मदनगोपालस्तोत्रम् २ Shri Madanagopala Stotram

ईश्वर उवाचशृणु देवि प्रवक्ष्यामि रहस्यं भुवनेश्वरि ।तवैव पौरुषं रूपं गोपिकानयनामृतम् ॥ १॥

īśvara uvācaśṛṇu devi pravakṣyāmi rahasyaṃ bhuvaneśvari |tavaiva pauruṣaṃ rūpaṃ gopikānayanāmṛtam || 1||

सदा निषेवितं रागाद्भवद्विरहभीरुभिः ।सत्यभामादिरूपाभिर्मायामूर्तिभिरष्टभिः ॥ २॥

sadā niṣevitaṃ rāgādbhavadvirahabhīrubhiḥ |satyabhāmādirūpābhirmāyāmūrtibhiraṣṭabhiḥ || 2||

ख्यातं मदनगोपालसंज्ञया भुवनत्रये ।तस्य ध्यानं प्रवक्ष्यामि सर्वपापप्रणाशनम् ॥ ३॥

khyātaṃ madanagopālasaṃjñayā bhuvanatraye |tasya dhyānaṃ pravakṣyāmi sarvapāpapraṇāśanam || 3||

सर्वमोहमयं सर्वसम्पत्प्रदमनुत्तमम् ।अणिमादिमहैश्वर्यप्रदमायुःप्रवर्धनम् ॥ ४॥

sarvamohamayaṃ sarvasampatpradamanuttamam |aṇimādimahaiśvaryapradamāyuḥpravardhanam || 4||

सौभाग्यदायकं नॄणां स्त्रीणां चैव विशेषतः ।किमत्र बहुनोक्तेन ध्यानेनानेन भामिनि ।यद्यदिच्छति तत्सर्वं नरः प्राप्नोत्यसंशयः ॥ ५॥

saubhāgyadāyakaṃ nṝṇāṃ strīṇāṃ caiva viśeṣataḥ |kimatra bahunoktena dhyānenānena bhāmini |yadyadicchati tatsarvaṃ naraḥ prāpnotyasaṃśayaḥ || 5||

श्रीमद्बालार्कसङ्काशं पद्मरागमणिप्रभम् ।बन्धूकबन्धुरालोकसन्ध्यारागारुणद्युतिम् ॥ ६॥

śrīmadbālārkasaṅkāśaṃ padmarāgamaṇiprabham |bandhūkabandhurālokasandhyārāgāruṇadyutim || 6||

मकुटानेकमाणिक्यप्रभापल्लविताम्बरम् ।किरीटोपान्तविन्यस्तबर्हिबर्हावतंसकम् ॥ ७॥

makuṭānekamāṇikyaprabhāpallavitāmbaram |kirīṭopāntavinyastabarhibarhāvataṃsakam || 7||

कस्तूरीतिलकाक्रान्तकमनीयालकस्थलम् ।निस्तलस्थूलमाणिक्यचारुमौक्तिकमण्डलम् ॥ ८॥

kastūrītilakākrāntakamanīyālakasthalam |nistalasthūlamāṇikyacārumauktikamaṇḍalam || 8||

दन्तांशुकुसुमाश्लिष्टचिबुकोद्देशशोभितम् ।शशाङ्कबिम्बालङ्कारश्लाघातङ्ककराननम् ॥ ९॥

dantāṃśukusumāśliṣṭacibukoddeśaśobhitam |śaśāṅkabimbālaṅkāraślāghātaṅkakarānanam || 9||

अनर्धरत्नग्रैवेयविलसत्कम्बुकन्धरम् ।उदंशुमौक्तिकैर्हारैर्वैजयन्त्या च मालया ॥ १०॥

anardharatnagraiveyavilasatkambukandharam |udaṃśumauktikairhārairvaijayantyā ca mālayā || 10||

श्रीवत्सकौस्तुभाभ्यां च परिष्कृतभुजान्तरम् ।छत्रं पुष्पं शरं पद्मं सृणिं शङ्खेक्षुकार्मुके ॥ ११॥

śrīvatsakaustubhābhyāṃ ca pariṣkṛtabhujāntaram |chatraṃ puṣpaṃ śaraṃ padmaṃ sṛṇiṃ śaṅkhekṣukārmuke || 11||

गदां पाशं च मुरलीं बिभ्राणं मोहनाकृतिम् ।निम्ननाभिं रोमराजीविलसत्पल्लवोदरम् ॥ १२॥

gadāṃ pāśaṃ ca muralīṃ bibhrāṇaṃ mohanākṛtim |nimnanābhiṃ romarājīvilasatpallavodaram || 12||

विसङ्कटकटीदेशवाचालमणिमेखलम् ।स्पुरत्सौदामनीछायादायादकनकाम्बरम् ॥ १३॥

visaṅkaṭakaṭīdeśavācālamaṇimekhalam |spuratsaudāmanīchāyādāyādakanakāmbaram || 13||

मणिमञ्जीरकिरणकिञ्जल्कितपदाम्बुजम् ।शाणोल्लीढमणिश्रेणिरम्याङ्घ्रिनखमण्डलम् ॥ १४॥

maṇimañjīrakiraṇakiñjalkitapadāmbujam |śāṇollīḍhamaṇiśreṇiramyāṅghrinakhamaṇḍalam || 14||

आपादकण्ठमायुक्तभूषाशतमनोहरम् ।कल्पकानोकहाराममहिते मणिमण्डपे ॥ १५॥

āpādakaṇṭhamāyuktabhūṣāśatamanoharam |kalpakānokahārāmamahite maṇimaṇḍape || 15||

चिन्तामणिमहापीठमध्ये हेमसरोरुहे ।कर्णिकापरिसन्दीप्तश्रीमञ्चक्रासने शुभे ॥ १६॥

cintāmaṇimahāpīṭhamadhye hemasaroruhe |karṇikāparisandīptaśrīmañcakrāsane śubhe || 16||

तिष्ठन्तं देवदेवेशं त्रिभङ्गीललिताकृतिम् ।वामांसशिखरोपान्तव्यालोलमणिकुण्डलम् ॥ १७॥

tiṣṭhantaṃ devadeveśaṃ tribhaṅgīlalitākṛtim |vāmāṃsaśikharopāntavyālolamaṇikuṇḍalam || 17||

आकुञ्चितभ्रुवं किञ्चित्कुञ्चिताधरपल्लवम् ।गानामृतरसास्वादनिष्पन्दनिखिलेन्द्रियैः ॥ १८॥

ākuñcitabhruvaṃ kiñcitkuñcitādharapallavam |gānāmṛtarasāsvādaniṣpandanikhilendriyaiḥ || 18||

उपास्यमानमानन्दात् सदारैर्दिविषद्वरैः ।सौरदुन्दुभिनिर्घोषैर्मुक्तप्रसववृष्टिभिः ॥ १९॥

upāsyamānamānandāt sadārairdiviṣadvaraiḥ |sauradundubhinirghoṣairmuktaprasavavṛṣṭibhiḥ || 19||

ध्यायेन्मदनगोपालं मन्त्री शुचिरलङ्कृतम् ।(यः) पठेन्मदनगोपालध्यानस्तोत्रं समाहितः ।सर्वान् कामानवाप्नोति दुर्लभानप्ययत्नतः ॥ २०॥

dhyāyenmadanagopālaṃ mantrī śuciralaṅkṛtam |(yaḥ) paṭhenmadanagopāladhyānastotraṃ samāhitaḥ |sarvān kāmānavāpnoti durlabhānapyayatnataḥ || 20||

इति श्रीमदनगोपालस्तोत्रं सम्पूर्णम् ।

iti śrīmadanagopālastotraṃ sampūrṇam |