यतिराजविजयश्लोकाः Yatiraja Vijaya Shlokah

॥ श्रीः ॥॥ श्रीमते रामानुजाय नमः ॥॥ श्रीघटिकाशतवात्स्यवरदगुरवे नमः ॥श्रीघटिकाशतवात्स्यवरद्गुरुभिरनुगृहीताः॥ अथ यतिराजविजयश्लोकाः (१)॥नमो वरदविष्ण्वार्यनयनानन्ददायिने ।वात्स्याय वरदार्याय वादिनीहारभास्वते ॥मायाविमोहितसुरानसुरानलावीत्येनाच्युतस्स कुहनासमयैर्मनुष्यान् ।सम्मोहयत्सु पुनरेषु सुदर्शनोऽपितानेव जेतुमधुना यतिशेखरोऽभूत् ॥ १॥

|| śrīḥ |||| śrīmate rāmānujāya namaḥ |||| śrīghaṭikāśatavātsyavaradagurave namaḥ ||śrīghaṭikāśatavātsyavaradgurubhiranugṛhītāḥ|| atha yatirājavijayaślokāḥ (1)||namo varadaviṣṇvāryanayanānandadāyine |vātsyāya varadāryāya vādinīhārabhāsvate ||māyāvimohitasurānasurānalāvītyenācyutassa kuhanāsamayairmanuṣyān |sammohayatsu punareṣu sudarśano'pitāneva jetumadhunā yatiśekharo'bhūt || 1||

त्रिदण्डकाषायशिखोपवीतैःप्रसाधयन् पारमहंस्यलक्ष्मीम् ।वैकुण्ठमारोपयितुं मुमुक्षून्सोपानकारी यतिराज एषः ॥ २॥

tridaṇḍakāṣāyaśikhopavītaiḥprasādhayan pāramahaṃsyalakṣmīm |vaikuṇṭhamāropayituṃ mumukṣūnsopānakārī yatirāja eṣaḥ || 2||

स एष साक्षात्कृतकृष्णदत्तांनिक्षेपविद्यां निरवद्यभूमा ।गद्यात्मना कृष्णजनोपभोग्यांसंवादरूपां विदधे दयालुः ॥ ३॥

sa eṣa sākṣātkṛtakṛṣṇadattāṃnikṣepavidyāṃ niravadyabhūmā |gadyātmanā kṛṣṇajanopabhogyāṃsaṃvādarūpāṃ vidadhe dayāluḥ || 3||

प्रमाणेष्वेष वेदान्तः प्रमेयेषु परः पुमान् ।प्रमातृषु यतीन्द्रोऽयं न द्वितीयमपेक्षते ॥ ४॥

pramāṇeṣveṣa vedāntaḥ prameyeṣu paraḥ pumān |pramātṛṣu yatīndro'yaṃ na dvitīyamapekṣate || 4||

कर्मव्याजकृताखिलात्मनिवहक्लेशावबोधस्फुरत्पश्चात्तापकृपाविमोचितजगज्जन्मादिलीलादरम् ।भोगैकप्रवणं विधास्यति परं ब्रह्मापि दत्ताभयःभूतेभ्यो यतिराज एष इति मे चेतस्यभून्निश्चयः ॥ ५॥

karmavyājakṛtākhilātmanivahakleśāvabodhasphuratpaścāttāpakṛpāvimocitajagajjanmādilīlādaram |bhogaikapravaṇaṃ vidhāsyati paraṃ brahmāpi dattābhayaḥbhūtebhyo yatirāja eṣa iti me cetasyabhūnniścayaḥ || 5||

देहाक्षादिविलक्षणोऽणुरजडो नित्योऽहमर्थोऽमलज्ञानानन्दमयोऽप्यतन्मय इव भ्राम्यत्यविद्यावृतः ।पञ्चक्लेशविपाकपावकशिखालीढस्य तस्यात्मनःनिर्वाणाय निसर्गसौहृदनिधे ! नान्या गतिस्त्वांविना ॥ ६॥

dehākṣādivilakṣaṇo'ṇurajaḍo nityo'hamartho'malajñānānandamayo'pyatanmaya iva bhrāmyatyavidyāvṛtaḥ |pañcakleśavipākapāvakaśikhālīḍhasya tasyātmanaḥnirvāṇāya nisargasauhṛdanidhe ! nānyā gatistvāṃvinā || 6||

सर्वज्ञो न न वेद तस्य करुणाराशेरुपेक्षा कुतःसर्वेशः किमसौ न शक्ष्यति परित्रातुं तथापि प्रभुः ।सर्वान् रक्षति यत्कटाक्षकणिकापेक्षी नरानुद्धरन्संसाराम्बुनिधेः स एव हि गुरुः सर्वोत्तरं दैवतम् ॥ ७॥

sarvajño na na veda tasya karuṇārāśerupekṣā kutaḥsarveśaḥ kimasau na śakṣyati paritrātuṃ tathāpi prabhuḥ |sarvān rakṣati yatkaṭākṣakaṇikāpekṣī narānuddharansaṃsārāmbunidheḥ sa eva hi guruḥ sarvottaraṃ daivatam || 7||

त्रिवर्गमवधीरयन् त्रिविधचेतनाचेतनप्रपञ्चमयकञ्चुके भगवति स्वयं ज्योतिषि ।निवेशितधियां सतां निखिलमङ्गलैकास्पदंतमेव कथयन् गतिं यतिभिरीडितः क्रीडति ॥ ८॥

trivargamavadhīrayan trividhacetanācetanaprapañcamayakañcuke bhagavati svayaṃ jyotiṣi |niveśitadhiyāṃ satāṃ nikhilamaṅgalaikāspadaṃtameva kathayan gatiṃ yatibhirīḍitaḥ krīḍati || 8||

कुदर्शनानीतरदर्शनानियतीन्द्र ! कुर्वन्निजदर्शनेन ।सम्यक् श्रुतिन्यायकलापदर्शीसुदर्शनोऽसि प्रियदर्शनस्त्वम् ॥ ९॥

kudarśanānītaradarśanāniyatīndra ! kurvannijadarśanena |samyak śrutinyāyakalāpadarśīsudarśano'si priyadarśanastvam || 9||

काले वर्षतु वासवः क्षितिभुजो रक्षन्तु सम्यक् महींसर्वे सन्तु निरामयाश्च कृतिनः सत्वोत्तराः प्राणिनः ।पुण्या लोकमिदं पुनातु भगवद्भक्तिः चिरस्थायिनीमालावत् यतिशेखरस्य विहरत्वाज्ञा नृणां मूर्धसु ॥ १०॥

kāle varṣatu vāsavaḥ kṣitibhujo rakṣantu samyak mahīṃsarve santu nirāmayāśca kṛtinaḥ satvottarāḥ prāṇinaḥ |puṇyā lokamidaṃ punātu bhagavadbhaktiḥ cirasthāyinīmālāvat yatiśekharasya viharatvājñā nṛṇāṃ mūrdhasu || 10||

इति श्रीघटिकाशतवात्स्यवरदगुरुभिरनुगृहीताःयतिराजविजयश्लोकाः सम्पूर्णाः ।(१) श्रीघटिकाशतवात्स्यवरद्गुरुभिः (एते श्रीश्रुतप्रकाशिकाप्रसूतेःश्रीनडादूरम्माल् वात्स्यवरदगुरोः वंश्याः, श्रीनिगमान्तमहादेशिकस्यप्रशिष्याः, श्रीपरकालमठस्थापकस्य ब्रह्मतन्त्रस्वतन्त्रगुरोःशिष्याः, श्रीमदहोबिलमठस्थापकस्य शठकोपमुनेः आचार्याः ।)अनुगृहीतात् यतिराजविजयनाटकात् उद्धृता इमे श्लोकाः ॥)नमो वरद्विष्ण्वार्यनयनानन्ददायिने ।वात्स्याय वरदार्याय वादिनीहारभास्वते ॥॥ श्रीघटिकाशतवात्स्यवरदगुरवे नमः ॥

iti śrīghaṭikāśatavātsyavaradagurubhiranugṛhītāḥyatirājavijayaślokāḥ sampūrṇāḥ |(1) śrīghaṭikāśatavātsyavaradgurubhiḥ (ete śrīśrutaprakāśikāprasūteḥśrīnaḍādūrammāl vātsyavaradaguroḥ vaṃśyāḥ, śrīnigamāntamahādeśikasyapraśiṣyāḥ, śrīparakālamaṭhasthāpakasya brahmatantrasvatantraguroḥśiṣyāḥ, śrīmadahobilamaṭhasthāpakasya śaṭhakopamuneḥ ācāryāḥ |)anugṛhītāt yatirājavijayanāṭakāt uddhṛtā ime ślokāḥ ||)namo varadviṣṇvāryanayanānandadāyine |vātsyāya varadāryāya vādinīhārabhāsvate |||| śrīghaṭikāśatavātsyavaradagurave namaḥ ||