कृष्णसहस्रनामस्तोत्रम् Shrikrishnasahasranamastotram from Satvatatantra

श्रीनारद उवाच ।कथितं मे त्वया देव हरिनामानुकीर्तनम् ।पापापहं महासौख्यं भगवद्भक्तिकारणम् ॥ १॥

śrīnārada uvāca |kathitaṃ me tvayā deva harināmānukīrtanam |pāpāpahaṃ mahāsaukhyaṃ bhagavadbhaktikāraṇam || 1||

तत्राहं यानि नामानि कीर्तयामि सुरोत्तम ।तान्यहं ज्ञातुमिच्छामि साकल्येन कुतूहलात् ॥ २॥

tatrāhaṃ yāni nāmāni kīrtayāmi surottama |tānyahaṃ jñātumicchāmi sākalyena kutūhalāt || 2||

श्रीशिव उवाच ।भूम्यम्बुतेजसां ये वै परमाणूनपि द्विज ।शक्यन्ते गणितुं भूयो जन्मभिर्न हरेर्गुणान् ॥ ३॥

śrīśiva uvāca |bhūmyambutejasāṃ ye vai paramāṇūnapi dvija |śakyante gaṇituṃ bhūyo janmabhirna harerguṇān || 3||

तथापि मुख्यं वक्ष्यामि श्रीविष्णोः परमाद्भुतम् ।नाम्नां सहस्रं पार्वत्यै यदिहोक्तं कृपालुना ॥ ४॥

tathāpi mukhyaṃ vakṣyāmi śrīviṣṇoḥ paramādbhutam |nāmnāṃ sahasraṃ pārvatyai yadihoktaṃ kṛpālunā || 4||

समाधिनिष्ठं मां दृष्ट्वा पार्वती वरवर्णिनी ।अपृच्छत्परमं देवं भगवन्तं जगद्गुरुम् ॥ ५॥

samādhiniṣṭhaṃ māṃ dṛṣṭvā pārvatī varavarṇinī |apṛcchatparamaṃ devaṃ bhagavantaṃ jagadgurum || 5||

तदा तस्यै मया प्रोक्तो मत्परो जगदीश्वरः ।नाम्नां सहस्रं च तथा गुणकर्मानुसारतः ॥ ६॥

tadā tasyai mayā prokto matparo jagadīśvaraḥ |nāmnāṃ sahasraṃ ca tathā guṇakarmānusārataḥ || 6||

तदहं तेऽभिवक्ष्यामि महाभागवतो भवान् ।यस्यैकस्मरणेनैव पुमान् सिद्धिमवाप्नुयात् ॥ ७॥

tadahaṃ te'bhivakṣyāmi mahābhāgavato bhavān |yasyaikasmaraṇenaiva pumān siddhimavāpnuyāt || 7||

उद्यन्नवीनजलदाभमकुण्ठधिष्ण्यं विद्योतितानलमनोहरपीतवासम् ।भास्वन्मयूखमुकुटाङ्गदहारयुक्तं काञ्चीकलापवलयाङ्गुलिभिर्विभातम् ॥ ८॥

udyannavīnajaladābhamakuṇṭhadhiṣṇyaṃ vidyotitānalamanoharapītavāsam |bhāsvanmayūkhamukuṭāṅgadahārayuktaṃ kāñcīkalāpavalayāṅgulibhirvibhātam || 8||

ब्रह्मादिदेवगणवन्दितपादपद्यं श्रीसेवितं सकलसुन्दरसंनिवेशम् ।गोगोपवनितामुनिवृन्दजुष्टं कृष्णं पुराणपुरुषं मनसा स्मरामि ॥ ९॥

brahmādidevagaṇavanditapādapadyaṃ śrīsevitaṃ sakalasundarasaṃniveśam |gogopavanitāmunivṛndajuṣṭaṃ kṛṣṇaṃ purāṇapuruṣaṃ manasā smarāmi || 9||

ओं नमो वासुदेवाय कृष्णाय परमात्मने ।प्रणतक्लेशसंहर्त्रे परमानन्ददायिने ॥ १०॥

oṃ namo vāsudevāya kṛṣṇāya paramātmane |praṇatakleśasaṃhartre paramānandadāyine || 10||

ओं श्रीकृष्णः श्रीपतिः श्रीमान् श्रीधरः श्रीसुखाश्रयः ।श्रीदाता श्रीकरः श्रीशः श्रीसेव्यः श्रीविभावनः ॥ ११॥

oṃ śrīkṛṣṇaḥ śrīpatiḥ śrīmān śrīdharaḥ śrīsukhāśrayaḥ |śrīdātā śrīkaraḥ śrīśaḥ śrīsevyaḥ śrīvibhāvanaḥ || 11||

परमात्मा परं ब्रह्म परेशः परमेश्वरः ।परानन्दः परं धाम परमानन्ददायकः ॥ १२॥

paramātmā paraṃ brahma pareśaḥ parameśvaraḥ |parānandaḥ paraṃ dhāma paramānandadāyakaḥ || 12||

निरालम्बो निर्विकारो निर्लेपो निरवग्रहः ।नित्यानन्दो नित्यमुक्तो निरीहो निस्पृहप्रियः ॥ १३॥

nirālambo nirvikāro nirlepo niravagrahaḥ |nityānando nityamukto nirīho nispṛhapriyaḥ || 13||

प्रियंवदः प्रियकरः प्रियदः प्रियसञ्जनः ।प्रियानुगः प्रियालम्बी प्रियकीर्तिः प्रियात्प्रियः ॥ १४॥

priyaṃvadaḥ priyakaraḥ priyadaḥ priyasañjanaḥ |priyānugaḥ priyālambī priyakīrtiḥ priyātpriyaḥ || 14||

महात्यागी महाभोगी महायोगी महातपाः ।महात्मा महतां श्रेष्ठो महालोकपतिर्महान् ॥ १५॥

mahātyāgī mahābhogī mahāyogī mahātapāḥ |mahātmā mahatāṃ śreṣṭho mahālokapatirmahān || 15||

सिद्धार्थः सिद्धसङ्कल्पः सिद्धिदः सिद्धसाधनः ।सिद्धेशः सिद्धमार्गाग्रः सिद्धलोकैकपालकः ॥ १६॥

siddhārthaḥ siddhasaṅkalpaḥ siddhidaḥ siddhasādhanaḥ |siddheśaḥ siddhamārgāgraḥ siddhalokaikapālakaḥ || 16||

इष्टो विशिष्टः शिष्टेष्टो महिष्ठो जिष्णुरुत्तमः ।ज्येष्ठः श्रेष्ठश्च सर्वेष्टो विष्णुर्भ्राजिष्णुरव्ययः ॥ १७॥

iṣṭo viśiṣṭaḥ śiṣṭeṣṭo mahiṣṭho jiṣṇuruttamaḥ |jyeṣṭhaḥ śreṣṭhaśca sarveṣṭo viṣṇurbhrājiṣṇuravyayaḥ || 17||

विभुः शम्भुः प्रभुर्भूमा स्वभूः स्वानन्दमूर्तिमान् ।प्रीतिमान् प्रीतिदाता च प्रीतिदः प्रीतिवर्धनः ॥ १८॥

vibhuḥ śambhuḥ prabhurbhūmā svabhūḥ svānandamūrtimān |prītimān prītidātā ca prītidaḥ prītivardhanaḥ || 18||

योगेश्वरो योगगम्यो योगीशो योगपारगः ।योगदाता योगपतिर्योगसिद्धिविधायकः ॥ १९॥

yogeśvaro yogagamyo yogīśo yogapāragaḥ |yogadātā yogapatiryogasiddhividhāyakaḥ || 19||

सत्यव्रतः सत्यपरः त्रिसत्यः सत्यकारणः ।सत्याश्रयः सत्यहरः सत्पालिः सत्यवर्धनः ॥ २०॥

satyavrataḥ satyaparaḥ trisatyaḥ satyakāraṇaḥ |satyāśrayaḥ satyaharaḥ satpāliḥ satyavardhanaḥ || 20||

सर्वानन्दः सर्वहरः सर्वगः सर्ववश्यकृत् ।सर्वपाता सर्वसुखः सर्वश्रुतिगणार्णवः ॥ २१॥

sarvānandaḥ sarvaharaḥ sarvagaḥ sarvavaśyakṛt |sarvapātā sarvasukhaḥ sarvaśrutigaṇārṇavaḥ || 21||

जनार्दनो जगन्नाथो जगत्त्राता जगत्पिता ।जगत्कर्ता जगद्धर्ता जगदानन्दमूर्तिमान् ॥ २२॥

janārdano jagannātho jagattrātā jagatpitā |jagatkartā jagaddhartā jagadānandamūrtimān || 22||

धरापतिर्लोकपतिः स्वर्पतिर्जगताम्पतिः ।विद्यापतिर्वित्तपतिः सत्पतिः कमलापतिः ॥ २३॥

dharāpatirlokapatiḥ svarpatirjagatāmpatiḥ |vidyāpatirvittapatiḥ satpatiḥ kamalāpatiḥ || 23||

चतुरात्मा चतुर्बाहुश्चतुर्वर्गफलप्रदः ।चतुर्व्यूहश्चतुर्धामा चतुर्युगविधायकः ॥ २४॥

caturātmā caturbāhuścaturvargaphalapradaḥ |caturvyūhaścaturdhāmā caturyugavidhāyakaḥ || 24||

आदिदेवो देवदेवो देवेशो देवधारणः ।देवकृद्देवभृद्देवो देवेडितपदाम्बुजः ॥ २५॥

ādidevo devadevo deveśo devadhāraṇaḥ |devakṛddevabhṛddevo deveḍitapadāmbujaḥ || 25||

विश्वेश्वरो विश्वरूपी विश्वात्मा विश्वतोमुखः ।विश्वसूर्विश्वफलदो विश्वगो विश्वनायकः ॥ २६॥

viśveśvaro viśvarūpī viśvātmā viśvatomukhaḥ |viśvasūrviśvaphalado viśvago viśvanāyakaḥ || 26||

भूतकृद्भूतभृद्भावो भूतात्मा भूतभावनः ।भूतिदो भूतिविस्तारो विभूतिर्भूतिपालकः ॥ २७॥

bhūtakṛdbhūtabhṛdbhāvo bhūtātmā bhūtabhāvanaḥ |bhūtido bhūtivistāro vibhūtirbhūtipālakaḥ || 27||

नारायणो नारशायी नारसूर्नारजीवनः ।नारैकफलदो नारमुक्तिदो नारनायकः ॥ २८॥

nārāyaṇo nāraśāyī nārasūrnārajīvanaḥ |nāraikaphalado nāramuktido nāranāyakaḥ || 28||

सहस्ररूपः साहस्रनामा साहस्रविग्रहः ।सहस्रशीर्षा साहस्रपादाक्षिभुजशीर्षवान् ॥ २९॥

sahasrarūpaḥ sāhasranāmā sāhasravigrahaḥ |sahasraśīrṣā sāhasrapādākṣibhujaśīrṣavān || 29||

पद्मनाभः पद्मगर्भः पद्मी पद्मनिभेक्षणः ।पद्मशायी पद्ममाली पद्माङ्कितपदद्वयः ॥ ३०॥

padmanābhaḥ padmagarbhaḥ padmī padmanibhekṣaṇaḥ |padmaśāyī padmamālī padmāṅkitapadadvayaḥ || 30||

वीर्यवान् स्थैर्यवान् वाग्मी शौर्यवान् धैर्यवान् क्षमी ।धीमान् धर्मपरो भोगी भगवान् भयनाशनः ॥ ३१॥

vīryavān sthairyavān vāgmī śauryavān dhairyavān kṣamī |dhīmān dharmaparo bhogī bhagavān bhayanāśanaḥ || 31||

जयन्तो विजयो जेता जयदो जयवर्धनः ।अमानी मानदो मान्यो महिमावान्महाबलः ॥ ३२॥

jayanto vijayo jetā jayado jayavardhanaḥ |amānī mānado mānyo mahimāvānmahābalaḥ || 32||

सन्तुष्टस्तोषदो दाता दमनो दीनवत्सलः ।ज्ञानी यशस्वान् धृतिमान् सह ओजोबलाश्रयः ॥ ३३॥

santuṣṭastoṣado dātā damano dīnavatsalaḥ |jñānī yaśasvān dhṛtimān saha ojobalāśrayaḥ || 33||

हयग्रीवो महातेजा महार्णवविनोदकृत् ।मधुकैटभविध्वंसी वेदकृद्वेदपालकः ॥ ३४॥

hayagrīvo mahātejā mahārṇavavinodakṛt |madhukaiṭabhavidhvaṃsī vedakṛdvedapālakaḥ || 34||

सनत्कुमारः सनकः सनन्दश्च सनातनः ।अखण्डब्रह्मव्रतवानात्मा योगविवेचकः ॥ ३५॥

sanatkumāraḥ sanakaḥ sanandaśca sanātanaḥ |akhaṇḍabrahmavratavānātmā yogavivecakaḥ || 35||

श्रीनारदो देवऋषिः कर्माकर्मप्रवर्तकः ।सात्वतागमकृल्लोकहिताहितप्रसूचकः ॥ ३६॥

śrīnārado devaṛṣiḥ karmākarmapravartakaḥ |sātvatāgamakṛllokahitāhitaprasūcakaḥ || 36||

आदिकालो यज्ञतत्त्वं धातृनासापुटोद्भवः ।दन्ताग्रन्यस्तभूगोलो हिरण्याक्षबलान्तकः ॥ ३७॥

ādikālo yajñatattvaṃ dhātṛnāsāpuṭodbhavaḥ |dantāgranyastabhūgolo hiraṇyākṣabalāntakaḥ || 37||

पृथ्वीपतिः शीघ्रवेगो रोमान्तर्गतसागरः ।श्वासावधूतहेमाद्रिः प्रजापतिपतिस्तुतः ॥ ३८॥

pṛthvīpatiḥ śīghravego romāntargatasāgaraḥ |śvāsāvadhūtahemādriḥ prajāpatipatistutaḥ || 38||

अनन्तो धरणीभर्ता पातालतलवासकृत् ।कामाग्निजवनो नागराजराजो महाद्युतिः ॥ ३९॥

ananto dharaṇībhartā pātālatalavāsakṛt |kāmāgnijavano nāgarājarājo mahādyutiḥ || 39||

महाकूर्मो विश्वकायः शेषभुक्सर्वपालकः ।लोकपितृगणाधीशः पितृस्तुतमहापदः ॥ ४०॥

mahākūrmo viśvakāyaḥ śeṣabhuksarvapālakaḥ |lokapitṛgaṇādhīśaḥ pitṛstutamahāpadaḥ || 40||

कृपामयः स्वयं व्यक्तिर्ध्रुवप्रीतिविवर्धनः ।ध्रुवस्तुतपदो विष्णुलोकदो लोकपूजितः ॥ ४१॥

kṛpāmayaḥ svayaṃ vyaktirdhruvaprītivivardhanaḥ |dhruvastutapado viṣṇulokado lokapūjitaḥ || 41||

शुक्लः कर्दमसन्तप्तस्तपस्तोषितमानसः ।मनोऽभीष्टप्रदो हर्षबिन्द्वञ्चितसरोवरः ॥ ४२॥

śuklaḥ kardamasantaptastapastoṣitamānasaḥ |mano'bhīṣṭaprado harṣabindvañcitasarovaraḥ || 42||

यज्ञः सुरगणाधीशो दैत्यदानवघातकः ।मनुत्राता लोकपालो लोकपालकजन्मकृत् ॥ ४३॥

yajñaḥ suragaṇādhīśo daityadānavaghātakaḥ |manutrātā lokapālo lokapālakajanmakṛt || 43||

कपिलाख्यः साङ्ख्यपाता कर्दमाङ्गसमुद्भवः ।सर्वसिद्धगणाधीशो देवहूतिगतिप्रदः ॥ ४४॥

kapilākhyaḥ sāṅkhyapātā kardamāṅgasamudbhavaḥ |sarvasiddhagaṇādhīśo devahūtigatipradaḥ || 44||

दत्तोऽत्रितनयो योगी योगमार्गप्रदर्शकः ।अनसूयानन्दकरः सर्वयोगिजनस्तुतः ॥ ४५॥

datto'tritanayo yogī yogamārgapradarśakaḥ |anasūyānandakaraḥ sarvayogijanastutaḥ || 45||

नारायणो नरऋषिर्धर्मपुत्रो महामनाः ।महेशशूलदमनो महेशैकवरप्रदः ॥ ४६॥

nārāyaṇo naraṛṣirdharmaputro mahāmanāḥ |maheśaśūladamano maheśaikavarapradaḥ || 46||

आकल्पान्ततपोधीरो मन्मथादिमदापहः ।ऊर्वशीसृग्जितानङ्गो मार्कण्डेयप्रियप्रदः ॥ ४७॥

ākalpāntatapodhīro manmathādimadāpahaḥ |ūrvaśīsṛgjitānaṅgo mārkaṇḍeyapriyapradaḥ || 47||

ऋषभो नाभिसुखदो मेरुदेवीप्रियात्मजः ।योगिराजद्विजस्रष्टा योगचर्याप्रदर्शकः ॥ ४८॥

ṛṣabho nābhisukhado merudevīpriyātmajaḥ |yogirājadvijasraṣṭā yogacaryāpradarśakaḥ || 48||

अष्टबाहुर्दक्षयज्ञपावनोऽखिलसत्कृतः ।दक्षेशद्वेषशमनो दक्षज्ञानप्रदायकः ॥ ४९॥

aṣṭabāhurdakṣayajñapāvano'khilasatkṛtaḥ |dakṣeśadveṣaśamano dakṣajñānapradāyakaḥ || 49||

प्रियव्रतकुलोत्पन्नो गयनामा महायशाः ।उदारकर्मा बहुविन्महागुणगणार्णवः ॥ ५०॥

priyavratakulotpanno gayanāmā mahāyaśāḥ |udārakarmā bahuvinmahāguṇagaṇārṇavaḥ || 50||