शिवार्चनोपदेशम् ईश्वरप्रोक्तं ४ Ishvaraproktam 4 Shivarchanopadesham

(शिवरहस्यान्तर्गते महादेवाख्ये)शिवपार्वतीसंवादेश्रद्धया सकृदेवापि समभ्यर्च्य महेश्वरम् ।गायत्र्या च समभ्यर्च्य सोमस्थानमवाप्नुयात् ॥ ७॥

(śivarahasyāntargate mahādevākhye)śivapārvatīsaṃvādeśraddhayā sakṛdevāpi samabhyarcya maheśvaram |gāyatryā ca samabhyarcya somasthānamavāpnuyāt || 7||

पञ्चाक्षरेणाभिपूज्य रुद्रलोके वसेन्नरः ।कल्पमेकं दिव्यदेहः शिवरूपेण सङ्गतः ॥ ८॥

pañcākṣareṇābhipūjya rudraloke vasennaraḥ |kalpamekaṃ divyadehaḥ śivarūpeṇa saṅgataḥ || 8||

पञ्चभिर्ब्रह्मभिः पूज्य शिवं शिवगणो भवेत् ।संशोध्य च शुभं लिङ्गं हेमपीठं शुभोदकैः ॥ ९॥

pañcabhirbrahmabhiḥ pūjya śivaṃ śivagaṇo bhavet |saṃśodhya ca śubhaṃ liṅgaṃ hemapīṭhaṃ śubhodakaiḥ || 9||

अद्भिः पूते तथा पीठे लिङ्गे चावाह्य शङ्करम् ।दृष्ट्वा देवं तथा लिङ्गे सुपुष्पं मस्तके क्षिपेत् ॥ १०॥

adbhiḥ pūte tathā pīṭhe liṅge cāvāhya śaṅkaram |dṛṣṭvā devaṃ tathā liṅge supuṣpaṃ mastake kṣipet || 10||

कल्पिते चासने तत्र निर्माल्यमपनोद्य च ।पाद्यमाचमनं चार्घ्यं दत्वा रुद्राय शम्भवे ॥ ११॥

kalpite cāsane tatra nirmālyamapanodya ca |pādyamācamanaṃ cārghyaṃ datvā rudrāya śambhave || 11||

स्नापयेद्गन्धतोयेन पाटलीमिश्रितेन च ।क्षीरेण च गवां नित्यं घृतेन च सुगन्धिना ॥ १२॥

snāpayedgandhatoyena pāṭalīmiśritena ca |kṣīreṇa ca gavāṃ nityaṃ ghṛtena ca sugandhinā || 12||

दध्ना च मधुना चैव कीटहीनेन शङ्करि ।ऐक्षव्या सितया चापि स्नापयेद्देवमीश्वरम् ॥ १३॥

dadhnā ca madhunā caiva kīṭahīnena śaṅkari |aikṣavyā sitayā cāpi snāpayeddevamīśvaram || 13||

नारिकेलोदकैः स्नाप्य मोचाम्ररकसुपानसैः ।जम्बीरसारैर्गन्धोदैः कुशपुष्पहिरण्यजैः ॥ १४॥

nārikelodakaiḥ snāpya mocāmrarakasupānasaiḥ |jambīrasārairgandhodaiḥ kuśapuṣpahiraṇyajaiḥ || 14||

अखण्डनीरधाराभिः स्नापयेत्परमेश्वरम् ।रुद्रेण चमकेनैव तथा पौरुषसूक्तकैः ॥ १५॥

akhaṇḍanīradhārābhiḥ snāpayetparameśvaram |rudreṇa camakenaiva tathā pauruṣasūktakaiḥ || 15||

कद्रुद्रैः पवमानैश्च वामदेवादिसामभिः ।रथन्तरैस्तथा रौद्रैः शिवेऽथर्वशिखादिभिः ॥ १६॥

kadrudraiḥ pavamānaiśca vāmadevādisāmabhiḥ |rathantaraistathā raudraiḥ śive'tharvaśikhādibhiḥ || 16||

स्नापयेद्देवदेवेशं तर्पयेदष्टनामभिः ।शुद्धवस्त्रेण सम्मृज्य पीठे स्थाप्य महेश्वरम् ॥ १७॥

snāpayeddevadeveśaṃ tarpayedaṣṭanāmabhiḥ |śuddhavastreṇa sammṛjya pīṭhe sthāpya maheśvaram || 17||

भस्मना चन्दनाद्यैश्च लेपयेत्साक्षतादिभिः ।रोचनाद्यैश्च सम्पूज्य चन्द्रैश्चैव महेश्वरम् ॥ १८॥

bhasmanā candanādyaiśca lepayetsākṣatādibhiḥ |rocanādyaiśca sampūjya candraiścaiva maheśvaram || 18||

बिल्वपत्रैरखण्डैश्च दूर्वापामार्गदर्भकैः ।नीलोत्पलैस्तथा पद्मैर्नन्द्यावर्तशिरीषकैः ॥ १९॥

bilvapatrairakhaṇḍaiśca dūrvāpāmārgadarbhakaiḥ |nīlotpalaistathā padmairnandyāvartaśirīṣakaiḥ || 19||

मल्लिकाचम्पकैर्जाजीवकुलार्कशमीसुमैः ।करवीरैश्च कुटजैः पाटलैर्द्रोणसम्भवैः ॥ २०॥

mallikācampakairjājīvakulārkaśamīsumaiḥ |karavīraiśca kuṭajaiḥ pāṭalairdroṇasambhavaiḥ || 20||

केतकी बृहतीपुष्पैः पुष्पैरारग्वधोद्भवैः ।पूजयेन्नामभिर्देवि निधनेत्यादिभिः शिवे ॥ २१॥

ketakī bṛhatīpuṣpaiḥ puṣpairāragvadhodbhavaiḥ |pūjayennāmabhirdevi nidhanetyādibhiḥ śive || 21||

दत्वा पञ्चविधं धूपं तगजागरुकेसरम् ।देवद्रुसद्घजैर्बैल्वगुग्गुलं सधृतं शिवे ॥ २२॥

datvā pañcavidhaṃ dhūpaṃ tagajāgarukesaram |devadrusadghajairbailvaguggulaṃ sadhṛtaṃ śive || 22||

दीपान् प्रज्वाल्य घृतजान् पायसं च निवेदयेत् ।दधिभक्तं च मध्वाज्यपरिप्लुतमुमापतेः ॥ २३॥

dīpān prajvālya ghṛtajān pāyasaṃ ca nivedayet |dadhibhaktaṃ ca madhvājyapariplutamumāpateḥ || 23||

शुद्धान्नं चैव मुद्गान्नं माषान्नं च निवेदयेत् ।माषापूपं गुडापूपं गोधूमापूपमेव च ॥ २४॥

śuddhānnaṃ caiva mudgānnaṃ māṣānnaṃ ca nivedayet |māṣāpūpaṃ guḍāpūpaṃ godhūmāpūpameva ca || 24||

खेजिका लड्डुकाष्चैव मोदकाः फेणिकाः शिवे ।मण्डकाभक्ष्यभोज्यं च निवेद्यं स्यात्सदा शिवे ॥ २५॥

khejikā laḍḍukāṣcaiva modakāḥ pheṇikāḥ śive |maṇḍakābhakṣyabhojyaṃ ca nivedyaṃ syātsadā śive || 25||

शाकसूपादिदध्यन्नं गुडान्नं विनिवेदयेत् ।क्रमेणैव फलैः श्रेष्ठैः पानकैर्मजिकां तथा ॥ २६॥

śākasūpādidadhyannaṃ guḍānnaṃ vinivedayet |krameṇaiva phalaiḥ śreṣṭhaiḥ pānakairmajikāṃ tathā || 26||

ताम्बूलमथ गन्धाढ्यं सकलं विनिवेदयेत् ।नीराजयेत्ततो दीपैः शतसाहस्रवर्तिकम् ॥ २७॥

tāmbūlamatha gandhāḍhyaṃ sakalaṃ vinivedayet |nīrājayettato dīpaiḥ śatasāhasravartikam || 27||

वृषकुम्भगजाकारं नागमानुषरूपकम् ।नाक्षत्रं दीपकं दत्वा सद्योजातादिपञ्चकैः ॥ २८॥

vṛṣakumbhagajākāraṃ nāgamānuṣarūpakam |nākṣatraṃ dīpakaṃ datvā sadyojātādipañcakaiḥ || 28||

पञ्चपात्रेषु देयं स्यात्ततः कर्पूरखण्डजम् ।रक्षाबन्धं ततः कुर्याद्भस्मना त्रिः क्रमेण तु ॥ २८९॥

pañcapātreṣu deyaṃ syāttataḥ karpūrakhaṇḍajam |rakṣābandhaṃ tataḥ kuryādbhasmanā triḥ krameṇa tu || 289||

ऋक्सामयाजुषाथर्वमन्त्रैःस्तुत्वा महेश्वरम् ।पौराणैर्वा तथा वाक्यैः स्तुवीत परमेश्वरम् ॥ ३०॥

ṛksāmayājuṣātharvamantraiḥstutvā maheśvaram |paurāṇairvā tathā vākyaiḥ stuvīta parameśvaram || 30||

ईशानं पुरुषं चैवमघोरं वाममेव च ।सद्योजातं जपेत्पश्चात्पञ्चभिः पूजयेच्छिवम् ॥ ३१॥

īśānaṃ puruṣaṃ caivamaghoraṃ vāmameva ca |sadyojātaṃ japetpaścātpañcabhiḥ pūjayecchivam || 31||

छत्रं च चामरे दिव्ये व्यजनादर्शकध्वजम् ।वीणावेणुमृदङ्गादीन् शङ्खदुन्दुभिकाहलम् ॥ ३२॥

chatraṃ ca cāmare divye vyajanādarśakadhvajam |vīṇāveṇumṛdaṅgādīn śaṅkhadundubhikāhalam || 32||

चार्मं तन्त्रीमयं श्रेष्ठं तथैव च मुखोद्भवम् ।वाद्यं च श्रेष्टमित्याहुः शिवार्चासु महेश्वरि ॥ ३३॥

cārmaṃ tantrīmayaṃ śreṣṭhaṃ tathaiva ca mukhodbhavam |vādyaṃ ca śreṣṭamityāhuḥ śivārcāsu maheśvari || 33||

अलाभे सर्ववाद्यानां घण्टाघोषः प्रशस्यते ।रत्नस्वर्णोद्भवं पात्रं राजतं ताम्रजं तथा ॥ ३४॥

alābhe sarvavādyānāṃ ghaṇṭāghoṣaḥ praśasyate |ratnasvarṇodbhavaṃ pātraṃ rājataṃ tāmrajaṃ tathā || 34||

कांस्यपैत्तलसम्भूतं दारवं चाश्मसम्भवम् ।शौक्तिकं पत्रसम्भूतं मृन्मयं वाप्यलाभतः ॥ ३५॥

kāṃsyapaittalasambhūtaṃ dāravaṃ cāśmasambhavam |śauktikaṃ patrasambhūtaṃ mṛnmayaṃ vāpyalābhataḥ || 35||

कल्पयेच्छिवपूजायां फलं स्यादुत्तरोत्तरम् ।पञ्चामृतं चान्यगवां कापिलं स्यात्ततोऽधिकम् ॥ ३६॥

kalpayecchivapūjāyāṃ phalaṃ syāduttarottaram |pañcāmṛtaṃ cānyagavāṃ kāpilaṃ syāttato'dhikam || 36||

नारिकेलं तथैवान्यत् श्वेतं तत्र प्रशस्यते ।रम्भाः सुवृत्तपीताच्छाः प्रशस्तास्त्वभिषेचने ॥ ३७॥

nārikelaṃ tathaivānyat śvetaṃ tatra praśasyate |rambhāḥ suvṛttapītācchāḥ praśastāstvabhiṣecane || 37||

इक्षुभ्यः पौण्ड्रकं चेक्षु प्रशस्तं स्नपने शिवे ।गुलवल्मीकसम्भूतान्मधु पार्वतमुत्तमम् ॥ ३८॥

ikṣubhyaḥ pauṇḍrakaṃ cekṣu praśastaṃ snapane śive |gulavalmīkasambhūtānmadhu pārvatamuttamam || 38||

कृष्णं निषिद्धं देवेशि पैतृके विनियोजयेत् ।ताटाकात्कूप्यमुत्कृष्टं ततः कुल्योद्भवं शिवे ॥ ३९॥

kṛṣṇaṃ niṣiddhaṃ deveśi paitṛke viniyojayet |tāṭākātkūpyamutkṛṣṭaṃ tataḥ kulyodbhavaṃ śive || 39||

ततो नदीभवं पुण्यं सागराभिमुखासु च ।शङ्खोदकं ततोत्कृष्टं सर्वपात्रजलैरपि ॥ ४०॥

tato nadībhavaṃ puṇyaṃ sāgarābhimukhāsu ca |śaṅkhodakaṃ tatotkṛṣṭaṃ sarvapātrajalairapi || 40||

सर्वतैलैरपि शिवे तिलजं श्रेष्ठमुच्यते ।प्रहरं तिष्ठते जाती दिवारात्रौ च मल्लिका ॥ ४१॥

sarvatailairapi śive tilajaṃ śreṣṭhamucyate |praharaṃ tiṣṭhate jātī divārātrau ca mallikā || 41||

पद्मं नीलोत्पलं चैव मुकुलं वा दिनत्रयम् ।न पर्युषितदोषोऽस्ति बिल्वपत्रे शिवप्रिये ॥ ४२॥

padmaṃ nīlotpalaṃ caiva mukulaṃ vā dinatrayam |na paryuṣitadoṣo'sti bilvapatre śivapriye || 42||

न पर्युषितदोषोऽस्ति हैमे रत्नोपकल्पिते ।अलाभे बिल्वपत्राणां निर्माल्यैः क्षालितैर्यजेत् ॥ ४३॥

na paryuṣitadoṣo'sti haime ratnopakalpite |alābhe bilvapatrāṇāṃ nirmālyaiḥ kṣālitairyajet || 43||

पुष्पाणामप्यलाभे तु तत्पत्राणि निवेदयेत् ।कुटजैर्नार्चयेदीशं यस्य कस्य सुमस्य च ॥ ४४॥

puṣpāṇāmapyalābhe tu tatpatrāṇi nivedayet |kuṭajairnārcayedīśaṃ yasya kasya sumasya ca || 44||

विना नीलोत्पलं देवि साम्बं मन्दारकैर्यजेत् ।मल्लिकाभिर्जातिकाभिः प्रातश्चम्पकनन्दिकैः ॥ ४५॥

vinā nīlotpalaṃ devi sāmbaṃ mandārakairyajet |mallikābhirjātikābhiḥ prātaścampakanandikaiḥ || 45||

मध्याह्ने कर्णिकारैश्च करवीरैश्चपाटलैः ।पुन्नागैः पारिजातैश्च पुष्पैरन्यैर्यथाबलम् ॥ ४६॥

madhyāhne karṇikāraiśca karavīraiścapāṭalaiḥ |punnāgaiḥ pārijātaiśca puṣpairanyairyathābalam || 46||

कनकं केतकीपुष्पं निशि कादम्बजैर्यजेत् ।सर्वदा बिल्वपत्रं मे प्रियं शैलेन्द्रकन्यके ॥ ४७॥

kanakaṃ ketakīpuṣpaṃ niśi kādambajairyajet |sarvadā bilvapatraṃ me priyaṃ śailendrakanyake || 47||

बिल्वपत्रे च कमले कमला सुप्रतिष्ठता ।नीलोत्पलेऽम्बिका साक्षात् अल्लकेरक्तसन्धितः ॥ ४८॥

bilvapatre ca kamale kamalā supratiṣṭhatā |nīlotpale'mbikā sākṣāt allakeraktasandhitaḥ || 48||

पुण्डरीके महादेवो गणेशः शतपत्रके ।कर्णिकारे स्थितो वेधा मल्लिकासु हरिः स्थितः ॥ ४९॥

puṇḍarīke mahādevo gaṇeśaḥ śatapatrake |karṇikāre sthito vedhā mallikāsu hariḥ sthitaḥ || 49||

कर्णिकारे स्थितो नन्दी दुर्गा पाटलकेषु च ।श्वेतार्के चैव चण्डीश पुष्पेषु गणपाः स्थिताः ॥ ५०॥

karṇikāre sthito nandī durgā pāṭalakeṣu ca |śvetārke caiva caṇḍīśa puṣpeṣu gaṇapāḥ sthitāḥ || 50||

यमो नीलेषु पुष्पेषु रक्तेऽपर्णा प्रतिष्ठिता ।श्वभ्रपुष्पार्चने मुक्तिर्भुक्तिरत्र समर्चने ॥ ५१॥

yamo nīleṣu puṣpeṣu rakte'parṇā pratiṣṭhitā |śvabhrapuṣpārcane muktirbhuktiratra samarcane || 51||

पीतं वश्यकरं देवि नीलकं मारणे भवेत् ।अनेन विधिना देवः प्रसीदति महेश्वरः ॥ ५२॥

pītaṃ vaśyakaraṃ devi nīlakaṃ māraṇe bhavet |anena vidhinā devaḥ prasīdati maheśvaraḥ || 52||

कृष्णागरूद्भवं धूपं सर्वपापनिकृन्तनम् ।साम्राणिजं गुग्गुलुजं धूपं वश्यकरं भवेत् ॥ ५३॥

kṛṣṇāgarūdbhavaṃ dhūpaṃ sarvapāpanikṛntanam |sāmrāṇijaṃ guggulujaṃ dhūpaṃ vaśyakaraṃ bhavet || 53||

सर्वरोगहरं बैल्वं सधृतं धूपमुत्तमम् ।मारणोच्चाटने नैव धूपो दीपोऽपि सत्तमे ॥ ५४॥

sarvarogaharaṃ bailvaṃ sadhṛtaṃ dhūpamuttamam |māraṇoccāṭane naiva dhūpo dīpo'pi sattame || 54||

कौसुम्भतैलं वश्यं स्यात् शिवदीपप्रदानतः ।सार्षपं रोगनाशाय माधूकं राजवश्यकम् ॥ ५५॥

kausumbhatailaṃ vaśyaṃ syāt śivadīpapradānataḥ |sārṣapaṃ roganāśāya mādhūkaṃ rājavaśyakam || 55||

नारीकेलोद्भवं तैलं स्त्रीवशीकरणं शिवे ।नीलतैलं ज्ञानदायि शिवाग्रे दीपदापने ॥ ५६॥

nārīkelodbhavaṃ tailaṃ strīvaśīkaraṇaṃ śive |nīlatailaṃ jñānadāyi śivāgre dīpadāpane || 56||

हैरण्डे बुद्धिमान्द्यं स्यात् शिवाग्रे दीपदानतः ।गव्यमाज्यं मुक्तिदायि माहिषं पुष्टिकृद्भवेत् ॥ ५७॥

hairaṇḍe buddhimāndyaṃ syāt śivāgre dīpadānataḥ |gavyamājyaṃ muktidāyi māhiṣaṃ puṣṭikṛdbhavet || 57||

एवं धूपादिदीपेषु पुष्पेषु फलमम्बिके ।यथालाभं प्रकुर्वीत तानयुक्तो न दुष्यति ॥ ५८॥

evaṃ dhūpādidīpeṣu puṣpeṣu phalamambike |yathālābhaṃ prakurvīta tānayukto na duṣyati || 58||

वृक्षाः पुष्पाणि पत्राद्यै वल्लयश्च महेश्वरि ।उपयुक्त शिवार्चायां गावो या लोकमातरः ॥ ५९॥

vṛkṣāḥ puṣpāṇi patrādyai vallayaśca maheśvari |upayukta śivārcāyāṃ gāvo yā lokamātaraḥ || 59||

गतिं प्रयान्ति परमां किम्पुनर्मानवाः शिवे ।द्विजाः क्षत्रा विशः शूद्राः स्त्रियो वापि च शाङ्कराः ॥ ६०॥

gatiṃ prayānti paramāṃ kimpunarmānavāḥ śive |dvijāḥ kṣatrā viśaḥ śūdrāḥ striyo vāpi ca śāṅkarāḥ || 60||

शङ्करार्चासु निरताः प्रयान्ति परमं पदम् ।पूजयेद्यः शिवं रुद्रं शर्वं शिवमजं सकृत् ॥ ६१॥

śaṅkarārcāsu niratāḥ prayānti paramaṃ padam |pūjayedyaḥ śivaṃ rudraṃ śarvaṃ śivamajaṃ sakṛt || 61||

स याति शिवसायुज्यं त्रिः सप्तकुलसंयुतः ।पूजितं वा महादेवं पूज्यमानमथापि वा ॥ ६२॥

sa yāti śivasāyujyaṃ triḥ saptakulasaṃyutaḥ |pūjitaṃ vā mahādevaṃ pūjyamānamathāpi vā || 62||

दृष्ट्वा प्रयाति वै मर्त्यो रुद्रलोकं न संशयः ।अर्चितं प्रातरीक्षेत लिङ्गं देवमुमापतिम् ॥ ६३॥

dṛṣṭvā prayāti vai martyo rudralokaṃ na saṃśayaḥ |arcitaṃ prātarīkṣeta liṅgaṃ devamumāpatim || 63||

नैशपापं द्विमुच्येत मध्याह्ने हयमेधभाक् ।सायं जन्मायुतोद्भूतं दृष्ट्वा तत्पापनाशकृत् ॥ ६४॥

naiśapāpaṃ dvimucyeta madhyāhne hayamedhabhāk |sāyaṃ janmāyutodbhūtaṃ dṛṣṭvā tatpāpanāśakṛt || 64||

निशीथे तु महादेवमभिवीक्ष्य विमुक्तिभाक् ।दृष्ट्वा नत्वाभिगच्छेद्वा स याति गणतां मम ॥ ६५॥

niśīthe tu mahādevamabhivīkṣya vimuktibhāk |dṛṣṭvā natvābhigacchedvā sa yāti gaṇatāṃ mama || 65||

स कृत्प्रसङ्गतो लिङ्गमनघः स्याद्धरस्य हि ।दृष्ट्वा नत्वाभिगच्छेद्वा प्रादक्षिण्येन शङ्करि ॥ ६६॥

sa kṛtprasaṅgato liṅgamanaghaḥ syāddharasya hi |dṛṣṭvā natvābhigacchedvā prādakṣiṇyena śaṅkari || 66||

एकप्रदक्षिणं लिङ्गे चण्डेशादर्शनं तथा ।अदीपदर्शनं चैव शिवस्यार्धनमस्क्रिया ॥ ६७॥

ekapradakṣiṇaṃ liṅge caṇḍeśādarśanaṃ tathā |adīpadarśanaṃ caiva śivasyārdhanamaskriyā || 67||

ब्राह्मणानां परीवादो हन्ति पुण्यं पुराकृतम् ॥ईश्वरः उवाच ।इत्येष ते समासेन फलाफलविनिर्णयः ॥ ६८॥

brāhmaṇānāṃ parīvādo hanti puṇyaṃ purākṛtam ||īśvaraḥ uvāca |ityeṣa te samāsena phalāphalavinirṇayaḥ || 68||

पुण्यं च दर्शनं शम्भोर्धूपदीपनिवेदने ।कथितं प्रथितं देवि महितं शाम्भवं वरम् ॥ ६९॥

puṇyaṃ ca darśanaṃ śambhordhūpadīpanivedane |kathitaṃ prathitaṃ devi mahitaṃ śāmbhavaṃ varam || 69||

नानायोनिषु सञ्चरन् विधिवशाद्विप्रत्वमेत्यादरात्वर्णित्वेऽखिलवेदजालकलनाद्दाराग्निहोत्रे रतः ।अग्निष्टोममखादिभिः क्रतुवरैरिद्वेष्टिभिश्चान्तिमेवानप्रस्थगतो विरज्य विषये त्यक्तेषणो मस्करी ॥ ७०॥

nānāyoniṣu sañcaran vidhivaśādvipratvametyādarātvarṇitve'khilavedajālakalanāddārāgnihotre rataḥ |agniṣṭomamakhādibhiḥ kratuvarairidveṣṭibhiścāntimevānaprasthagato virajya viṣaye tyakteṣaṇo maskarī || 70||

॥ इति शिवरहस्यान्तर्गते ईश्वरप्रोक्तं ४ शिवार्चनोपदेशं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ४७ । ७७०॥

|| iti śivarahasyāntargate īśvaraproktaṃ 4 śivārcanopadeśaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 47 | 770||

– ॥ श्रीशिवरहस्यम् ।महादेवाख्यः एकादशमांशः ।अध्यायः ४७ ।७-७०॥

– || śrīśivarahasyam |mahādevākhyaḥ ekādaśamāṃśaḥ |adhyāyaḥ 47 | 7-70||