कमलात्रिशती Kamala Trishati

गङ्गाधरमखिविरचिता ।परमाभरणं विष्णोर्वक्षसि सा सागरेन्द्रवरपुत्री ।या मूर्तिर्मती काले क्षमा जनानां कृतापराधानाम् ॥ १ ॥

gaṅgādharamakhiviracitā |paramābharaṇaṃ viṣṇorvakṣasi sā sāgarendravaraputrī |yā mūrtirmatī kāle kṣamā janānāṃ kṛtāparādhānām || 1 ||

सा नः श्रेयो दद्यात् कमला कमलासनादिजननीं याम् ।संप्राप्य सहचरीं हरिरवति जगन्त्यनाकुलं सततम् ॥ २ ॥

sā naḥ śreyo dadyāt kamalā kamalāsanādijananīṃ yām |saṃprāpya sahacarīṃ hariravati jagantyanākulaṃ satatam || 2 ||

नित्यश्रेयोदाने ख्याता या हरिगृहस्य सर्वस्वम् ।श्रुतिमौलिस्तुतविभवा सा भातु पुरः सदास्माकम् ॥ ३ ॥

nityaśreyodāne khyātā yā harigṛhasya sarvasvam |śrutimaulistutavibhavā sā bhātu puraḥ sadāsmākam || 3 ||

विष्णुक्रीडालोला विख्याता दीनरक्षणे लक्ष्मीः ।जननी नः स्फुरतु सदा तेन वयं किल कृतार्थाः स्मः ॥ ४ ॥

viṣṇukrīḍālolā vikhyātā dīnarakṣaṇe lakṣmīḥ |jananī naḥ sphuratu sadā tena vayaṃ kila kṛtārthāḥ smaḥ || 4 ||

निर्वाणाङ्कुरजननी काले सा सार्वभौमपददोग्ध्री ।निरसतिमोहसमूहा मम दैवतमादृतं गुरुभिः ॥ ५ ॥

nirvāṇāṅkurajananī kāle sā sārvabhaumapadadogdhrī |nirasatimohasamūhā mama daivatamādṛtaṃ gurubhiḥ || 5 ||

विष्णोर्वक्षसि लसिता शीतमयूखस्य सोदरी कमला ।कमलायतनयना नः पातु सदा पापराशिभ्यः ॥ ६ ॥

viṣṇorvakṣasi lasitā śītamayūkhasya sodarī kamalā |kamalāyatanayanā naḥ pātu sadā pāparāśibhyaḥ || 6 ||

कविपरिषदा च वेदैः नित्यं स्तुतनिजमहोदया कमला ।मनसि मम संनिधत्तां त्वमितानन्दाय लोकनाथेन ॥ ७ ॥

kavipariṣadā ca vedaiḥ nityaṃ stutanijamahodayā kamalā |manasi mama saṃnidhattāṃ tvamitānandāya lokanāthena || 7 ||

दुग्धोदधितनया सा दुरितनिहन्त्री कृतप्रणामानाम् ।आनन्दपदविधात्री पत्या साकं पदे पदे लोके ॥ ८ ॥

dugdhodadhitanayā sā duritanihantrī kṛtapraṇāmānām |ānandapadavidhātrī patyā sākaṃ pade pade loke || 8 ||

मन्मथजननी सा मामवतु सरोजा(क्ष)गेहिनी कमला ।यामाराध्य बुधेन्द्रा विशन्ति परमं तु तत् पदं विष्णोः ॥ ९ ॥

manmathajananī sā māmavatu sarojā(kṣa)gehinī kamalā |yāmārādhya budhendrā viśanti paramaṃ tu tat padaṃ viṣṇoḥ || 9 ||

सत्सूक्तिकृतिविधात्री नमतामम्बा त्रिलोक्यास्तु ।नित्यप्रसादभूम्ना रक्षति मामादरात् कमला ॥ १० ॥

satsūktikṛtividhātrī namatāmambā trilokyāstu |nityaprasādabhūmnā rakṣati māmādarāt kamalā || 10 ||

मम सूक्तिरञ्जलिपुटः प्रणतिश्चानेकसंख्याका ।कुतुकात् क्षीरोदसुताममितानन्दाय गाहते कमलाम् ॥ ११ ॥

mama sūktirañjalipuṭaḥ praṇatiścānekasaṃkhyākā |kutukāt kṣīrodasutāmamitānandāya gāhate kamalām || 11 ||

या पारमार्थ्यसरणिः सा कमला निश्चिता वेदैः ।सैषा हि जगन्माता संसृतितापापहन्त्री च ॥ १२ ॥

yā pāramārthyasaraṇiḥ sā kamalā niścitā vedaiḥ |saiṣā hi jaganmātā saṃsṛtitāpāpahantrī ca || 12 ||

मन्दस्मितमधुराननममन्दसंतोषदायि भजतां तत् ।कमलारूपं तेजो विभातु नित्यं मदीयहृत्कमले ॥ १३ ॥

mandasmitamadhurānanamamandasaṃtoṣadāyi bhajatāṃ tat |kamalārūpaṃ tejo vibhātu nityaṃ madīyahṛtkamale || 13 ||

काले क्षपयति कमला कटाक्षधाट्या हि मामकं दुरितम् ।अत एवाश्रितरक्षणदीक्षेत्येवं जनो वदति ॥ १४ ॥

kāle kṣapayati kamalā kaṭākṣadhāṭyā hi māmakaṃ duritam |ata evāśritarakṣaṇadīkṣetyevaṃ jano vadati || 14 ||

नवनवहर्म्यविधात्री नाकिकिरीटार्चिता च सा देवी ।ज्योतिर्मण्डललसिता मुनिहृदयाब्जासना च सद्गतिदा ॥ १५ ॥

navanavaharmyavidhātrī nākikirīṭārcitā ca sā devī |jyotirmaṇḍalalasitā munihṛdayābjāsanā ca sadgatidā || 15 ||

संवीक्ष्य जलधितनयां भूयो भूयः प्रणम्य भक्तगणः ।निरसितदुरितौघः सन् स्तौति मुदा मोक्षसिद्धये कमलाम् ॥ १६ ॥

saṃvīkṣya jaladhitanayāṃ bhūyo bhūyaḥ praṇamya bhaktagaṇaḥ |nirasitaduritaughaḥ san stauti mudā mokṣasiddhaye kamalām || 16 ||

राकानिशीव देव्यां दृष्टायां भक्तगणवाणी ।भजते जलनिधिशैलीं साङ्गोपाङ्गं कृतानन्दा ॥ १७ ॥

rākāniśīva devyāṃ dṛṣṭāyāṃ bhaktagaṇavāṇī |bhajate jalanidhiśailīṃ sāṅgopāṅgaṃ kṛtānandā || 17 ||

दुर्गतिभीत्या खिन्नः सोऽहं शरणं भजामि तां कमलाम् ।शरणार्थिनां हि रक्षाकृदिति ख्याता हि या लोके ॥ १८ ॥

durgatibhītyā khinnaḥ so'haṃ śaraṇaṃ bhajāmi tāṃ kamalām |śaraṇārthināṃ hi rakṣākṛditi khyātā hi yā loke || 18 ||

न हि कलयते हृदन्ते मन्दारं कामधेनुं वा ।यः सेवते मुकुन्दप्रियां श्रियं नित्यभावेन ॥ १९ ॥

na hi kalayate hṛdante mandāraṃ kāmadhenuṃ vā |yaḥ sevate mukundapriyāṃ śriyaṃ nityabhāvena || 19 ||

कैटभमर्दनमहिषीं ममाञ्जलिर्गाहतां काले ।न हि नाथनीयमत्र क्षमातले सा प्रसन्नास्तु ॥ २० ॥

kaiṭabhamardanamahiṣīṃ mamāñjalirgāhatāṃ kāle |na hi nāthanīyamatra kṣamātale sā prasannāstu || 20 ||

संतापपीडितं मामवतु सदा श्रीर्हरिप्रिया माता ।रक्षितवायसमुख्या कृपानिधिः पुण्यकृद्दृश्या ॥ २१ ॥

saṃtāpapīḍitaṃ māmavatu sadā śrīrharipriyā mātā |rakṣitavāyasamukhyā kṛpānidhiḥ puṇyakṛddṛśyā || 21 ||

न हि केवलं प्रणामैः स्तुत्या भक्त्या समाराध्या ।सत्येन धर्मनिवहैर्भावेन च कमलगेहिनी कमला ॥ २२ ॥

na hi kevalaṃ praṇāmaiḥ stutyā bhaktyā samārādhyā |satyena dharmanivahairbhāvena ca kamalagehinī kamalā || 22 ||

कदाचित्कविलोकेऽप्यक्षीणानन्ददायिनी कमला ।रक्षतु कटाक्षकलिकाङ्कूरैर्भक्तानिहादरतः ॥ २३ ॥

kadācitkaviloke'pyakṣīṇānandadāyinī kamalā |rakṣatu kaṭākṣakalikāṅkūrairbhaktānihādarataḥ || 23 ||

कलिपापग्लपितानां मुरमर्दनदिव्यगेहिनी लक्ष्मीः ।राजति शरणं परमं वशीकृतेशा च विबुधगणसेव्या ॥ २४ ॥

kalipāpaglapitānāṃ muramardanadivyagehinī lakṣmīḥ |rājati śaraṇaṃ paramaṃ vaśīkṛteśā ca vibudhagaṇasevyā || 24 ||

नित्योल्लसदुरुमाला वक्षसि कमला हरेर्भाति ।निजतनुभासा द्योतितकौस्तुभमणिरम्बुधेस्तनया ॥ २५ ॥

nityollasadurumālā vakṣasi kamalā harerbhāti |nijatanubhāsā dyotitakaustubhamaṇirambudhestanayā || 25 ||

मातर्मङ्गलदायिन्यमरेन्द्रवधूसमर्चिताङ्घ्रियुगे ।मां पाह्यपायनिवहात् संततमकलक्षमामूर्ते ॥ २६ ॥

mātarmaṅgaladāyinyamarendravadhūsamarcitāṅghriyuge |māṃ pāhyapāyanivahāt saṃtatamakalakṣamāmūrte || 26 ||

यदि कलिता चोपेक्षा नश्येत् किल तावकी महती ।कीर्तिरतोऽम्ब कटाक्षैः परिषिञ्च मुदा मुहुः शीतैः ॥ २७ ॥

yadi kalitā copekṣā naśyet kila tāvakī mahatī |kīrtirato'mba kaṭākṣaiḥ pariṣiñca mudā muhuḥ śītaiḥ || 27 ||

धनधान्यसुतादिरुचिग्रस्तं मां पाहि कमले त्वम् ।तेनोर्जितकीर्तिः स्या मातस्त्वं सर्वरक्षिणी ख्याता ॥ २८ ॥

dhanadhānyasutādirucigrastaṃ māṃ pāhi kamale tvam |tenorjitakīrtiḥ syā mātastvaṃ sarvarakṣiṇī khyātā || 28 ||

तव पादाम्बुजयुगलध्यानं मातर्मदीयमघमाशु ।कबलीकरोति काले तेनाहं सिद्धसंकल्पः ॥ २९ ॥

tava pādāmbujayugaladhyānaṃ mātarmadīyamaghamāśu |kabalīkaroti kāle tenāhaṃ siddhasaṃkalpaḥ || 29 ||

अञ्जलिकलिका हि कृता यदि तस्यै मुरनिहन्तृदयितायै ।रसनाग्रे खेलनभाक् तस्य तु पुंसो गिरां देवी ॥ ३० ॥

añjalikalikā hi kṛtā yadi tasyai muranihantṛdayitāyai |rasanāgre khelanabhāk tasya tu puṃso girāṃ devī || 30 ||

मातस्तव मूर्तिरियं सुधामयी निश्चिता निपुणैः ।यत् तद्दर्शनभूम्ना निरस्ततापा बुधा भवन्त्यचिरात् ॥ ३१ ॥

mātastava mūrtiriyaṃ sudhāmayī niścitā nipuṇaiḥ |yat taddarśanabhūmnā nirastatāpā budhā bhavantyacirāt || 31 ||

कलितजगत्त्रयरक्षाभराणि मयि देवि संविधेहि मुदा ।त्वद्वीक्षणानि कमले तेनाहं सिद्धसंकल्पः ॥ ३२ ॥

kalitajagattrayarakṣābharāṇi mayi devi saṃvidhehi mudā |tvadvīkṣaṇāni kamale tenāhaṃ siddhasaṃkalpaḥ || 32 ||

वरदे मुरारिदयिते जयन्ति ते वीक्षणानि यानि दिवि ।संप्राप्य तानि मघवा विजितारिर्देवसंघवन्द्यश्च ॥ ३३ ॥

varade murāridayite jayanti te vīkṣaṇāni yāni divi |saṃprāpya tāni maghavā vijitārirdevasaṃghavandyaśca || 33 ||

मोहान्धकारभास्करमम्ब कटाक्षं विधेहि मयि कमले ।येनाप्तज्ञानकलाः स्तुवन्ति विबुधास्त्वदीयसदसि कलम् ॥ ३४ ॥

mohāndhakārabhāskaramamba kaṭākṣaṃ vidhehi mayi kamale |yenāptajñānakalāḥ stuvanti vibudhāstvadīyasadasi kalam || 34 ||

कामक्रोधादिमहासत्त्वनिरासं कृपासारात् ।कुरु मातर्मम संसृतिभीतिं च निराकुरु त्वमेवारात् ॥ ३५ ॥

kāmakrodhādimahāsattvanirāsaṃ kṛpāsārāt |kuru mātarmama saṃsṛtibhītiṃ ca nirākuru tvamevārāt || 35 ||

मूढानामपि हृद्यां कवितां दातुं यदीयपरिचर्या ।प्रभवति काले सा हि श्रीरम्बा नः प्रसन्नास्तु ॥ ३६ ॥

mūḍhānāmapi hṛdyāṃ kavitāṃ dātuṃ yadīyaparicaryā |prabhavati kāle sā hi śrīrambā naḥ prasannāstu || 36 ||

दिव्यक्षेत्रेषु बुधा दिनकरमध्ये च वेदमौलौ च ।यत्स्थानमिति वदन्ति श्रीरेषा भाति संश्रितहरिर्हि ॥ ३७ ॥

divyakṣetreṣu budhā dinakaramadhye ca vedamaulau ca |yatsthānamiti vadanti śrīreṣā bhāti saṃśritaharirhi || 37 ||

निजलीलाक्रान्तहरी रक्षति कमला कटाक्षधाट्या नः ।शरणार्थिनश्च काले विहगोरगपशुमुखानुर्व्याम् ॥ ३८ ॥

nijalīlākrāntaharī rakṣati kamalā kaṭākṣadhāṭyā naḥ |śaraṇārthinaśca kāle vihagoragapaśumukhānurvyām || 38 ||

समराङ्गणेषु जयदा त्रिदशानां मौलिभिर्मान्या ।आपदि रक्षणदक्षा सा कमला नः प्रसन्नास्तु ॥ ३९ ॥

samarāṅgaṇeṣu jayadā tridaśānāṃ maulibhirmānyā |āpadi rakṣaṇadakṣā sā kamalā naḥ prasannāstu || 39 ||

नित्यानन्दासनभाड् नवनिधिवन्द्या च सागरेन्द्रसुता ।विलसति माधववक्षसि पालितलोकत्रया च जननी नः ॥ ४० ॥

nityānandāsanabhāḍ navanidhivandyā ca sāgarendrasutā |vilasati mādhavavakṣasi pālitalokatrayā ca jananī naḥ || 40 ||

मुनिनुतनिजपरिपाटी वाग्धाटी दानलोलुपा भजताम् ।शिक्षितरिपुजनकोटी विलसति धृतशातकुम्भमयशाटी ॥ ४१ ॥

muninutanijaparipāṭī vāgdhāṭī dānalolupā bhajatām |śikṣitaripujanakoṭī vilasati dhṛtaśātakumbhamayaśāṭī || 41 ||

निखिलागमवेद्यपदा नित्यं सद्भिः समाराध्या ।संसृतिपाशनिहन्त्री या तस्यै चाञ्जलिः क्रियते ॥ ४२ ॥

nikhilāgamavedyapadā nityaṃ sadbhiḥ samārādhyā |saṃsṛtipāśanihantrī yā tasyai cāñjaliḥ kriyate || 42 ||

भूयांसि नमांसि मया भक्तेन कृतानि कमलजाङ्घ्रियुगे ।नित्यं लगन्तु तेन हि सर्वा राजन्ति संपदो मान्याः ॥ ४३ ॥

bhūyāṃsi namāṃsi mayā bhaktena kṛtāni kamalajāṅghriyuge |nityaṃ lagantu tena hi sarvā rājanti saṃpado mānyāḥ || 43 ||

नित्यं निर्मलरूपे बरदे वाराशिकन्यके मातः ।सद्गणरक्षणदीक्षे पाहीति वदन्तमाशु मां पाहि ॥ ४४ ॥

nityaṃ nirmalarūpe barade vārāśikanyake mātaḥ |sadgaṇarakṣaṇadīkṣe pāhīti vadantamāśu māṃ pāhi || 44 ||

भुवनजननि त्वमारात् कृतरक्षणसंततिः क्षमामूर्ते ।प्रतिवस्तु रमे कलितस्वरूपशक्त्या हि राजसे जगति ॥ ४५ ॥

bhuvanajanani tvamārāt kṛtarakṣaṇasaṃtatiḥ kṣamāmūrte |prativastu rame kalitasvarūpaśaktyā hi rājase jagati || 45 ||

जय जय कलशाब्धिसुते जय जय हरिवल्लभे रमे मातः ।प्रातरिति विबुधवर्याः पठन्ति नामानि ते हि मे गुरवः ॥ ४६ ॥

jaya jaya kalaśābdhisute jaya jaya harivallabhe rame mātaḥ |prātariti vibudhavaryāḥ paṭhanti nāmāni te hi me guravaḥ || 46 ||

नेत्ररुचिविजितशारदपद्मे पद्मे नमस्तुभ्यम् ।तेन वयं गतविपदः सा मुक्तिः करगता कलिता ॥ ४७ ॥

netrarucivijitaśāradapadme padme namastubhyam |tena vayaṃ gatavipadaḥ sā muktiḥ karagatā kalitā || 47 ||

सततं बद्धाञ्जलिपुटमुपास्महे तच्छुभप्रदं तेजः ।यत् कमलोदरनिलयं कमलाक्षप्रीतिवीचिकापूरम् ॥ ४८ ॥

satataṃ baddhāñjalipuṭamupāsmahe tacchubhapradaṃ tejaḥ |yat kamalodaranilayaṃ kamalākṣaprītivīcikāpūram || 48 ||

स्फुरतु मम वचसि कमले त्वदीयवैभवसुधाधारा ।नित्यं व्यक्तिं प्राप्ता धुतनुतजनखेदजालका महती ॥ ४९ ॥

sphuratu mama vacasi kamale tvadīyavaibhavasudhādhārā |nityaṃ vyaktiṃ prāptā dhutanutajanakhedajālakā mahatī || 49 ||

कमले तव नुतिविषये बुद्धिर्जाता हि मे सहसा ।तेन मम भागधेयं परिणतमित्येव नित्यसंतुष्टः ॥ ५० ॥

kamale tava nutiviṣaye buddhirjātā hi me sahasā |tena mama bhāgadheyaṃ pariṇatamityeva nityasaṃtuṣṭaḥ || 50 ||