विश्वकर्माष्टकम् २ Shrivishvakarmashtakam 2

आदिरूप नमस्तुभ्यं नमस्तुभ्यं पितामह ।विराटाख्य नमस्तुभ्यं विश्वकर्मन्नमोनमः ॥ १॥

ādirūpa namastubhyaṃ namastubhyaṃ pitāmaha |virāṭākhya namastubhyaṃ viśvakarmannamonamaḥ || 1||

आकृतिकल्पनानाथस्त्रिनेत्री ज्ञाननायकः ।सर्वसिद्धिप्रदाता त्वं विश्वकर्मन्नमोनमः ॥ २॥

ākṛtikalpanānāthastrinetrī jñānanāyakaḥ |sarvasiddhipradātā tvaṃ viśvakarmannamonamaḥ || 2||

पुस्तकं ज्ञानसूत्रं च कम्बी सूत्रं कमण्डलुम् ।धृत्वा संमोहनं देव विश्वकर्मन्नमोनमः ॥ ३॥

pustakaṃ jñānasūtraṃ ca kambī sūtraṃ kamaṇḍalum |dhṛtvā saṃmohanaṃ deva viśvakarmannamonamaḥ || 3||

विश्वात्मा भूतरूपेण नानाकष्टसंहारक ।तारकानादिसंहाराद्विश्वकर्मन्नमोनमः ॥ ४॥

viśvātmā bhūtarūpeṇa nānākaṣṭasaṃhāraka |tārakānādisaṃhārādviśvakarmannamonamaḥ || 4||

ब्रह्माण्डाखिलदेवानां स्थानं स्वर्भूतलं तलम् ।लीलया रचितं येन विश्वरूपाय ते नमः ॥ ५॥

brahmāṇḍākhiladevānāṃ sthānaṃ svarbhūtalaṃ talam |līlayā racitaṃ yena viśvarūpāya te namaḥ || 5||

विश्वव्यापिन्नमस्तुभ्यं त्र्यम्बकं हंसवाहनम् ।सर्वक्षेत्रनिवासाख्यं विश्वकर्मन्नमोनमः ॥ ६॥

viśvavyāpinnamastubhyaṃ tryambakaṃ haṃsavāhanam |sarvakṣetranivāsākhyaṃ viśvakarmannamonamaḥ || 6||

निराभासाय नित्याय सत्यज्ञानान्तरात्मने ।विशुद्धाय विदूराय विश्वकर्मन्नमोनमः ॥ ७॥

nirābhāsāya nityāya satyajñānāntarātmane |viśuddhāya vidūrāya viśvakarmannamonamaḥ || 7||

नमो वेदान्तवेद्याय वेदमूलनिवासिने ।नमो विविक्तचेष्टाय विश्वकर्मन्नमोनमः ॥ ८॥

namo vedāntavedyāya vedamūlanivāsine |namo viviktaceṣṭāya viśvakarmannamonamaḥ || 8||

यो नरः पठते नित्यं विश्वकर्माष्टकमिदम् ।धनं धर्मं च पुत्रश्च लभेदान्ते परां गतिम् ॥ ९॥

yo naraḥ paṭhate nityaṃ viśvakarmāṣṭakamidam |dhanaṃ dharmaṃ ca putraśca labhedānte parāṃ gatim || 9||

इति विश्वकर्माष्टकं सम्पूर्णम् ।

iti viśvakarmāṣṭakaṃ sampūrṇam |