प्रदोषस्तोत्रम् Pradoshastotram

श्री गणेशाय नमः ।जय देव जगन्नाथ जय शङ्कर शाश्वत ।जय सर्वसुराध्यक्ष जय सर्वसुरार्चित ॥ १॥

śrī gaṇeśāya namaḥ |jaya deva jagannātha jaya śaṅkara śāśvata |jaya sarvasurādhyakṣa jaya sarvasurārcita || 1||

जय सर्वगुणातीत जय सर्ववरप्रद ।जय नित्य निराधार जय विश्वम्भराव्यय ॥ २॥

jaya sarvaguṇātīta jaya sarvavaraprada |jaya nitya nirādhāra jaya viśvambharāvyaya || 2||

जय विश्वैकवन्द्येश जय नागेन्द्रभूषण ।जय गौरीपते शम्भो जय चन्द्रार्धशेखर ॥ ३॥

jaya viśvaikavandyeśa jaya nāgendrabhūṣaṇa |jaya gaurīpate śambho jaya candrārdhaśekhara || 3||

जय कोट्यर्कसङ्काश जयानन्तगुणाश्रय ।जय भद्र विरूपाक्ष जयाचिन्त्य निरञ्जन ॥ ४॥

jaya koṭyarkasaṅkāśa jayānantaguṇāśraya |jaya bhadra virūpākṣa jayācintya nirañjana || 4||

जय नाथ कृपासिन्धो जय भक्तार्तिभञ्जन ।जय दुस्तरसंसारसागरोत्तारण प्रभो ॥ ५॥

jaya nātha kṛpāsindho jaya bhaktārtibhañjana |jaya dustarasaṃsārasāgarottāraṇa prabho || 5||

प्रसीद मे महादेव संसारार्तस्य खिद्यतः ।सर्वपापक्षयं कृत्वा रक्ष मां परमेश्वर ॥ ६॥

prasīda me mahādeva saṃsārārtasya khidyataḥ |sarvapāpakṣayaṃ kṛtvā rakṣa māṃ parameśvara || 6||

महादारिद्र्यमग्नस्य महापापहतस्य च ।महाशोकनिविष्टस्य महारोगातुरस्य च ॥ ७॥

mahādāridryamagnasya mahāpāpahatasya ca |mahāśokaniviṣṭasya mahārogāturasya ca || 7||

ऋणभारपरीतस्य दह्यमानस्य कर्मभिः ।ग्रहैः प्रपीड्यमानस्य प्रसीद मम शङ्कर ॥ ८॥

ṛṇabhāraparītasya dahyamānasya karmabhiḥ |grahaiḥ prapīḍyamānasya prasīda mama śaṅkara || 8||

दरिद्रः प्रार्थयेद्देवं प्रदोषे गिरिजापतिम् ।अर्थाढ्यो वाऽथ राजा वा प्रार्थयेद्देवमीश्वरम् ॥ ९॥

daridraḥ prārthayeddevaṃ pradoṣe girijāpatim |arthāḍhyo vā'tha rājā vā prārthayeddevamīśvaram || 9||

दीर्घमायुः सदारोग्यं कोशवृद्धिर्बलोन्नतिः ।ममास्तु नित्यमानन्दः प्रसादात्तव शङ्कर ॥ १०॥

dīrghamāyuḥ sadārogyaṃ kośavṛddhirbalonnatiḥ |mamāstu nityamānandaḥ prasādāttava śaṅkara || 10||

शत्रवः संक्षयं यान्तु प्रसीदन्तु मम प्रजाः ।नश्यन्तु दस्यवो राष्ट्रे जनाः सन्तु निरापदः ॥ ११॥

śatravaḥ saṃkṣayaṃ yāntu prasīdantu mama prajāḥ |naśyantu dasyavo rāṣṭre janāḥ santu nirāpadaḥ || 11||

दुर्भिक्षमरिसन्तापाः शमं यान्तु महीतले ।सर्वसस्यसमृद्धिश्च भूयात्सुखमया दिशः ॥ १२॥

durbhikṣamarisantāpāḥ śamaṃ yāntu mahītale |sarvasasyasamṛddhiśca bhūyātsukhamayā diśaḥ || 12||

एवमाराधयेद्देवं पूजान्ते गिरिजापतिम् ।ब्राह्मणान्भोजयेत् पश्चाद्दक्षिणाभिश्च पूजयेत् ॥ १३॥

evamārādhayeddevaṃ pūjānte girijāpatim |brāhmaṇānbhojayet paścāddakṣiṇābhiśca pūjayet || 13||

सर्वपापक्षयकरी सर्वरोगनिवारणी ।शिवपूजा मयाऽऽख्याता सर्वाभीष्टफलप्रदा ॥ १४॥

sarvapāpakṣayakarī sarvaroganivāraṇī |śivapūjā mayā''khyātā sarvābhīṣṭaphalapradā || 14||

॥ इति प्रदोषस्तोत्रं सम्पूर्णम् ॥

|| iti pradoṣastotraṃ sampūrṇam ||