लक्ष्मीस्तोत्रम् (इन्द्रकृतं ब्रह्मवैवर्तपुराणान्तर्गतम् नमः कमलवासिन्यै नारायण्यै नमो नमः) Indrakritam Lakshmi Stotram

नारायण उवाच ।सहस्रदलपद्मस्य कर्णिकावासिनीं पराम् ।शरत्पार्वणकोटीन्दुप्रभाजुष्टकरां वराम् ॥ १०॥

nārāyaṇa uvāca |sahasradalapadmasya karṇikāvāsinīṃ parām |śaratpārvaṇakoṭīnduprabhājuṣṭakarāṃ varām || 10||

स्वतेजसा प्रज्वलन्तीं सुखदृश्यां मनोहराम् ।प्रतप्तकाञ्चननिभां शोभां मूर्तिमतीं सतीम् ॥ ११॥

svatejasā prajvalantīṃ sukhadṛśyāṃ manoharām |prataptakāñcananibhāṃ śobhāṃ mūrtimatīṃ satīm || 11||

रत्नभूषणभूषाढ्यां शोभितां पीतवाससा ।ईषद्धास्यप्रसन्नास्यां रम्यां सुस्थिरयौवनाम् ॥ १२॥

ratnabhūṣaṇabhūṣāḍhyāṃ śobhitāṃ pītavāsasā |īṣaddhāsyaprasannāsyāṃ ramyāṃ susthirayauvanām || 12||

सर्वसम्पत्प्रदात्रीं च महालक्ष्मीं भजे शुभाम् ।ध्यानेनानेन तां ध्यात्वा चोपहारैस्सुसंयुतः ॥ १३॥

sarvasampatpradātrīṃ ca mahālakṣmīṃ bhaje śubhām |dhyānenānena tāṃ dhyātvā copahāraissusaṃyutaḥ || 13||

(इन्द्रः)सम्पूज्य ब्रह्मवाक्येन चोपहाराणि षोडश ।ददौ भक्त्या विधानेन प्रत्येकं मन्त्रपूर्वकम् ॥ १४॥

(indraḥ)sampūjya brahmavākyena copahārāṇi ṣoḍaśa |dadau bhaktyā vidhānena pratyekaṃ mantrapūrvakam || 14||

इन्द्र उवाच ।ॐ नमः कमलवासिन्यै नारायण्यै नमो नमः ।कृष्णप्रियायै सारायै पद्मायै च नमो नमः ॥ ५२॥

indra uvāca |oṃ namaḥ kamalavāsinyai nārāyaṇyai namo namaḥ |kṛṣṇapriyāyai sārāyai padmāyai ca namo namaḥ || 52||

पद्मपत्रेक्षणायै च पद्मास्यायै नमो नमः ।पद्मासनायै पद्मिन्यै वैष्णव्यै च नमो नमः ॥ ५३॥

padmapatrekṣaṇāyai ca padmāsyāyai namo namaḥ |padmāsanāyai padminyai vaiṣṇavyai ca namo namaḥ || 53||

सर्वसम्पत्स्वरूपायै सर्वदात्र्यै नमो नमः ।सुखदायै मोक्षदायै सिद्धिदायै नमो नमः ॥ ५४॥

sarvasampatsvarūpāyai sarvadātryai namo namaḥ |sukhadāyai mokṣadāyai siddhidāyai namo namaḥ || 54||

हरिभक्तिप्रदात्र्यै च हर्षदात्र्यै नमो नमः ।कृष्णवक्षस्थितायै च कृष्णेशायै नमो नमः ॥ ५५॥

haribhaktipradātryai ca harṣadātryai namo namaḥ |kṛṣṇavakṣasthitāyai ca kṛṣṇeśāyai namo namaḥ || 55||

कृष्णशोभास्वरूपायै रत्नाढ्यायै नमो नमः ।सम्पत्त्यधिष्ठातृदेव्यै महादेव्यै नमो नमः ॥ ५६॥

kṛṣṇaśobhāsvarūpāyai ratnāḍhyāyai namo namaḥ |sampattyadhiṣṭhātṛdevyai mahādevyai namo namaḥ || 56||

सस्याधिष्ठातृदेव्यै च सस्यलक्ष्म्यै नमो नमः ।नमो बुद्धिस्वरूपायै बुद्धिदायै नमो नमः ॥ ५७॥

sasyādhiṣṭhātṛdevyai ca sasyalakṣmyai namo namaḥ |namo buddhisvarūpāyai buddhidāyai namo namaḥ || 57||

वैकुण्ठे च महालक्ष्मीर्लक्ष्मीः क्षीरोदसागरे ।स्वर्गलक्ष्मीरिन्द्रगेहे राजलक्ष्मीर्नृपालये ॥ ५८॥

vaikuṇṭhe ca mahālakṣmīrlakṣmīḥ kṣīrodasāgare |svargalakṣmīrindragehe rājalakṣmīrnṛpālaye || 58||

गृहलक्ष्मीश्च गृहिणां गेहे च गृहदेवता ।सुरभिस्सा गवां माता दक्षिणा यज्ञकामिनी ॥ ५९॥

gṛhalakṣmīśca gṛhiṇāṃ gehe ca gṛhadevatā |surabhissā gavāṃ mātā dakṣiṇā yajñakāminī || 59||

अदितिर्देवमाता त्वं कमला कमलालये ।स्वाहा त्वं च हविर्दाने कव्यदाने स्वधा स्मृता ॥ ६०॥

aditirdevamātā tvaṃ kamalā kamalālaye |svāhā tvaṃ ca havirdāne kavyadāne svadhā smṛtā || 60||

त्वं हि विष्णुस्वरूपा च सर्वाधारा वसुन्धरा ।शुद्धसत्त्वस्वरूपा त्वं नारायणपरायणा ॥ ६१॥

tvaṃ hi viṣṇusvarūpā ca sarvādhārā vasundharā |śuddhasattvasvarūpā tvaṃ nārāyaṇaparāyaṇā || 61||

क्रोधहिंसावर्जिता च वरदा च शुभानना ।परमार्थप्रदा त्वं च हरिदास्यप्रदा परा ॥ ६२॥

krodhahiṃsāvarjitā ca varadā ca śubhānanā |paramārthapradā tvaṃ ca haridāsyapradā parā || 62||

यया विना जगत्सर्वं भस्मीभूतमसारकम् ।जीवन्मृतं च विश्वं च शवतुल्यं यया विना ॥ ६३॥

yayā vinā jagatsarvaṃ bhasmībhūtamasārakam |jīvanmṛtaṃ ca viśvaṃ ca śavatulyaṃ yayā vinā || 63||

सर्वेषां च परा त्वं हि सर्वबान्धवरूपिणी ।यया विना न सम्भाष्यो बान्धवैर्बान्धवः सदा ॥ ६४॥

sarveṣāṃ ca parā tvaṃ hi sarvabāndhavarūpiṇī |yayā vinā na sambhāṣyo bāndhavairbāndhavaḥ sadā || 64||

त्वया हीनो बन्धुहीनस्त्वया युक्तः सबान्धवः ।धर्मार्थकाममोक्षाणां त्वं च कारणरूपिणी ॥ ६५॥

tvayā hīno bandhuhīnastvayā yuktaḥ sabāndhavaḥ |dharmārthakāmamokṣāṇāṃ tvaṃ ca kāraṇarūpiṇī || 65||

स्तनन्धयानां त्वं माता शिशूनां शैशवे यथा ।तथा त्वं सर्वदा माता सर्वेषां सर्वविश्वतः ॥ ६६॥

stanandhayānāṃ tvaṃ mātā śiśūnāṃ śaiśave yathā |tathā tvaṃ sarvadā mātā sarveṣāṃ sarvaviśvataḥ || 66||

त्यक्तस्तनो मातृहीनः स चेज्जीवति दैवतः ।त्वया हीनो जनः कोऽपि न जीवत्येव निश्चितम् ॥ ६७॥

tyaktastano mātṛhīnaḥ sa cejjīvati daivataḥ |tvayā hīno janaḥ ko'pi na jīvatyeva niścitam || 67||

सुप्रसन्नस्वरूपा त्वं मे प्रसन्ना भवाम्बिके ।वैरिग्रहस्तद्विषयं देहि मह्यं सनातनि ॥ ६८॥

suprasannasvarūpā tvaṃ me prasannā bhavāmbike |vairigrahastadviṣayaṃ dehi mahyaṃ sanātani || 68||

वयं यावत्त्वया हीना बन्धुहीनाश्च भिक्षुकाः ।सर्वसम्पद्विहीनाश्च तावदेव हरिप्रिये ॥ ६९॥

vayaṃ yāvattvayā hīnā bandhuhīnāśca bhikṣukāḥ |sarvasampadvihīnāśca tāvadeva haripriye || 69||

राज्यं देहि श्रियं देहि बलं देहि सुरेश्वरि ।कीर्तिं देहि धनं देहि पुत्रान्मह्यं च देहि वै ॥ ७०॥

rājyaṃ dehi śriyaṃ dehi balaṃ dehi sureśvari |kīrtiṃ dehi dhanaṃ dehi putrānmahyaṃ ca dehi vai || 70||

कामं देहि मतिं देहि भोगान्देहि हरिप्रिये ।ज्ञानं देहि च धर्मं च सर्वसौभाग्यमीप्सितम् ॥ ७१॥

kāmaṃ dehi matiṃ dehi bhogāndehi haripriye |jñānaṃ dehi ca dharmaṃ ca sarvasaubhāgyamīpsitam || 71||

सर्वाधिकारमेवं वै प्रभावं च प्रतापकम् ।जयं पराक्रमं युद्धे परमैश्वर्य्यमेव च ॥ ७२॥

sarvādhikāramevaṃ vai prabhāvaṃ ca pratāpakam |jayaṃ parākramaṃ yuddhe paramaiśvaryyameva ca || 72||

इत्युक्त्वा तु महेन्द्रश्च सर्वैः सुरगणैः सह ।ननाम साश्रुनेत्रोऽयं मूर्ध्ना चैव पुनः पुनः ॥ ७३॥

ityuktvā tu mahendraśca sarvaiḥ suragaṇaiḥ saha |nanāma sāśrunetro'yaṃ mūrdhnā caiva punaḥ punaḥ || 73||

इति ब्रह्मवैवर्तपुराणे प्रकृतिखण्डे एकोनचत्वारिंशाध्यायान्तर्गतंइन्द्रकृतं लक्ष्मीस्तोत्रं समाप्तम् ।ब्रह्मवैवर्तपुराण । प्रकृतिखण्ड । अध्याय ३९/१०१२/; ५३७३॥ब्रह्मवैवर्तपुराण । प्रकृतिखण्ड । अध्याय ३९/१०-१२/; ५३-७३॥

iti brahmavaivartapurāṇe prakṛtikhaṇḍe ekonacatvāriṃśādhyāyāntargataṃindrakṛtaṃ lakṣmīstotraṃ samāptam |brahmavaivartapurāṇa | prakṛtikhaṇḍa | adhyāya 39/1012/; 5373||brahmavaivartapurāṇa | prakṛtikhaṇḍa | adhyāya 39/10-12/; 53-73||