श्रीकृष्णस्तोत्रम् (नन्दकृतं ब्रह्मवैवर्तपुराणान्तर्गतम् नमो ब्रह्मण्यदेवाय गोब्राह्मणहिताय च) Nandakritam Shri Krishna Stotram

नन्द उवाच ।नमो ब्रह्मण्यदेवाय गोब्राह्मणहिताय च ॥ २०४॥

nanda uvāca |namo brahmaṇyadevāya gobrāhmaṇahitāya ca || 204||

जगद्धिताय कृष्णाय गोविन्दाय नमो नमः ।नमो ब्रह्मण्यदेवाय ब्रह्मणे परमात्मने ॥ २०५॥

jagaddhitāya kṛṣṇāya govindāya namo namaḥ |namo brahmaṇyadevāya brahmaṇe paramātmane || 205||

अनन्तकोटिब्रह्माण्डधामधाम्ने नमोऽस्तु ते ।नमो मत्स्यादिरूपाणां जीवरूपाय साक्षिणे ॥ २०६॥

anantakoṭibrahmāṇḍadhāmadhāmne namo'stu te |namo matsyādirūpāṇāṃ jīvarūpāya sākṣiṇe || 206||

निर्लिप्ताय निर्गुणाय निराकाराय ते नमः ।अतिसूक्ष्मस्वरूपाय स्थूलात्स्थूलतमाय च ॥ २०७॥

nirliptāya nirguṇāya nirākārāya te namaḥ |atisūkṣmasvarūpāya sthūlātsthūlatamāya ca || 207||

सर्वेश्वराय सर्वाय तेजोरूप नमोऽस्तु ते ।अतिप्रत्यक्षरूपाय ध्यानासाध्याय योगिनाम् ॥ २०८॥

sarveśvarāya sarvāya tejorūpa namo'stu te |atipratyakṣarūpāya dhyānāsādhyāya yoginām || 208||

ब्रह्मविष्णुमहेशानां वन्द्याय नित्यरूपिणे ।धाम्ने चतुर्ण्णां वर्णानां युगेष्वेव चतुर्षु च ॥ २०९॥

brahmaviṣṇumaheśānāṃ vandyāya nityarūpiṇe |dhāmne caturṇṇāṃ varṇānāṃ yugeṣveva caturṣu ca || 209||

शुक्लरक्तपीतश्यामाभिधानगुणशालिने ।योगिने योगरूपाय गुरवे योगिनामपि ॥ २१०॥

śuklaraktapītaśyāmābhidhānaguṇaśāline |yogine yogarūpāya gurave yogināmapi || 210||

सिद्धेश्वराय सिद्धाय सिद्धानां गुरवे नमः ।यं स्तोतुमक्षमो ब्रह्मा विष्णुर्यं स्तोतुमक्षमः ॥ २११॥

siddheśvarāya siddhāya siddhānāṃ gurave namaḥ |yaṃ stotumakṣamo brahmā viṣṇuryaṃ stotumakṣamaḥ || 211||

यं स्तोतुमक्षमो रुद्रः शेषो यं स्तोतुमक्षमः ।यं स्तोतुमक्षमो धर्मो यं स्तोतुमक्षमो रविः ॥ २१२॥

yaṃ stotumakṣamo rudraḥ śeṣo yaṃ stotumakṣamaḥ |yaṃ stotumakṣamo dharmo yaṃ stotumakṣamo raviḥ || 212||

यं स्तोतुमक्षमो लम्बोदरश्चापि षडाननः ।यं स्तोतुमक्षमाः सर्वे मुनयः सनकादयः ॥ २१३॥

yaṃ stotumakṣamo lambodaraścāpi ṣaḍānanaḥ |yaṃ stotumakṣamāḥ sarve munayaḥ sanakādayaḥ || 213||

कपिलो न क्षमः स्तोतुं सिद्धेन्द्राणां गुरोर्गुरुः ।न शक्तौ स्तवनं कर्तुं नरनारायणावृषी ॥ २१४॥

kapilo na kṣamaḥ stotuṃ siddhendrāṇāṃ gurorguruḥ |na śaktau stavanaṃ kartuṃ naranārāyaṇāvṛṣī || 214||

अन्ये जडधियः के वा स्तोतुं शक्ताः परात्परम् ।वेदा न शक्ता नो वाणी न च लक्ष्मीः सरस्वती ॥ २१५॥

anye jaḍadhiyaḥ ke vā stotuṃ śaktāḥ parātparam |vedā na śaktā no vāṇī na ca lakṣmīḥ sarasvatī || 215||

न राधा स्तवने शक्ता किं स्तुवन्ति विपश्चितः ।क्षमस्व निखिलं ब्रह्मन्नपराधं क्षणेक्षणे ॥ २१६॥

na rādhā stavane śaktā kiṃ stuvanti vipaścitaḥ |kṣamasva nikhilaṃ brahmannaparādhaṃ kṣaṇekṣaṇe || 216||

रक्ष मां करुणासिन्धो दीनबन्धो भवार्णवे ।पुरा तीर्थे तपस्तप्त्वा पुत्रः प्राप्तः सनातनः ॥ २१७॥

rakṣa māṃ karuṇāsindho dīnabandho bhavārṇave |purā tīrthe tapastaptvā putraḥ prāptaḥ sanātanaḥ || 217||

स्वकीयचरणाम्भोजे भक्तिं दास्यं च देहि मे ।ब्रह्मत्वममरत्वं वा सालोक्यादिकमेव वा ॥ २१८॥

svakīyacaraṇāmbhoje bhaktiṃ dāsyaṃ ca dehi me |brahmatvamamaratvaṃ vā sālokyādikameva vā || 218||

त्वत्पदाम्भोजदास्यस्य कलां नार्हन्ति षोडशीम् ।इन्द्रत्वं वा सुरत्वं वा सम्प्राप्तिं सिद्धिस्वर्गयोः ॥ २१९॥

tvatpadāmbhojadāsyasya kalāṃ nārhanti ṣoḍaśīm |indratvaṃ vā suratvaṃ vā samprāptiṃ siddhisvargayoḥ || 219||

राजत्वं चिरजीवित्वं सुधियो गणयन्ति किम् ।एतद्यत्कथितं सर्वं ब्रह्मत्वादिकमीश्वर ॥ २२०॥

rājatvaṃ cirajīvitvaṃ sudhiyo gaṇayanti kim |etadyatkathitaṃ sarvaṃ brahmatvādikamīśvara || 220||

भक्तसङ्गक्षणार्द्धस्य नोपमा ते किमर्हति ।त्वद्भक्तो यस्त्वत्सदृशः कस्त्वां तर्कितुमीश्वरः ॥ २२१॥

bhaktasaṅgakṣaṇārddhasya nopamā te kimarhati |tvadbhakto yastvatsadṛśaḥ kastvāṃ tarkitumīśvaraḥ || 221||

क्षणार्द्धालापमात्रेण पारं कर्तुं स चेश्वरः ।भक्तसङ्गाद्भवत्येव भक्तिं कर्तुमनेकधा ॥ २२२॥

kṣaṇārddhālāpamātreṇa pāraṃ kartuṃ sa ceśvaraḥ |bhaktasaṅgādbhavatyeva bhaktiṃ kartumanekadhā || 222||

त्वद्भक्तजलदालापजलसेकेन वर्द्धते ।अभक्तालापतापात्तु शुष्कतां याति तत्क्षणम् ॥ २२३॥

tvadbhaktajaladālāpajalasekena varddhate |abhaktālāpatāpāttu śuṣkatāṃ yāti tatkṣaṇam || 223||

त्वद्गुणस्मृतिसेकाच्च वर्द्धते तत्क्षणे स्फुटम् ।त्वद्भक्त्यङ्कुरमुद्भूतं स्फीतं मानसजं परम् ॥ २२४॥

tvadguṇasmṛtisekācca varddhate tatkṣaṇe sphuṭam |tvadbhaktyaṅkuramudbhūtaṃ sphītaṃ mānasajaṃ param || 224||

न नश्यं वर्द्धनीयं च नित्यं नित्यं क्षणे क्षणे ।ततः सम्प्राप्य ब्रह्मत्वं भक्तस्य जीवनाय च ॥ २२५॥

na naśyaṃ varddhanīyaṃ ca nityaṃ nityaṃ kṣaṇe kṣaṇe |tataḥ samprāpya brahmatvaṃ bhaktasya jīvanāya ca || 225||

ददात्येव फलं तस्मै हरिदास्यमनुत्तमम् ।सम्प्राप्य दुर्लभं दास्यं यदि दासो बभूव ह ॥ २२६॥

dadātyeva phalaṃ tasmai haridāsyamanuttamam |samprāpya durlabhaṃ dāsyaṃ yadi dāso babhūva ha || 226||

सुनिश्चयेन तेनैव जितं सर्वं भयादिकम् ।इत्येवमुक्त्वा भक्त्या च नन्दस्तस्थौ हरेः पुरः ॥ २२७॥

suniścayena tenaiva jitaṃ sarvaṃ bhayādikam |ityevamuktvā bhaktyā ca nandastasthau hareḥ puraḥ || 227||

प्रसन्नवदनः कृष्णो ददौ तस्मै तदीप्सितम् ।एवं नन्दकृतं स्तोत्रं नित्यं भक्त्या च यः पठेत् ॥ २२८॥

prasannavadanaḥ kṛṣṇo dadau tasmai tadīpsitam |evaṃ nandakṛtaṃ stotraṃ nityaṃ bhaktyā ca yaḥ paṭhet || 228||

सुदृढां भक्तिमाप्नोति सद्यो दास्यं लभेद्धरेः ॥इति श्रीब्रह्मवैवर्ते महापुराणे श्रीकृष्णजन्मखण्डे पूर्वे एकविंशाध्यायान्तर्गतंनन्दकृतं श्रीकृष्णस्तोत्रं समाप्तम् ।ब्रह्मवैवर्तपुराण । श्रीकृष्णजन्म, पूर्वभाग । अध्याय २१/२०४२२८॥ब्रह्मवैवर्तपुराण । श्रीकृष्णजन्म, पूर्वभाग । अध्याय २१/२०४-२२८॥

sudṛḍhāṃ bhaktimāpnoti sadyo dāsyaṃ labheddhareḥ ||iti śrībrahmavaivarte mahāpurāṇe śrīkṛṣṇajanmakhaṇḍe pūrve ekaviṃśādhyāyāntargataṃnandakṛtaṃ śrīkṛṣṇastotraṃ samāptam |brahmavaivartapurāṇa | śrīkṛṣṇajanma, pūrvabhāga | adhyāya 21/204228||brahmavaivartapurāṇa | śrīkṛṣṇajanma, pūrvabhāga | adhyāya 21/204-228||