ललितादेवीस्तोत्रम् Brahmadibhih Kritam Shri Lalitadevi Stotram

ब्रह्माद्या ऊचुः ।नमो नमस्ते जगदेकनाथे नमो नमः श्रीत्रिपुराभिधाने ।नमो नमो भण्डमहासुरघ्ने नमोऽस्तु कामेश्वरि वामकेशि ॥ ११॥

brahmādyā ūcuḥ |namo namaste jagadekanāthe namo namaḥ śrītripurābhidhāne |namo namo bhaṇḍamahāsuraghne namo'stu kāmeśvari vāmakeśi || 11||

चिन्तामणे चिन्तितदानदक्षेऽचिन्तये चिराकारतरङ्गमाले ।चित्राम्बरे चित्रजगत्प्रसूते चित्राख्यनित्ये सुखदे नमस्ते ॥ १२॥

cintāmaṇe cintitadānadakṣe'cintaye cirākārataraṅgamāle |citrāmbare citrajagatprasūte citrākhyanitye sukhade namaste || 12||

मोक्षप्रदे मुग्धशशाङ्कचूडे मुग्धस्मिते मोहनभेददक्षे ।मुद्रेश्वरीचर्चितराजतन्त्रे मुद्राप्रिये देवि नमो नमस्ते ॥ १३॥

mokṣaprade mugdhaśaśāṅkacūḍe mugdhasmite mohanabhedadakṣe |mudreśvarīcarcitarājatantre mudrāpriye devi namo namaste || 13||

क्रूरान्तकध्वंसिनि कोमलाङ्गे कोपेषु कालीं तनुमादधाने ।क्रोडानने पालितसैन्यचक्रे क्रोडीकृताशेषभये नमस्ते ॥ १४॥

krūrāntakadhvaṃsini komalāṅge kopeṣu kālīṃ tanumādadhāne |kroḍānane pālitasainyacakre kroḍīkṛtāśeṣabhaye namaste || 14||

षडङ्गदेवीपरिवारकृष्णे षडङ्गयुक्तश्रुतिवाक्यमृग्ये ।षट्चक्रसंस्थे च षडूर्मियुक्ते षड्भावरूपे ललिते नमस्ते ॥ १५॥

ṣaḍaṅgadevīparivārakṛṣṇe ṣaḍaṅgayuktaśrutivākyamṛgye |ṣaṭcakrasaṃsthe ca ṣaḍūrmiyukte ṣaḍbhāvarūpe lalite namaste || 15||

कामे शिवे मुख्यसमस्तनित्ये कान्तासनान्ते कमलायताक्षि ।कामप्रदे कामिनि कामशम्भोः काम्ये कलानामधिपे नमस्ते ॥ १६॥

kāme śive mukhyasamastanitye kāntāsanānte kamalāyatākṣi |kāmaprade kāmini kāmaśambhoḥ kāmye kalānāmadhipe namaste || 16||

दिव्यौषधाद्ये नगरौघरूपे दिव्ये दिनाधीशसहस्रकान्ते ।देदीप्यमाने दयया सनाथे देवाधिदेवप्रमदे नमस्ते ॥ १७॥

divyauṣadhādye nagaraugharūpe divye dinādhīśasahasrakānte |dedīpyamāne dayayā sanāthe devādhidevapramade namaste || 17||

सदाणिमाद्यष्टकसेवनीये सदाशिवात्मोज्ज्वलमञ्चवासे ।सभ्ये सदेकालयपादपूज्ये सवित्रि लोकस्य नमो नमस्ते ॥ १८॥

sadāṇimādyaṣṭakasevanīye sadāśivātmojjvalamañcavāse |sabhye sadekālayapādapūjye savitri lokasya namo namaste || 18||

ब्राह्मीमुखैर्मातृगणैर्निषेव्ये ब्रह्मप्रिये ब्राह्मणबन्धभेत्रि ।ब्रह्मामृतस्रोतसि राजहंसि ब्रह्मेश्वरि श्रीललिते नमस्ते ॥ १९॥

brāhmīmukhairmātṛgaṇairniṣevye brahmapriye brāhmaṇabandhabhetri |brahmāmṛtasrotasi rājahaṃsi brahmeśvari śrīlalite namaste || 19||

सङ्क्षोभिणीमुख्यसमस्तमुद्रासंसेविते संसरणप्रहन्त्रि ।संसारलीलाकृतिसारसाक्षि सदा नमस्ते ललितेऽधिनाथे ।नित्ये कलाषोडशकेन नामाकर्षिण्यधीशि प्रमथेन सेव्ये ॥ २०॥

saṅkṣobhiṇīmukhyasamastamudrāsaṃsevite saṃsaraṇaprahantri |saṃsāralīlākṛtisārasākṣi sadā namaste lalite'dhināthe |nitye kalāṣoḍaśakena nāmākarṣiṇyadhīśi pramathena sevye || 20||

नित्ये निरातङ्कदयाप्रपञ्चे नीलालकश्रेणि नमो नमस्ते ।अनङ्गपुष्पादिभिरुन्नदाभिरनङ्गदेवीभिरजस्रसेव्ये ।अभव्यहन्त्र्यक्षरराशिरूपे हतारिवर्गे ललिते नमस्ते ॥ २१॥

nitye nirātaṅkadayāprapañce nīlālakaśreṇi namo namaste |anaṅgapuṣpādibhirunnadābhiranaṅgadevībhirajasrasevye |abhavyahantryakṣararāśirūpe hatārivarge lalite namaste || 21||

सङ्क्षोभिणीमुख्यचतुर्दशार्चिर्मालावृतोदारमहाप्रदीप्ते ।आत्मानमाबिभ्रति विभ्रमाढ्ये शुभ्राश्रये शुभ्रपदे नमस्ते ॥ २२॥

saṅkṣobhiṇīmukhyacaturdaśārcirmālāvṛtodāramahāpradīpte |ātmānamābibhrati vibhramāḍhye śubhrāśraye śubhrapade namaste || 22||

सशर्वसिद्धादिकशक्तिवन्द्ये सर्वज्ञविज्ञातपदारविन्दे ।सर्वाधिके सर्वगते समस्तसिद्धिप्रदे श्रीललिते नमस्ते ॥ २३॥

saśarvasiddhādikaśaktivandye sarvajñavijñātapadāravinde |sarvādhike sarvagate samastasiddhiprade śrīlalite namaste || 23||

सर्वज्ञजातप्रथमाभिरन्यदेवीभिरप्याश्रितचक्रभूमे ।सर्वामराकाङ्क्षितपूरयित्रि सर्वस्य लोकस्य सवित्रि पाहि ॥ २४॥

sarvajñajātaprathamābhiranyadevībhirapyāśritacakrabhūme |sarvāmarākāṅkṣitapūrayitri sarvasya lokasya savitri pāhi || 24||

वन्दे वशिन्यादिकवाग्विभूते वर्द्धिष्णुचक्रद्युतिवाहवाहे ।बलाहकश्यामकचे वचोऽब्धे वरप्रदे सुन्दरि पाहि विश्वम् ॥ २५॥

vande vaśinyādikavāgvibhūte varddhiṣṇucakradyutivāhavāhe |balāhakaśyāmakace vaco'bdhe varaprade sundari pāhi viśvam || 25||

बाणादिदिव्यायुधसार्वभौमे भण्डासुरानीकवनान्तदावे ।अत्युग्रतेजोज्ज्वलिताम्बुराशे प्रसेव्यमाने परितो नमस्ते ॥ २६॥

bāṇādidivyāyudhasārvabhaume bhaṇḍāsurānīkavanāntadāve |atyugratejojjvalitāmburāśe prasevyamāne parito namaste || 26||

कामेशि वज्रेशि भगेश्यरूपे कन्ये कले कालविलोपदक्षे ।कथाविशेषीकृतदैत्यसैन्ये कामेशयान्ते कमले नमस्ते ॥ २७॥

kāmeśi vajreśi bhageśyarūpe kanye kale kālavilopadakṣe |kathāviśeṣīkṛtadaityasainye kāmeśayānte kamale namaste || 27||

बिन्दुस्थिते बिन्दुकलैकरूपे बिन्द्वात्मिके बृंहितचित्प्रकाशे ।बृहत्कुचाम्भोजविलोलहारे बृहत्प्रभावे ललिते नमस्ते ॥ २८॥

bindusthite bindukalaikarūpe bindvātmike bṛṃhitacitprakāśe |bṛhatkucāmbhojavilolahāre bṛhatprabhāve lalite namaste || 28||

कामेश्वरोत्सङ्गसदानिवासे कालात्मिके देवि कृतानुकम्पे ।कल्पावसानोत्थितकालिरूपे कामप्रदे कल्पलते नमस्ते ॥ २९॥

kāmeśvarotsaṅgasadānivāse kālātmike devi kṛtānukampe |kalpāvasānotthitakālirūpe kāmaprade kalpalate namaste || 29||

सवारुणे सान्द्रसुधांशुशीते सारङ्गशावाक्षि सरोजवक्त्रे ।सारस्य सारस्य सदैकभूमे समस्तविद्येश्वरि सन्नतिस्ते ॥ ३०॥

savāruṇe sāndrasudhāṃśuśīte sāraṅgaśāvākṣi sarojavaktre |sārasya sārasya sadaikabhūme samastavidyeśvari sannatiste || 30||

तव प्रभावेण चिदग्निजायां श्रीशम्भुनाथप्रकडीकृतायाः ।भण्डासुराद्याः समरे प्रचण्डा हता जगत्कण्टकतां प्रयाताः ॥ ३१॥

tava prabhāveṇa cidagnijāyāṃ śrīśambhunāthaprakaḍīkṛtāyāḥ |bhaṇḍāsurādyāḥ samare pracaṇḍā hatā jagatkaṇṭakatāṃ prayātāḥ || 31||

नव्यानि सर्वाणि वपूंषि कृत्वा हि सान्द्रकारुण्यसुधाप्लवैर्न्नः ।त्वया समस्तं भुवनं सहर्षं सुजीवितं सुन्दरि सभ्यलभ्ये ॥ ३२॥

navyāni sarvāṇi vapūṃṣi kṛtvā hi sāndrakāruṇyasudhāplavairnnaḥ |tvayā samastaṃ bhuvanaṃ saharṣaṃ sujīvitaṃ sundari sabhyalabhye || 32||

इति ब्रह्माण्डपुराणे उत्तरभागे त्रिंशाध्यायान्तर्गतंब्रह्मादिभिः कृतं श्रीललितादेवीस्तोत्रं समाप्तम् ।ब्रह्माण्डपुराण । उत्तरभाग । ललिता । अध्याय ३०/११३०॥ब्रह्माण्डपुराण । उत्तरभाग । ललिता । अध्याय ३०/११-३०॥

iti brahmāṇḍapurāṇe uttarabhāge triṃśādhyāyāntargataṃbrahmādibhiḥ kṛtaṃ śrīlalitādevīstotraṃ samāptam |brahmāṇḍapurāṇa | uttarabhāga | lalitā | adhyāya 30/1130||brahmāṇḍapurāṇa | uttarabhāga | lalitā | adhyāya 30/11-30||