नामरत्नमालावलिस्तोत्रम् Namaratnamalavalistotram

नत्वा श्रीवल्लभाचार्यान्नौमि श्रीविठ्ठलं प्रभुम् ।ततः श्रीवल्लभं स्तौमि तन्नामाष्टशतोदितैः ॥ १॥

natvā śrīvallabhācāryānnaumi śrīviṭhṭhalaṃ prabhum |tataḥ śrīvallabhaṃ staumi tannāmāṣṭaśatoditaiḥ || 1||

ऋषिर्निरूपितश्चात्र विठ्ठलेशात्मजासुतः ।छन्दोऽपि च तथाऽनुष्टुब्देवता गोकुलेश्वरः ॥ २॥

ṛṣirnirūpitaścātra viṭhṭhaleśātmajāsutaḥ |chando'pi ca tathā'nuṣṭubdevatā gokuleśvaraḥ || 2||

महाकारुणिकाधीशो बीजं चात्र निरूप्यते ।विनियोगो भक्तियोगे सिद्धिः स्वप्रभुसङ्गमः ॥ ३॥

mahākāruṇikādhīśo bījaṃ cātra nirūpyate |viniyogo bhaktiyoge siddhiḥ svaprabhusaṅgamaḥ || 3||

श्रीवल्लभार्यरूपः श्रीमद्विठ्ठलनन्दनः ।श्रीवल्लभः सदानन्दः सच्चिदानन्दविग्रहः ॥ ४॥

śrīvallabhāryarūpaḥ śrīmadviṭhṭhalanandanaḥ |śrīvallabhaḥ sadānandaḥ saccidānandavigrahaḥ || 4||

रुक्यिणीनन्दनः श्रीमान् पार्वतीप्राणवल्लभः ।सर्वसद्गुणसम्पन्नः पुत्रविठ्ठलराययुक् ॥ ५॥

rukyiṇīnandanaḥ śrīmān pārvatīprāṇavallabhaḥ |sarvasadguṇasampannaḥ putraviṭhṭhalarāyayuk || 5||

पौत्रगोवर्द्धनेशाढ्यस्तदतिप्रीतिकारकः ।संलालितव्रजपतिर्व्रजाधीशेक्षणोत्सुकः ॥ ६॥

pautragovarddhaneśāḍhyastadatiprītikārakaḥ |saṃlālitavrajapatirvrajādhīśekṣaṇotsukaḥ || 6||

पुत्रपौत्रप्रपौत्रदिसमस्तकुलमोदकः ।भूयो निजकुलाधारः सर्वस्वकुलपोषकः ॥ ७॥

putrapautraprapautradisamastakulamodakaḥ |bhūyo nijakulādhāraḥ sarvasvakulapoṣakaḥ || 7||

निजाश्रिताखिलज्ञातिप्रीतिपूर्वकपालकः ।याचनोचितसम्प्राप्तप्राणिमात्रप्रपोषकः ॥ ८॥

nijāśritākhilajñātiprītipūrvakapālakaḥ |yācanocitasamprāptaprāṇimātraprapoṣakaḥ || 8||

सर्वाधारो महोदारः सदानन्दप्रवाहवान् ।सम्प्राप्तपण्डितव्रातमानपूर्वकदानकृत् ॥ ९॥

sarvādhāro mahodāraḥ sadānandapravāhavān |samprāptapaṇḍitavrātamānapūrvakadānakṛt || 9||

गोकुलावासकर्ता च भूयो गोवर्द्धने स्थितः ।गोस्वामी गोकुलाधीशो गोप्रियो गोकुलेश्वरः ॥ १०॥

gokulāvāsakartā ca bhūyo govarddhane sthitaḥ |gosvāmī gokulādhīśo gopriyo gokuleśvaraḥ || 10||

गोकुलानन्दकर्ता च गोकुलाधिकभूषणम् ।गोवल्लभो गोकुलेशो गोकुलप्रीतिकारकः ॥ ११॥

gokulānandakartā ca gokulādhikabhūṣaṇam |govallabho gokuleśo gokulaprītikārakaḥ || 11||

आचार्यकृतसिद्धान्तग्रन्धव्याख्यानकारकः ।पितामहपदासक्तः पितृपादाब्जभक्तिमान् ॥ १२॥

ācāryakṛtasiddhāntagrandhavyākhyānakārakaḥ |pitāmahapadāsaktaḥ pitṛpādābjabhaktimān || 12||

पितामहस्वरूपत्वज्ञापकैकस्वनामधृक् ।पितृपूर्णकरूपत्वख्यापकात्मस्थषड्गुणः ॥ १३॥

pitāmahasvarūpatvajñāpakaikasvanāmadhṛk |pitṛpūrṇakarūpatvakhyāpakātmasthaṣaḍguṇaḥ || 13||

अतिमानुषकर्मादिकृतिः श्रीकृष्णरूपधृक् ।धर्मग्लानिकृताधर्मनाशनार्थावतारवान् ॥ १४॥

atimānuṣakarmādikṛtiḥ śrīkṛṣṇarūpadhṛk |dharmaglānikṛtādharmanāśanārthāvatāravān || 14||

पाषण्डिदण्डिसम्प्रोक्तप्रचण्डाधर्मखण्डनः ।स्वधर्मस्थापकोऽखण्डधरामण्डलमण्डनम् ॥ १५॥

pāṣaṇḍidaṇḍisamproktapracaṇḍādharmakhaṇḍanaḥ |svadharmasthāpako'khaṇḍadharāmaṇḍalamaṇḍanam || 15||

योऽतिकोपितपृध्वीशाकारितस्तत्समीपगः ।उल्लङ्घिततदीयाज्ञः सत्यसन्धो व्रजे स्थितः ॥ १६॥

yo'tikopitapṛdhvīśākāritastatsamīpagaḥ |ullaṅghitatadīyājñaḥ satyasandho vraje sthitaḥ || 16||

आबालवृद्धतुलसीमालातिलकधारकः ।कालिन्दीपतिरीशस्तद्विरहानुभवप्रदः ॥ १७॥

ābālavṛddhatulasīmālātilakadhārakaḥ |kālindīpatirīśastadvirahānubhavapradaḥ || 17||

क्ष्मेशोक्तिव्याजवाराहक्षेत्रगङ्गासमीपगः ।पुनस्तदाहुतिव्याजत्वरितप्राप्तगोकुलः ॥ १८॥

kṣmeśoktivyājavārāhakṣetragaṅgāsamīpagaḥ |punastadāhutivyājatvaritaprāptagokulaḥ || 18||

कालिन्दीसङ्गमोत्सुक्यतदीयविरहाक्षमः ।नित्यं श्रीगोकुलस्थानयमुनारसभोगकृत् ॥ १९॥

kālindīsaṅgamotsukyatadīyavirahākṣamaḥ |nityaṃ śrīgokulasthānayamunārasabhogakṛt || 19||

आनन्दकन्दसन्दोहशृङ्गाररसमूर्त्तिमान् ।सर्वेन्द्रियसुखासाद्यरसरूपफलात्मकः ॥ २०॥

ānandakandasandohaśṛṅgārarasamūrttimān |sarvendriyasukhāsādyarasarūpaphalātmakaḥ || 20||

मुखनिक्षिप्तताम्बूलचर्वितारुणसद्द्विजः ।पक्वबिम्बाधरोऽनन्यभक्तदत्ताधरामृतः ॥ २१॥

mukhanikṣiptatāmbūlacarvitāruṇasaddvijaḥ |pakvabimbādharo'nanyabhaktadattādharāmṛtaḥ || 21||

सुमुखः सुन्दरग्रीवः सुकपोलः सुनासिकः ।सुकर्णयुगविन्यस्तसुवर्णमणिकुण्डलः ॥ २२॥

sumukhaḥ sundaragrīvaḥ sukapolaḥ sunāsikaḥ |sukarṇayugavinyastasuvarṇamaṇikuṇḍalaḥ || 22||

तिलकातिलसद्भाली राजीवदललोचनः ।स्निग्धनीलालकवृतः सुन्दरभ्रूयुगान्वितः ॥ २३॥

tilakātilasadbhālī rājīvadalalocanaḥ |snigdhanīlālakavṛtaḥ sundarabhrūyugānvitaḥ || 23||

शुभलक्षणसर्वाङ्गसर्वावयवसौष्ठवः ।सम्फुल्लपद्मवक्त्रश्रीदर्शनाकृष्टभक्तहृत् ॥ २४॥

śubhalakṣaṇasarvāṅgasarvāvayavasauṣṭhavaḥ |samphullapadmavaktraśrīdarśanākṛṣṭabhaktahṛt || 24||

सुस्निग्धमधुरालापो वचनामृतपोषकः ।महाकारुणिकाधीशः कटाक्षाकृष्टमानसः ॥ २५॥

susnigdhamadhurālāpo vacanāmṛtapoṣakaḥ |mahākāruṇikādhīśaḥ kaṭākṣākṛṣṭamānasaḥ || 25||

चरणप्रणताशेषलोकशरणदाग्रणीः ।त्रैलौक्याभरणीभूतः संसारतरणाश्रयः ॥ २६॥

caraṇapraṇatāśeṣalokaśaraṇadāgraṇīḥ |trailaukyābharaṇībhūtaḥ saṃsārataraṇāśrayaḥ || 26||

लक्ष्मीविलासनिलयस्तातपादाब्जसेवकः ।गिरिधारिपदाम्भोजसञ्चारिभ्रमरायितः ॥ २७॥

lakṣmīvilāsanilayastātapādābjasevakaḥ |giridhāripadāmbhojasañcāribhramarāyitaḥ || 27||

हरिगानप्रियो दानशीलः सन्मानकारकः ।नित्योत्सवमनाः प्रीतो वनितानयनोत्सवः ॥ २८॥

harigānapriyo dānaśīlaḥ sanmānakārakaḥ |nityotsavamanāḥ prīto vanitānayanotsavaḥ || 28||

निजजन्मोत्सवकरः स्वजनाहृतमङ्गलः ।द्विजभोजनसुप्रीतो व्रजमङ्गलदायकः ॥ २९॥

nijajanmotsavakaraḥ svajanāhṛtamaṅgalaḥ |dvijabhojanasuprīto vrajamaṅgaladāyakaḥ || 29||

ऋषिपूजादिपूर्वोक्तमङ्गलाचारकारकः ।सुवासिनीसुमुक्ताक्तपात्रनीराजनाञ्चितः ॥ ३०॥

ṛṣipūjādipūrvoktamaṅgalācārakārakaḥ |suvāsinīsumuktāktapātranīrājanāñcitaḥ || 30||

नारायणकलोत्पन्नरत्नाभरणभूषितः ।तत्कुलस्त्र्यञ्जलिक्षिप्तहेमपुष्पप्रपूजितः ॥ ३१॥

nārāyaṇakalotpannaratnābharaṇabhūṣitaḥ |tatkulastryañjalikṣiptahemapuṣpaprapūjitaḥ || 31||

निजालयकृतानेकगीतवाद्यमहोत्सवः ।सुगन्धिकुङ्कमालेपकारिताशेषमङ्गलः ॥ ३२॥

nijālayakṛtānekagītavādyamahotsavaḥ |sugandhikuṅkamālepakāritāśeṣamaṅgalaḥ || 32||

महानुभावः परमो भव्यमूर्तिर्महाद्युतिः ।शुभस्मृतिः शुभध्यानः शुभकृन्नामकीर्तनः ॥ ३३॥

mahānubhāvaḥ paramo bhavyamūrtirmahādyutiḥ |śubhasmṛtiḥ śubhadhyānaḥ śubhakṛnnāmakīrtanaḥ || 33||

अष्टोत्तरशतश्रीमन्नाममालेयमद्भुता ।श्रीवल्लभगणेष्वेवं कृष्णरायेण गुम्फिता ॥ ३४॥

aṣṭottaraśataśrīmannāmamāleyamadbhutā |śrīvallabhagaṇeṣvevaṃ kṛṣṇarāyeṇa gumphitā || 34||

धार्या कण्ठगता नित्यं प्रभुसङ्गरसप्रदा ।विशेषतस्तु जप्येयं तदीयानन्यसेवकैः ॥ ३५॥

dhāryā kaṇṭhagatā nityaṃ prabhusaṅgarasapradā |viśeṣatastu japyeyaṃ tadīyānanyasevakaiḥ || 35||

इति श्रीकृष्णरायेण विरचितं श्रीनामरत्नमालावलिस्तोत्रं सम्पूर्णम् ।

iti śrīkṛṣṇarāyeṇa viracitaṃ śrīnāmaratnamālāvalistotraṃ sampūrṇam |