पूर्णमङ्गलेशसुप्रभातम् Shri Purnamangalesha Suprabhatam

नमः शिवाय पूर्णाय पूर्णमङ्गलवासिने ।जागृहि त्वं महादेव! सुप्रभातमुपस्थितम् ॥ १॥

namaḥ śivāya pūrṇāya pūrṇamaṅgalavāsine |jāgṛhi tvaṃ mahādeva! suprabhātamupasthitam || 1||

उत्तिष्ठोत्तिष्ट भगवन् विश्वमङ्गलसिद्धये ।आकेकराक्षिकलया दासाननुगृहाण नः ॥ २॥

uttiṣṭhottiṣṭa bhagavan viśvamaṅgalasiddhaye |ākekarākṣikalayā dāsānanugṛhāṇa naḥ || 2||

नमस्ते चन्द्रचूडाय नमस्ते शूलपाणये ।नमस्ते नीलकण्ठाय नमस्ते विश्वमूर्तये ॥ ३॥

namaste candracūḍāya namaste śūlapāṇaye |namaste nīlakaṇṭhāya namaste viśvamūrtaye || 3||

शम्भो सदाशिव, जगत्रयमङ्गलात्मन्गङ्गाधर, प्रणत भक्तजनार्तिहारिन् ।योगीन्द्रवन्दितविशुद्धपदारविन्द,श्रीपूर्णमङ्गलपते तव सुप्रभातम् ॥ ४॥

śambho sadāśiva, jagatrayamaṅgalātmangaṅgādhara, praṇata bhaktajanārtihārin |yogīndravanditaviśuddhapadāravinda,śrīpūrṇamaṅgalapate tava suprabhātam || 4||

पश्याभ्यपेति भगवन्, विमला विभातलक्ष्मीरियं विदधति स्तुतिगीतकानि ।पूजासुमानि विकचानि सुसज्जयन्तीश्रीपूर्णमङ्गलपते, तव सुप्रभातम् ॥ ५॥

paśyābhyapeti bhagavan, vimalā vibhātalakṣmīriyaṃ vidadhati stutigītakāni |pūjāsumāni vikacāni susajjayantīśrīpūrṇamaṅgalapate, tava suprabhātam || 5||

प्राचीप्रसादसुमुखी भव, शुक्रदीपहस्ता हि तिष्ठति भवत्पदसेवनोत्काः ।मन्दं च बीजयति वायुरयं भवन्तंश्रीपूर्णमङ्गलपते, तव सुप्रभातम् ॥ ६॥

prācīprasādasumukhī bhava, śukradīpahastā hi tiṣṭhati bhavatpadasevanotkāḥ |mandaṃ ca bījayati vāyurayaṃ bhavantaṃśrīpūrṇamaṅgalapate, tava suprabhātam || 6||

शैलास्तुपारविमलाम्बुकृताभिषेकाविद्योतमानतरुगुल्मजटाकलापाः ।त्यध्याननिश्चलतमाः परितः स्फुरन्तिश्रीपूर्णमङ्गलपते, तव सुप्रभातम् ॥ ७॥

śailāstupāravimalāmbukṛtābhiṣekāvidyotamānatarugulmajaṭākalāpāḥ |tyadhyānaniścalatamāḥ paritaḥ sphurantiśrīpūrṇamaṅgalapate, tava suprabhātam || 7||

एनं जगत्प्रकृतिपूजितपादपद्मम् ।त्वं देवदेव, शितकण्ठमकुण्ठशक्तिम् ।सेवामहे निखिलकामितसिद्धिहेतोःश्रीपूर्णमङ्गलपते, तव सुप्रभातम् ॥ ८॥

enaṃ jagatprakṛtipūjitapādapadmam |tvaṃ devadeva, śitakaṇṭhamakuṇṭhaśaktim |sevāmahe nikhilakāmitasiddhihetoḥśrīpūrṇamaṅgalapate, tava suprabhātam || 8||

हे विश्वनाथ, धनदस्तवपादसाद,स्त्वं स्वीकरोऽपि भगवन्निव भिक्षुचर्याम् ।निस्वार्थजीवितमुदाहरसि त्वमित्थंश्रीपूर्णमङ्गलपते, तव सुप्रभातम् ॥ ९॥

he viśvanātha, dhanadastavapādasāda,stvaṃ svīkaro'pi bhagavanniva bhikṣucaryām |nisvārthajīvitamudāharasi tvamitthaṃśrīpūrṇamaṅgalapate, tava suprabhātam || 9||

तत्स्थानमद्य विदितं किल तण्डुलाद्रिःसान्निध्यमत्र भगवंस्तव संविभाव्य ।क्षेत्रं तवाथ निरमायि च विप्रवर्यैःश्रीपूर्णमङ्गलपते, तव सुप्रभातम् ॥ १०॥

tatsthānamadya viditaṃ kila taṇḍulādriḥsānnidhyamatra bhagavaṃstava saṃvibhāvya |kṣetraṃ tavātha niramāyi ca vipravaryaiḥśrīpūrṇamaṅgalapate, tava suprabhātam || 10||

शास्ताम्बिकागणपतिश्च महाविभूम्नित्वद्धाम्नि यत्र सततं कृतसन्निधानाः ।अन्वर्थनामकमिदं जयताद्विशुद्धंश्रीपूर्णमङ्गलपते, तव सुप्रभातम् ॥ ११॥

śāstāmbikāgaṇapatiśca mahāvibhūmnitvaddhāmni yatra satataṃ kṛtasannidhānāḥ |anvarthanāmakamidaṃ jayatādviśuddhaṃśrīpūrṇamaṅgalapate, tava suprabhātam || 11||

शैलात्मजाललितलास्यकलानुविद्धंस्वं ताण्डवं प्रकटयन् विबुधैर्नुतस्त्वम् ।आनन्दरूप, नटराज, विधेहि शं नःश्रीपूर्णमङ्गलपते, तव सुप्रभातम् ॥ १२॥

śailātmajālalitalāsyakalānuviddhaṃsvaṃ tāṇḍavaṃ prakaṭayan vibudhairnutastvam |ānandarūpa, naṭarāja, vidhehi śaṃ naḥśrīpūrṇamaṅgalapate, tava suprabhātam || 12||

गङ्गाकलापशशिशेखर, तुल्यदृष्टे,सर्वज्ञ, सर्वनुत, दीनजनैकबन्धो ।त्वामेकमद्भुतवरित्रमुपाश्रयामःश्रीपूर्णमङ्गलपते, तव सुप्रभातम् ॥ १३॥

gaṅgākalāpaśaśiśekhara, tulyadṛṣṭe,sarvajña, sarvanuta, dīnajanaikabandho |tvāmekamadbhutavaritramupāśrayāmaḥśrīpūrṇamaṅgalapate, tava suprabhātam || 13||

त्रय्यात्मक, त्रिनयन, त्रिपुरान्तक; श्रीगौरीपते, त्रिभुवनैकशरण्य, शम्भो ।त्रायस्व नस्त्रिविधतापदवाग्निपातात्श्रीपूर्णमङ्गलपते, तव सुप्रभातम् ॥ १४॥

trayyātmaka, trinayana, tripurāntaka; śrīgaurīpate, tribhuvanaikaśaraṇya, śambho |trāyasva nastrividhatāpadavāgnipātātśrīpūrṇamaṅgalapate, tava suprabhātam || 14||

यदीयताण्डवच्युतं यदङ्गसङ्गपावितंविभूतिलेशमाप्य हा! महर्षयः प्रहर्षिताः ।हृदन्तशान्तिमाधुरीमनन्तसौख्यदायिनींददातु नो नटेश्वरः स पूर्णमङ्गलेश्वरः ॥ १५॥

yadīyatāṇḍavacyutaṃ yadaṅgasaṅgapāvitaṃvibhūtileśamāpya hā! maharṣayaḥ praharṣitāḥ |hṛdantaśāntimādhurīmanantasaukhyadāyinīṃdadātu no naṭeśvaraḥ sa pūrṇamaṅgaleśvaraḥ || 15||

दरिद्रभावदुःखितप्रमोददानदीक्षितोमदान्धदैत्यसञ्चयप्रणाशकारिवैभवः ।स्मरारिरन्तकान्तको विषाशनो दयानिधिःददातु शं महेश्वरः स पूर्णमङ्गलेश्वरः ॥ १६॥

daridrabhāvaduḥkhitapramodadānadīkṣitomadāndhadaityasañcayapraṇāśakārivaibhavaḥ |smarārirantakāntako viṣāśano dayānidhiḥdadātu śaṃ maheśvaraḥ sa pūrṇamaṅgaleśvaraḥ || 16||

गिरीन्द्रनन्दिनीप्रियं गिरीन्द्रमिन्दुशेखरंगिरामगोचरं शिवं निरीहनित्यपूजितम् ।भवाब्धितारकं भवं भजामहे भजामहेददातु शं महेश्वरः स पूर्णमङ्गलेश्वरः ॥ १७॥

girīndranandinīpriyaṃ girīndraminduśekharaṃgirāmagocaraṃ śivaṃ nirīhanityapūjitam |bhavābdhitārakaṃ bhavaṃ bhajāmahe bhajāmahedadātu śaṃ maheśvaraḥ sa pūrṇamaṅgaleśvaraḥ || 17||

नमोऽस्तु मुक्तिदायिने, मुनीन्द्रचित्तवासिनेनमोऽस्तु शूलधारिणे, विपद्धिमोक्षकारिणे ।नमोऽस्तु पापहारिणे, महाकपर्दधारिणे,नमोऽस्तु पूर्णमङ्गलप्रकाशिने, नमो नमः ॥ १८॥

namo'stu muktidāyine, munīndracittavāsinenamo'stu śūladhāriṇe, vipaddhimokṣakāriṇe |namo'stu pāpahāriṇe, mahākapardadhāriṇe,namo'stu pūrṇamaṅgalaprakāśine, namo namaḥ || 18||

सुप्रभातस्तोत्रमिदं ये शृण्वन्ति पठन्ति वा ।तेभ्यो ददातु भगवान् भक्तिं सर्वार्थदायिनीम् ॥ १९॥

suprabhātastotramidaṃ ye śṛṇvanti paṭhanti vā |tebhyo dadātu bhagavān bhaktiṃ sarvārthadāyinīm || 19||

शक्त्या संसेव्यमानस्य पूर्णमङ्गलवासिनः ।महेश्वरस्य कारुण्यात् ग्रामोऽयं वृद्धिमाप्नुयात् ॥ २०॥

śaktyā saṃsevyamānasya pūrṇamaṅgalavāsinaḥ |maheśvarasya kāruṇyāt grāmo'yaṃ vṛddhimāpnuyāt || 20||

इति श्रीवासुदेवन् एलयथेन विरचितंश्रीपूर्णमङ्गलेशसुप्रभातस्तोत्रं सम्पूर्णम् ।

iti śrīvāsudevan elayathena viracitaṃśrīpūrṇamaṅgaleśasuprabhātastotraṃ sampūrṇam |