रामरक्षास्तोत्रम् Shri Ramaraksha Shtotram From Padmapurana

इदं पवित्रं परमं भक्तानां वल्लभं सदा ।ध्येयं हि दासभावेन भक्तिभावेन चेतसा ॥परं सहस्रनामाख्यम् ये पठन्ति मनीषिणः ।सर्वपापविनिर्मुक्ताः ते यान्ति हरिसन्निधौ ॥महादेव उवाच ।शृणु देवि प्रवक्ष्यामि माहात्म्यं केशवस्य तु ।ये शृण्वन्ति नरश्रेष्ठाः ते पुण्याः पुण्यरूपिणः ॥ॐ रामरक्षास्तोत्रस्य श्रीमहर्षिर्विश्वामित्रऋषिः ।श्रीरामो देवता । अनुष्टुप्छन्दः ।श्रीविष्णुप्रीत्यर्थे जपे विनियोगः ॥अतसी पुष्पसङ्काशं पीतवास समच्युतम् ।ध्यात्वा वै पुण्डरीकाक्षं श्रीरामं विष्णुमव्ययम् ॥ १॥

idaṃ pavitraṃ paramaṃ bhaktānāṃ vallabhaṃ sadā |dhyeyaṃ hi dāsabhāvena bhaktibhāvena cetasā ||paraṃ sahasranāmākhyam ye paṭhanti manīṣiṇaḥ |sarvapāpavinirmuktāḥ te yānti harisannidhau ||mahādeva uvāca |śṛṇu devi pravakṣyāmi māhātmyaṃ keśavasya tu |ye śṛṇvanti naraśreṣṭhāḥ te puṇyāḥ puṇyarūpiṇaḥ ||oṃ rāmarakṣāstotrasya śrīmaharṣirviśvāmitraṛṣiḥ |śrīrāmo devatā | anuṣṭupchandaḥ |śrīviṣṇuprītyarthe jape viniyogaḥ ||atasī puṣpasaṅkāśaṃ pītavāsa samacyutam |dhyātvā vai puṇḍarīkākṣaṃ śrīrāmaṃ viṣṇumavyayam || 1||

पातुवो हृदयं रामः श्रीकण्ठः कण्ठमेव च ।नाभिं पातु मखत्राता कटिं मे विश्वरक्षकः ॥ २॥

pātuvo hṛdayaṃ rāmaḥ śrīkaṇṭhaḥ kaṇṭhameva ca |nābhiṃ pātu makhatrātā kaṭiṃ me viśvarakṣakaḥ || 2||

करौ पातु दाशरथिः पादौ मे विश्वरूपधृक् ।चक्षुषी पातु वै देव सीतापतिरनुत्तमः ॥ ३॥

karau pātu dāśarathiḥ pādau me viśvarūpadhṛk |cakṣuṣī pātu vai deva sītāpatiranuttamaḥ || 3||

शिखां मे पातु विश्वात्मा कर्णौ मे पातु कामदः ।पार्श्वयोस्तु सुरत्राता कालकोटि दुरासदः ॥ ४॥

śikhāṃ me pātu viśvātmā karṇau me pātu kāmadaḥ |pārśvayostu suratrātā kālakoṭi durāsadaḥ || 4||

अनन्तः सर्वदा पातु शरीरं विश्वनायकः ।जिह्वां मे पातु पापघ्नो लोकशिक्षाप्रवर्त्तकः ॥ ५॥

anantaḥ sarvadā pātu śarīraṃ viśvanāyakaḥ |jihvāṃ me pātu pāpaghno lokaśikṣāpravarttakaḥ || 5||

राघवः पातु मे दन्तान् केशान् रक्षतु केशवः ।सक्थिनी पातु मे दत्तविजयोनाम विश्वसृक् ॥ ६॥

rāghavaḥ pātu me dantān keśān rakṣatu keśavaḥ |sakthinī pātu me dattavijayonāma viśvasṛk || 6||

एतां रामबलोपेतां रक्षां यो वै पुमान् पठेत् ।सचिरायुः सुखी विद्वान् लभते दिव्यसम्पदाम् ॥ ७॥

etāṃ rāmabalopetāṃ rakṣāṃ yo vai pumān paṭhet |sacirāyuḥ sukhī vidvān labhate divyasampadām || 7||

रक्षां करोति भूतेभ्यः सदा रक्षतु वैष्णवी ।रामेति रामभद्रेति रामचन्द्रेति यः स्मरेत् ॥ ८॥

rakṣāṃ karoti bhūtebhyaḥ sadā rakṣatu vaiṣṇavī |rāmeti rāmabhadreti rāmacandreti yaḥ smaret || 8||

विमुक्तः स नरः पापान् मुक्तिं प्राप्नोति शाश्वतीम् ।वसिष्ठेन इदं प्रोक्तं गुरवे विष्णुरूपिणे ॥ ९॥

vimuktaḥ sa naraḥ pāpān muktiṃ prāpnoti śāśvatīm |vasiṣṭhena idaṃ proktaṃ gurave viṣṇurūpiṇe || 9||

ततो मे ब्रह्मणः प्राप्तं मयोक्तं नारदं प्रति ।नारदेन तु भूर्लोके प्रापितं सुजनेष्विह ॥ १०॥

tato me brahmaṇaḥ prāptaṃ mayoktaṃ nāradaṃ prati |nāradena tu bhūrloke prāpitaṃ sujaneṣviha || 10||

सुप्त्वा वाऽथ गृहेवापि मार्गे गच्छेत एव वा ।ये पठन्ति नरश्रेष्ठः ते नराः पुण्यभागिनः ॥ ११॥ (ते ज्ञेयाः)

suptvā vā'tha gṛhevāpi mārge gaccheta eva vā |ye paṭhanti naraśreṣṭhaḥ te narāḥ puṇyabhāginaḥ || 11|| (te jñeyāḥ)

इति श्रीपाद्मेमहापुराणे पञ्चपञ्चाशत्साहस्त्र्यांसंहितायामुत्तरखण्डे उमापतिनारदसंवादेरामरक्षास्तोत्रं नामत्रिसप्ततितमोऽध्यायः ॥

iti śrīpādmemahāpurāṇe pañcapañcāśatsāhastryāṃsaṃhitāyāmuttarakhaṇḍe umāpatināradasaṃvāderāmarakṣāstotraṃ nāmatrisaptatitamo'dhyāyaḥ ||