काञ्चीक्षेत्रप्रशस्तिः शिवप्रोक्ता Shivaprokta Kanchikshetraprashastih

(शिवरहस्यान्तर्गते उग्राख्ये)शिवपार्तवतीसंवादेश्रीशिव उवाचदेवि काञ्चीपुरी काचिद्यत्र वेगवती नदी ।तत्र वासमपेक्षन्ते नित्यं ब्रह्मादयः सुराः ॥ १॥

(śivarahasyāntargate ugrākhye)śivapārtavatīsaṃvādeśrīśiva uvācadevi kāñcīpurī kācidyatra vegavatī nadī |tatra vāsamapekṣante nityaṃ brahmādayaḥ surāḥ || 1||

एकाम्रेशा(एकाम्बरा)भिधं लिङ्गं तत्रास्त्येकं मदात्मकम् ।तदर्शनेन पापानि विनश्यन्ति क्षणादिव ॥ २॥

ekāmreśā(ekāmbarā)bhidhaṃ liṅgaṃ tatrāstyekaṃ madātmakam |tadarśanena pāpāni vinaśyanti kṣaṇādiva || 2||

कोटितीर्थाभिधं तीर्थं तत्रास्त्येकमघापहम् ।तत्रैव मज्जनादेव ब्रह्महत्या विमुच्यते ॥ ३॥

koṭitīrthābhidhaṃ tīrthaṃ tatrāstyekamaghāpaham |tatraiva majjanādeva brahmahatyā vimucyate || 3||

तत्र श्राद्धं विधानेन कर्तव्यं पितृमुक्तये ।तर्पणीयाश्च पितरः कोटितीर्थोदकैः शुभैः ॥ ४॥

tatra śrāddhaṃ vidhānena kartavyaṃ pitṛmuktaye |tarpaṇīyāśca pitaraḥ koṭitīrthodakaiḥ śubhaiḥ || 4||

कोटितीर्थे नरः स्नात्वा सम्पूज्यैकाम्बरेश्वरम् ।मुच्यते सर्वथा देवि ब्रह्महत्याऽयुतैरपि ॥ ५॥

koṭitīrthe naraḥ snātvā sampūjyaikāmbareśvaram |mucyate sarvathā devi brahmahatyā'yutairapi || 5||

तत्रैव मामुपाश्रित्य ऋषयो ब्रह्मवादिनः ।वसन्ति बहवस्तेषां सङ्ख्या कर्तुं न शक्यते ॥ ६॥

tatraiva māmupāśritya ṛṣayo brahmavādinaḥ |vasanti bahavasteṣāṃ saṅkhyā kartuṃ na śakyate || 6||

तत्र मां प्रत्यहं विष्णुब्रह्माद्याः सुरसत्तमाः ।कुर्वन्ति पूजनं भक्त्या त्रिकालं सर्वसाधनैः ॥ ७॥

tatra māṃ pratyahaṃ viṣṇubrahmādyāḥ surasattamāḥ |kurvanti pūjanaṃ bhaktyā trikālaṃ sarvasādhanaiḥ || 7||

प्रदोषसमये विष्णुर्मामभ्यर्च्य विधानतः ।सेवां करोति सानन्दं मृदङ्गमभिवादयन् ॥ ८॥

pradoṣasamaye viṣṇurmāmabhyarcya vidhānataḥ |sevāṃ karoti sānandaṃ mṛdaṅgamabhivādayan || 8||

विविधैः कुसुमैर्नूत्नैबिल्वपत्रैश्चतुर्मुखः ।मामभ्यर्च्य ततः सायं तोलान्वादयते मुदा ॥ ९॥

vividhaiḥ kusumairnūtnaibilvapatraiścaturmukhaḥ |māmabhyarcya tataḥ sāyaṃ tolānvādayate mudā || 9||

वाग्देवी वल्लकीं धृत्वा सायमभ्यर्च्य मां शिवम् ।करोति गानममलं गीतशास्त्रविशारदा ॥ १०॥

vāgdevī vallakīṃ dhṛtvā sāyamabhyarcya māṃ śivam |karoti gānamamalaṃ gītaśāstraviśāradā || 10||

इन्द्रः सम्पूज्य मां सायं बिल्वपत्रादिभिर्मुदा ।करोति वैणवं वाद्यं तत्तद्रन्ध्रनिषेवणात् ॥ ११॥

indraḥ sampūjya māṃ sāyaṃ bilvapatrādibhirmudā |karoti vaiṇavaṃ vādyaṃ tattadrandhraniṣevaṇāt || 11||

शची नृत्यं करोत्यग्रे सायमन्वहमादरात् ।रम्भाद्यैरप्सरोभिश्च सहिता मम तुष्टये ॥ १२॥

śacī nṛtyaṃ karotyagre sāyamanvahamādarāt |rambhādyairapsarobhiśca sahitā mama tuṣṭaye || 12||

लक्ष्मीः सायं समभ्यर्च्य स्वर्णवच्चामरद्वयम् ।गृहीत्वा तव पार्श्वस्था भवतीमुपसेवते ॥ १३॥

lakṣmīḥ sāyaṃ samabhyarcya svarṇavaccāmaradvayam |gṛhītvā tava pārśvasthā bhavatīmupasevate || 13||

देवपत्न्यस्तथाऽन्याश्च सायं सम्पूज्य मां शिवम् ।विष्णुब्रह्मादिदेवानां पत्न्यो यास्तास्तु शैलजे ॥ १४॥

devapatnyastathā'nyāśca sāyaṃ sampūjya māṃ śivam |viṣṇubrahmādidevānāṃ patnyo yāstāstu śailaje || 14||

तव दास्यस्तनस्तास्ते सेवां कुर्वन्ति सादरम् ।कामाक्षीरूपमासाद्य त्वया तत्र मनोरमे ॥ १५॥

tava dāsyastanastāste sevāṃ kurvanti sādaram |kāmākṣīrūpamāsādya tvayā tatra manorame || 15||

स्थीयते सततं त्वं तु देवदेवाङ्गनार्चिता ।कुबेरेण पुरा तत्र रत्नस्तम्भविराजितम् ॥ १६॥

sthīyate satataṃ tvaṃ tu devadevāṅganārcitā |kubereṇa purā tatra ratnastambhavirājitam || 16||

शिवस्थानं कृतं रम्यं रत्नगोपुरराजितम् ।पञ्चक्रोशमितं चक्रे (यत्र) हेमप्राकारमुत्तमम् ॥ १७॥

śivasthānaṃ kṛtaṃ ramyaṃ ratnagopurarājitam |pañcakrośamitaṃ cakre (yatra) hemaprākāramuttamam || 17||

चक्रे प्राकारशृङ्गाणि श्रेष्ठरत्नमयानि सः ।स्थीयते तत्र सततं मया रत्नशिवालये ॥ १८॥

cakre prākāraśṛṅgāṇi śreṣṭharatnamayāni saḥ |sthīyate tatra satataṃ mayā ratnaśivālaye || 18||

॥ इति शिवरहस्यान्तर्गते शिवप्रोक्ता काञ्चीक्षेत्रप्रशस्तिः ॥॥ श्रीशिवरहस्यम् । उग्राख्यः सप्तमांशः । अध्यायः २०। ११८॥

|| iti śivarahasyāntargate śivaproktā kāñcīkṣetrapraśastiḥ |||| śrīśivarahasyam | ugrākhyaḥ saptamāṃśaḥ | adhyāyaḥ 20| 118||

– ॥ श्रीशिवरहस्यम् ।उग्राख्यः सप्तमांशः ।अध्यायः २० ।१-१८॥

– || śrīśivarahasyam |ugrākhyaḥ saptamāṃśaḥ |adhyāyaḥ 20 | 1-18||