श्रीकृष्णस्तवः १ Shrikrishnastavah 1

देवा ऊचुःयज्जागरादिषु भवेषु परं ह्यहेतुःहेतुः स्विदस्य विचरन्ति गुणाश्रयेण ।नैतद्विशन्ति महदिन्द्रियदेवसङ्घास्तस्मै नमोऽग्निमिव विस्तृतविस्फुलिङ्गाः ॥ १॥

devā ūcuḥyajjāgarādiṣu bhaveṣu paraṃ hyahetuḥhetuḥ svidasya vicaranti guṇāśrayeṇa |naitadviśanti mahadindriyadevasaṅghāstasmai namo'gnimiva vistṛtavisphuliṅgāḥ || 1||

नैवेशितुं प्रभुरयं बलिनां बलीयान्माया न शब्द उत नो विषयीकरोति ।तद्ब्रह्म पूर्णममृतं परमं प्रशान्तंशुद्धं परात्परतरं शरणं गताः स्मः ॥ २॥

naiveśituṃ prabhurayaṃ balināṃ balīyānmāyā na śabda uta no viṣayīkaroti |tadbrahma pūrṇamamṛtaṃ paramaṃ praśāntaṃśuddhaṃ parātparataraṃ śaraṇaṃ gatāḥ smaḥ || 2||

अंशांशकांशककलाद्यवतारवृन्दैरावेशपूर्णसहितैश्च परस्य यस्य ।सर्गादयः किल भवन्ति तमेव कृष्णंपूर्णात्परं तु परिपूर्णतमं नताः स्मः ॥ ३॥

aṃśāṃśakāṃśakakalādyavatāravṛndairāveśapūrṇasahitaiśca parasya yasya |sargādayaḥ kila bhavanti tameva kṛṣṇaṃpūrṇātparaṃ tu paripūrṇatamaṃ natāḥ smaḥ || 3||

मन्वन्तरेषु च युगेषु गतागतेषुकल्पेषु चांशकलया स्ववपुर्बिभर्षि ।अद्यैव धाम परिपूर्णतमं तनोषिधर्मं विधाय भुवि मङ्गलमातनोषि ॥ ४॥

manvantareṣu ca yugeṣu gatāgateṣukalpeṣu cāṃśakalayā svavapurbibharṣi |adyaiva dhāma paripūrṇatamaṃ tanoṣidharmaṃ vidhāya bhuvi maṅgalamātanoṣi || 4||

यद्दुर्लभं विशदयोगिभिरप्यगम्यंगम्यं द्रवद्भिरमलाशयभक्तियोगैः ।आनन्दकन्द चरतस्तव मन्दयानंपादारविन्दमकरन्दरजो दधामः ॥ ५॥

yaddurlabhaṃ viśadayogibhirapyagamyaṃgamyaṃ dravadbhiramalāśayabhaktiyogaiḥ |ānandakanda caratastava mandayānaṃpādāravindamakarandarajo dadhāmaḥ || 5||

पूर्वं तथात्र कमनीयवपुष्मयं त्वांकन्दर्पकोटिशतमोहनमद्भुतं च ।गोलोकधामधिषणद्युतिमादधानंराधापतिं धरणिधुर्यधनं दधामः ॥ ६॥

pūrvaṃ tathātra kamanīyavapuṣmayaṃ tvāṃkandarpakoṭiśatamohanamadbhutaṃ ca |golokadhāmadhiṣaṇadyutimādadhānaṃrādhāpatiṃ dharaṇidhuryadhanaṃ dadhāmaḥ || 6||

इति गर्गसंहितायां गोलोकखण्डे एकादशाध्यायान्तर्गतःश्रीकृष्णजननात्पूर्वं देवैः कृतः श्रीकृष्णस्तवः सम्पूर्णः ।

iti gargasaṃhitāyāṃ golokakhaṇḍe ekādaśādhyāyāntargataḥśrīkṛṣṇajananātpūrvaṃ devaiḥ kṛtaḥ śrīkṛṣṇastavaḥ sampūrṇaḥ |