शिवस्तोत्रम् (पितामहकृतं २ लिङ्गपुराणान्तर्गतम् प्रसीद देवदेवेश प्रसीद परमेश्वर) Pitamahakritam 2 Shiva Stotram

श्रीपितामह उवाच ।प्रसीद देवदेवेश प्रसीद परमेश्वर ।प्रसीद जगतां नाथ प्रसीदानन्ददाव्यय ॥ १२२॥

śrīpitāmaha uvāca |prasīda devadeveśa prasīda parameśvara |prasīda jagatāṃ nātha prasīdānandadāvyaya || 122||

पञ्चास्य रुद्ररुद्राय पञ्चाशत्कोटिमूर्तये ।आत्मत्रयोपविष्टाय विद्यातत्त्वाय ते नमः ॥ १२३॥

pañcāsya rudrarudrāya pañcāśatkoṭimūrtaye |ātmatrayopaviṣṭāya vidyātattvāya te namaḥ || 123||

शिवाय शिवतत्त्वाय अघोराय नमो नमः ।अघोराष्टकतत्त्वाय द्वादशात्मस्वरूपिणे ॥ १२४॥

śivāya śivatattvāya aghorāya namo namaḥ |aghorāṣṭakatattvāya dvādaśātmasvarūpiṇe || 124||

विद्युत्कोटिप्रतीकाशमष्टकाशं सुशोभनम् ।रूपमास्थाय लोकेऽस्मिन् संस्थिताय शिवात्मने ॥ १२५॥

vidyutkoṭipratīkāśamaṣṭakāśaṃ suśobhanam |rūpamāsthāya loke'smin saṃsthitāya śivātmane || 125||

अग्निवर्णाय रौद्राय अम्बिकार्धशरीरिणे ।धवलश्यामरक्तानां मुक्तिदायामराय च ॥ १२६॥

agnivarṇāya raudrāya ambikārdhaśarīriṇe |dhavalaśyāmaraktānāṃ muktidāyāmarāya ca || 126||

ज्येष्ठाय रुद्ररूपाय सोमाय वरदाय च ।त्रिलोकाय त्रिदेवाय वषट्काराय वै नमः ॥ १२७॥

jyeṣṭhāya rudrarūpāya somāya varadāya ca |trilokāya tridevāya vaṣaṭkārāya vai namaḥ || 127||

मध्ये गगनरूपाय गगनस्थाय ते नमः ।अष्टक्षेत्राष्टरूपाय अष्टतत्त्वाय ते नमः ॥ १२८॥

madhye gaganarūpāya gaganasthāya te namaḥ |aṣṭakṣetrāṣṭarūpāya aṣṭatattvāya te namaḥ || 128||

चतुर्धा च चतुर्धा च चतुर्धा संस्थिताय च ।पञ्चधा पञ्चधा चैव पञ्चमन्त्रशरीरिणे ॥ १२९॥

caturdhā ca caturdhā ca caturdhā saṃsthitāya ca |pañcadhā pañcadhā caiva pañcamantraśarīriṇe || 129||

चतुःषष्टिप्रकाराय अकाराय नमो नमः ।द्वात्रिंशत्तत्त्वरूपाय उकाराय नमो नमः ॥ १३०॥

catuḥṣaṣṭiprakārāya akārāya namo namaḥ |dvātriṃśattattvarūpāya ukārāya namo namaḥ || 130||

षोडशात्मस्वरूपाय मकाराय नमो नमः ।अष्टधाऽऽत्मस्वरूपाय अर्धमात्राऽऽत्मने नमः ॥ १३१॥

ṣoḍaśātmasvarūpāya makārāya namo namaḥ |aṣṭadhā''tmasvarūpāya ardhamātrā''tmane namaḥ || 131||

ॐ काराय नमस्तुभ्यं चतुर्धा संस्थिताय च ।गगनेशाय सहस्रशिरसे स्वर्गेशाय नमो नमः ॥ १३२॥

oṃ kārāya namastubhyaṃ caturdhā saṃsthitāya ca |gaganeśāya sahasraśirase svargeśāya namo namaḥ || 132||

सप्तलोकाय पातालनरकेशाय वै नमः ।अष्टक्षेत्राष्टरूपाय परात्परतराय च ॥ १३३॥

saptalokāya pātālanarakeśāya vai namaḥ |aṣṭakṣetrāṣṭarūpāya parātparatarāya ca || 133||

सहस्रशिरसे तुभ्यं सहस्राय च ते नमः ।सहस्रपादयुक्ताय शर्वाय परमेष्ठिने ॥ १३४॥

sahasraśirase tubhyaṃ sahasrāya ca te namaḥ |sahasrapādayuktāya śarvāya parameṣṭhine || 134||

नवात्मतत्त्वरूपाय नवाष्टात्मात्मशक्तये ।पुनरष्टप्रकाशाय तथाष्टाष्टकमूर्तये ॥ १३५॥

navātmatattvarūpāya navāṣṭātmātmaśaktaye |punaraṣṭaprakāśāya tathāṣṭāṣṭakamūrtaye || 135||

चतुःषष्ट्यात्मतत्त्वाय पुनरष्टविधाय ते ।गुणाष्टकवृतायैव गुणिने निर्गुणाय ते ॥ १३६॥

catuḥṣaṣṭyātmatattvāya punaraṣṭavidhāya te |guṇāṣṭakavṛtāyaiva guṇine nirguṇāya te || 136||

मूलस्ताय नमस्तुभ्यं शास्वतस्थानवासिने ।नाभिमण्डलसंस्थाय हृदि निस्स्वनकारिणे ॥ १३७॥

mūlastāya namastubhyaṃ śāsvatasthānavāsine |nābhimaṇḍalasaṃsthāya hṛdi nissvanakāriṇe || 137||

कन्धरे च स्थितायैव तालुरन्ध्रस्थिताय च ।भ्रूमध्ये संस्थितायैव नादमध्ये स्थिताय च ॥ १३८॥

kandhare ca sthitāyaiva tālurandhrasthitāya ca |bhrūmadhye saṃsthitāyaiva nādamadhye sthitāya ca || 138||

चन्द्रबिम्बस्थितायैव शिवाय शिवरूपिणे ।वह्निसोमार्करूपाय षट्त्रिंशच्छक्तिरूपिणे ॥ १३९॥

candrabimbasthitāyaiva śivāya śivarūpiṇe |vahnisomārkarūpāya ṣaṭtriṃśacchaktirūpiṇe || 139||

त्रिधा संवृत्य लोकान्वै प्रसुप्तभुजगात्मने ।त्रिप्रकारं स्तितायैव त्रेताग्निमयरूपिणे ॥ १४०॥

tridhā saṃvṛtya lokānvai prasuptabhujagātmane |triprakāraṃ stitāyaiva tretāgnimayarūpiṇe || 140||

सदाशिवाय शान्ताय महेशाय पिनाकिने ।सर्वज्ञाय शरण्याय सद्योजाताय वै नमः ॥ १४१॥

sadāśivāya śāntāya maheśāya pinākine |sarvajñāya śaraṇyāya sadyojātāya vai namaḥ || 141||

अघोराय नमस्तुभ्यं वामदेवाय ते नमः ।तत्पुरुषाय नमोऽस्तु ईशानाय नमो नमः ॥ १४२॥

aghorāya namastubhyaṃ vāmadevāya te namaḥ |tatpuruṣāya namo'stu īśānāya namo namaḥ || 142||

नमस्त्रिंशत्प्रकाशाय शान्तातीताय वै नमः ।अनन्तेशाय सूक्ष्माय उत्तमाय नमोऽस्तु ते ॥ १४३॥

namastriṃśatprakāśāya śāntātītāya vai namaḥ |ananteśāya sūkṣmāya uttamāya namo'stu te || 143||

एकाक्षाय नमस्तुभ्यमेकरुद्राय ते नमः ।नमस्त्रिमूर्तये तुभ्यं श्रीकण्ठाय शिखण्डिने ॥ १४४॥

ekākṣāya namastubhyamekarudrāya te namaḥ |namastrimūrtaye tubhyaṃ śrīkaṇṭhāya śikhaṇḍine || 144||

अनन्तासनसंस्थाय अनन्तायान्तकारिणे ।विमलाय विशालाय विमलाङ्गाय ते नमः ॥ १४५॥

anantāsanasaṃsthāya anantāyāntakāriṇe |vimalāya viśālāya vimalāṅgāya te namaḥ || 145||

विमलासनसंस्थाय विमलार्थार्थरूपिणे ।योगपीठान्तरस्थाय योगिने योगदायिने ॥ १४६॥

vimalāsanasaṃsthāya vimalārthārtharūpiṇe |yogapīṭhāntarasthāya yogine yogadāyine || 146||

योगिनां हृदि संस्थाय सदा नीवारशूकवत् ।प्रत्याहाराय ते नित्यं प्रत्याहाररताय ते ॥ १४७॥

yogināṃ hṛdi saṃsthāya sadā nīvāraśūkavat |pratyāhārāya te nityaṃ pratyāhāraratāya te || 147||

प्रत्याहाररतानां च प्रतिस्थानस्थिताय च ।धारणायै नमस्तुभ्यं धारणाभिरताय ते ॥ १४८॥

pratyāhāraratānāṃ ca pratisthānasthitāya ca |dhāraṇāyai namastubhyaṃ dhāraṇābhiratāya te || 148||

धारणाभ्यासयुक्तानां पुरस्तात्संस्थिताय च ।ध्यानाय ध्यानरूपाय ध्यानगम्याय ते नमः ॥ १४९॥

dhāraṇābhyāsayuktānāṃ purastātsaṃsthitāya ca |dhyānāya dhyānarūpāya dhyānagamyāya te namaḥ || 149||

ध्येयाय ध्येयगम्याय ध्येयध्यानाय ते नमः ।ध्येयानामपि ध्येयाय नमो ध्येयतमाय ते ॥ १५०॥

dhyeyāya dhyeyagamyāya dhyeyadhyānāya te namaḥ |dhyeyānāmapi dhyeyāya namo dhyeyatamāya te || 150||

समाधानाभिगम्याय समाधानाय ते नमः ।समाधानरतानां तु निर्विकल्पार्थरूपिणे ॥ १५१॥

samādhānābhigamyāya samādhānāya te namaḥ |samādhānaratānāṃ tu nirvikalpārtharūpiṇe || 151||

दग्ध्वोद्धृतं सर्वमिदं त्वयाद्य जगत्त्रयं रुद्र पुरुत्रयं हि ।कस्तोतुमिच्छेत्कथमीदृशं त्वां स्तोष्येह तुष्टाय शिवाय तुभ्यम् ॥ १५२॥

dagdhvoddhṛtaṃ sarvamidaṃ tvayādya jagattrayaṃ rudra purutrayaṃ hi |kastotumicchetkathamīdṛśaṃ tvāṃ stoṣyeha tuṣṭāya śivāya tubhyam || 152||

भक्त्या च तुष्ट्याद्भुतदर्शनाच्च मर्त्या अमर्त्या अपि देवदेव ।एते गणाः सिद्धगणैः प्रणामं कुर्वन्ति देवेश गणेश तुभ्यम् ॥ १५३॥

bhaktyā ca tuṣṭyādbhutadarśanācca martyā amartyā api devadeva |ete gaṇāḥ siddhagaṇaiḥ praṇāmaṃ kurvanti deveśa gaṇeśa tubhyam || 153||

निरीक्षणादेव विभोऽसि दग्धुं पुरत्रयं चैव जगत्त्रयं च ।लीलालसेनाम्बिकया क्षणेन दग्धं किलेषुश्च तदाथ मुक्तः ॥ १५४॥

nirīkṣaṇādeva vibho'si dagdhuṃ puratrayaṃ caiva jagattrayaṃ ca |līlālasenāmbikayā kṣaṇena dagdhaṃ kileṣuśca tadātha muktaḥ || 154||

कृतो रथश्चैषुवरश्च शुभ्रं शरासनं ते त्रिपुरक्षयाय ।अनेकयत्नैश्च मयाथ तुभ्यं फलं न दृष्टं सुरसिद्धसङ्घैः ॥ १५५॥

kṛto rathaścaiṣuvaraśca śubhraṃ śarāsanaṃ te tripurakṣayāya |anekayatnaiśca mayātha tubhyaṃ phalaṃ na dṛṣṭaṃ surasiddhasaṅghaiḥ || 155||

रथो रथी देववरो हरिश्च रुद्रः स्वयं शक्रपितामहौ च ।त्वमेव सर्वे भगवन् कथं तु स्तोष्ये ह्यतोष्यं प्रणिपत्य मूर्ध्ना ॥ १५६॥

ratho rathī devavaro hariśca rudraḥ svayaṃ śakrapitāmahau ca |tvameva sarve bhagavan kathaṃ tu stoṣye hyatoṣyaṃ praṇipatya mūrdhnā || 156||

अनन्तपादस्त्वमनन्तबाहुरनन्तमूर्धान्तकरः शिवश्च ।अनन्तमूर्तिः कथमीदृशं त्वां तेष्ये ह्यतोष्यं कथमीदृशं त्वाम् ॥ १५७॥

anantapādastvamanantabāhuranantamūrdhāntakaraḥ śivaśca |anantamūrtiḥ kathamīdṛśaṃ tvāṃ teṣye hyatoṣyaṃ kathamīdṛśaṃ tvām || 157||

नमो नमः सर्वविदे शिवाय रुद्राय शर्वाय भवाय तुभ्यम् ।स्तूलाय सूक्ष्माय सुसूक्ष्मसूक्ष्मसूक्ष्माय सूक्ष्मार्थविदे विधात्रे ॥ १५८॥

namo namaḥ sarvavide śivāya rudrāya śarvāya bhavāya tubhyam |stūlāya sūkṣmāya susūkṣmasūkṣmasūkṣmāya sūkṣmārthavide vidhātre || 158||

स्रष्ट्रे नमः सर्वसुरासुराणां भर्त्रे च हर्त्रे जगतां विधात्रे ।नेत्रे सुराणामसुरेश्वराणां दात्रे प्रशास्त्रे मम सर्वशास्त्रे ॥ १५९॥

sraṣṭre namaḥ sarvasurāsurāṇāṃ bhartre ca hartre jagatāṃ vidhātre |netre surāṇāmasureśvarāṇāṃ dātre praśāstre mama sarvaśāstre || 159||

वेदान्तवेद्याय सुनिर्मलाय वेदार्थविद्भिः सततं स्तुताय ।वेदात्मरूपाय भवाय तुभ्यमन्ताय मध्याय सुमध्यमाय ॥ १६०॥

vedāntavedyāya sunirmalāya vedārthavidbhiḥ satataṃ stutāya |vedātmarūpāya bhavāya tubhyamantāya madhyāya sumadhyamāya || 160||

आद्यन्तशून्याय च संस्थिताय तथा त्वशून्याय च लिङ्गिने च ।अलिङ्गिने लिङ्गमयाय तुभ्यं लिङ्गाय वेदादिमयाय साक्षात् ॥ १६१॥

ādyantaśūnyāya ca saṃsthitāya tathā tvaśūnyāya ca liṅgine ca |aliṅgine liṅgamayāya tubhyaṃ liṅgāya vedādimayāya sākṣāt || 161||

रुद्राय मूर्धाननिकृन्तनाय ममादिदेवस्य च यज्ञमूर्तेः ।विध्वान्तभङ्गं मम कर्तुमीश दृष्ट्वैव भूमौ करजाग्रकोट्या ॥ १६२॥

rudrāya mūrdhānanikṛntanāya mamādidevasya ca yajñamūrteḥ |vidhvāntabhaṅgaṃ mama kartumīśa dṛṣṭvaiva bhūmau karajāgrakoṭyā || 162||

अहो विचित्रं तव देवदेव विचेष्टितं सर्वसुरासुरेश ।देहीव देवैः सह देवकार्यं करिष्यसे निर्गुणरूपतत्त्व ॥ १६३॥

aho vicitraṃ tava devadeva viceṣṭitaṃ sarvasurāsureśa |dehīva devaiḥ saha devakāryaṃ kariṣyase nirguṇarūpatattva || 163||

एकं स्थूलं सूक्ष्ममेकं सुसूक्ष्मं मूर्तामूर्तं मूर्तमेकं ह्यमूर्तम् ।एकं दृष्टं वाङ्मयं चैकमीशं ध्येयं चैकं तत्त्वमत्राद्भुतं ते ॥ १६४॥

ekaṃ sthūlaṃ sūkṣmamekaṃ susūkṣmaṃ mūrtāmūrtaṃ mūrtamekaṃ hyamūrtam |ekaṃ dṛṣṭaṃ vāṅmayaṃ caikamīśaṃ dhyeyaṃ caikaṃ tattvamatrādbhutaṃ te || 164||

स्वप्ने दृष्टं यत्पदार्थं ह्यलक्ष्यं दृष्टं नूनं भाति मन्ये न चापि ।मूर्तिर्नो वै देवमीशान देवैर्लक्ष्या यत्नैरप्यलक्ष्यं कथं तु ॥ १६५॥

svapne dṛṣṭaṃ yatpadārthaṃ hyalakṣyaṃ dṛṣṭaṃ nūnaṃ bhāti manye na cāpi |mūrtirno vai devamīśāna devairlakṣyā yatnairapyalakṣyaṃ kathaṃ tu || 165||

दिव्यः क्व देवेश भवत्प्रभावो वयं क्व भक्तिः क्व च ते स्तुतिश्च ।तथापि भक्त्या विलपन्तमीश पितामहं मां भगवन्क्षमस्व ॥ १६६॥

divyaḥ kva deveśa bhavatprabhāvo vayaṃ kva bhaktiḥ kva ca te stutiśca |tathāpi bhaktyā vilapantamīśa pitāmahaṃ māṃ bhagavankṣamasva || 166||

सूत उवाच ।य इमं शृणुयाद्द्विजोत्तमा भुवि देवं प्रणिपत्य वा पठेत् ।स च मुञ्चति पापबन्धनं भवभक्त्या पुरशासितुः स्तवम् ॥ १६७॥

sūta uvāca |ya imaṃ śṛṇuyāddvijottamā bhuvi devaṃ praṇipatya vā paṭhet |sa ca muñcati pāpabandhanaṃ bhavabhaktyā puraśāsituḥ stavam || 167||

इति श्रीलिङ्गमहापुराणे पूर्वभागे द्विसप्ततितमाध्यायान्तर्गतंपितामहकृतं शिवस्तोत्रं समाप्तम् ।लिङ्गपुराण । पूर्वभाग । अध्याय ७२/१२२१६७॥लिन्गपुराण । पूर्वभाग । अध्याय ७२/१२२-१६७॥

iti śrīliṅgamahāpurāṇe pūrvabhāge dvisaptatitamādhyāyāntargataṃpitāmahakṛtaṃ śivastotraṃ samāptam |liṅgapurāṇa | pūrvabhāga | adhyāya 72/122167||lingapurāṇa | pūrvabhāga | adhyāya 72/122-167||