शिववन्दना मुनिभिः कृता Munayah Krita Shivavandana

शिव श्रीमहादेव गौरीपते मां त्वदीयं नयापारसंसारपारम् ।भवन्तं विना कोऽपि नास्त्येव लोके न माता पिता वा न दाता महेश ॥ ४२॥

śiva śrīmahādeva gaurīpate māṃ tvadīyaṃ nayāpārasaṃsārapāram |bhavantaṃ vinā ko'pi nāstyeva loke na mātā pitā vā na dātā maheśa || 42||

अघोरा हि संसारवृत्तिस्त्वपारा हराचारहीनस्य हारानुकारः ।कदाप्यस्य नेत्येव संसारपारं नयाशु प्रपश्येश पश्य प्रपश्य ॥ ४३॥

aghorā hi saṃsāravṛttistvapārā harācārahīnasya hārānukāraḥ |kadāpyasya netyeva saṃsārapāraṃ nayāśu prapaśyeśa paśya prapaśya || 43||

कदा वा मुदा वा महादेव देवेत्युपालम्भनेनाषि कालो विनेयः ।स्वकालोऽपि नेयः स कालोऽयमासीत् इति श्रीमहाकालकालानुवेलम् ॥ ४४॥

kadā vā mudā vā mahādeva devetyupālambhanenāṣi kālo vineyaḥ |svakālo'pi neyaḥ sa kālo'yamāsīt iti śrīmahākālakālānuvelam || 44||

अयं पुण्यकालो महाकालकालः स्मृतो येन कालस्वभावोऽयमासीत् ।अयं शोभनस्यापि कालो यतोऽभूत् महेशस्मृतिर्मुक्तिदानप्रवीणा ॥ ४५॥

ayaṃ puṇyakālo mahākālakālaḥ smṛto yena kālasvabhāvo'yamāsīt |ayaṃ śobhanasyāpi kālo yato'bhūt maheśasmṛtirmuktidānapravīṇā || 45||

स संसारमोहप्रवाहोऽपि नष्टः क्षणार्धादिहार्धेन्दुमौले कृपालो ।अलं बाललीलाभिरित्येव कुर्मः शिवाराधनं बालबिल्वीदलाद्यैः ॥ ४६॥

sa saṃsāramohapravāho'pi naṣṭaḥ kṣaṇārdhādihārdhendumaule kṛpālo |alaṃ bālalīlābhirityeva kurmaḥ śivārādhanaṃ bālabilvīdalādyaiḥ || 46||

संसारचण्डकरधीरकरप्रचारैः तप्तं शरीरमिदमेतदतः परं मे ।गौरीमनोहरतरुप्रवरोपकण्ठच्छायामुपेत्य निवसामि खलु प्रकामम् ॥ ४७॥

saṃsāracaṇḍakaradhīrakarapracāraiḥ taptaṃ śarīramidametadataḥ paraṃ me |gaurīmanoharatarupravaropakaṇṭhacchāyāmupetya nivasāmi khalu prakāmam || 47||

दुर्वृत्तवृत्तशमनोपशमाय शर्वं शश्वत् समीहितसमर्पणकारणेषु ।लिङ्गेषु फुल्लकमलैः कमलैश्च बिल्वैर्रभ्यर्चयामि सितभूतिविभूषिताङ्गः ॥ ४८॥

durvṛttavṛttaśamanopaśamāya śarvaṃ śaśvat samīhitasamarpaṇakāraṇeṣu |liṅgeṣu phullakamalaiḥ kamalaiśca bilvairrabhyarcayāmi sitabhūtivibhūṣitāṅgaḥ || 48||

नातः परं कृत्यमुमा सहायपादारविन्दभजनादपि किं वदान्यत् ।कृत्यं विशिष्य सकलेप्सितदानदक्षदाक्षायणीरमणमक्षरमाश्रयामः ॥ ४९॥

nātaḥ paraṃ kṛtyamumā sahāyapādāravindabhajanādapi kiṃ vadānyat |kṛtyaṃ viśiṣya sakalepsitadānadakṣadākṣāyaṇīramaṇamakṣaramāśrayāmaḥ || 49||

गौरीमनोरमण ते चरणारविन्दमस्माकमस्तु शरणं तरुणेन्दुमौले ।नक्षत्रमण्डल निभामलगण्डमाला लीलाविलोकनविलोचनभाललोल ॥ ५०॥

gaurīmanoramaṇa te caraṇāravindamasmākamastu śaraṇaṃ taruṇendumaule |nakṣatramaṇḍala nibhāmalagaṇḍamālā līlāvilokanavilocanabhālalola || 50||

॥ इति शिवरहस्यान्तर्गते मुनिभिः कृता शिववन्दना सम्पूर्णा ॥॥ श्रीशिवरहस्यम् । हराख्यः तृतीयांशः । उत्तरार्धम् । अध्यायः २४। ४२५० ॥

|| iti śivarahasyāntargate munibhiḥ kṛtā śivavandanā sampūrṇā |||| śrīśivarahasyam | harākhyaḥ tṛtīyāṃśaḥ | uttarārdham | adhyāyaḥ 24| 4250 ||

– ॥ श्रीशिवरहस्यम् ।हराख्यः तृतीयांशः ।उत्तरार्धम् ।अध्यायः २४। ४२-५० ॥

– || śrīśivarahasyam |harākhyaḥ tṛtīyāṃśaḥ |uttarārdham |adhyāyaḥ 24| 42-50 ||