कृष्णनामकरणप्रस्तवः Shri Krishnanamakaranapra Stava

गोलोकनाथो भगवाञ्छ्रीकृष्णो राधिकापतिः ॥ ४८॥

golokanātho bhagavāñchrīkṛṣṇo rādhikāpatiḥ || 48||

नारायणो यो वैकुण्ठे कमलाकान्त एव च ।श्वेतद्वीपनिवासी यः पिता विष्णुश्च सोऽप्यजः ॥ ४९॥

nārāyaṇo yo vaikuṇṭhe kamalākānta eva ca |śvetadvīpanivāsī yaḥ pitā viṣṇuśca so'pyajaḥ || 49||

कपिलोऽन्ये तदंशाश्च नरनारायणावृषी ।सर्वेषां तेजसां राशिर्मूर्तिमानागतः किमु ॥ ५०॥

kapilo'nye tadaṃśāśca naranārāyaṇāvṛṣī |sarveṣāṃ tejasāṃ rāśirmūrtimānāgataḥ kimu || 50||

तं वसुं दर्शयित्वा च शिशुरूपो बभूव ह ।साम्प्रतं सूतिकागारादाजगाम तवालयम् ॥ ५१॥

taṃ vasuṃ darśayitvā ca śiśurūpo babhūva ha |sāmprataṃ sūtikāgārādājagāma tavālayam || 51||

अयोनिसम्भवश्चायमाविर्भूतो महीतले ।वायुपूर्णं मातृगर्भे कृत्वा च मायया हरिः ॥ ५२॥

ayonisambhavaścāyamāvirbhūto mahītale |vāyupūrṇaṃ mātṛgarbhe kṛtvā ca māyayā hariḥ || 52||

आविर्भूय वसुं मूर्तिं दर्शयित्वा जगाम ह ।युगे युगे वर्णभेदो नामभेदोऽस्य बल्लव ॥ ९३॥

āvirbhūya vasuṃ mūrtiṃ darśayitvā jagāma ha |yuge yuge varṇabhedo nāmabhedo'sya ballava || 93||

शुक्लः पीतस्तथा रक्त इदानीं कृष्णतां गतः ।शुक्लवर्णः सत्ययुगे सुतीव्रतेजसा वृतः ॥ ५४॥

śuklaḥ pītastathā rakta idānīṃ kṛṣṇatāṃ gataḥ |śuklavarṇaḥ satyayuge sutīvratejasā vṛtaḥ || 54||

त्रेतायां रक्तवर्णोऽयं पीतोऽयं द्वापरे विभुः ।कृष्णवर्णः कलौ श्रीमांस्तेजसां राशिरेव च ॥ ५५॥

tretāyāṃ raktavarṇo'yaṃ pīto'yaṃ dvāpare vibhuḥ |kṛṣṇavarṇaḥ kalau śrīmāṃstejasāṃ rāśireva ca || 55||

परिपूर्णतमं ब्रह्म तेन कृष्ण इति स्मृतः ।ब्रह्मणो वाचकः कोऽयमृकारोऽनन्तवाचकः ॥ ५६॥

paripūrṇatamaṃ brahma tena kṛṣṇa iti smṛtaḥ |brahmaṇo vācakaḥ ko'yamṛkāro'nantavācakaḥ || 56||

शिवस्य वाचकः षश्च नकारो धर्मवाचकः ।अकारो विष्णुवचनः श्वेतद्वीपनिवासिनः ॥ ५७॥

śivasya vācakaḥ ṣaśca nakāro dharmavācakaḥ |akāro viṣṇuvacanaḥ śvetadvīpanivāsinaḥ || 57||

नरनारायणार्थस्य विसर्गो वाचकः स्मृतः ।सर्वेषां तेजसां राशिः सर्वमूर्तिस्वरूपकः ॥ ५८॥

naranārāyaṇārthasya visargo vācakaḥ smṛtaḥ |sarveṣāṃ tejasāṃ rāśiḥ sarvamūrtisvarūpakaḥ || 58||

सर्वाधारः सर्वबीजस्तेन कृष्ण इति स्मृतः ।कर्मनिर्मूलवचनः कृषिर्नो दास्यवाचकः ॥ ५९॥

sarvādhāraḥ sarvabījastena kṛṣṇa iti smṛtaḥ |karmanirmūlavacanaḥ kṛṣirno dāsyavācakaḥ || 59||

अकारो दातृवचनस्तेन कृष्ण इति स्मृतः ।कृषिर्निश्चेष्टवचनो नकारो भक्तिवाचकः ॥ ६०॥

akāro dātṛvacanastena kṛṣṇa iti smṛtaḥ |kṛṣirniśceṣṭavacano nakāro bhaktivācakaḥ || 60||

अकारः प्राप्तिवचनस्तेन कृष्ण इति स्मृतः ।कृषिर्निर्वाणवचनो नकारो मोक्षवाचकः ॥ ६१॥

akāraḥ prāptivacanastena kṛṣṇa iti smṛtaḥ |kṛṣirnirvāṇavacano nakāro mokṣavācakaḥ || 61||

अकारो दातृवचनस्तेन कृष्ण इति स्मृतः ।नाम्नां भगवतो नन्द कोटीनां स्मरणेन यत् ॥ ६२॥

akāro dātṛvacanastena kṛṣṇa iti smṛtaḥ |nāmnāṃ bhagavato nanda koṭīnāṃ smaraṇena yat || 62||

तत्फलं लभते नूनं कृष्णेति स्मरणे नरः ।यद्विधं स्मरणात्पुण्यं वचनाच्छ्रवणात्तथा ॥ ६३॥

tatphalaṃ labhate nūnaṃ kṛṣṇeti smaraṇe naraḥ |yadvidhaṃ smaraṇātpuṇyaṃ vacanācchravaṇāttathā || 63||

कोटिजन्मांहसो नाशो भवेद्यत्स्मरणादिकात् ।विष्णोर्नाम्नां च सर्वेषां सारात्सारं परात्परम् ॥ ६४॥

koṭijanmāṃhaso nāśo bhavedyatsmaraṇādikāt |viṣṇornāmnāṃ ca sarveṣāṃ sārātsāraṃ parātparam || 64||

कृष्णेति सुन्दरं नाम मङ्गलं भक्तिदायकम् ।ककारोच्चारणाद्भक्तः कैवल्यं मृत्युजन्महम् ॥ ६९॥

kṛṣṇeti sundaraṃ nāma maṅgalaṃ bhaktidāyakam |kakāroccāraṇādbhaktaḥ kaivalyaṃ mṛtyujanmaham || 69||

ऋकाराद्दास्यमतुलं षकाराद्भक्तिमीप्सिताम् ।नकारात्सहवासं च तत्समं कालमेव च ॥ ६६॥

ṛkārāddāsyamatulaṃ ṣakārādbhaktimīpsitām |nakārātsahavāsaṃ ca tatsamaṃ kālameva ca || 66||

तत्सारूप्यं विसर्गाच्च लभते नात्र संशयः ।ककारोच्चारणादेव वेपन्ते यमकिङ्कराः ॥ ६७॥

tatsārūpyaṃ visargācca labhate nātra saṃśayaḥ |kakāroccāraṇādeva vepante yamakiṅkarāḥ || 67||

ऋकारोक्तेर्न तिष्ठन्ति षकारात्पातकानि च ।नकारोच्चारणाद्रोगा अकारान्मृत्युरेव च ॥ ६८॥

ṛkārokterna tiṣṭhanti ṣakārātpātakāni ca |nakāroccāraṇādrogā akārānmṛtyureva ca || 68||

ध्रुवं सर्वे पलायन्ते नामोच्चारणभीरवः ।स्मृत्युक्तिश्रवणोद्योगात्कृष्णनाम्नो व्रजेश्वर ॥ ६९॥

dhruvaṃ sarve palāyante nāmoccāraṇabhīravaḥ |smṛtyuktiśravaṇodyogātkṛṣṇanāmno vrajeśvara || 69||

रथं गृहीत्वा धावन्ति गोलोकात्कृष्णकिङ्कराः ।पृथिव्या रजसः सङ्ख्यां कर्तुं शक्ता विपश्चितः ॥ ७०॥

rathaṃ gṛhītvā dhāvanti golokātkṛṣṇakiṅkarāḥ |pṛthivyā rajasaḥ saṅkhyāṃ kartuṃ śaktā vipaścitaḥ || 70||

नाम्नः प्रभावसङ्ख्यानं सन्तो वक्तुं न च क्षमाः ।पुरा शङ्करवक्त्रेण नाम्नोऽस्य महिमा श्रुतः ॥ ७१॥

nāmnaḥ prabhāvasaṅkhyānaṃ santo vaktuṃ na ca kṣamāḥ |purā śaṅkaravaktreṇa nāmno'sya mahimā śrutaḥ || 71||

गुणान्नामप्रभावं च किञ्चिज्जानाति मद्गुरुः ।ब्रह्माऽनन्तश्च धर्मश्च सुरर्षिमनुमानवाः ॥ ७२॥

guṇānnāmaprabhāvaṃ ca kiñcijjānāti madguruḥ |brahmā'nantaśca dharmaśca surarṣimanumānavāḥ || 72||

वेदाः सन्तो न जानन्ति महिम्नः षोडशीं कलाम् ।इत्येवं कथितो नन्द महिमा च सुतस्य च ॥ ७३॥

vedāḥ santo na jānanti mahimnaḥ ṣoḍaśīṃ kalām |ityevaṃ kathito nanda mahimā ca sutasya ca || 73||

यथामति यथाज्ञानं गुरुवक्त्राद्यथा श्रुतम् ।कृष्णः पीताम्बरः कंसध्वंसी च विष्टरश्रवाः ॥ ७४॥

yathāmati yathājñānaṃ guruvaktrādyathā śrutam |kṛṣṇaḥ pītāmbaraḥ kaṃsadhvaṃsī ca viṣṭaraśravāḥ || 74||

देवकीनन्दनः श्रीशो यशोदानन्दनो हरिः ।सनातनोऽच्युतोऽनन्तः सर्वेशः सर्वरूपधृक् ॥ ७५॥

devakīnandanaḥ śrīśo yaśodānandano hariḥ |sanātano'cyuto'nantaḥ sarveśaḥ sarvarūpadhṛk || 75||

सर्वाधारः सर्वगतिः सर्वकारणकारणम् ।राधाबन्धू राधिकात्मा राधिकाजीवनं स्वयम् ॥ ७६॥

sarvādhāraḥ sarvagatiḥ sarvakāraṇakāraṇam |rādhābandhū rādhikātmā rādhikājīvanaṃ svayam || 76||

राधाप्राणो राधिकेशो राधिकारमणः स्वयम् ।राधिकासहचारी च राधामानसपूरणः ॥ ७७॥

rādhāprāṇo rādhikeśo rādhikāramaṇaḥ svayam |rādhikāsahacārī ca rādhāmānasapūraṇaḥ || 77||

राधाधनो राधिकाङ्गो राधिकासक्तमानसः ।राधिकाचित्तचोरश्च राधाप्राणाधिकः प्रभुः ॥ ७८॥

rādhādhano rādhikāṅgo rādhikāsaktamānasaḥ |rādhikācittacoraśca rādhāprāṇādhikaḥ prabhuḥ || 78||

परिपूर्णतमं ब्रह्म गोविन्दो गरुडध्वजः ।नामान्येतानि कृष्णस्य श्रुतानि मन्मुखाद्धृदि ॥ ७९॥

paripūrṇatamaṃ brahma govindo garuḍadhvajaḥ |nāmānyetāni kṛṣṇasya śrutāni manmukhāddhṛdi || 79||

जन्ममृत्युहराण्येव रक्ष नन्द शुभेक्षण ।कृतं निरूपणं नाम्नां कनिष्ठस्य यथा श्रुतम् ॥ ८०॥

janmamṛtyuharāṇyeva rakṣa nanda śubhekṣaṇa |kṛtaṃ nirūpaṇaṃ nāmnāṃ kaniṣṭhasya yathā śrutam || 80||

इति श्रीब्रह्मवैवर्तपुराणे श्रीकृष्णजन्मखण्डे पूर्वेद्वादशाध्यायान्तर्गतः नामकरणप्रस्तावः समाप्तः ।ब्रह्मवैवर्तपुराण । श्रीकृष्णजन्म, पूर्वभाग । अध्याय १३/४८८०॥ब्रह्मवैवर्तपुराण । श्रीकृष्णजन्म, पूर्वभाग । अध्याय १३/४८-८०॥

iti śrībrahmavaivartapurāṇe śrīkṛṣṇajanmakhaṇḍe pūrvedvādaśādhyāyāntargataḥ nāmakaraṇaprastāvaḥ samāptaḥ |brahmavaivartapurāṇa | śrīkṛṣṇajanma, pūrvabhāga | adhyāya 13/4880||brahmavaivartapurāṇa | śrīkṛṣṇajanma, pūrvabhāga | adhyāya 13/48-80||