नामरत्नाख्यस्तोत्रम् Namaratnakhyastotram

यन्नामार्कोदयात्पापध्वान्तराशिः प्रशाम्यति ।विकसन्ति हृदञ्जानि तन्नामानि सदाऽऽश्रये ॥ १॥

yannāmārkodayātpāpadhvāntarāśiḥ praśāmyati |vikasanti hṛdañjāni tannāmāni sadā''śraye || 1||

आनुष्टुभमिह च्छन्द ऋषिरग्निकुमारजः ।सर्वशक्तिसमायुक्तो देवः श्रीवल्लभात्मजः ॥ २॥

ānuṣṭubhamiha cchanda ṛṣiragnikumārajaḥ |sarvaśaktisamāyukto devaḥ śrīvallabhātmajaḥ || 2||

विनियोगः समस्तेष्टसिद्ध्यर्थे विनिरूपितः ।श्रीविठ्ठलः कृपासिन्धुर्भक्तवश्योऽतिसुन्दरः ॥ ३॥

viniyogaḥ samasteṣṭasiddhyarthe vinirūpitaḥ |śrīviṭhṭhalaḥ kṛpāsindhurbhaktavaśyo'tisundaraḥ || 3||

कृष्णलीलारसाविष्टः श्रीमान्वल्लभनन्दनः ।दुर्दृश्यो भक्तसन्दृश्यो भक्तिगम्यो भयापहः ॥ ४॥

kṛṣṇalīlārasāviṣṭaḥ śrīmānvallabhanandanaḥ |durdṛśyo bhaktasandṛśyo bhaktigamyo bhayāpahaḥ || 4||

अनन्यभक्तहृदयो दीनानाथैकसंश्रयः ।राजीवलोचनो रासलीलारसमहोदधिः ॥ ५॥

ananyabhaktahṛdayo dīnānāthaikasaṃśrayaḥ |rājīvalocano rāsalīlārasamahodadhiḥ || 5||

धर्मसेतुर्भक्तिसेतुः सुखसेव्यो व्रजेश्वरः ।भक्तशोकापहः शान्तः सर्वज्ञः सर्वकामदः ॥ ६॥

dharmaseturbhaktisetuḥ sukhasevyo vrajeśvaraḥ |bhaktaśokāpahaḥ śāntaḥ sarvajñaḥ sarvakāmadaḥ || 6||

रुक्यिणीरमणः श्रीशो भक्तरत्नपरीक्षकः ।भक्तरक्षैकदक्षः श्रीकृष्णभक्तिप्रवर्तकः ॥ ७॥

rukyiṇīramaṇaḥ śrīśo bhaktaratnaparīkṣakaḥ |bhaktarakṣaikadakṣaḥ śrīkṛṣṇabhaktipravartakaḥ || 7||

महासुरतिरस्कर्ता सर्वशास्त्रविदग्रणीः ।कर्मजाड्यभिदुष्णांशुर्भक्तनेत्रसुधाकरः ॥ ८॥

mahāsuratiraskartā sarvaśāstravidagraṇīḥ |karmajāḍyabhiduṣṇāṃśurbhaktanetrasudhākaraḥ || 8||

महालक्ष्मीगर्भरत्नं कृष्णवर्त्मसमुद्भवः ।भक्तचिन्तामणिर्भक्तिकल्पद्रुमनवाङ्कुरः ॥ ९॥

mahālakṣmīgarbharatnaṃ kṛṣṇavartmasamudbhavaḥ |bhaktacintāmaṇirbhaktikalpadrumanavāṅkuraḥ || 9||

श्रीगोकुलकृतावासः कालिन्दीपुलिनप्रियः ।गोवर्धनागमरतः प्रियवृन्दावनाचलः ॥ १०॥

śrīgokulakṛtāvāsaḥ kālindīpulinapriyaḥ |govardhanāgamarataḥ priyavṛndāvanācalaḥ || 10||

गोवर्धनाद्रिमखकृन्महेन्द्रमदभित्प्रियः ।कृष्णलीलैकसर्वस्वः श्रीभागवतभाववित् ॥ ११॥

govardhanādrimakhakṛnmahendramadabhitpriyaḥ |kṛṣṇalīlaikasarvasvaḥ śrībhāgavatabhāvavit || 11||

पितृप्रवर्तितपथप्रचारसुविचारकः ।व्रजेश्वरप्रीतिकर्ता तन्निमन्त्रणभोजनः ॥ १२॥

pitṛpravartitapathapracārasuvicārakaḥ |vrajeśvaraprītikartā tannimantraṇabhojanaḥ || 12||

बाललीलादिसुप्रीतो गोपीसम्बन्धिसत्कथः ।अतिगम्भीरतात्पर्यः कथनीयगुणाकरः ॥ १३॥

bālalīlādisuprīto gopīsambandhisatkathaḥ |atigambhīratātparyaḥ kathanīyaguṇākaraḥ || 13||

पितृवंशोदधिविभुः स्वानुरूपसुतप्रसूः ।दिक्चक्रवर्ती सत्कीर्तिर्महोज्ज्वलचरित्रवान् ॥ १४॥

pitṛvaṃśodadhivibhuḥ svānurūpasutaprasūḥ |dikcakravartī satkīrtirmahojjvalacaritravān || 14||

अनेकक्षितिपश्रेणीमूर्धाऽऽसिक्तपदाम्बुजः ।विप्रदारिद्र्यदावाग्निर्भूदेवाग्निप्रपूजकः ॥ १५॥

anekakṣitipaśreṇīmūrdhā''siktapadāmbujaḥ |vipradāridryadāvāgnirbhūdevāgniprapūjakaḥ || 15||

गोब्राह्यणप्राणरक्षापरः सत्यपरायणः ।प्रियश्रुतिपथः शश्वन्महामखकरः प्रभुः ॥ १६॥

gobrāhyaṇaprāṇarakṣāparaḥ satyaparāyaṇaḥ |priyaśrutipathaḥ śaśvanmahāmakhakaraḥ prabhuḥ || 16||

कृष्णानुग्रहसंलभ्यो महापतितपावनः ।अनेकमार्गसङ्क्लिष्टजीवस्वास्थ्यप्रदो महान् ॥ १७॥

kṛṣṇānugrahasaṃlabhyo mahāpatitapāvanaḥ |anekamārgasaṅkliṣṭajīvasvāsthyaprado mahān || 17||

नानाभ्रमनिराकर्ता भक्ताज्ञानभिदुत्तमः ।महापुरुषसत्ख्यातिर्महापुरुषविग्रहः ॥ १८॥

nānābhramanirākartā bhaktājñānabhiduttamaḥ |mahāpuruṣasatkhyātirmahāpuruṣavigrahaḥ || 18||

दर्शनीयतमो वाग्मी मायावादनिरासकृत् ।सदा प्रसन्नवदनो मुग्धस्थितमुखाम्बुजः ॥ १९॥

darśanīyatamo vāgmī māyāvādanirāsakṛt |sadā prasannavadano mugdhasthitamukhāmbujaḥ || 19||

प्रेमार्द्रदृग्विशालाक्षः क्षितिमण्डलमण्डनः ।त्रिजगद्व्यापिसत्कीर्तिर्धवलीकृतमेचकः ॥ २०॥

premārdradṛgviśālākṣaḥ kṣitimaṇḍalamaṇḍanaḥ |trijagadvyāpisatkīrtirdhavalīkṛtamecakaḥ || 20||

वाक्सुधाऽऽकृष्टभक्तान्तःकरणः शत्रुतापनः ।भक्तसम्प्रार्थितकरो दासदासीप्सितप्रदः ॥ २१॥

vāksudhā''kṛṣṭabhaktāntaḥkaraṇaḥ śatrutāpanaḥ |bhaktasamprārthitakaro dāsadāsīpsitapradaḥ || 21||

अचिन्त्यमहिमाऽमेयो विस्मयास्पदविग्रहः ।भक्तक्लेशासहः सर्वसहो भक्तकृते वशः ॥ २२॥

acintyamahimā'meyo vismayāspadavigrahaḥ |bhaktakleśāsahaḥ sarvasaho bhaktakṛte vaśaḥ || 22||

आचार्यरत्नं सर्वानुग्रहकृन्मन्त्रवित्तमः ।सर्वस्वदानकुशलो गीतसङ्गीतसागरः ॥ २३॥

ācāryaratnaṃ sarvānugrahakṛnmantravittamaḥ |sarvasvadānakuśalo gītasaṅgītasāgaraḥ || 23||

गोवर्धनाचलसखो गोपगोगोपिकाप्रियः ।चिन्तितज्ञो महाबुद्धिर्जगद्वन्द्यपदाम्बुजः ॥ २४॥

govardhanācalasakho gopagogopikāpriyaḥ |cintitajño mahābuddhirjagadvandyapadāmbujaḥ || 24||

जगदाश्चर्यरसकृत् सदा कृष्णकथाप्रियः ।सुखोदर्ककृतिः सर्वसन्देहच्छेददक्षिणः ॥ २५॥

jagadāścaryarasakṛt sadā kṛṣṇakathāpriyaḥ |sukhodarkakṛtiḥ sarvasandehacchedadakṣiṇaḥ || 25||

स्वपक्षरक्षणे दक्षः प्रतिपक्षभयङ्करः ।गोपिकाविरहाविष्टः कृष्णात्मा स्वसमर्पकः ॥ २६॥

svapakṣarakṣaṇe dakṣaḥ pratipakṣabhayaṅkaraḥ |gopikāvirahāviṣṭaḥ kṛṣṇātmā svasamarpakaḥ || 26||

निवेदिभक्तसर्वस्वशरणाध्वप्रदर्शकः ।श्रीकृष्णानुगृहीतैकप्रार्थनीयपदाम्बुजः ॥ २७॥

nivedibhaktasarvasvaśaraṇādhvapradarśakaḥ |śrīkṛṣṇānugṛhītaikaprārthanīyapadāmbujaḥ || 27||

इमानि नामरत्नानि श्रीविठ्ठलपदाम्बुजम् ।ध्यात्वा तदेकशरणो यः पठेत्स हरिं लभेत् ॥ २८॥

imāni nāmaratnāni śrīviṭhṭhalapadāmbujam |dhyātvā tadekaśaraṇo yaḥ paṭhetsa hariṃ labhet || 28||

यद्यन्मनस्यभिध्यायेत्तत्तदाप्नोत्यसंशयम् ।नानारत्नाभिधभिदं स्तोत्रं यः प्रपठेत्सुधीः ॥ २९॥

yadyanmanasyabhidhyāyettattadāpnotyasaṃśayam |nānāratnābhidhabhidaṃ stotraṃ yaḥ prapaṭhetsudhīḥ || 29||

तदीयत्वं गृहाणाशु प्रार्थ्यमेतन्मम प्रभो ।श्रीविठ्ठलपदाम्भोजमकरन्दजुषोऽनिशम् ॥ ३०॥

tadīyatvaṃ gṛhāṇāśu prārthyametanmama prabho |śrīviṭhṭhalapadāmbhojamakarandajuṣo'niśam || 30||

इति श्रीरघुनाथजीविरचितनामरत्नाख्यं स्तोत्रं समाप्तम् ।

iti śrīraghunāthajīviracitanāmaratnākhyaṃ stotraṃ samāptam |