राधाष्टोत्तरशतनामस्तोत्रम् Shriradhashtottarashatanamastotram

अथास्याः सम्प्रवक्ष्यामि नाम्नामष्टोत्तरं शतम् ।यस्य सङ्कीर्तनादेव श्रीकृष्णं वशयेद्ध्रुवम् ॥ १॥

athāsyāḥ sampravakṣyāmi nāmnāmaṣṭottaraṃ śatam |yasya saṅkīrtanādeva śrīkṛṣṇaṃ vaśayeddhruvam || 1||

राधिका सुन्दरी गोपी कृष्णसङ्गमकारिणी ।चञ्चलाक्षी कुरङ्गाक्षी गान्धर्वी वृषभानुजा ॥ २॥

rādhikā sundarī gopī kṛṣṇasaṅgamakāriṇī |cañcalākṣī kuraṅgākṣī gāndharvī vṛṣabhānujā || 2||

वीणापाणिः स्मितमुखी रक्ताशोकलतालया ।गोवर्धनचरी गोपी गोपीवेषमनोहरा ॥ ३॥

vīṇāpāṇiḥ smitamukhī raktāśokalatālayā |govardhanacarī gopī gopīveṣamanoharā || 3||

चन्द्रावलीसपत्नी च दर्पणस्था कलावती ।कृपावती सुप्रतीका तरुणी हृदयङ्गमा ॥ ४॥

candrāvalīsapatnī ca darpaṇasthā kalāvatī |kṛpāvatī supratīkā taruṇī hṛdayaṅgamā || 4||

कृष्णप्रिया कृष्णसखी विपरीतरतिप्रिया ।प्रवीणा सुरतप्रीता चन्द्रास्या चारुविग्रहा ॥ ५॥

kṛṣṇapriyā kṛṣṇasakhī viparītaratipriyā |pravīṇā surataprītā candrāsyā cāruvigrahā || 5||

केकराक्षा हरेः कान्ता महालक्ष्मीः सुकेशिनी ।सङ्केतवटसंस्थाना कमनीया च कामिनी ॥ ६॥

kekarākṣā hareḥ kāntā mahālakṣmīḥ sukeśinī |saṅketavaṭasaṃsthānā kamanīyā ca kāminī || 6||

वृषभानुसुता राधा किशोरी ललिता लता ।विद्युद्वल्ली काञ्चनाभा कुमारी मुग्धवेशिनी ॥ ७॥

vṛṣabhānusutā rādhā kiśorī lalitā latā |vidyudvallī kāñcanābhā kumārī mugdhaveśinī || 7||

केशिनी केशवसखी नवनीतैकविक्रया ।षोडशाब्दा कलापूर्णा जारिणी जारसङ्गिनी ॥ ८॥

keśinī keśavasakhī navanītaikavikrayā |ṣoḍaśābdā kalāpūrṇā jāriṇī jārasaṅginī || 8||

हर्षिणी वर्षिणी वीरा धीरा धाराधरा धृतिः ।यौवनस्था वनस्था च मधुरा मधुराकृतिः ॥ ९॥

harṣiṇī varṣiṇī vīrā dhīrā dhārādharā dhṛtiḥ |yauvanasthā vanasthā ca madhurā madhurākṛtiḥ || 9||

वृषभानुपुरावासा मानलीलाविशारदा ।दानलीला दानदात्री दण्डहस्ता भ्रुवोन्नता ॥ १०॥

vṛṣabhānupurāvāsā mānalīlāviśāradā |dānalīlā dānadātrī daṇḍahastā bhruvonnatā || 10||

सुस्तनी मधुरास्या च बिम्बोष्ठी पञ्चमस्वरा ।सङ्गीतकुशला सेव्या कृष्णवश्यत्वकारिणी ॥ ११॥

sustanī madhurāsyā ca bimboṣṭhī pañcamasvarā |saṅgītakuśalā sevyā kṛṣṇavaśyatvakāriṇī || 11||

तारिणी हारिणी ह्रीला शीला लीला ललामिका ।गोपाली दधिविक्रेत्री प्रौढा मुग्धा च मध्यका ॥ १२॥

tāriṇī hāriṇī hrīlā śīlā līlā lalāmikā |gopālī dadhivikretrī prauḍhā mugdhā ca madhyakā || 12||

स्वाधीनपतिका चोक्ता खण्डिता याऽभिसारिका ।रसिका रसिनी रस्या रसनास्त्रैकशेवधिः ॥ १३॥

svādhīnapatikā coktā khaṇḍitā yā'bhisārikā |rasikā rasinī rasyā rasanāstraikaśevadhiḥ || 13||

पालिका लालिका लज्जा लालसा ललनामणिः ।बहुरूपा सुरूपा च सुप्रसन्ना महामतिः ॥ १४॥

pālikā lālikā lajjā lālasā lalanāmaṇiḥ |bahurūpā surūpā ca suprasannā mahāmatiḥ || 14||

मरालगमना मत्ता मन्त्रिणी मन्त्रनायिका ।मन्त्रराजैकसंसेव्या मन्त्रराजैकसिद्धिदा ॥ १५॥

marālagamanā mattā mantriṇī mantranāyikā |mantrarājaikasaṃsevyā mantrarājaikasiddhidā || 15||

अष्टादशाक्षरफला अष्टाक्षरनिषेविता ।इत्येतद्राधिकादेव्या नाम्नामष्टोत्तरशतम् ॥ १६॥

aṣṭādaśākṣaraphalā aṣṭākṣaraniṣevitā |ityetadrādhikādevyā nāmnāmaṣṭottaraśatam || 16||

कीर्तयेत्प्रातरुत्थाय कृष्णवश्यत्वसिद्धये ।एकैकनामोच्चारेण वशी भवति केशवः ॥ १७॥

kīrtayetprātarutthāya kṛṣṇavaśyatvasiddhaye |ekaikanāmoccāreṇa vaśī bhavati keśavaḥ || 17||

वदने चैव कण्ठे च बाह्वोरुरसि चोदरे ।पादयोश्च क्रमेणास्या न्यसेन्मन्त्रान्पृथक्पृथक् ॥ १८॥

vadane caiva kaṇṭhe ca bāhvorurasi codare |pādayośca krameṇāsyā nyasenmantrānpṛthakpṛthak || 18||

इत्यूर्ध्वाम्नाये राधाष्टोत्तरशतनामकथनं नाम प्रथमः पटलः ॥॥ ॐ तत्सत् ॥

ityūrdhvāmnāye rādhāṣṭottaraśatanāmakathanaṃ nāma prathamaḥ paṭalaḥ |||| oṃ tatsat ||