कृष्णस्तवराजः (2) Shrikrishnastavaraja

श्रीगणेशाय नमः ।श्रीमहादेव उवाच ।शृणु देवि प्रवक्ष्यामि स्तोत्रं परमदुर्लभम् ।यज्ज्ञात्वा न पुनर्गच्छेन्नरो निरययातनाम् ॥ १॥

śrīgaṇeśāya namaḥ |śrīmahādeva uvāca |śṛṇu devi pravakṣyāmi stotraṃ paramadurlabham |yajjñātvā na punargacchennaro nirayayātanām || 1||

नारदाय च यत्प्रोक्तं ब्रह्मपुत्रेण धीमता ।सनत्कुमारेण पुरा योगीन्द्रगुरुवर्त्मना ॥ २॥

nāradāya ca yatproktaṃ brahmaputreṇa dhīmatā |sanatkumāreṇa purā yogīndraguruvartmanā || 2||

श्रीनारद उवाच ।प्रसीद भगवन्मह्यमज्ञानात्कुण्ठितात्मने ।तवांघ्रिपङ्कजरजोरागिणीं भक्तिमुत्तमाम् ॥ ३॥

śrīnārada uvāca |prasīda bhagavanmahyamajñānātkuṇṭhitātmane |tavāṃghripaṅkajarajorāgiṇīṃ bhaktimuttamām || 3||

अज प्रसीद भगवन्नमितद्युतिपञ्जर ।अप्रमेयं प्रसीदास्मद्दुःखहन्पुरुषोत्तम ॥ ४॥

aja prasīda bhagavannamitadyutipañjara |aprameyaṃ prasīdāsmadduḥkhahanpuruṣottama || 4||

स्वसंवेद्य प्रसीदास्मदानन्दात्मन्ननामय ।अचिन्त्यसार विश्वात्मन्प्रसीद परमेश्वर ॥ ५॥

svasaṃvedya prasīdāsmadānandātmannanāmaya |acintyasāra viśvātmanprasīda parameśvara || 5||

प्रसीद तुङ्गतुङ्गानां प्रसीद शिवशोभन ।प्रसीद गुणगम्भीर गम्भीराणां महाद्युते ॥ ६॥

prasīda tuṅgatuṅgānāṃ prasīda śivaśobhana |prasīda guṇagambhīra gambhīrāṇāṃ mahādyute || 6||

प्रसीद व्यक्तं विस्तीर्णं विस्तीर्णानामगोचर ।प्रसीदार्द्रार्द्रजातीनां प्रसीदान्तान्तदायिनाम् ॥ ७॥

prasīda vyaktaṃ vistīrṇaṃ vistīrṇānāmagocara |prasīdārdrārdrajātīnāṃ prasīdāntāntadāyinām || 7||

गुरोर्गरीयः सर्वेश प्रसीदानन्त देहिनाम् ।जय माधव मायात्मन् जय शाश्वतशङ्खभृत् ॥ ८॥

gurorgarīyaḥ sarveśa prasīdānanta dehinām |jaya mādhava māyātman jaya śāśvataśaṅkhabhṛt || 8||

जय शङ्खधर श्रीमन् जय नन्दकनन्दन ।जय चक्रगदापाणे जय देव जनार्दन ॥ ९॥

jaya śaṅkhadhara śrīman jaya nandakanandana |jaya cakragadāpāṇe jaya deva janārdana || 9||

जय रत्नवराबद्धकिरीटाकान्तमस्तक ।जय पक्षिपतिच्छायानिरुद्धार्ककरारुण ॥ १०॥

jaya ratnavarābaddhakirīṭākāntamastaka |jaya pakṣipaticchāyāniruddhārkakarāruṇa || 10||

नमस्ते नरकाराते नमस्ते मधुसूदन ।नमस्ते ललितापाङ्ग नमस्ते नरकान्तक ॥ ११॥

namaste narakārāte namaste madhusūdana |namaste lalitāpāṅga namaste narakāntaka || 11||

नमः पापहरेशान नमः सर्पभवापह ।नमः सम्भूतसर्वात्मन्नमः सम्भृतकौस्तुभ ॥ १२॥

namaḥ pāpahareśāna namaḥ sarpabhavāpaha |namaḥ sambhūtasarvātmannamaḥ sambhṛtakaustubha || 12||

नमस्ते नयनातीत नमस्ते भयहारक ।नमो विभिन्नवेषाय नमः श्रुतिपथातिग ॥ १३॥

namaste nayanātīta namaste bhayahāraka |namo vibhinnaveṣāya namaḥ śrutipathātiga || 13||

नमश्चिन्मूर्तिभेदेन सर्गस्थित्यन्तहेतवे ।विष्णवे त्रिदशारातिजिष्णवे परमात्मने ॥ १४॥

namaścinmūrtibhedena sargasthityantahetave |viṣṇave tridaśārātijiṣṇave paramātmane || 14||

चक्रभिन्नारिचक्राय चक्रिणे चक्रवल्लभ ।विश्वाय विश्ववन्द्याय विश्वभूतानुवर्तिने ॥ १५॥

cakrabhinnāricakrāya cakriṇe cakravallabha |viśvāya viśvavandyāya viśvabhūtānuvartine || 15||

नमोऽस्तु योगिध्येयात्मन्नमोऽस्त्वध्यात्मिरूपिणे ।भक्तिप्रदाय भक्तानां नमस्ते मुक्तिदायिने ॥ १६॥

namo'stu yogidhyeyātmannamo'stvadhyātmirūpiṇe |bhaktipradāya bhaktānāṃ namaste muktidāyine || 16||

पूजनं हवनं चेज्या ध्यानं पश्चान्नमस्क्रिया ।देवेश कर्म सर्वं मे भवेदाराधनं तव ॥ १७॥

pūjanaṃ havanaṃ cejyā dhyānaṃ paścānnamaskriyā |deveśa karma sarvaṃ me bhavedārādhanaṃ tava || 17||

इति हवनजपार्चाभेदतो विष्णुपूजानियतहृदयकर्मा यस्तु मन्त्री चिराय ।स खलु सकलकामान् प्राप्य कृष्णान्तरात्माजननमृतिविमुक्तोऽत्युत्तमां भक्तिमेति ॥ १८॥

iti havanajapārcābhedato viṣṇupūjāniyatahṛdayakarmā yastu mantrī cirāya |sa khalu sakalakāmān prāpya kṛṣṇāntarātmājananamṛtivimukto'tyuttamāṃ bhaktimeti || 18||

गोगोपगोपिकावीतं गोपालं गोषु गोप्रदम् ।गोपैरीड्यं गोसहस्रैर्नौमि गोकुलनायकम् ॥ १९॥

gogopagopikāvītaṃ gopālaṃ goṣu gopradam |gopairīḍyaṃ gosahasrairnaumi gokulanāyakam || 19||

प्रीणयेदनया स्तुत्या जगन्नाथं जगन्मयम् ।धर्मार्थकाममोक्षाणामाप्तये पुरुषोत्तमः ॥ २०॥

prīṇayedanayā stutyā jagannāthaṃ jaganmayam |dharmārthakāmamokṣāṇāmāptaye puruṣottamaḥ || 20||

॥ इति श्रीनारदपञ्चरात्रे श्रीकृष्णस्तवराजः सम्पूर्णः ॥

|| iti śrīnāradapañcarātre śrīkṛṣṇastavarājaḥ sampūrṇaḥ ||