कमलाष्टकम् Kamala Ashtakam

न्यङ्कावरातिभयशङ्काकुले धृतदृगङ्कायतिः प्रणमतांशङ्काकलङ्कयुतपङ्कायताश्मशितटङ्कायितस्वचरिता ।त्वं कालदेशपदशङ्कातिपातिपतिसङ्काश वैभवयुताशं काममातरनिशं कामनीयमिह सङ्काशयाशु कृपया ॥ १॥

nyaṅkāvarātibhayaśaṅkākule dhṛtadṛgaṅkāyatiḥ praṇamatāṃśaṅkākalaṅkayutapaṅkāyatāśmaśitaṭaṅkāyitasvacaritā |tvaṃ kāladeśapadaśaṅkātipātipatisaṅkāśa vaibhavayutāśaṃ kāmamātaraniśaṃ kāmanīyamiha saṅkāśayāśu kṛpayā || 1||

आचान्तरङ्गदलिमोचान्तरङ्गरुचिवाचां तरङ्गगतिभिःकाचाटनाय कटुवाचाटभावयुतनीचाटनं न कलये ।वाचामगोचरसदाचारसूरिजनताचातुरीविवृतयेप्राचां गतिं कुशलवाचां जगज्जननि याचामि देवि भवतीम् ॥ २॥

ācāntaraṅgadalimocāntaraṅgarucivācāṃ taraṅgagatibhiḥkācāṭanāya kaṭuvācāṭabhāvayutanīcāṭanaṃ na kalaye |vācāmagocarasadācārasūrijanatācāturīvivṛtayeprācāṃ gatiṃ kuśalavācāṃ jagajjanani yācāmi devi bhavatīm || 2||

चेटीकृतामरवधूटीकराग्रधृतपेटीपुटार्घ्यसुमनोवीटीदलक्रमुकपाटीरपङ्कनवशाटीकृताङ्गरचना ।खेटीकमानशतकोटीकराब्जजजटाटीरवन्दितपदाया टीकतेऽब्जवनमाटीकतां हृदयवाटीमतीव कमला ॥ ३॥

ceṭīkṛtāmaravadhūṭīkarāgradhṛtapeṭīpuṭārghyasumanovīṭīdalakramukapāṭīrapaṅkanavaśāṭīkṛtāṅgaracanā |kheṭīkamānaśatakoṭīkarābjajajaṭāṭīravanditapadāyā ṭīkate'bjavanamāṭīkatāṃ hṛdayavāṭīmatīva kamalā || 3||

स्वान्तान्तरालकृतकान्तागमान्तशतशान्तान्तराघनिकराःशान्तार्थकान्तवकृतान्ता भजन्ति हृदि दान्ता दुरन्ततपसा ।यां तानतापभवतान्तातिभीतजगतां तापनोदनपटुंमां तारयत्वशुभकान्तारतोऽद्य हरिकान्ताकटाक्षलहरी ॥ ४॥

svāntāntarālakṛtakāntāgamāntaśataśāntāntarāghanikarāḥśāntārthakāntavakṛtāntā bhajanti hṛdi dāntā durantatapasā |yāṃ tānatāpabhavatāntātibhītajagatāṃ tāpanodanapaṭuṃmāṃ tārayatvaśubhakāntārato'dya harikāntākaṭākṣalaharī || 4||

यां भावुका मनसि सम्भावयन्ति भवसम्भावनापहृतयेत्वं भासि लक्ष्मि सततं भाव्ययद्भवनसम्भावनादिविधये ।जम्भारिसम्पदुपलम्भादिकारणमहं भाव्यमङ्घ्रियुगलंसम्भावये श्रुतिषु सम्भाषितं वचसि सम्भाष्य तस्य तव च ॥ ५॥

yāṃ bhāvukā manasi sambhāvayanti bhavasambhāvanāpahṛtayetvaṃ bhāsi lakṣmi satataṃ bhāvyayadbhavanasambhāvanādividhaye |jambhārisampadupalambhādikāraṇamahaṃ bhāvyamaṅghriyugalaṃsambhāvaye śrutiṣu sambhāṣitaṃ vacasi sambhāṣya tasya tava ca || 5||

दूरावधूतमधुधारागिरोच्चकुचभारानताङ्गलतिकासाराङ्गलिप्तघनसारार्द्रकुङ्कुमरसा राजहंसगमना ।वैराकरस्मरविकारापसंसरणवाराशिमग्रमनसःश्रीराविरस्तु धुरि ताराय मे गुरुभिरारधिता भगवती ॥ ६॥

dūrāvadhūtamadhudhārāgiroccakucabhārānatāṅgalatikāsārāṅgaliptaghanasārārdrakuṅkumarasā rājahaṃsagamanā |vairākarasmaravikārāpasaṃsaraṇavārāśimagramanasaḥśrīrāvirastu dhuri tārāya me gurubhirāradhitā bhagavatī || 6||

श्रीवासधूपकनदावासदीपरुचिरावासभूपरिसराश्रीवासदेशलसदावापकाशरदभावाभकेशनिकरा ।श्रीवासुदेवरमणी वामदेवविधिदेवाधिपावनपराश्रीवासवस्तुनरदेवाहतस्तुतिसभावा मुदेऽस्तु सुतराम् ॥ ७॥

śrīvāsadhūpakanadāvāsadīparucirāvāsabhūparisarāśrīvāsadeśalasadāvāpakāśaradabhāvābhakeśanikarā |śrīvāsudevaramaṇī vāmadevavidhidevādhipāvanaparāśrīvāsavastunaradevāhatastutisabhāvā mude'stu sutarām || 7||

भाषादिदेवकुलयोषामणिस्तवनघोषाञ्चितस्वसविधादोषाकुले जगति पोषाकुला सपदि शेषाहि शायिदयिता ।दोषालयस्य मम दोषानपोह्य गतदोषाभिनन्द्यमहिमाशेषाशनाहिरिपुशेषादिसम्पद विशेषां ददातु विभवान् ॥ ८॥

bhāṣādidevakulayoṣāmaṇistavanaghoṣāñcitasvasavidhādoṣākule jagati poṣākulā sapadi śeṣāhi śāyidayitā |doṣālayasya mama doṣānapohya gatadoṣābhinandyamahimāśeṣāśanāhiripuśeṣādisampada viśeṣāṃ dadātu vibhavān || 8||

इति श्रीकमलाष्टकं सम्पूर्णम् ।स्तोत्रसमुच्चयः २ (८४)

iti śrīkamalāṣṭakaṃ sampūrṇam |stotrasamuccayaḥ 2 (84)