रामभद्रमङ्गलाशासनम् Shriramabhadramangalashasanam

शरणागतसन्त्राणनिपुणाय महात्मने ।अयोध्याजनभाग्याय रामभद्रायमङ्गलम् ॥ १॥

śaraṇāgatasantrāṇanipuṇāya mahātmane |ayodhyājanabhāgyāya rāmabhadrāyamaṅgalam || 1||

कौसल्यानन्दकन्दाय कल्याणगुणसिन्धवे ।शरण्याय वरेण्याय रामभद्राय मङ्गलम् ॥ २॥

kausalyānandakandāya kalyāṇaguṇasindhave |śaraṇyāya vareṇyāya rāmabhadrāya maṅgalam || 2||

कौशिकाख्यमहायोगिसन्देशसफलीकृतौ ।कृतिने नतितुष्टाय रामभद्राय मङ्गलम् ॥ ३॥

kauśikākhyamahāyogisandeśasaphalīkṛtau |kṛtine natituṣṭāya rāmabhadrāya maṅgalam || 3||

वैदेहीवदनाम्भोजलोलम्बायितचेतसे ।भद्राणामपि भद्राय रामभद्राय मङ्गलम् ॥ ४॥

vaidehīvadanāmbhojalolambāyitacetase |bhadrāṇāmapi bhadrāya rāmabhadrāya maṅgalam || 4||

गौतमाश्रमसाफल्यनिदानपदपांसवे ।दाशकीशादिमित्राय रामभद्राय मङ्गलम् ॥ ५॥

gautamāśramasāphalyanidānapadapāṃsave |dāśakīśādimitrāya rāmabhadrāya maṅgalam || 5||

महापातकनिर्मुक्तिहेतुसेतुविधायिने ।शिक्षितासुरजालाय रामभद्राय मङ्गलम् ॥ ६॥

mahāpātakanirmuktihetusetuvidhāyine |śikṣitāsurajālāya rāmabhadrāya maṅgalam || 6||

विभीषणपरित्राणसंहृष्टमनसेऽनिशम् ।प्राप्तसीताय रामाय रामभद्राय मङ्गलम् ॥ ७॥

vibhīṣaṇaparitrāṇasaṃhṛṣṭamanase'niśam |prāptasītāya rāmāya rāmabhadrāya maṅgalam || 7||

प्राप्तराज्याय रामाय भरताभीष्टदायिने ।सर्वबन्धुसमेताय रामभद्राय मङ्गलम् ॥ ८॥

prāptarājyāya rāmāya bharatābhīṣṭadāyine |sarvabandhusametāya rāmabhadrāya maṅgalam || 8||

श्रीनिवासयतीन्द्रोक्तं सीतावल्लभमङ्गलम् ।ये पठन्ति महात्मानस्तेषां भूयात्तु मङ्गलम् ॥ ९॥

śrīnivāsayatīndroktaṃ sītāvallabhamaṅgalam |ye paṭhanti mahātmānasteṣāṃ bhūyāttu maṅgalam || 9||

इति श्रीरामभद्रमङ्गलाशासनं सम्पूर्णम् ॥

iti śrīrāmabhadramaṅgalāśāsanaṃ sampūrṇam ||