प्रार्थनापद्धतिः Prarthanapaddhatih

श्रीराधिकायै नमः ।शुद्धगाङ्गेयगौराङ्गीं कुरङ्गीलङ्गिमेक्षणाम् ।जितकोटीन्दुबिम्बास्यामम्बुदाम्बरसंवृताम् ॥ १॥

śrīrādhikāyai namaḥ |śuddhagāṅgeyagaurāṅgīṃ kuraṅgīlaṅgimekṣaṇām |jitakoṭīndubimbāsyāmambudāmbarasaṃvṛtām || 1||

नवीनवल्लवीवृन्दधम्मिल्लोत्फुल्लमल्लिकाम् ।दिव्यरत्नाद्यलङ्कारसेव्यमानतनुश्रियम् ॥ २॥

navīnavallavīvṛndadhammillotphullamallikām |divyaratnādyalaṅkārasevyamānatanuśriyam || 2||

विदग्धमण्डलगुरुं गणगौरवमण्डिताम् ।अतिप्रेष्ठवयस्याभिरष्टाभिरभिवेष्टिताम् ॥ ३॥

vidagdhamaṇḍalaguruṃ gaṇagauravamaṇḍitām |atipreṣṭhavayasyābhiraṣṭābhirabhiveṣṭitām || 3||

चञ्चलापाङ्गभङ्गेन व्याकुलीकृतकेशवाम् ।गोष्ठेन्द्रसुतजीवातुरम्यबिम्बाधरामृताम् ॥ ४॥

cañcalāpāṅgabhaṅgena vyākulīkṛtakeśavām |goṣṭhendrasutajīvāturamyabimbādharāmṛtām || 4||

त्वामसौ याचते नत्वा विलुठन् यमुनातटे ।काकुभिर्व्याकुलस्वान्तो जनो वृन्दावनेश्वरि ॥ ५॥

tvāmasau yācate natvā viluṭhan yamunātaṭe |kākubhirvyākulasvānto jano vṛndāvaneśvari || 5||

कृतागस्केऽप्ययोग्येऽपि जनेऽस्मिन् कुमतावपि ।दास्यदानप्रदानस्य लवमप्युपपादय ॥ ६॥

kṛtāgaske'pyayogye'pi jane'smin kumatāvapi |dāsyadānapradānasya lavamapyupapādaya || 6||

युक्तस्त्वया जनो नैव दुःखितोऽयमुपेक्षितुम् ।कृपाद्द्योतद्रवच्चित्तनवनीतासि यत् सदा ॥ ७॥

yuktastvayā jano naiva duḥkhito'yamupekṣitum |kṛpāddyotadravaccittanavanītāsi yat sadā || 7||

इति श्रीरूपगोस्वामिविरचितस्तवमालायां प्रार्थनापद्धतिः समाप्ता ।

iti śrīrūpagosvāmiviracitastavamālāyāṃ prārthanāpaddhatiḥ samāptā |