मथुरास्तवः Shri Mathurastavah

मुक्तेर्गोविन्दभक्तेर्वितरणचतुरं सच्चिदानन्दरूपंयस्यां विद्योति विद्यायुगलमुदयते तारकं पारकं च ।कृष्णस्योत्पत्तिलीलाखनिरखिलजगन्मौलिरत्नस्य सा तेवैकुण्ठाद् या प्रतिष्ठा प्रथयतु मथुरा मङ्गलानां कलापम् ॥ १॥

muktergovindabhaktervitaraṇacaturaṃ saccidānandarūpaṃyasyāṃ vidyoti vidyāyugalamudayate tārakaṃ pārakaṃ ca |kṛṣṇasyotpattilīlākhanirakhilajaganmauliratnasya sā tevaikuṇṭhād yā pratiṣṭhā prathayatu mathurā maṅgalānāṃ kalāpam || 1||

कोटीन्दुस्पष्टकान्ती रभसयुतभवक्लेशयौधेरयोध्यामायावित्रासिवासा मुनिहृदयमुषो दिव्यलीला स्रवन्ती ।साशीः काशीशमुख्यामरपतिभिरलं प्रार्थितद्वारकार्यावैकुण्ठोद्गीतकीर्तिर्दिशतु मधुपुरी प्रेमभक्तिश्रियं वः ॥ २॥

koṭīnduspaṣṭakāntī rabhasayutabhavakleśayaudherayodhyāmāyāvitrāsivāsā munihṛdayamuṣo divyalīlā sravantī |sāśīḥ kāśīśamukhyāmarapatibhiralaṃ prārthitadvārakāryāvaikuṇṭhodgītakīrtirdiśatu madhupurī premabhaktiśriyaṃ vaḥ || 2||

बीजं मुक्तितरोरनर्थपटलीनिस्तारकं तारकंधाम प्रेमरसस्य वाञ्छितधुरासम्पारकं पारकम् ।एतद् यत्र निवासिनामुदयते चिच्छक्तिवृत्तिद्वयंमथ्नातु व्यसनानि माथुरपुरी सा वः श्रियं च क्रियात् ॥ ३॥

bījaṃ muktitaroranarthapaṭalīnistārakaṃ tārakaṃdhāma premarasasya vāñchitadhurāsampārakaṃ pārakam |etad yatra nivāsināmudayate cicchaktivṛttidvayaṃmathnātu vyasanāni māthurapurī sā vaḥ śriyaṃ ca kriyāt || 3||

अद्यावन्ति पतद्ग्रहं कुरु माये शनैर्वीजयच्छत्रं काञ्चि गृहाण काशि पुरतः पादूयुगं धारय ।नायोध्ये भज सम्भ्रमं स्तुतिकथां नोद्गारय द्वारकेदेवीयं भवतीषु हन्त मथुरा दृष्टिप्रसादं दधे ॥ ४॥

adyāvanti patadgrahaṃ kuru māye śanairvījayacchatraṃ kāñci gṛhāṇa kāśi purataḥ pādūyugaṃ dhāraya |nāyodhye bhaja sambhramaṃ stutikathāṃ nodgāraya dvārakedevīyaṃ bhavatīṣu hanta mathurā dṛṣṭiprasādaṃ dadhe || 4||

इति श्रीरूपगोस्वामिविरचितस्तवमालायां मथुरास्तवः समाप्तः ।

iti śrīrūpagosvāmiviracitastavamālāyāṃ mathurāstavaḥ samāptaḥ |