कृष्णमङ्गलम् २ Shri Krishnamangalam (2)

मङ्गलं यादवेन्द्राय महनीयगुणाब्धये । (महनीयगुणात्मने) ।वसुदेवतनूजाय वासुदेवाय मङ्गलम् ॥ १॥

maṅgalaṃ yādavendrāya mahanīyaguṇābdhaye | (mahanīyaguṇātmane) |vasudevatanūjāya vāsudevāya maṅgalam || 1||

किरीटकुण्डलभ्राजदलकैर्यन्मुखश्रिये ।श्रीवत्सकौस्तुभोद्भासि वक्षसे चास्तु मङ्गलम् ॥ २॥

kirīṭakuṇḍalabhrājadalakairyanmukhaśriye |śrīvatsakaustubhodbhāsi vakṣase cāstu maṅgalam || 2||

नीलाम्बुदनिकाशाय विद्युत्सदृशवाससे ।देवकीवसुदेवाभ्यां संस्तुतायास्तु मङ्गलम् ॥ ३॥

nīlāmbudanikāśāya vidyutsadṛśavāsase |devakīvasudevābhyāṃ saṃstutāyāstu maṅgalam || 3||

ताभ्यां सम्प्रार्थितायाथ प्राकृतार्भकरूपिणे ।यशोदाय गृहं पित्रा प्रापितायास्तु मङ्गलम् ॥ ४॥

tābhyāṃ samprārthitāyātha prākṛtārbhakarūpiṇe |yaśodāya gṛhaṃ pitrā prāpitāyāstu maṅgalam || 4||

पूतनाऽसुपयःपानपेशलायाऽसुरारिणे ।शकटासुर विध्वंसि पादपद्माय मङ्गलम् ॥ ५॥

pūtanā'supayaḥpānapeśalāyā'surāriṇe |śakaṭāsura vidhvaṃsi pādapadmāya maṅgalam || 5||

यशोदाऽऽलोकिते स्वास्ये विश्वरूपप्रदर्शिने ।मायामानुषरूपाय माधवायास्तु मङ्गलम् ॥ ६॥

yaśodā''lokite svāsye viśvarūpapradarśine |māyāmānuṣarūpāya mādhavāyāstu maṅgalam || 6||

तृणावर्तदनूजासु हारिणे शुभकारिणे ।वत्सासुरप्रभेत्रे च वत्सपालाय मङ्गलम् ॥ ७॥

tṛṇāvartadanūjāsu hāriṇe śubhakāriṇe |vatsāsuraprabhetre ca vatsapālāya maṅgalam || 7||

दामोदराय वीराय यमलार्जुनपातिने ।धात्रा हृतानां वत्सानां रूपधर्त्रेऽस्तु मङ्गलम् ॥ ८॥

dāmodarāya vīrāya yamalārjunapātine |dhātrā hṛtānāṃ vatsānāṃ rūpadhartre'stu maṅgalam || 8||

ब्रह्मस्तुताय कृष्णाय कालीयफणनृत्यते ।दावाग्निरक्षिताशेष गोगोपालाय मङ्गलम् ॥ ९॥

brahmastutāya kṛṣṇāya kālīyaphaṇanṛtyate |dāvāgnirakṣitāśeṣa gogopālāya maṅgalam || 9||

गोवर्धनाचलोद्घर्त्रे गोपी क्रीडाभिलाषिणे ।अञ्जल्याऽऽहृतवस्त्राणां सुप्रीतायास्तु मङ्गलम् ॥ १०॥

govardhanācalodghartre gopī krīḍābhilāṣiṇe |añjalyā''hṛtavastrāṇāṃ suprītāyāstu maṅgalam || 10||

सुदर्शनाख्य गन्धर्व शापमोक्षणकारिणे ।शङ्खचूडशिरोहर्त्रे वृषभघ्नाय मङ्गलम् ॥ ११॥

sudarśanākhya gandharva śāpamokṣaṇakāriṇe |śaṅkhacūḍaśirohartre vṛṣabhaghnāya maṅgalam || 11||

गान्दिनीसुतसन्दृष्ट दिव्यरूपाय शौरिणे ।त्रिवक्रया प्रार्थिताय सुन्दराङ्गाय मङ्गलम् ॥ १२॥

gāndinīsutasandṛṣṭa divyarūpāya śauriṇe |trivakrayā prārthitāya sundarāṅgāya maṅgalam || 12||

गन्धमाल्याम्बराढ्याय गजराजविमर्दिने ।चाणूरमुष्टिकप्राणहारिणे चास्तु मङ्गलम् ॥ १३॥

gandhamālyāmbarāḍhyāya gajarājavimardine |cāṇūramuṣṭikaprāṇahāriṇe cāstu maṅgalam || 13||

कंसहन्त्रे जरासन्धबलमर्दन कारिणे ।मथुरापुरवासाय महाधीराय मङ्गलम् ॥ १४॥

kaṃsahantre jarāsandhabalamardana kāriṇe |mathurāpuravāsāya mahādhīrāya maṅgalam || 14||

मुचुकुन्द महानन्ददायिने परमात्मने ।रुक्मिणी परिणेत्रे च सबलायास्तु मङ्गलम् ॥ १५॥

mucukunda mahānandadāyine paramātmane |rukmiṇī pariṇetre ca sabalāyāstu maṅgalam || 15||

द्वारकापुरवासाय हारनूपुरधारिणे ।सत्यभामासमेताय नरकघ्नाय मङ्गलम् ॥ १६॥

dvārakāpuravāsāya hāranūpuradhāriṇe |satyabhāmāsametāya narakaghnāya maṅgalam || 16||

बाणासुरकरच्छेत्रे भूतनाथस्तुताय च ।धर्माहूताय यागार्थं शर्मदायास्तु मङ्गलम् ॥ १७॥

bāṇāsurakaracchetre bhūtanāthastutāya ca |dharmāhūtāya yāgārthaṃ śarmadāyāstu maṅgalam || 17||

कारयित्रे जरासन्धवधं भीमेन राजभिः ।मुक्तैः स्तुताय तत्पुत्र राज्यदायास्तु मङ्गलम् ॥ १८॥

kārayitre jarāsandhavadhaṃ bhīmena rājabhiḥ |muktaiḥ stutāya tatputra rājyadāyāstu maṅgalam || 18||

चैद्यतेजोपहर्त्रे च पाण्डवप्रियकारिणे ।कुचेलाय महाभाग्यदायिने तेऽस्तु मङ्गलम् ॥ १९॥

caidyatejopahartre ca pāṇḍavapriyakāriṇe |kucelāya mahābhāgyadāyine te'stu maṅgalam || 19||

देव्यष्टक समेताय पुत्रपौत्रयुताय च ।षोडशस्त्री सहस्रैस्तु संयुतायास्तु मङ्गलम् ॥ २०॥

devyaṣṭaka sametāya putrapautrayutāya ca |ṣoḍaśastrī sahasraistu saṃyutāyāstu maṅgalam || 20||

यश्शिष्टरक्षणपरः करुणाम्बुराशिःदुष्टासुरांशनृपतीन् विनिगृह्य शूरान् ।कष्टां दशां अपनुदन्तरसा पृथिव्याःपुष्टिं ददातु स हरिः कुलदैवतं नः ॥ २१॥

yaśśiṣṭarakṣaṇaparaḥ karuṇāmburāśiḥduṣṭāsurāṃśanṛpatīn vinigṛhya śūrān |kaṣṭāṃ daśāṃ apanudantarasā pṛthivyāḥpuṣṭiṃ dadātu sa hariḥ kuladaivataṃ naḥ || 21||

॥ इति श्रीकृष्णमङ्गलं सम्पूर्णम् ॥

|| iti śrīkṛṣṇamaṅgalaṃ sampūrṇam ||