गोकुलेशाष्टोत्तरशतनामस्तोत्रम् Shrigokuleshashtottarashatanamastotram

यन्नामाब्जं सदापूर्णं कृपाज्योत्स्नासमन्वितम् ।पुष्टिभक्तिसुधावृष्टिकारकं च सुखाल्पदम् ॥ १॥

yannāmābjaṃ sadāpūrṇaṃ kṛpājyotsnāsamanvitam |puṣṭibhaktisudhāvṛṣṭikārakaṃ ca sukhālpadam || 1||

अथ नामशतं साष्टं वल्लभस्य वदाम्यहम् ।देवता वल्लभो नाम्नां छन्दोऽनुष्टुप् सुखाकरम् ॥ २॥

atha nāmaśataṃ sāṣṭaṃ vallabhasya vadāmyaham |devatā vallabho nāmnāṃ chando'nuṣṭup sukhākaram || 2||

फलं तु तत्पदाम्भोजे व्यसनं सर्वदा भवेत् ।ऋषिस्तु विष्णुदासोऽत्र दासाय वरणं मतम् ॥ ३॥

phalaṃ tu tatpadāmbhoje vyasanaṃ sarvadā bhavet |ṛṣistu viṣṇudāso'tra dāsāya varaṇaṃ matam || 3||

वल्लभो गोकुलेशश्च विठ्ठलेशप्रियात्मजः ।ताततुल्यस्वभावस्थो व्रजमङ्गलभूषणः ॥ ४॥

vallabho gokuleśaśca viṭhṭhaleśapriyātmajaḥ |tātatulyasvabhāvastho vrajamaṅgalabhūṣaṇaḥ || 4||

धराधरस्नेहदान्तो बहुनिर्दोषविग्रहः ।भजनानन्दपीयूषपूर्णो मञ्जुदृगञ्चलः ॥ ५॥

dharādharasnehadānto bahunirdoṣavigrahaḥ |bhajanānandapīyūṣapūrṇo mañjudṛgañcalaḥ || 5||

दासवृन्दचकोरेन्दुः करुणादृष्टिवृष्टिकृत् ।षट्कर्मवाञ्जनाधारः प्रतीतः पुरुषोत्तमः ॥ ६॥

dāsavṛndacakorenduḥ karuṇādṛṣṭivṛṣṭikṛt |ṣaṭkarmavāñjanādhāraḥ pratītaḥ puruṣottamaḥ || 6||

दासलीलाविष्टचित्तो गोपीवल्लभवल्लभः ।गृहस्थधर्मकर्ता च मर्यादामार्गरक्षकः ॥ ७॥

dāsalīlāviṣṭacitto gopīvallabhavallabhaḥ |gṛhasthadharmakartā ca maryādāmārgarakṣakaḥ || 7||

पुष्टिमार्गस्थितो नित्यं कृष्णप्रेमरसात्मकः ।द्विजदारिद्र्यदुःखघ्नो वाञ्छाकल्पतरुर्महान् ॥ ८॥

puṣṭimārgasthito nityaṃ kṛṣṇapremarasātmakaḥ |dvijadāridryaduḥkhaghno vāñchākalpatarurmahān || 8||

अनन्यभक्तभावज्ञो मोहनादिसुखप्रदः ।वल्लभेष्टप्रदो नित्यं गोकुलप्रीतिवर्धनः ॥ ९॥

ananyabhaktabhāvajño mohanādisukhapradaḥ |vallabheṣṭaprado nityaṃ gokulaprītivardhanaḥ || 9||

दासजीवनरूपश्च कन्दर्पादपि सुन्दरः ।पादपद्मरसस्पर्शसर्वारिष्टनिवारकः ॥ १०॥

dāsajīvanarūpaśca kandarpādapi sundaraḥ |pādapadmarasasparśasarvāriṣṭanivārakaḥ || 10||

मालीरक्षणकर्ता च शुद्धसत्कीर्तिवर्धनः ।दुष्टानान्दोषहन्ता यो भक्तनिर्भयकारकः ॥ ११॥

mālīrakṣaṇakartā ca śuddhasatkīrtivardhanaḥ |duṣṭānāndoṣahantā yo bhaktanirbhayakārakaḥ || 11||

इन्द्रादिभिर्नतो दक्षो लावण्यामृतवारिधिः ।रसिको द्विजराजाख्यो द्विजवंशविभूषणः ॥ १२॥

indrādibhirnato dakṣo lāvaṇyāmṛtavāridhiḥ |rasiko dvijarājākhyo dvijavaṃśavibhūṣaṇaḥ || 12||

असाधारणसद्धर्मा साधारः सुजनाश्रितः ।क्षमावान् क्रोधमात्सर्यतिरस्कारादिवर्जितः ॥ १३॥

asādhāraṇasaddharmā sādhāraḥ sujanāśritaḥ |kṣamāvān krodhamātsaryatiraskārādivarjitaḥ || 13||

गोपीकान्तो मनोहारी दामोदरगुणोत्सवः ।विहारी भक्तप्राणेशो राजीवदललोचनः ॥ १४॥

gopīkānto manohārī dāmodaraguṇotsavaḥ |vihārī bhaktaprāṇeśo rājīvadalalocanaḥ || 14||

मुकुन्दानुग्रहोत्साही भक्तिमार्गरसात्मकः ।भक्तभाग्यफलं धीरो बन्धुसज्जनवेष्टितः ॥ १५॥

mukundānugrahotsāhī bhaktimārgarasātmakaḥ |bhaktabhāgyaphalaṃ dhīro bandhusajjanaveṣṭitaḥ || 15||

वचनामृतमाधुर्यतृप्तसेवकसंस्तुतः ।नित्योत्सवो नित्यश्रेयो नित्यदानपरायणः ॥ १६॥

vacanāmṛtamādhuryatṛptasevakasaṃstutaḥ |nityotsavo nityaśreyo nityadānaparāyaṇaḥ || 16||

भवबन्धनदुःखघ्नो महदाधिविनाशकः ।

bhavabandhanaduḥkhaghno mahadādhivināśakaḥ |

नयनानन्दकर्ता च विश्वमोहनरूपधृक् ।श्रुतिस्मृतिपुराणादिशास्त्रातत्त्वार्थपारगः ॥ १८॥

nayanānandakartā ca viśvamohanarūpadhṛk |śrutismṛtipurāṇādiśāstrātattvārthapāragaḥ || 18||

धनाढ्यो धनदो धर्मरक्षाकर्ता शुभप्रदः ।सर्वेश्वरः सदापूर्णज्ञानवान् विबुधप्रियः ॥ १९॥

dhanāḍhyo dhanado dharmarakṣākartā śubhapradaḥ |sarveśvaraḥ sadāpūrṇajñānavān vibudhapriyaḥ || 19||

ब्रह्मवादे सविश्वासो मायावादादिखण्डनः ।उग्रप्रतापवान् ध्येयो भृत्यदुःखनिवारकः ॥ २०॥

brahmavāde saviśvāso māyāvādādikhaṇḍanaḥ |ugrapratāpavān dhyeyo bhṛtyaduḥkhanivārakaḥ || 20||

सतामात्माऽजातशत्रुर्जीवमात्रशुभस्पृहः ।दीनबन्धुर्विधुः श्रीमान् दयालुर्भक्तवत्सलः ॥ २१॥

satāmātmā'jātaśatrurjīvamātraśubhaspṛhaḥ |dīnabandhurvidhuḥ śrīmān dayālurbhaktavatsalaḥ || 21||

अनवद्यसुसङ्कल्पो जगदुद्धारणक्षमः ।अनन्तशक्तिमान् शुद्धगम्भीरमृदुलाशयः ॥ २२॥

anavadyasusaṅkalpo jagaduddhāraṇakṣamaḥ |anantaśaktimān śuddhagambhīramṛdulāśayaḥ || 22||

प्रणाममात्रसन्तुष्टः सर्वाधिकसुखप्रदः ।शृङ्गारादिरसोत्कर्षचातुर्यवलितस्मितः ॥ २३॥

praṇāmamātrasantuṣṭaḥ sarvādhikasukhapradaḥ |śṛṅgārādirasotkarṣacāturyavalitasmitaḥ || 23||

पादाम्बुजरजःस्पर्शमहापतितपावनः ।पितृपालितसद्धर्मरक्षणोत्सुकमानसः ॥ २४॥

pādāmbujarajaḥsparśamahāpatitapāvanaḥ |pitṛpālitasaddharmarakṣaṇotsukamānasaḥ || 24||

भक्तिसिद्धान्तमर्मज्ञो गूढभावप्रकाशकः ।पुष्टिप्रवाहमर्यादामार्गनिर्धारकारकः ॥ २५॥

bhaktisiddhāntamarmajño gūḍhabhāvaprakāśakaḥ |puṣṭipravāhamaryādāmārganirdhārakārakaḥ || 25||

श्रीभागवतसारज्ञो सर्वाधिकतत्त्वबोधकः ।अनन्यभावसन्तुष्टः पराश्रयनिवारकः ॥ २६॥

śrībhāgavatasārajño sarvādhikatattvabodhakaḥ |ananyabhāvasantuṣṭaḥ parāśrayanivārakaḥ || 26||

आचार्यार्ध्यस्वरूपश्च सदाद्भुतचरित्रवान् ।तैलङ्गतिलको दैवीसृष्टिसाफल्यकारकः ॥ २७॥

ācāryārdhyasvarūpaśca sadādbhutacaritravān |tailaṅgatilako daivīsṛṣṭisāphalyakārakaḥ || 27||

इति श्रीगोकुलेशानां नामाब्जाभिधमुत्तमम् ।स्तोत्रं सद्ब्रह्मभट्टेन विष्णुदासेन वर्णितम् ॥ २८॥

iti śrīgokuleśānāṃ nāmābjābhidhamuttamam |stotraṃ sadbrahmabhaṭṭena viṣṇudāsena varṇitam || 28||

यः पठेच्छृणुयाद्भक्त्या प्रभुस्तस्य प्रियो भवेत् ।संशयोऽत्र न कर्तव्यः समर्थो गोकुलेश्वरः ॥ २९॥

yaḥ paṭhecchṛṇuyādbhaktyā prabhustasya priyo bhavet |saṃśayo'tra na kartavyaḥ samartho gokuleśvaraḥ || 29||

तत्कारुण्यबलेनैव मयैतत्प्रकटीकृतम् ।पठन्तु साधवोऽप्येतत्तद्वद्देवानुकम्पया ॥ ३०॥

tatkāruṇyabalenaiva mayaitatprakaṭīkṛtam |paṭhantu sādhavo'pyetattadvaddevānukampayā || 30||

मदीयेयं तु विज्ञप्तिर्बुद्धिदोषप्रमत्तताम् ।शोधयित्वा यथायुक्तं तथा कुर्वन्तु साधवः ॥ ३१॥

madīyeyaṃ tu vijñaptirbuddhidoṣapramattatām |śodhayitvā yathāyuktaṃ tathā kurvantu sādhavaḥ || 31||

इति श्रीविष्णुदासविरचितमष्टोत्तरशतनाम्नां स्तोत्रं सम्पूर्णम् ।

iti śrīviṣṇudāsaviracitamaṣṭottaraśatanāmnāṃ stotraṃ sampūrṇam |