प्रणामप्रणयाख्यस्तवः Pranamapranayakhyastavah

श्रीकृष्णाय नमः ।कन्दर्पकोटिरम्याय स्फुरदिन्दीवरत्विषे ।जगन्मोहनलीलाय नमो गोपेन्द्रसूनवे ॥ १॥

śrīkṛṣṇāya namaḥ |kandarpakoṭiramyāya sphuradindīvaratviṣe |jaganmohanalīlāya namo gopendrasūnave || 1||

कृष्णलाकृतहाराय कृष्णलावण्यशालिने ।कृष्णाकूलकरीन्द्राय कृष्णाय करवै नमः ॥ २॥

kṛṣṇalākṛtahārāya kṛṣṇalāvaṇyaśāline |kṛṣṇākūlakarīndrāya kṛṣṇāya karavai namaḥ || 2||

सर्वानन्दकदम्बाय कन्दम्बकुसुमस्रजे ।नमः प्रेमावलम्बाय प्रलम्बारिकनीयसे ॥ ३॥

sarvānandakadambāya kandambakusumasraje |namaḥ premāvalambāya pralambārikanīyase || 3||

कुण्डलस्फुरदंसाय वंशायत्तमुखश्रिये ।राधामानसहंसाय व्रजोत्तंसाय ते नमः ॥ ४॥

kuṇḍalasphuradaṃsāya vaṃśāyattamukhaśriye |rādhāmānasahaṃsāya vrajottaṃsāya te namaḥ || 4||

नमः शिखण्डचूडाय दण्डमण्डितपाणये ।कुण्डलीकृतपुष्पाय पुण्डरीकेक्षणाय ते ॥ ५॥

namaḥ śikhaṇḍacūḍāya daṇḍamaṇḍitapāṇaye |kuṇḍalīkṛtapuṣpāya puṇḍarīkekṣaṇāya te || 5||

राधिकाप्रेममाध्वीकमाधुरीमुदितान्तरम् ।कन्दर्पवृन्दसौन्दर्यं गोविन्दमभिवादये ॥ ६॥

rādhikāpremamādhvīkamādhurīmuditāntaram |kandarpavṛndasaundaryaṃ govindamabhivādaye || 6||

शृङ्गाररसशृङ्गारं कर्णिकारात्तकर्णिकम् ।वन्दे श्रिया नवाभ्राणां बिभ्राणं विभ्रमं हरिम् ॥ ७॥

śṛṅgārarasaśṛṅgāraṃ karṇikārāttakarṇikam |vande śriyā navābhrāṇāṃ bibhrāṇaṃ vibhramaṃ harim || 7||

साध्वीमणिव्रातपश्यतोहरवेणवे ।कह्लारकृतचूडाय शङ्खचूडभिदे नमः ॥ ८॥

sādhvīmaṇivrātapaśyatoharaveṇave |kahlārakṛtacūḍāya śaṅkhacūḍabhide namaḥ || 8||

राधिकाधरबन्धूकमकरन्दमधुव्रतम् ।दैत्यसिन्धुरपारीन्द्रं वन्दे गोपेन्द्रनन्दनम् ॥ ९॥

rādhikādharabandhūkamakarandamadhuvratam |daityasindhurapārīndraṃ vande gopendranandanam || 9||

बर्हेन्द्रायुधरम्याय जगज्जीवनदायिने ।राधाविद्युद्वृताङ्गाय कृष्णाम्भोदाय ते नमः ॥ १०॥

barhendrāyudharamyāya jagajjīvanadāyine |rādhāvidyudvṛtāṅgāya kṛṣṇāmbhodāya te namaḥ || 10||

प्रेमान्धवल्लवीवृन्दलोचनेन्द्रीवरेन्दवे ।काश्मीरतिलकाढ्याय नमः पीताम्बराय ते ॥ ११॥

premāndhavallavīvṛndalocanendrīvarendave |kāśmīratilakāḍhyāya namaḥ pītāmbarāya te || 11||

गीर्वाणेशमदोद्दाम दावनिर्वाणनीरदम् ।कन्दूकीकृतशैलेन्द्रं वन्दे गोकुलबान्धवम् ॥ १२॥

gīrvāṇeśamadoddāma dāvanirvāṇanīradam |kandūkīkṛtaśailendraṃ vande gokulabāndhavam || 12||

दैन्यार्णवे निमग्नोऽस्मि मन्तुग्रावभरार्दितः ।दुष्टे कारुण्यपारीण मयि कृष्ण कृपां कुरु ॥ १३॥

dainyārṇave nimagno'smi mantugrāvabharārditaḥ |duṣṭe kāruṇyapārīṇa mayi kṛṣṇa kṛpāṃ kuru || 13||

आधारोऽप्यपराधानामविवेकहतोऽप्यहम् ।त्वत्कारुण्यप्रतीक्षोऽस्मि प्रसीद मयि माधव ॥ १४॥

ādhāro'pyaparādhānāmavivekahato'pyaham |tvatkāruṇyapratīkṣo'smi prasīda mayi mādhava || 14||

इति श्रीरूपगोस्वामिविरचितस्तवमालायां प्रणामप्रणयाख्यः स्तवः सम्पूर्णः ।

iti śrīrūpagosvāmiviracitastavamālāyāṃ praṇāmapraṇayākhyaḥ stavaḥ sampūrṇaḥ |