गोकुलेशशयनाष्टकम् Shrigokuleshashayanashtakam

प्रातः स्मरामि गुरुगोकुलनाथसंज्ञंसंसारसागरसमुत्तरणैकसेतुम् ।श्रीकृष्णचन्द्रचरणाम्बुजसर्वकालसंशुद्धसेवनविधौ कमलावतारम् ॥ १॥

prātaḥ smarāmi gurugokulanāthasaṃjñaṃsaṃsārasāgarasamuttaraṇaikasetum |śrīkṛṣṇacandracaraṇāmbujasarvakālasaṃśuddhasevanavidhau kamalāvatāram || 1||

प्रस्वाप्य नन्दतनयं प्रणयेन पश्चादानन्दपूर्णनिजमन्दिरमभ्युपेतम् ।स्थूलोपधानसहितासनसन्निषण्णंश्रीगोकुलेशमनिशं निशि चिन्तयामि ॥ २॥

prasvāpya nandatanayaṃ praṇayena paścādānandapūrṇanijamandiramabhyupetam |sthūlopadhānasahitāsanasanniṣaṇṇaṃśrīgokuleśamaniśaṃ niśi cintayāmi || 2||

अभ्यग्रभक्तकरदत्तसिताभ्रयुक्तंताम्बूलपूर्णवदनं सदनं रसाब्धेः ।आवेष्टितं परित आत्मजनैरशेषैःश्रीगोकुलेशमनिशं निशि चिन्तयामि ॥ ३॥

abhyagrabhaktakaradattasitābhrayuktaṃtāmbūlapūrṇavadanaṃ sadanaṃ rasābdheḥ |āveṣṭitaṃ parita ātmajanairaśeṣaiḥśrīgokuleśamaniśaṃ niśi cintayāmi || 3||

जाते तथा प्रभुकथाकथने तदानीमुत्थापिते परिचयेण पृथूपधाने ।गन्तुं गृहाय सुहृदः स्वयमुक्तवन्तंश्रीगोकुलेशमनिशं निशि चिन्तयामि ॥ ४॥

jāte tathā prabhukathākathane tadānīmutthāpite paricayeṇa pṛthūpadhāne |gantuṃ gṛhāya suhṛdaḥ svayamuktavantaṃśrīgokuleśamaniśaṃ niśi cintayāmi || 4||

नित्योल्लसन्नवरसौघनिवासरूपंसौन्दर्यनिर्जितजगज्जयिकामभूपम् ।स्वप्रेयसीजनमनोहरचारुवेषंसञ्चिन्तयामि शयने निशि गोकुलेशम् ॥ ५॥

nityollasannavarasaughanivāsarūpaṃsaundaryanirjitajagajjayikāmabhūpam |svapreyasījanamanoharacāruveṣaṃsañcintayāmi śayane niśi gokuleśam || 5||

कस्तूरिकादितनुलेपविसारिगन्धंपुष्पस्रगन्तरलसत्तनुमौलिबन्धम् ।संवाहिताङ्घ्रियुगलं निजमुख्यभक्तैःसञ्चिन्तयामि शयने निशि गोकुलेशम् ॥ ६॥

kastūrikāditanulepavisārigandhaṃpuṣpasragantaralasattanumaulibandham |saṃvāhitāṅghriyugalaṃ nijamukhyabhaktaiḥsañcintayāmi śayane niśi gokuleśam || 6||

सप्रेमहास्यवचनैः कतिचित्स्वकीयान्स्थित्वा क्षणं निजगृहाय निदिष्टवन्तम् ।शय्योपवेशसमयोचित्तवेषभाजंसञ्चिन्तयामि शयने निशि गोकुलेशम् ॥ ७॥

sapremahāsyavacanaiḥ katicitsvakīyānsthitvā kṣaṇaṃ nijagṛhāya nidiṣṭavantam |śayyopaveśasamayocittaveṣabhājaṃsañcintayāmi śayane niśi gokuleśam || 7||

निद्रागमात् प्रथमतो निजसुन्दरीभिःसंसेवितं तदखिलेन्द्रियवृत्तिभाग्यम् ।शृङ्गारसारमधिराजमुदारवेषंसञ्चिन्तयामि शयने निशि गोकुलेशम् ॥ ८॥

nidrāgamāt prathamato nijasundarībhiḥsaṃsevitaṃ tadakhilendriyavṛttibhāgyam |śṛṅgārasāramadhirājamudāraveṣaṃsañcintayāmi śayane niśi gokuleśam || 8||

स्वच्छोपरिच्छदलसच्छयनोपविष्टंसस्नेहभक्तसुखसेवितपादपद्मम् ।निद्रावधूस्वसमयेप्सितसङ्गसौख्यंसञ्चिन्तयामि शयने निशि गोकुलेशम् ॥ ९॥

svacchoparicchadalasacchayanopaviṣṭaṃsasnehabhaktasukhasevitapādapadmam |nidrāvadhūsvasamayepsitasaṅgasaukhyaṃsañcintayāmi śayane niśi gokuleśam || 9||

श्रीगोकुलेशशयनाष्टकमादरेणश्रीकृष्णरायरचितं सरसार्थपद्यम् ।सञ्चिन्तिताखिलफलप्रदमिष्टसिद्।ह्ध्यैसञ्चिन्तयन्तु निशि तच्चरणैकचित्ताः ॥ १०॥

śrīgokuleśaśayanāṣṭakamādareṇaśrīkṛṣṇarāyaracitaṃ sarasārthapadyam |sañcintitākhilaphalapradamiṣṭasid|hdhyaisañcintayantu niśi taccaraṇaikacittāḥ || 10||

इति श्रीकृष्णरायविरचितं श्रीशयनाष्टकं सम्पूर्णम् ।

iti śrīkṛṣṇarāyaviracitaṃ śrīśayanāṣṭakaṃ sampūrṇam |