युञ्जयस्तवनं नामाष्टचत्वारिंशतमः पटलः ॥

|| iti śrīrudrayāmale uttaratantre mahātantroddīpanerudramṛtyuñjayastavanaṃ nāmāṣṭacatvāriṃśatamaḥ paṭalaḥ ||