भद्रगिरिपतिसंस्तुतिः Bhadragiripati Samstuti

धरणीतनया रमणी कमनीय सीताङ्क मनोहररूप हरे ।भरताग्रज राघव दाशरथे विजयी भव भद्रगिरीन्द्रपते ॥ १॥

dharaṇītanayā ramaṇī kamanīya sītāṅka manohararūpa hare |bharatāgraja rāghava dāśarathe vijayī bhava bhadragirīndrapate || 1||

बुधलक्षणलक्षण सर्वविलक्षण लक्षणपूर्वज राम हरे ।भवपाशविनाशक हे नृहरे विजयी भव भद्रगिरीन्द्रपते ॥ २॥

budhalakṣaṇalakṣaṇa sarvavilakṣaṇa lakṣaṇapūrvaja rāma hare |bhavapāśavināśaka he nṛhare vijayī bhava bhadragirīndrapate || 2||

धरचक्र धनुश्शरदीप्त चतुष्करचक्रभवाद्यभवादिविभो ।परचक्रभयङ्कर हे भगवन् विजयी भव भद्रगिरीन्द्रपते ॥ ३॥

dharacakra dhanuśśaradīpta catuṣkaracakrabhavādyabhavādivibho |paracakrabhayaṅkara he bhagavan vijayī bhava bhadragirīndrapate || 3||

अधिनीरजजन्मसुरेशमुनीन्द्रविलक्षणलक्षणदक्षपते ।नवकन्धरसुन्दरदिव्यतनो विजयी भव भद्रगिरीन्द्रपते ॥ ४॥

adhinīrajajanmasureśamunīndravilakṣaṇalakṣaṇadakṣapate |navakandharasundaradivyatano vijayī bhava bhadragirīndrapate || 4||

सततः प्रततः प्रचरैः करुणा भरणै स्तव दिग्विसरैर्नमित ।स्मरणाभिरतं भवतं सततं कुरु मामिह भद्रगिरीन्द्रपते ॥ ५॥

satataḥ pratataḥ pracaraiḥ karuṇā bharaṇai stava digvisarairnamita |smaraṇābhirataṃ bhavataṃ satataṃ kuru māmiha bhadragirīndrapate || 5||

सचतुर्मुखषण्मुखपञ्चमुख प्रमुखाखिलदैवतमौलिमणे ।शरणागतवत्सल सारनिधे परिपालय मां वृषशैलपते ॥ ६॥

sacaturmukhaṣaṇmukhapañcamukha pramukhākhiladaivatamaulimaṇe |śaraṇāgatavatsala sāranidhe paripālaya māṃ vṛṣaśailapate || 6||

अभिरामगुणाकर दाशरथे जगदेकदनुर्धर धीरमते ।रघुनायक राम रमेश विभो वरदोभव देव दयाजलधे ॥ ७॥

abhirāmaguṇākara dāśarathe jagadekadanurdhara dhīramate |raghunāyaka rāma rameśa vibho varadobhava deva dayājaladhe || 7||

इति भद्रगिरिपति संस्तुतिः समाप्ता ।

iti bhadragiripati saṃstutiḥ samāptā |