नार्मदलिङ्ग एवं बाणलिङ्गमहिमवर्णनं सदाशिवप्रोक्तम् Narmadalinga or Banalinga Mahima Varnanam by Sadashiva

देवीत्रिलोकीतिलक स्वामिन्तिलकस्वामिसुप्रिय ।ओङ्कारकुण्डलिङ्गानां बाणलिङ्गत्वता कथम् ॥ १॥

devītrilokītilaka svāmintilakasvāmisupriya |oṅkārakuṇḍaliṅgānāṃ bāṇaliṅgatvatā katham || 1||

वक्तुमर्हसि देवेश लोकानां हितकाम्यया ।तदा देव्या वचः श्रुत्वा सन्तुष्टः प्राह शङ्करः ॥ २॥

vaktumarhasi deveśa lokānāṃ hitakāmyayā |tadā devyā vacaḥ śrutvā santuṣṭaḥ prāha śaṅkaraḥ || 2||

सूतःउत्फुल्लनीलोत्पलनीलसुन्दरीमुमां तदालिङ्गय मुदा सदाशिवः ।बभाण बाणोत्तमसत्कथां द्विजाः सर्वार्थदात्रीं सकलाघहन्त्रीम् ॥ ३॥

sūtaḥutphullanīlotpalanīlasundarīmumāṃ tadāliṅgaya mudā sadāśivaḥ |babhāṇa bāṇottamasatkathāṃ dvijāḥ sarvārthadātrīṃ sakalāghahantrīm || 3||

सदाशिवःशृणु देवि महाभागे कथामेतां मनोरमाम् ।गङ्गाया नर्मदायाश्च विवादः सुमहानभूत् ॥ ४॥

sadāśivaḥśṛṇu devi mahābhāge kathāmetāṃ manoramām |gaṅgāyā narmadāyāśca vivādaḥ sumahānabhūt || 4||

तत्सर्वं विस्तरेणैव त्वयि सर्वं प्रकीर्तितम् ।अविमुक्ते वसामीति नित्यं सान्निध्यदे मया ॥ ५॥

tatsarvaṃ vistareṇaiva tvayi sarvaṃ prakīrtitam |avimukte vasāmīti nityaṃ sānnidhyade mayā || 5||

गङायै च वरो दत्तो नर्मदायै महेश्वरि ।सिकता याः शिलाः सर्वाः तानि लिङ्गानि निम्नगे ॥ ६॥

gaṅāyai ca varo datto narmadāyai maheśvari |sikatā yāḥ śilāḥ sarvāḥ tāni liṅgāni nimnage || 6||

त्वदन्तर्गतमेवाद्य कुण्डमोङ्कारसञ्ज्ञितम् ।गङ्गायां विश्वनाथाख्यलिङ्गाकृतिरहं स्थितः ॥ ७॥

tvadantargatamevādya kuṇḍamoṅkārasañjñitam |gaṅgāyāṃ viśvanāthākhyaliṅgākṛtirahaṃ sthitaḥ || 7||

त्वत्तीरे नर्मदे लिङ्गमोङ्कारं परमेश्वरम् ।तल्लिङ्गरूपः सततं निवसामि तटे तव ॥ ८॥

tvattīre narmade liṅgamoṅkāraṃ parameśvaram |talliṅgarūpaḥ satataṃ nivasāmi taṭe tava || 8||

द्रष्टृणां सर्वपापानि नाशयामि न संशयः ।अमरैः पूजितं यस्मादमरेश्वरमुच्यते ॥ ९॥

draṣṭṛṇāṃ sarvapāpāni nāśayāmi na saṃśayaḥ |amaraiḥ pūjitaṃ yasmādamareśvaramucyate || 9||

त्वं लिङ्गमण्डलाक्रान्ता भविष्यसि सरिद्वरे ।ओङ्कारे च भृगुक्षेत्रे नर्मदावरसङ्गमे ॥ १०॥

tvaṃ liṅgamaṇḍalākrāntā bhaviṣyasi saridvare |oṅkāre ca bhṛgukṣetre narmadāvarasaṅgame || 10||

सर्वत्र सुलभा रेवा त्रिषु स्थानेषु दुर्लभा ।त्वल्लिङ्गं सर्वभावेन पूजितं सर्वकामदम् ॥ ११॥

sarvatra sulabhā revā triṣu sthāneṣu durlabhā |tvalliṅgaṃ sarvabhāvena pūjitaṃ sarvakāmadam || 11||

इति तस्यै वरो दत्तो नर्मदायै मनोरमे ।तानि लिङ्गानि सर्वाणि बाणसम्पूजितानि हि ॥ १२॥

iti tasyai varo datto narmadāyai manorame |tāni liṅgāni sarvāṇi bāṇasampūjitāni hi || 12||

दर्शनात्स्पर्शनाद्गौरि पुण्यदानि न संशयः ।नार्मदे ये महालिङ्गे नीरं वा पत्रमेककम् ॥ १३॥

darśanātsparśanādgauri puṇyadāni na saṃśayaḥ |nārmade ye mahāliṅge nīraṃ vā patramekakam || 13||

दद्यात् स मुक्तो भवति त्रिनेत्रप्रियकृत्तमः ।न सम्प्रोक्षणसंस्कारो न प्रतिष्ठा हि पार्वति ॥ १४॥

dadyāt sa mukto bhavati trinetrapriyakṛttamaḥ |na samprokṣaṇasaṃskāro na pratiṣṭhā hi pārvati || 14||

नावाहनं न पूजादिविधिः स्यात्तत्र शङ्करि ।सपीठं मुक्तपीठं वा नर्मदालिङ्गमर्चयेत् ॥ १५॥

nāvāhanaṃ na pūjādividhiḥ syāttatra śaṅkari |sapīṭhaṃ muktapīṭhaṃ vā narmadāliṅgamarcayet || 15||

स्पृष्टास्पृष्टं न तस्यास्ति नित्यं सान्निध्यदं मम ।तल्लिङ्गे मम भक्तैश्च यद्दत्तं लीलथाऽपि च ॥ १६॥

spṛṣṭāspṛṣṭaṃ na tasyāsti nityaṃ sānnidhyadaṃ mama |talliṅge mama bhaktaiśca yaddattaṃ līlathā'pi ca || 16||

बिल्वपत्रं तथा नीरं फलं वा कन्दमेव वा ।गृह्णामि शिरसा तच्च तस्मै मुक्तिं ददाम्यम् ॥ १७॥

bilvapatraṃ tathā nīraṃ phalaṃ vā kandameva vā |gṛhṇāmi śirasā tacca tasmai muktiṃ dadāmyam || 17||

विमर्शो न च कर्तव्यो नार्मदे परमेश्वरि ।अन्यानि सर्वलिङ्गानि प्रतिष्ठाप्रोक्षणादिभिः ॥ १८॥

vimarśo na ca kartavyo nārmade parameśvari |anyāni sarvaliṅgāni pratiṣṭhāprokṣaṇādibhiḥ || 18||

संस्कृतानि विशेषेण पूज्यानीति मतिः शिवे ।मृल्लिङ्गाद्धातुलिङ्गानि रत्नजानि महेश्वरि ॥ १९॥

saṃskṛtāni viśeṣeṇa pūjyānīti matiḥ śive |mṛlliṅgāddhātuliṅgāni ratnajāni maheśvari || 19||

स्फाटिकादीनि पुण्यानि चन्द्रकान्तोद्भवानि च ।स्थावराणि च सर्वाणि जङ्गमानि विशेषतः ॥ २०॥

sphāṭikādīni puṇyāni candrakāntodbhavāni ca |sthāvarāṇi ca sarvāṇi jaṅgamāni viśeṣataḥ || 20||

महापारदक्लृप्तानि लिङ्गान्यत्युत्तमानि च ।तेभ्यो विशिष्टमेतद्धि नार्मदं शर्मदं मम ॥ २१॥

mahāpāradaklṛptāni liṅgānyatyuttamāni ca |tebhyo viśiṣṭametaddhi nārmadaṃ śarmadaṃ mama || 21||

नार्मदं लिङ्गमभ्यर्च्य स्थावरार्चाफलं लभेत् ।यस्तु पश्यति पुण्यात्मा स्थावरं लिङ्गमैश्वरम् ॥ २२॥

nārmadaṃ liṅgamabhyarcya sthāvarārcāphalaṃ labhet |yastu paśyati puṇyātmā sthāvaraṃ liṅgamaiśvaram || 22||

नित्यं च नियमोपेतः पापैः सर्वैः प्रमुच्यते ।स नार्मदं महालिङ्गं दृष्ट्वा तत्फलमाप्नुयात् ॥ २३॥

nityaṃ ca niyamopetaḥ pāpaiḥ sarvaiḥ pramucyate |sa nārmadaṃ mahāliṅgaṃ dṛṣṭvā tatphalamāpnuyāt || 23||

पूजिते नार्मदे लिङ्गे सर्वलिङ्गार्चनाफलम् ।प्राप्नुयान्नियतं गौरि सत्यमेतन्मयोच्यते ॥ २४॥

pūjite nārmade liṅge sarvaliṅgārcanāphalam |prāpnuyānniyataṃ gauri satyametanmayocyate || 24||

शावाचौचे सूतकेऽपि बाणलिङ्गं समर्चयेत् ।नित्यं लिङ्गार्चनफलं यस्मिन् क्लृप्तं तदाप्नुयात् ॥ २५॥

śāvācauce sūtake'pi bāṇaliṅgaṃ samarcayet |nityaṃ liṅgārcanaphalaṃ yasmin klṛptaṃ tadāpnuyāt || 25||

नातः परतरं लिङ्गं प्रशस्तं परमेश्वरि ।अस्मिन्सम्पूजिते दृष्टे महापापक्षयो भवेत् ॥ २६॥

nātaḥ parataraṃ liṅgaṃ praśastaṃ parameśvari |asminsampūjite dṛṣṭe mahāpāpakṣayo bhavet || 26||

यद्गृहे बाणलिङ्गं स्यात् शिवक्षेत्रं हि तत्स्मृतम् ।तत्रैव मरणाज्जन्तुरपि कीटपिपीलिकम् ॥ २७॥

yadgṛhe bāṇaliṅgaṃ syāt śivakṣetraṃ hi tatsmṛtam |tatraiva maraṇājjanturapi kīṭapipīlikam || 27||

मल्लोके निवसेद्देवि पुनरावृत्तिदुर्लभम् ।बाणलिङ्गं न यस्यास्ति गृहे बिल्वदलार्चितम् ॥ २८॥

malloke nivaseddevi punarāvṛttidurlabham |bāṇaliṅgaṃ na yasyāsti gṛhe bilvadalārcitam || 28||

न तद्गेहे जलं ग्राह्यमन्नं वा वैदिकोत्तमैः ।यद्गृहे बाणलिङ्गार्चा स मुनिः स च पण्डितः ॥ २९॥

na tadgehe jalaṃ grāhyamannaṃ vā vaidikottamaiḥ |yadgṛhe bāṇaliṅgārcā sa muniḥ sa ca paṇḍitaḥ || 29||

तेनेष्टाः सकला यज्ञा वेदाधीताश्च तेन वै ।तेनोर्वरेयं दत्ता स्यात् सशैलवनकानना ॥ ३०॥

teneṣṭāḥ sakalā yajñā vedādhītāśca tena vai |tenorvareyaṃ dattā syāt saśailavanakānanā || 30||

॥ इति शिवरहस्यान्तर्गते सदाशिवप्रोक्तं नार्मदलिङ्ग अथवा बाणलिङ्ग महिमवर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः १०॥– ॥ श्रीशिवरहस्यम् । भर्गाख्यः पन्चमांशः । अध्यायः १०॥

|| iti śivarahasyāntargate sadāśivaproktaṃ nārmadaliṅga athavā bāṇaliṅga mahimavarṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 10||– || śrīśivarahasyam | bhargākhyaḥ pancamāṃśaḥ | adhyāyaḥ 10||