कृष्णस्तोत्रम् (नारदरचितम्) Narada Rachita Krishnastotra

श्री गणेशाय नमः ।वन्दे नवघनश्यामं पीतकौशेयवाससम् ।सानन्दं सुन्दरं शुद्धं श्रीकृष्णं प्रकृतेः परम् ॥ १॥

śrī gaṇeśāya namaḥ |vande navaghanaśyāmaṃ pītakauśeyavāsasam |sānandaṃ sundaraṃ śuddhaṃ śrīkṛṣṇaṃ prakṛteḥ param || 1||

राधेशं राधिकाप्राणवल्लभं बल्लवीसुतम् ।राधासेवितपादाब्जं राधावक्षःस्थलस्थितम् ॥ २॥

rādheśaṃ rādhikāprāṇavallabhaṃ ballavīsutam |rādhāsevitapādābjaṃ rādhāvakṣaḥsthalasthitam || 2||

राधानुगं राधिकेष्टं राधापहृतमानसम् ।राधाधारं भवाधारं सर्वाधारं नमामि तम् ॥ ३॥

rādhānugaṃ rādhikeṣṭaṃ rādhāpahṛtamānasam |rādhādhāraṃ bhavādhāraṃ sarvādhāraṃ namāmi tam || 3||

राधाहृत्पद्ममध्ये च वसन्तं सन्ततं शुभम् ।राधासहचरं शश्वद्राधाज्ञापरिपालकम् ॥ ४॥

rādhāhṛtpadmamadhye ca vasantaṃ santataṃ śubham |rādhāsahacaraṃ śaśvadrādhājñāparipālakam || 4||

ध्यायन्ते योगिनो योगान् सिद्धाः सिद्धेश्वराश्च यम् ।तं ध्यायेत् सततं शुद्धं भगवन्तं सनातनम् ॥ ५॥

dhyāyante yogino yogān siddhāḥ siddheśvarāśca yam |taṃ dhyāyet satataṃ śuddhaṃ bhagavantaṃ sanātanam || 5||

सेवन्ते सततं सन्तो ब्रह्मेशशेषसज्ञकाः ।सेवन्ते निर्गुणं ब्रह्म भगवन्तं सनातनम् ॥ ६॥

sevante satataṃ santo brahmeśaśeṣasajñakāḥ |sevante nirguṇaṃ brahma bhagavantaṃ sanātanam || 6||

निर्लिप्तं च निरीहं च परमात्मानमीश्वरम् ।नित्यं सत्यं च परमं भगवन्तं सनातनम् ॥ ७॥

nirliptaṃ ca nirīhaṃ ca paramātmānamīśvaram |nityaṃ satyaṃ ca paramaṃ bhagavantaṃ sanātanam || 7||

यं सृष्टेरादिभूतं च सर्वबीजं परात्परम् ।योगिनस्तं प्रपद्यन्ते भगवन्तं सनातनम् ॥ ८॥

yaṃ sṛṣṭerādibhūtaṃ ca sarvabījaṃ parātparam |yoginastaṃ prapadyante bhagavantaṃ sanātanam || 8||

बीजं नानावताराणां सर्वकारणकारणम् ।वेदावेद्यं वेदबीजं वेदकारणकारणम् ॥ ९॥

bījaṃ nānāvatārāṇāṃ sarvakāraṇakāraṇam |vedāvedyaṃ vedabījaṃ vedakāraṇakāraṇam || 9||

योगिनस्तं प्रपद्यन्ते भगवन्तं सनातनम् ।इत्येवमुक्त्वा गन्धर्वः पपात धरणीतले ॥ १०॥

yoginastaṃ prapadyante bhagavantaṃ sanātanam |ityevamuktvā gandharvaḥ papāta dharaṇītale || 10||

नमाम दण्डवद् भूमौ देवदेवं परात्परम् ।इति तेन कृतं स्तोत्रं यः पठेत् प्रयतः शुचिः ॥ ११॥

namāma daṇḍavad bhūmau devadevaṃ parātparam |iti tena kṛtaṃ stotraṃ yaḥ paṭhet prayataḥ śuciḥ || 11||

इहैव जीवन्मुक्तश्च परं याति परां गतिम् ।हरिभक्तिं हरेर्दास्यं गोलोके च निरामयः ॥ १२॥

ihaiva jīvanmuktaśca paraṃ yāti parāṃ gatim |haribhaktiṃ harerdāsyaṃ goloke ca nirāmayaḥ || 12||

पार्षदप्रवरत्वं च लभते नाऽत्र संशयः ॥ १३॥

pārṣadapravaratvaṃ ca labhate nā'tra saṃśayaḥ || 13||

॥ इति नारदपञ्चरात्रे कृष्णस्तोत्रं सम्पूर्णम् ॥

|| iti nāradapañcarātre kṛṣṇastotraṃ sampūrṇam ||