शिवलिङ्गार्चनोपदेशम् (ऋषिकश्यपप्रोक्तं शिवरहस्यान्तर्गतम्) Rishikashyapaproktam Shivalingarchanopadesham

(शिवरहस्यान्तर्गते भीमाख्ये)कश्यपः (उवाच)बिल्वपत्रैः प्रसूनैर्वा त्रिवारं सकृदेव वा ।मृल्लिङ्गे रसलिङ्गे वा धातुजे नार्मदेऽपि वा ॥ २०॥

(śivarahasyāntargate bhīmākhye)kaśyapaḥ (uvāca)bilvapatraiḥ prasūnairvā trivāraṃ sakṛdeva vā |mṛlliṅge rasaliṅge vā dhātuje nārmade'pi vā || 20||

रत्नलिङ्गेषु वा सम्यक्स्थावरे वा चरेऽपि वा ।स्वायम्भुवे वा दैवे वाप्यर्षे वा मानवैः कृते ॥ २१॥

ratnaliṅgeṣu vā samyaksthāvare vā care'pi vā |svāyambhuve vā daive vāpyarṣe vā mānavaiḥ kṛte || 21||

उत्तरोत्तरतोत्कर्षात्पूजनीयः सदाशिवः ।लिङ्गेष्वेतेषु भक्त्यैव नियमाच्छङ्करार्चकः ॥ २२॥

uttarottaratotkarṣātpūjanīyaḥ sadāśivaḥ |liṅgeṣveteṣu bhaktyaiva niyamācchaṅkarārcakaḥ || 22||

स्फाटिके पूजितः शम्भुः प्रददाति च वाञ्छितम् ।लिङ्गार्चनेन सकलं वाञ्छितं प्राप्यते नृभिः ॥ २३॥

sphāṭike pūjitaḥ śambhuḥ pradadāti ca vāñchitam |liṅgārcanena sakalaṃ vāñchitaṃ prāpyate nṛbhiḥ || 23||

सर्वे लिङ्गार्चनेनैव प्राप्यन्ते हि मनोरथाः ।शिवस्य लिङ्गपूजैव मुक्तिदा श्रुतिदर्शिता ॥ २४॥

sarve liṅgārcanenaiva prāpyante hi manorathāḥ |śivasya liṅgapūjaiva muktidā śrutidarśitā || 24||

आमनन्त्यण्डजश्रेष्ठ जाबालश्रुतयो ध्रुवम् ।शिवलिङ्गमनभ्यर्च्य न पेयं जलमप्यणु ॥ २५॥

āmanantyaṇḍajaśreṣṭha jābālaśrutayo dhruvam |śivaliṅgamanabhyarcya na peyaṃ jalamapyaṇu || 25||

फलं वा यद्यदा भोज्यमन्नं वा शङ्करार्पितम् ।भुञ्जीयाच्छ्रीमहेशाय यन्निवेदितमुत्तमम् ॥ २६॥

phalaṃ vā yadyadā bhojyamannaṃ vā śaṅkarārpitam |bhuñjīyācchrīmaheśāya yanniveditamuttamam || 26||

अनभ्यर्च्य महादेवं योऽश्नीयत्फलमम्बु वा ।स पापी नरके घोरे तिष्ठत्याभूतसम्प्लवम् ॥ २७॥

anabhyarcya mahādevaṃ yo'śnīyatphalamambu vā |sa pāpī narake ghore tiṣṭhatyābhūtasamplavam || 27||

यद्यदह्नाच्चरेत्पापं यच्च तापत्रयात्मकम् ।तदह्नात्प्रतिमुच्येत शिवलिङ्गार्चनेन हि ॥ २८॥

yadyadahnāccaretpāpaṃ yacca tāpatrayātmakam |tadahnātpratimucyeta śivaliṅgārcanena hi || 28||

प्रदोषे यः शिवं दृष्ट्वा परिपूज्य स मुक्तिभाक् ।(प्रदोषे यः शिवं दृष्ट्वा पूजयेत्स विमुक्तिभाक् ।)द्वित्रैर्वा बिल्वपत्रैर्वा नीरैर्वापि महेश्वरम् ॥ २९॥

pradoṣe yaḥ śivaṃ dṛṣṭvā paripūjya sa muktibhāk |(pradoṣe yaḥ śivaṃ dṛṣṭvā pūjayetsa vimuktibhāk |)dvitrairvā bilvapatrairvā nīrairvāpi maheśvaram || 29||

सोमवारे तथा सायं शतजन्मघनाशनम् ।कालाष्टम्यां कालकालं सायमभ्यर्च्य शङ्करम् ॥ ३०॥

somavāre tathā sāyaṃ śatajanmaghanāśanam |kālāṣṭamyāṃ kālakālaṃ sāyamabhyarcya śaṅkaram || 30||

भूतायां वै भूतनाथं सायमभ्यर्च्य शङ्करम् ।नैवेद्यं निशि भुक्त्वैव सर्वथा गणपो भवेत् ॥ ३१॥

bhūtāyāṃ vai bhūtanāthaṃ sāyamabhyarcya śaṅkaram |naivedyaṃ niśi bhuktvaiva sarvathā gaṇapo bhavet || 31||

संसाररोगनिर्मुक्तो मुक्तये कल्पते नरः ।तथा पर्वस्वपि शिवं ग्रहणे सोमसूर्ययोः ॥ ३२॥

saṃsāraroganirmukto muktaye kalpate naraḥ |tathā parvasvapi śivaṃ grahaṇe somasūryayoḥ || 32||

समभ्यर्च्यामरश्रेष्ठं सर्वकालेष्वपि ध्रुवम् ।यावज्जीवं समभ्यर्च्य जीवन्मुक्तो भवेन्नरः ॥ ३३॥

samabhyarcyāmaraśreṣṭhaṃ sarvakāleṣvapi dhruvam |yāvajjīvaṃ samabhyarcya jīvanmukto bhavennaraḥ || 33||

प्रमादादेकदा त्यक्त्वा शिवलिङ्गार्चनं सुत ।वापयित्वा शिरः केशान् प्राश्य गव्यादिपञ्चकम् ॥ ३४॥

pramādādekadā tyaktvā śivaliṅgārcanaṃ suta |vāpayitvā śiraḥ keśān prāśya gavyādipañcakam || 34||

रुद्रैर्होमं हुनेदेवं चरुणा सर्पिषा द्विजः ।स्वसूत्रोक्तेन मार्गेण कृत्वा पूर्वापरक्रमम् ॥ ३५॥

rudrairhomaṃ hunedevaṃ caruṇā sarpiṣā dvijaḥ |svasūtroktena mārgeṇa kṛtvā pūrvāparakramam || 35||

शाम्भवं भोजयित्वैकमुपोष्याभ्यर्च्य शूलिनम् ।पूर्वाहारपरहे चैव कृत्वा पूजेदयं पुनः ॥ ३६॥

śāmbhavaṃ bhojayitvaikamupoṣyābhyarcya śūlinam |pūrvāhāraparahe caiva kṛtvā pūjedayaṃ punaḥ || 36||

भुञ्जीत शाम्भवैः सार्धं नैवेद्यं यच्छिवार्पितम् ।तत्पापमुक्तो भवति इत्याह परमेश्वरः ॥ ३७॥

bhuñjīta śāmbhavaiḥ sārdhaṃ naivedyaṃ yacchivārpitam |tatpāpamukto bhavati ityāha parameśvaraḥ || 37||

तस्मादतन्द्रितो लिङ्गे पूजनीयः सदाशिवः ।शिवप्रसादजनकं शिवलिङ्गस्य पूजनम् ॥ ४२॥

tasmādatandrito liṅge pūjanīyaḥ sadāśivaḥ |śivaprasādajanakaṃ śivaliṅgasya pūjanam || 42||

भुक्तिदं मुक्तिदं चापि ज्ञानदं सर्वदा नृणाम् ।अवश्यं तद् द्विजातीनामित्याह शशिशेखरः ॥ ४३॥

bhuktidaṃ muktidaṃ cāpi jñānadaṃ sarvadā nṛṇām |avaśyaṃ tad dvijātīnāmityāha śaśiśekharaḥ || 43||

तस्मात्सम्पूजयेत्साम्बं लिङ्मेव पिनाकिनः ।शिवलिङ्गार्चनेनैव शिवस्तुष्यति नान्यथा ॥ ४८॥

tasmātsampūjayetsāmbaṃ liṅmeva pinākinaḥ |śivaliṅgārcanenaiva śivastuṣyati nānyathā || 48||

॥ इति शिवरहस्यान्तर्गते ऋषिकश्यपप्रोक्तं शिवलिङ्गार्चनोपदेशं सम्पूर्णम् ॥॥ श्रीशिवरहस्यम् । भीमाख्यः अष्टमांशः । अध्यायः ८ । वावृत्तश्लोकाः ॥– ॥ श्रीशिवरहस्यम् । भीमाख्यः अष्टमांशः । अध्यायः ८ । वावृत्तश्लोकाः ॥

|| iti śivarahasyāntargate ṛṣikaśyapaproktaṃ śivaliṅgārcanopadeśaṃ sampūrṇam |||| śrīśivarahasyam | bhīmākhyaḥ aṣṭamāṃśaḥ | adhyāyaḥ 8 | vāvṛttaślokāḥ ||– || śrīśivarahasyam | bhīmākhyaḥ aṣṭamāṃśaḥ | adhyāyaḥ 8 | vāvṛttaślokāḥ ||