मदनगोपालस्तोत्रम् Shri Madanagopalastotram

वनभुवि रविकन्यास्वच्छकच्छालिपालिध्वनियुतवरतीर्थद्वादशादित्यकुञ्जे ।सकनकमणिवेदीमध्यमध्याधिरूढःस्फुरति मदनपूर्वः कोऽपि गोपाल एषः ॥ १॥

vanabhuvi ravikanyāsvacchakacchālipālidhvaniyutavaratīrthadvādaśādityakuñje |sakanakamaṇivedīmadhyamadhyādhirūḍhaḥsphurati madanapūrvaḥ ko'pi gopāla eṣaḥ || 1||

सुभगनवशिखण्डभ्राजदुष्णीषहाराङ्गदवलयसमुद्राध्वानमञ्जीररम्यः ।वसनघुसृणचर्चामल्लिकोल्लासिताङ्गःस्फुरति मदनपूर्वः कोऽपि गोपाल एषः ॥ २॥

subhaganavaśikhaṇḍabhrājaduṣṇīṣahārāṅgadavalayasamudrādhvānamañjīraramyaḥ |vasanaghusṛṇacarcāmallikollāsitāṅgaḥsphurati madanapūrvaḥ ko'pi gopāla eṣaḥ || 2||

कटिकृतवरभङ्गन्यस्तजङ्घान्यजङ्घःकरयुगधृतवंशीं न्यस्तबिम्बाधराग्रे ।सुमधुरमतितिर्यग्ग्रीवया वादयंस्तांस्फुरति मदनपूर्वः कोऽपि गोपाल एषः ॥ ३॥

kaṭikṛtavarabhaṅganyastajaṅghānyajaṅghaḥkarayugadhṛtavaṃśīṃ nyastabimbādharāgre |sumadhuramatitiryaggrīvayā vādayaṃstāṃsphurati madanapūrvaḥ ko'pi gopāla eṣaḥ || 3||

विधिकृतविधुसृष्टिव्यर्थताकारिवक्त्रद्युतिलवहृतराधास्थूलमानान्धकारः ।स्मितलपितमधूल्योन्मादितैतद्धृषीकःस्फुरति मदनपूर्वः कोऽपि गोपाल एषः ॥ ४॥

vidhikṛtavidhusṛṣṭivyarthatākārivaktradyutilavahṛtarādhāsthūlamānāndhakāraḥ |smitalapitamadhūlyonmāditaitaddhṛṣīkaḥsphurati madanapūrvaḥ ko'pi gopāla eṣaḥ || 4||

शरदुदितसरोजव्रातवित्रासिनेत्रऽन्चलकुटिलकटाक्षैर्मन्दरोड्डण्डचालैः ।झटिति मथितराधास्वान्तदुग्धार्णवान्तःस्फुरति मदनपूर्वः कोऽपि गोपाल एषः ॥ ५॥

śaraduditasarojavrātavitrāsinetra'ncalakuṭilakaṭākṣairmandaroḍḍaṇḍacālaiḥ |jhaṭiti mathitarādhāsvāntadugdhārṇavāntaḥsphurati madanapūrvaḥ ko'pi gopāla eṣaḥ || 5||

कुटिलचटुलचिल्लीवल्लिलास्येन लब्धप्रथितसकलसाध्वीधर्मरत्नप्रसादः ।तिलकवदलिकेन ध्वस्तकामेषुचापःस्फुरति मदनपूर्वः कोऽपि गोपाल एषः ॥ ६॥

kuṭilacaṭulacillīvallilāsyena labdhaprathitasakalasādhvīdharmaratnaprasādaḥ |tilakavadalikena dhvastakāmeṣucāpaḥsphurati madanapūrvaḥ ko'pi gopāla eṣaḥ || 6||

शुकयुववरचञ्चुप्रांशुनासांशुसिन्धौजनितकुलवधूटीदृष्टिमत्स्यीविहारः ।स्मितलवयुतराधाजल्पमन्त्रोन्मदान्तःस्फुरति मदनपूर्वः कोऽपि गोपाल एषः ॥ ७॥

śukayuvavaracañcuprāṃśunāsāṃśusindhaujanitakulavadhūṭīdṛṣṭimatsyīvihāraḥ |smitalavayutarādhājalpamantronmadāntaḥsphurati madanapūrvaḥ ko'pi gopāla eṣaḥ || 7||

विकसदधरबन्धूकान्तरुड्डीय गन्धैःपतितमुप विधर्तुं राधिकाचित्तभृङ्गम् ।दशनरुचिगुणाग्रे दत्ततत्सीधुचारःस्फुरति मदनपूर्वः कोऽपि गोपाल एषः ॥ ८॥

vikasadadharabandhūkāntaruḍḍīya gandhaiḥpatitamupa vidhartuṃ rādhikācittabhṛṅgam |daśanaruciguṇāgre dattatatsīdhucāraḥsphurati madanapūrvaḥ ko'pi gopāla eṣaḥ || 8||

श्रवणमदनकन्दप्रेक्षणोड्डीनराधाधृतिविभवविहङ्गे न्यस्तनेत्रान्तबाणः ।अलकमधुपदत्तद्योतमाध्वीकसत्रःस्फुरति मदनपूर्वः कोऽपि गोपाल एषः ॥ ९॥

śravaṇamadanakandaprekṣaṇoḍḍīnarādhādhṛtivibhavavihaṅge nyastanetrāntabāṇaḥ |alakamadhupadattadyotamādhvīkasatraḥsphurati madanapūrvaḥ ko'pi gopāla eṣaḥ || 9||

परिमलरुचिपालीशालिगान्धर्विकोद्यन्मुखकमलमधूलीपानमत्तद्विरेफः ।मुकुरजयिकपोले मृग्यताचुम्बबिम्बःस्फुरति मदनपूर्वः कोऽपि गोपाल एषः ॥ १०॥

parimalarucipālīśāligāndharvikodyanmukhakamalamadhūlīpānamattadvirephaḥ |mukurajayikapole mṛgyatācumbabimbaḥsphurati madanapūrvaḥ ko'pi gopāla eṣaḥ || 10||

मकरमुखसदृक्षस्वर्णवर्णावतंसप्रचलनहृतराधासर्वशारीरधर्मः ।तदतिचलदृगन्तस्वस्थवंशे धृताक्षःस्फुरति मदनपूर्वः कोऽपि गोपाल एषः ॥ ११॥

makaramukhasadṛkṣasvarṇavarṇāvataṃsapracalanahṛtarādhāsarvaśārīradharmaḥ |tadaticaladṛgantasvasthavaṃśe dhṛtākṣaḥsphurati madanapūrvaḥ ko'pi gopāla eṣaḥ || 11||

हरिमणिकृतशङ्खश्लाघितोल्लङ्घिलेखात्रयरुचिवृतकण्ठस्योपकण्ठे मणीन्द्रम् ।दधदिह परिरब्धुं राधिकां बिम्बितां चस्फुरति मदनपूर्वः कोऽपि गोपाल एषः ॥ १२॥

harimaṇikṛtaśaṅkhaślāghitollaṅghilekhātrayarucivṛtakaṇṭhasyopakaṇṭhe maṇīndram |dadhadiha parirabdhuṃ rādhikāṃ bimbitāṃ casphurati madanapūrvaḥ ko'pi gopāla eṣaḥ || 12||

कुवलयकृतवक्षस्तल्पमुच्चं दधानःश्रमविलुलितराधास्वापनायैव नव्यम् ।भुजयुगमपि दिव्यं तत्प्रकाण्डोपधानंस्फुरति मदनपूर्वः कोऽपि गोपाल एषः ॥ १३॥

kuvalayakṛtavakṣastalpamuccaṃ dadhānaḥśramavilulitarādhāsvāpanāyaiva navyam |bhujayugamapi divyaṃ tatprakāṇḍopadhānaṃsphurati madanapūrvaḥ ko'pi gopāla eṣaḥ || 13||

रुचिरजठरपत्रे चित्रनाभीतटोद्यत्तनुरुहततिनाम्नीं बल्लवीवृन्दभुक्त्यै ।स्मरनृपतिसमुद्रस्वाक्षरालीं दधानःस्फुरति मदनपूर्वः कोऽपि गोपाल एषः ॥ १४॥

rucirajaṭharapatre citranābhītaṭodyattanuruhatatināmnīṃ ballavīvṛndabhuktyai |smaranṛpatisamudrasvākṣarālīṃ dadhānaḥsphurati madanapūrvaḥ ko'pi gopāla eṣaḥ || 14||

युवतिहृदलसेभप्रौढबन्धाय कामस्थपितचितरसोरुस्तम्भजृम्भाभिरामः ।मरकतकटजैत्रफुल्लजानुप्रसन्नःस्फुरति मदनपूर्वः कोऽपि गोपाल एषः ॥ १५॥

yuvatihṛdalasebhaprauḍhabandhāya kāmasthapitacitarasorustambhajṛmbhābhirāmaḥ |marakatakaṭajaitraphullajānuprasannaḥsphurati madanapūrvaḥ ko'pi gopāla eṣaḥ || 15||

प्रणयनवमधूनां पानमात्रैकगत्यासकलकरणजीव्यं राधिकामत्तभृङ्ग्याः ।अरुणचरणकञ्जद्वन्द्वमुल्लास्य पश्यन्स्फुरति मदनपूर्वः कोऽपि गोपाल एषः ॥ १६॥

praṇayanavamadhūnāṃ pānamātraikagatyāsakalakaraṇajīvyaṃ rādhikāmattabhṛṅgyāḥ |aruṇacaraṇakañjadvandvamullāsya paśyansphurati madanapūrvaḥ ko'pi gopāla eṣaḥ || 16||

अतुलविलसदङ्गश्रेणिविन्यासभङ्ग्याग्लपितमदनकोटिस्फारसौन्दर्यकीर्तिः ।बललवहतमत्तापारपारीन्द्रदर्पःस्फुरति मदनपूर्वः कोऽपि गोपाल एषः ॥ १७॥

atulavilasadaṅgaśreṇivinyāsabhaṅgyāglapitamadanakoṭisphārasaundaryakīrtiḥ |balalavahatamattāpārapārīndradarpaḥsphurati madanapūrvaḥ ko'pi gopāla eṣaḥ || 17||

तरणिदुहितृकच्छे स्वच्छपाथोदधामासमुदितनवकामाभिररामावलीणाम् ।तडिदतिरुचिबाहुस्फुर्जदंसोऽतिजृम्भन्स्फुरति मदनपूर्वः कोऽपि गोपाल एषः ॥ १८॥

taraṇiduhitṛkacche svacchapāthodadhāmāsamuditanavakāmābhirarāmāvalīṇām |taḍidatirucibāhusphurjadaṃso'tijṛmbhansphurati madanapūrvaḥ ko'pi gopāla eṣaḥ || 18||

नवतरुणिमभट्टाचार्यवर्येण शास्त्रंमनसिजमुनि कॢप्तं न्यायमध्यापिताभिः ।नवनवयुवतीभिर्बिभ्रदुद्ग्राहमस्मिन्स्फुरति मदनपूर्वः कोऽपि गोपाल एषः ॥ १९॥

navataruṇimabhaṭṭācāryavaryeṇa śāstraṃmanasijamuni kḷptaṃ nyāyamadhyāpitābhiḥ |navanavayuvatībhirbibhradudgrāhamasminsphurati madanapūrvaḥ ko'pi gopāla eṣaḥ || 19||

रतिमतिरचयन्त्या राधिकानर्मकान्त्यास्थगितवचनदर्पः स्फारितान्यप्रसङ्गः ।खरमतिललितास्ये किञ्चिदञ्चत्स्मिताक्षःस्फुरति मदनपूर्वः कोऽपि गोपाल एषः ॥ २०॥

ratimatiracayantyā rādhikānarmakāntyāsthagitavacanadarpaḥ sphāritānyaprasaṅgaḥ |kharamatilalitāsye kiñcidañcatsmitākṣaḥsphurati madanapūrvaḥ ko'pi gopāla eṣaḥ || 20||

सविधरमितराधः साग्रजस्निग्धरूपप्रणयरुचिरचन्द्रः कुञ्जखेलावितन्द्रः ।रचितजनचकोरप्रेमपीयूषवर्षःस्फुरति मदनपूर्वः कोऽपि गोपाल एषः ॥ २१॥

savidharamitarādhaḥ sāgrajasnigdharūpapraṇayaruciracandraḥ kuñjakhelāvitandraḥ |racitajanacakorapremapīyūṣavarṣaḥsphurati madanapūrvaḥ ko'pi gopāla eṣaḥ || 21||

मदनवलितगोपालस्य यः स्तोत्रमेतत्पठति सुमतिरुद्यद्दैन्यवन्याभिषिक्तः ।स खलु विषयरागं सौरिभागं विहायप्रतिजनि लभते तत्पादकञ्जानुरागम् ॥ २२॥

madanavalitagopālasya yaḥ stotrametatpaṭhati sumatirudyaddainyavanyābhiṣiktaḥ |sa khalu viṣayarāgaṃ sauribhāgaṃ vihāyapratijani labhate tatpādakañjānurāgam || 22||

इति श्रीरघुनाथदासगोस्वामिविरचितस्तवावल्यांश्रीमदनगोपालस्तोत्रं सम्पूर्णम् ।

iti śrīraghunāthadāsagosvāmiviracitastavāvalyāṃśrīmadanagopālastotraṃ sampūrṇam |