गोकुलेशाष्टकम् ४ Shrigokuleshashtakam 4

उद्धर्तुं धरणीतले निजबलेनैव स्वकीयाम् जनान्आविर्भूय तथा कृपापरवशः श्रीविठ्ठलेशालये ।यः श्रीभागवतस्य तत्त्वविवृतेश्चक्रे प्रवाहं वचःपीयूषैरतिपोषणाय सततं श्रीगोकुलेशोऽवतु ॥ १॥

uddhartuṃ dharaṇītale nijabalenaiva svakīyām janānāvirbhūya tathā kṛpāparavaśaḥ śrīviṭhṭhaleśālaye |yaḥ śrībhāgavatasya tattvavivṛteścakre pravāhaṃ vacaḥpīyūṣairatipoṣaṇāya satataṃ śrīgokuleśo'vatu || 1||

यः पुष्टिमार्गगतभावविभावनैकंदक्षः समक्षमपि सन्निधिसेवकानाम् ।यो ज्ञानगूढहृदयः सदयः सदैवसेवासुखं मम तनोतु स गोकुलेशः ॥ २॥

yaḥ puṣṭimārgagatabhāvavibhāvanaikaṃdakṣaḥ samakṣamapi sannidhisevakānām |yo jñānagūḍhahṛdayaḥ sadayaḥ sadaivasevāsukhaṃ mama tanotu sa gokuleśaḥ || 2||

यः सेव्यः सततं सतां निजफलप्रेप्सावदाविर्तनामाचार्योदितशुद्धपुष्टिसुपथे नित्यानुकम्पाधरः ।यद्दृष्ट्यैव हृदन्धकारनिचयो यायात्क्षणात्क्षीणतामानन्दं मुहुरातनोतु मधुराकारः प्रभुर्वल्लनभः ॥ ३॥

yaḥ sevyaḥ satataṃ satāṃ nijaphalaprepsāvadāvirtanāmācāryoditaśuddhapuṣṭisupathe nityānukampādharaḥ |yaddṛṣṭyaiva hṛdandhakāranicayo yāyātkṣaṇātkṣīṇatāmānandaṃ muhurātanotu madhurākāraḥ prabhurvallanabhaḥ || 3||

यो मायामतवर्तिदुष्टवदनध्वंसं वचोभिर्निजैःकुर्वन् सेवकसर्वलोकहृदयानन्दं सदा पोषयन् ।तद्भावं सुदृढं करोति कृपया दासैकहृद्यातयायातानां शरणं हृदा समनसा मोदं सदा यच्छतु ॥ ४॥

yo māyāmatavartiduṣṭavadanadhvaṃsaṃ vacobhirnijaiḥkurvan sevakasarvalokahṛdayānandaṃ sadā poṣayan |tadbhāvaṃ sudṛḍhaṃ karoti kṛpayā dāsaikahṛdyātayāyātānāṃ śaraṇaṃ hṛdā samanasā modaṃ sadā yacchatu || 4||

हसद्वदनपङ्कजस्फुरदमन्दभावार्द्रदृक्कपोलविलसद्रजोद्वयविमिश्रताम्बूलदः ।समुन्नतसुनासिकः सरसचारुबिम्बाधरोहरत्वखिलसेविनां चिरवियोगतापं क्षणात् ॥ ५॥

hasadvadanapaṅkajasphuradamandabhāvārdradṛkkapolavilasadrajodvayavimiśratāmbūladaḥ |samunnatasunāsikaḥ sarasacārubimbādharoharatvakhilasevināṃ ciraviyogatāpaṃ kṣaṇāt || 5||

मनोजमधुराकृतिर्निजमनोविदोदोद्गतिकृते जनमनोहृतौ विरतिकारकः संसृतौ ।स्वभावपरिपोषको भवसमुद्रसंशोषकःकरोतु वरणं सदा सफलमत्र वै वल्लभः ॥ ६॥

manojamadhurākṛtirnijamanovidododgatikṛte janamanohṛtau viratikārakaḥ saṃsṛtau |svabhāvaparipoṣako bhavasamudrasaṃśoṣakaḥkarotu varaṇaṃ sadā saphalamatra vai vallabhaḥ || 6||

गोधूममेचकमनोहरवर्णदेहोयः केशकृष्णनिचयोल्लसदुत्तमाङ्गः ।सूक्ष्मोत्तरीयकटिवस्त्रविराजिताङ्गःसङ्गं तनोतु मुदमद्भुतगोकुलेशः ॥ ७॥

godhūmamecakamanoharavarṇadehoyaḥ keśakṛṣṇanicayollasaduttamāṅgaḥ |sūkṣmottarīyakaṭivastravirājitāṅgaḥsaṅgaṃ tanotu mudamadbhutagokuleśaḥ || 7||

ताताज्ञैकपरायणाशयविदां वर्यः परानन्ददोमाला येन सुरक्षिता निजमहायत्नेन कण्ठे सताम् ।धर्मो येन विवर्धितः पितृपदाचारैः सदा सर्वतःस श्रीगोकुलनायकः करुणया भूयाद्वशे सेविनाम् ॥ ८॥

tātājñaikaparāyaṇāśayavidāṃ varyaḥ parānandadomālā yena surakṣitā nijamahāyatnena kaṇṭhe satām |dharmo yena vivardhitaḥ pitṛpadācāraiḥ sadā sarvataḥsa śrīgokulanāyakaḥ karuṇayā bhūyādvaśe sevinām || 8||

सर्वं साधनजातमत्र विफलं नूनं विदित्वा जनानित्यं तं भजत प्रियं प्रभुमयं त्यक्त्वेतरस्याश्रयम् ।तन्नामानि जपन्तु रूपमखिलं सञ्जिन्तयन्तु स्वयंसौख्यं तत्पदभावतोऽभिलषितं सर्वं स्वतः प्राप्स्यते ॥ ९॥

sarvaṃ sādhanajātamatra viphalaṃ nūnaṃ viditvā janānityaṃ taṃ bhajata priyaṃ prabhumayaṃ tyaktvetarasyāśrayam |tannāmāni japantu rūpamakhilaṃ sañjintayantu svayaṃsaukhyaṃ tatpadabhāvato'bhilaṣitaṃ sarvaṃ svataḥ prāpsyate || 9||

इति श्रीहरिरायविरचितं श्रीगोकुलेशाष्टकं सम्पूर्णम् ।

iti śrīharirāyaviracitaṃ śrīgokuleśāṣṭakaṃ sampūrṇam |