शिवार्चनोपदेशम् प्रतिमासशिवरात्र्यां Pratimasashivaratryam Shivarchanopadesham

(शिवरहस्यान्तर्गते महादेवाख्ये)स्कन्द उवाच ।प्रतिमासं कृष्णपक्षे शिवरात्रिं च सत्तम ।पूजयेदविमुक्तेशमन्यक्षेत्रेऽपि वा शिवम् ॥ ३६॥

(śivarahasyāntargate mahādevākhye)skanda uvāca |pratimāsaṃ kṛṣṇapakṣe śivarātriṃ ca sattama |pūjayedavimukteśamanyakṣetre'pi vā śivam || 36||

माघ्यां कृष्णचतुर्दश्यां पूजयेदिन्दुशेखरम् ।चैत्रे त्रिणेत्रनामानं पूजयेत्परमेश्वरम् ॥ ३७॥

māghyāṃ kṛṣṇacaturdaśyāṃ pūjayedinduśekharam |caitre triṇetranāmānaṃ pūjayetparameśvaram || 37||

द्वादशाहक्रतुफलं लभते सोऽचिरान्मुने ।वैशाखे शिवनामानं पूज्य रात्रौ कुशोदकम् ॥ ३८॥

dvādaśāhakratuphalaṃ labhate so'cirānmune |vaiśākhe śivanāmānaṃ pūjya rātrau kuśodakam || 38||

पीत्वा पुरुषमेघस्य फलमष्टगुणं लभेत् ।ज्येष्ठे पशुपतिं पूज्य गवां शृङ्गोदकं पिबेत् ॥ ३९॥

pītvā puruṣameghasya phalamaṣṭaguṇaṃ labhet |jyeṣṭhe paśupatiṃ pūjya gavāṃ śṛṅgodakaṃ pibet || 39||

गवां कोटिप्रदानस्य यत्फलं तदवाप्नुयात् ।आषाढे चोग्रनामानं दृष्ट्वा प्राश्य च गोमयम् ॥ ४०॥

gavāṃ koṭipradānasya yatphalaṃ tadavāpnuyāt |āṣāḍhe cogranāmānaṃ dṛṣṭvā prāśya ca gomayam || 40||

सौत्रामण्ययुतस्यैव स फलं प्राप्नुयान्नरः ।श्रावणे शर्वनामानं पूज्य पर्णानि भक्षयेत् ॥ ४१॥

sautrāmaṇyayutasyaiva sa phalaṃ prāpnuyānnaraḥ |śrāvaṇe śarvanāmānaṃ pūjya parṇāni bhakṣayet || 41||

वर्षकोटिशतं साग्रं सूर्यलोके महीयते ।मासे भाद्रपदेऽष्टम्यां त्र्यम्बकं नाम पूजयेत् ॥ ४२॥

varṣakoṭiśataṃ sāgraṃ sūryaloke mahīyate |māse bhādrapade'ṣṭamyāṃ tryambakaṃ nāma pūjayet || 42||

प्राश्य बिल्वफलं पक्वं सत्रयागफलं लभेत् ।मासे चाश्वयुजेऽष्टम्यामीश्वरं नाम पूजयेत् ॥ ४३॥

prāśya bilvaphalaṃ pakvaṃ satrayāgaphalaṃ labhet |māse cāśvayuje'ṣṭamyāmīśvaraṃ nāma pūjayet || 43||

पौर्णम्यामाश्वयुज्यां च अश्विन्यर्क्षे प्रदोषके ।अन्धसां राशिभिर्लिङ्गं छादयेद्याममात्रकम् ॥ ४४॥

paurṇamyāmāśvayujyāṃ ca aśvinyarkṣe pradoṣake |andhasāṃ rāśibhirliṅgaṃ chādayedyāmamātrakam || 44||

सिक्थे सिक्थेऽश्वमेधस्य फलमाप्नोति मानवः ।तण्डुलोदकमापीय तस्मिन् मासि शिवार्चकः ॥ ४५॥

sikthe sikthe'śvamedhasya phalamāpnoti mānavaḥ |taṇḍulodakamāpīya tasmin māsi śivārcakaḥ || 45||

पौण्डरीकाष्टकस्यैवं फलं च सकलं भवेत् ।कार्तिके रुद्रनामानं पूज्य पीत्वा कुशोदकम् ॥ ४६॥

pauṇḍarīkāṣṭakasyaivaṃ phalaṃ ca sakalaṃ bhavet |kārtike rudranāmānaṃ pūjya pītvā kuśodakam || 46||

अग्निष्टोमादिदशकं फलं प्राप्य विमुच्यते ।मार्गशीर्षे महादेवमुग्रनाम्ना प्रपूजयेत् ॥ ४७॥

agniṣṭomādidaśakaṃ phalaṃ prāpya vimucyate |mārgaśīrṣe mahādevamugranāmnā prapūjayet || 47||

स उक्थ्यदशकस्यैव लभेत फलमम्बुपः ।पुष्यमासे तु सम्प्राप्ते यः कुर्यान्नक्तभोजनम् ॥ ४८॥

sa ukthyadaśakasyaiva labheta phalamambupaḥ |puṣyamāse tu samprāpte yaḥ kuryānnaktabhojanam || 48||

शर्वार्चनरतो धीमान् फलमूलेन वर्तयेत् ।अप्तोर्यामायुतफलं प्राप्नोत्येव विशेषतः ॥ ४९॥

śarvārcanarato dhīmān phalamūlena vartayet |aptoryāmāyutaphalaṃ prāpnotyeva viśeṣataḥ || 49||

माघमासे तु सम्प्राप्ते यः कुर्यान्नक्तभोजनम् ।स षोडशी(शि)शतफलं प्रोप्नोत्यमरपूजितः ॥ ५०॥

māghamāse tu samprāpte yaḥ kuryānnaktabhojanam |sa ṣoḍaśī(śi)śataphalaṃ propnotyamarapūjitaḥ || 50||

सम्प्राप्ते फाल्गुने मासि नक्ताशी शिवपूजकः ।श्यामाकक्षीरनीवारैर्जितक्रोधो जितेन्द्रियः ॥ ५१॥

samprāpte phālgune māsi naktāśī śivapūjakaḥ |śyāmākakṣīranīvārairjitakrodho jitendriyaḥ || 51||

अत्यग्निष्टोमदशकफलमेष समश्नुते ।सोपवासश्चतुर्दश्यां भवेदुभयपक्षयोः ॥ ५२॥

atyagniṣṭomadaśakaphalameṣa samaśnute |sopavāsaścaturdaśyāṃ bhavedubhayapakṣayoḥ || 52||

शिवाय पूर्णिमायां तु यो दद्याद्घृतकम्बलम् ।माघ्यामघायुतैर्मुक्तो भवेदेव महामुने ॥ ५३॥

śivāya pūrṇimāyāṃ tu yo dadyādghṛtakambalam |māghyāmaghāyutairmukto bhavedeva mahāmune || 53||

मासद्वादशकं ह्येवं पूजयेच्छशिशेखरम् ।पर्वान्ते भोजयेद्विप्रान् शिवभक्तान् जितेन्द्रियान् ॥ ५४॥

māsadvādaśakaṃ hyevaṃ pūjayecchaśiśekharam |parvānte bhojayedviprān śivabhaktān jitendriyān || 54||

पायसं मधुयुक्तं घृतेन च परिप्लुतम् ।भक्त्या हिरण्यवासांसि भक्तेभ्यो यो निवेदयेत् ॥ ५५॥

pāyasaṃ madhuyuktaṃ ghṛtena ca pariplutam |bhaktyā hiraṇyavāsāṃsi bhaktebhyo yo nivedayet || 55||

वर्षमेकं चरेदेवं नैरन्तर्येण यो नरः ।सर्वयज्ञफलं लब्ध्वा शिवक्षेत्रे विमुच्यते ॥ ५६॥

varṣamekaṃ caredevaṃ nairantaryeṇa yo naraḥ |sarvayajñaphalaṃ labdhvā śivakṣetre vimucyate || 56||

अविमुक्ते तु नियतमेवं व्रतवरं चरेत् ।जितेन्द्रियः सत्यवादी वित्तशाठ्यविवर्जितः ॥ ५७॥

avimukte tu niyatamevaṃ vratavaraṃ caret |jitendriyaḥ satyavādī vittaśāṭhyavivarjitaḥ || 57||

देहान्ते शिवसारूप्यं लभेत्पुण्यफलं शृणु ।सूर्यकोटिप्रतीकाशैर्विमानैः सार्वगामिकैः ॥ ५८॥

dehānte śivasārūpyaṃ labhetpuṇyaphalaṃ śṛṇu |sūryakoṭipratīkāśairvimānaiḥ sārvagāmikaiḥ || 58||

रुद्रकन्यासमाकीर्णैर्महावृषभसंयुतैः ।सङ्गीतनृत्तवाद्याद्यैरप्सरोगणसेवितैः ॥ ५९॥

rudrakanyāsamākīrṇairmahāvṛṣabhasaṃyutaiḥ |saṅgītanṛttavādyādyairapsarogaṇasevitaiḥ || 59||

चामरैर्धूयमानश्च स्तूयमानः सुरासुरैः ।गत्वा शिवपुरं दिव्यं वसेदाभूतसम्प्लवम् ॥ ६०॥

cāmarairdhūyamānaśca stūyamānaḥ surāsuraiḥ |gatvā śivapuraṃ divyaṃ vasedābhūtasamplavam || 60||

॥ इति शिवरहस्यान्तर्गते स्कन्दप्रोक्तं प्रतिमासशिवरात्र्यां शिवार्चनोपदेशं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः २६ । ३६६०॥

|| iti śivarahasyāntargate skandaproktaṃ pratimāsaśivarātryāṃ śivārcanopadeśaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 26 | 3660||

– ॥ श्रीशिवरहस्यम् ।महादेवाख्यः एकादशमांशः ।अध्यायः २६ ।३६-६०॥

– || śrīśivarahasyam |mahādevākhyaḥ ekādaśamāṃśaḥ |adhyāyaḥ 26 | 36-60||