शिवरक्षास्तोत्रम् अथवा अभयङ्करकवचम् Shivarakshastotram or Abhayankarakavacham

श्री गणेशाय नमः ॥अस्य श्रीशिवरक्षास्तोत्रमन्त्रस्य याज्ञवल्क्य ऋषिः ॥श्री सदाशिवो देवता ॥ अनुष्टुप् छन्दः ॥श्रीसदाशिवप्रीत्यर्थं शिवरक्षास्तोत्रजपे विनियोगः ॥चरितं देवदेवस्य महादेवस्य पावनम् ।अपारं परमोदारं चतुर्वर्गस्य साधनम् ॥ १॥

śrī gaṇeśāya namaḥ ||asya śrīśivarakṣāstotramantrasya yājñavalkya ṛṣiḥ ||śrī sadāśivo devatā || anuṣṭup chandaḥ ||śrīsadāśivaprītyarthaṃ śivarakṣāstotrajape viniyogaḥ ||caritaṃ devadevasya mahādevasya pāvanam |apāraṃ paramodāraṃ caturvargasya sādhanam || 1||

गौरीविनायकोपेतं पञ्चवक्त्रं त्रिनेत्रकम् ।शिवं ध्यात्वा दशभुजं शिवरक्षां पठेन्नरः ॥ २॥

gaurīvināyakopetaṃ pañcavaktraṃ trinetrakam |śivaṃ dhyātvā daśabhujaṃ śivarakṣāṃ paṭhennaraḥ || 2||

गंगाधरः शिरः पातु भालं अर्धेन्दुशेखरः ।नयने मदनध्वंसी कर्णो सर्पविभूषण ॥ ३॥

gaṃgādharaḥ śiraḥ pātu bhālaṃ ardhenduśekharaḥ |nayane madanadhvaṃsī karṇo sarpavibhūṣaṇa || 3||

घ्राणं पातु पुरारातिः मुखं पातु जगत्पतिः ।जिह्वां वागीश्वरः पातु कंधरां शितिकंधरः ॥ ४॥

ghrāṇaṃ pātu purārātiḥ mukhaṃ pātu jagatpatiḥ |jihvāṃ vāgīśvaraḥ pātu kaṃdharāṃ śitikaṃdharaḥ || 4||

श्रीकण्ठः पातु मे कण्ठं स्कन्धौ विश्वधुरन्धरः ।भुजौ भूभारसंहर्ता करौ पातु पिनाकधृक् ॥ ५॥

śrīkaṇṭhaḥ pātu me kaṇṭhaṃ skandhau viśvadhurandharaḥ |bhujau bhūbhārasaṃhartā karau pātu pinākadhṛk || 5||

हृदयं शंकरः पातु जठरं गिरिजापतिः ।नाभिं मृत्युञ्जयः पातु कटी व्याघ्राजिनाम्बरः ॥ ६॥

hṛdayaṃ śaṃkaraḥ pātu jaṭharaṃ girijāpatiḥ |nābhiṃ mṛtyuñjayaḥ pātu kaṭī vyāghrājināmbaraḥ || 6||

सक्थिनी पातु दीनार्तशरणागतवत्सलः ।उरू महेश्वरः पातु जानुनी जगदीश्वरः ॥ ७॥

sakthinī pātu dīnārtaśaraṇāgatavatsalaḥ |urū maheśvaraḥ pātu jānunī jagadīśvaraḥ || 7||

जङ्घे पातु जगत्कर्ता गुल्फौ पातु गणाधिपः ।चरणौ करुणासिंधुः सर्वाङ्गानि सदाशिवः ॥ ८॥

jaṅghe pātu jagatkartā gulphau pātu gaṇādhipaḥ |caraṇau karuṇāsiṃdhuḥ sarvāṅgāni sadāśivaḥ || 8||

एतां शिवबलोपेतां रक्षां यः सुकृती पठेत् ।स भुक्त्वा सकलान्कामान् शिवसायुज्यमाप्नुयात् ॥ ९॥

etāṃ śivabalopetāṃ rakṣāṃ yaḥ sukṛtī paṭhet |sa bhuktvā sakalānkāmān śivasāyujyamāpnuyāt || 9||

ग्रहभूतपिशाचाद्यास्त्रैलोक्ये विचरन्ति ये ।दूरादाशु पलायन्ते शिवनामाभिरक्षणात् ॥ १० ॥

grahabhūtapiśācādyāstrailokye vicaranti ye |dūrādāśu palāyante śivanāmābhirakṣaṇāt || 10 ||

अभयङ्करनामेदं कवचं पार्वतीपतेः ।भक्त्या बिभर्ति यः कण्ठे तस्य वश्यं जगत्त्रयम् ॥ ११॥

abhayaṅkaranāmedaṃ kavacaṃ pārvatīpateḥ |bhaktyā bibharti yaḥ kaṇṭhe tasya vaśyaṃ jagattrayam || 11||

इमां नारायणः स्वप्ने शिवरक्षां यथाऽऽदिशत् ।प्रातरुत्थाय योगीन्द्रो याज्ञवल्क्यः तथाऽलिखत् ॥ १२॥

imāṃ nārāyaṇaḥ svapne śivarakṣāṃ yathā''diśat |prātarutthāya yogīndro yājñavalkyaḥ tathā'likhat || 12||

इति श्रीयाज्ञवल्क्यप्रोक्तं शिवरक्षास्तोत्रं अथवा अभयङ्करकवचं सम्पूर्णम् ॥

iti śrīyājñavalkyaproktaṃ śivarakṣāstotraṃ athavā abhayaṅkarakavacaṃ sampūrṇam ||