रामषडक्षरमन्त्रोपदेशः सार्थः Ramashadaksharamantra Upadeshah

(अगस्त्य संहिता अध्याय ४)श्रीविष्णुप्रति ब्रह्मोवाच ।को वोपायो मनुष्याणां भक्तानां भक्तवत्सल ।एतच्छरीरपातान्ते नः परं मुक्तिसिद्धये ॥ २७॥

(agastya saṃhitā adhyāya 4)śrīviṣṇuprati brahmovāca |ko vopāyo manuṣyāṇāṃ bhaktānāṃ bhaktavatsala |etaccharīrapātānte naḥ paraṃ muktisiddhaye || 27||

इहाप्यस्माकमैश्वर्य्यं वै दुष्टेष्टार्थसिद्धये ।एवमुक्तः स देवोऽस्मै भुक्तिमुक्तिप्रसिद्धये ॥ २८॥

ihāpyasmākamaiśvaryyaṃ vai duṣṭeṣṭārthasiddhaye |evamuktaḥ sa devo'smai bhuktimuktiprasiddhaye || 28||

किञ्चिद् विचार्य भगवान् षडक्षरमुपादिशत् ।एकैकं वर्णविन्यासं क्रमाच्चाङ्गानि षट् पुनः ॥ २९॥

kiñcid vicārya bhagavān ṣaḍakṣaramupādiśat |ekaikaṃ varṇavinyāsaṃ kramāccāṅgāni ṣaṭ punaḥ || 29||

तद्विधिं विधये प्रादात् पञ्चमन्त्राक्षराणि च ।रहस्यं देवदेवोऽपि तं मिथः समबोधयत् ॥ ३०॥

tadvidhiṃ vidhaye prādāt pañcamantrākṣarāṇi ca |rahasyaṃ devadevo'pi taṃ mithaḥ samabodhayat || 30||

तस्य तत्प्राप्तिमात्रेण तदानीमेव तत्फलम् ।सर्वाधिपत्यं सर्वज्ञं भावोऽप्यस्याभवन् तदा ॥ ३१॥

tasya tatprāptimātreṇa tadānīmeva tatphalam |sarvādhipatyaṃ sarvajñaṃ bhāvo'pyasyābhavan tadā || 31||

किं चास्य भगवत्त्वं च यदिष्टं तदभूदपि ।सर्वेश्वरप्रसादेन तपसा किं न लभ्यते ॥ ३२॥

kiṃ cāsya bhagavattvaṃ ca yadiṣṭaṃ tadabhūdapi |sarveśvaraprasādena tapasā kiṃ na labhyate || 32||

मुनीनामपि सर्वेषां तदा ब्रह्मा तदाज्ञया ।उपादिदेश तत्सर्वं ततस्तु विष्णुरब्रवीत् ॥ ३३॥

munīnāmapi sarveṣāṃ tadā brahmā tadājñayā |upādideśa tatsarvaṃ tatastu viṣṇurabravīt || 33||

ऋषिर्भवास्य मन्त्रस्य त्वं ब्रह्मन् सर्वमन्त्रवित् ।रामोऽहं देवता छन्दो गायत्री छन्दसां परा ॥ ३४॥

ṛṣirbhavāsya mantrasya tvaṃ brahman sarvamantravit |rāmo'haṃ devatā chando gāyatrī chandasāṃ parā || 34||

मान्तो यान्तो भवेद्वीजं सर्वमाद्यफलप्रदम् ।नमः शक्तितयोद्दिष्टो नमोऽन्तो मन्त्रनायकः ॥ ३५॥

mānto yānto bhavedvījaṃ sarvamādyaphalapradam |namaḥ śaktitayoddiṣṭo namo'nto mantranāyakaḥ || 35||

रामाय मध्यमो ब्रह्मन् तस्मै सर्वं निवेदयेत् ।इह भुक्तिश्च मुक्तिश्च देहान्ते सम्भविष्यति ॥ ३६॥

rāmāya madhyamo brahman tasmai sarvaṃ nivedayet |iha bhuktiśca muktiśca dehānte sambhaviṣyati || 36||

यदन्यदप्यभीष्टं स्यात् तत्प्रसादात् प्रजायते ।अनुतिष्ठादरेणैव निरन्तरमनन्यधीः ॥ ३७॥

yadanyadapyabhīṣṭaṃ syāt tatprasādāt prajāyate |anutiṣṭhādareṇaiva nirantaramananyadhīḥ || 37||

चिरं मद्गतचित्तस्तु मामेवाराधयेच्चिरम् ।मामेव मनसा ध्यायन् मामेवैष्यसि नान्यथा ॥ ३८॥

ciraṃ madgatacittastu māmevārādhayecciram |māmeva manasā dhyāyan māmevaiṣyasi nānyathā || 38||

तत्र तदेतद् विस्तार्य्य शिष्येभ्यो ब्रूहि गौरवम् ।इत्युक्त्वान्तर्दधे देवस्तत्रैव कमलेक्षणः ॥ ३९॥

tatra tadetad vistāryya śiṣyebhyo brūhi gauravam |ityuktvāntardadhe devastatraiva kamalekṣaṇaḥ || 39||

प्रजापतिश्च भगवान् मुनिभिः सार्द्धमन्वहम् ।अन्वतिष्ठद् विधानेन निक्षिप्याज्ञां सिरस्यथ ॥ ४०॥

prajāpatiśca bhagavān munibhiḥ sārddhamanvaham |anvatiṣṭhad vidhānena nikṣipyājñāṃ sirasyatha || 40||

इति रामषडक्षरमन्त्रोपदेशः सम्पूर्णः ।इत्यगस्त्यसंहितायां परमरहस्ये ब्रह्मणा षडक्षरमन्त्रग्रहणं नाम चतुर्थोऽध्यायः ॥ ४॥

iti rāmaṣaḍakṣaramantropadeśaḥ sampūrṇaḥ |ityagastyasaṃhitāyāṃ paramarahasye brahmaṇā ṣaḍakṣaramantragrahaṇaṃ nāma caturtho'dhyāyaḥ || 4||

रं रामाय नमः ।ॐ रामाय नमः ।

raṃ rāmāya namaḥ |oṃ rāmāya namaḥ |