सावित्रीपञ्जरस्तोत्रम् १ अथवा गायत्रीपञ्जरस्तोत्रम् Savitri or Gayatri Panjarastotram 1

श्रीगणेशाय नमः ॥भगवन्तं देवदेवं ब्रह्माणं परमेष्ठिनम् ।विधातारं विश्वसृजं पद्मयोनिं प्रजापतिम् ॥ १॥

śrīgaṇeśāya namaḥ ||bhagavantaṃ devadevaṃ brahmāṇaṃ parameṣṭhinam |vidhātāraṃ viśvasṛjaṃ padmayoniṃ prajāpatim || 1||

शुद्धस्फटिकसङ्काशं महेन्द्रशिखरोपमम् ।बद्धपिङ्गजटाजूटं तडित्कनककुण्डलम् ॥ २॥

śuddhasphaṭikasaṅkāśaṃ mahendraśikharopamam |baddhapiṅgajaṭājūṭaṃ taḍitkanakakuṇḍalam || 2||

शरच्चन्द्राभवदनं स्फुरदिन्दीवरेक्षणम् ।हिरण्मयं विश्वरूपमुपवीताजिनावृतम् ॥ ३॥

śaraccandrābhavadanaṃ sphuradindīvarekṣaṇam |hiraṇmayaṃ viśvarūpamupavītājināvṛtam || 3||

मौक्तिकाभाक्षवलयस्तन्त्रीलयसमन्वितः ।कर्पूरोद्धूलिततनुः स्रष्टुर्नयनवर्धनम् ॥ ४॥

mauktikābhākṣavalayastantrīlayasamanvitaḥ |karpūroddhūlitatanuḥ sraṣṭurnayanavardhanam || 4||

विनयेनोपसङ्गम्य शिरसा प्रणिपत्य च ।नारदः परिपप्रच्छ देवर्षिगणमध्यगः ॥ ५॥

vinayenopasaṅgamya śirasā praṇipatya ca |nāradaḥ paripapraccha devarṣigaṇamadhyagaḥ || 5||

नारद उवाच ।भगवन् देवदेवेश सर्वज्ञ करुणानिधे ।श्रोतुमिच्छामि प्रश्नेन भोगमोक्षैकसाधनम् ॥ ६॥

nārada uvāca |bhagavan devadeveśa sarvajña karuṇānidhe |śrotumicchāmi praśnena bhogamokṣaikasādhanam || 6||

ऐश्वर्यस्य समग्रस्य फलदं द्वन्द्ववर्जितम् ।ब्रह्महत्यादिपापघ्नं पापाद्यरिभयापहम् ॥ ७॥

aiśvaryasya samagrasya phaladaṃ dvandvavarjitam |brahmahatyādipāpaghnaṃ pāpādyaribhayāpaham || 7||

यदेकं निष्कलं सूक्ष्मं निरञ्जनमनामयम् ।यत्ते प्रियतमं लोके तन्मे ब्रूहि पितर्मम ॥ ८॥

yadekaṃ niṣkalaṃ sūkṣmaṃ nirañjanamanāmayam |yatte priyatamaṃ loke tanme brūhi pitarmama || 8||

ब्रह्मोवाच ।शृणु नारद वक्ष्यमि ब्रह्ममूलं सनातनम् ।सृष्ट्यादौ मन्मुखे क्षिप्तं देवदेवेन विष्णुना ॥ ९॥

brahmovāca |śṛṇu nārada vakṣyami brahmamūlaṃ sanātanam |sṛṣṭyādau manmukhe kṣiptaṃ devadevena viṣṇunā || 9||

प्रपञ्चबीजमित्याहुरुत्पत्तिस्थितिहेतुकम् ।पुरा मया तु कथितं कश्यपाय सुधीमते ॥ १०॥

prapañcabījamityāhurutpattisthitihetukam |purā mayā tu kathitaṃ kaśyapāya sudhīmate || 10||

सावित्रीपञ्जरं नाम रहस्यं निगमत्रये ।ऋष्यादिकं च दिग्वर्णं साङ्गावरणकं क्रमात् ॥ ११॥

sāvitrīpañjaraṃ nāma rahasyaṃ nigamatraye |ṛṣyādikaṃ ca digvarṇaṃ sāṅgāvaraṇakaṃ kramāt || 11||

वाहनायुधमन्त्रास्त्रं मूर्तिध्यानसमन्वितम् ।स्तोत्रं शृणु प्रवक्ष्यामि तव स्नेहाच्च नारद ॥ १२॥

vāhanāyudhamantrāstraṃ mūrtidhyānasamanvitam |stotraṃ śṛṇu pravakṣyāmi tava snehācca nārada || 12||

ब्रह्मनिष्ठाय देयं स्याददेयं यस्य कस्यचित् ।आचम्य नियतः पश्चादात्मध्यानपुरःसरम् ॥ १३॥

brahmaniṣṭhāya deyaṃ syādadeyaṃ yasya kasyacit |ācamya niyataḥ paścādātmadhyānapuraḥsaram || 13||

ओमित्यादौ विचिन्त्याथ व्योमहैमाब्जसंस्थितम् ।धर्मकन्दगतज्ञानमैश्वर्याष्टदलान्वितम् ॥ १४॥

omityādau vicintyātha vyomahaimābjasaṃsthitam |dharmakandagatajñānamaiśvaryāṣṭadalānvitam || 14||

वैराग्यकर्णिकाऽऽसीनां प्रणवग्रहमध्यगाम् ।ब्रह्मवेदिसमायुक्तां चैतन्यपुरमध्यगाम् ॥ १५॥

vairāgyakarṇikā''sīnāṃ praṇavagrahamadhyagām |brahmavedisamāyuktāṃ caitanyapuramadhyagām || 15||

तत्त्वहंससमाकीर्णां शब्दपीठे सुसंस्थिताम् ।नादबिन्दुकलातीतां गोपुरैरुपशोभिताम् ॥ १६॥

tattvahaṃsasamākīrṇāṃ śabdapīṭhe susaṃsthitām |nādabindukalātītāṃ gopurairupaśobhitām || 16||

विद्याविद्यामृतत्वादिप्रकारैरभिसंवृताम् ।निगमार्गलसञ्च्छन्नां निर्गुणद्वारवाटिकाम् ॥ १७॥

vidyāvidyāmṛtatvādiprakārairabhisaṃvṛtām |nigamārgalasañcchannāṃ nirguṇadvāravāṭikām || 17||

चतुर्वर्गफलोपेतां महाकल्पवनैवृताम् ।साद्रानन्दसुधासिन्धुनिगमद्वारवाटिकाम् ॥ १८॥

caturvargaphalopetāṃ mahākalpavanaivṛtām |sādrānandasudhāsindhunigamadvāravāṭikām || 18||

ध्यानधारणयोगादितृणगुल्मलतावृताम् ।सदसच्चित्स्वरूपाख्यां मृगपक्षिसमाकुलाम् ।विद्याविद्याविचारत्वाल्लोकालोकाचलावृताम् ॥ १९॥

dhyānadhāraṇayogāditṛṇagulmalatāvṛtām |sadasaccitsvarūpākhyāṃ mṛgapakṣisamākulām |vidyāvidyāvicāratvāllokālokācalāvṛtām || 19||

अविकारसमाश्लिष्टनिजध्यानगुणावृताम् ।पञ्चीकरणपञ्चोत्थभूततत्त्वनिवेदिताम् ॥ २०॥

avikārasamāśliṣṭanijadhyānaguṇāvṛtām |pañcīkaraṇapañcotthabhūtatattvaniveditām || 20||

वेदोपनिषदर्थाख्यदेवर्षिगणसेविताम् ।इतिहासग्रहगणैः सदारैरभिवन्दिताम् ॥ २१॥

vedopaniṣadarthākhyadevarṣigaṇasevitām |itihāsagrahagaṇaiḥ sadārairabhivanditām || 21||

गाथाप्सरोभिर्यक्षैश्च गणकिन्नरसेविताम् ।नारसिंहपुराणाख्यैः पुरुषैः कल्पचारणैः ॥ २२॥

gāthāpsarobhiryakṣaiśca gaṇakinnarasevitām |nārasiṃhapurāṇākhyaiḥ puruṣaiḥ kalpacāraṇaiḥ || 22||

कृतगानविनोदादिकथालापनतत्पराम् ।तदित्यवाङ्मनोगम्यतेजोरूपधरां पराम् ॥ २३॥

kṛtagānavinodādikathālāpanatatparām |tadityavāṅmanogamyatejorūpadharāṃ parām || 23||

जगतः प्रसवित्रीं तां सवितुः सृष्टिकारिणीम् ।वरेण्यमित्यन्नमयीं पुरुषार्थफलप्रदाम् ॥ २४॥

jagataḥ prasavitrīṃ tāṃ savituḥ sṛṣṭikāriṇīm |vareṇyamityannamayīṃ puruṣārthaphalapradām || 24||

अविद्यावर्णवर्ज्यां च तेजोवद्गर्भसंज्ञिकाम् ।देवस्य सच्चिदानन्दपरब्रह्मरसात्मिकाम् ॥ २५॥

avidyāvarṇavarjyāṃ ca tejovadgarbhasaṃjñikām |devasya saccidānandaparabrahmarasātmikām || 25||

धीमह्यहं स वै तद्वद्ब्रह्माद्वैतस्वरूपिणीम् ।धियो यो नस्तु सविता प्रचोदयादुपासिताम् ॥ २६॥

dhīmahyahaṃ sa vai tadvadbrahmādvaitasvarūpiṇīm |dhiyo yo nastu savitā pracodayādupāsitām || 26||

परोऽसौ सविता साक्षादेनोनिर्हरणाय च ।परो रजस इत्यादि परं ब्रह्म सनातनम् ॥ २७॥

paro'sau savitā sākṣādenonirharaṇāya ca |paro rajasa ityādi paraṃ brahma sanātanam || 27||

आपो ज्योतिरिति द्वाभ्यां पाञ्चभौतिकसंज्ञकम् ।रसोऽमृतं ब्रह्मपदैस्तां नित्यां तपिनीं पराम् ॥ २८॥

āpo jyotiriti dvābhyāṃ pāñcabhautikasaṃjñakam |raso'mṛtaṃ brahmapadaistāṃ nityāṃ tapinīṃ parām || 28||

भूर्भुवःसुवरित्येतैर्निगमत्वप्रकाशिकाम् ।महर्जनस्तपःसत्यलोकोपरिसुसंस्थिताम् ॥ २९॥

bhūrbhuvaḥsuvarityetairnigamatvaprakāśikām |maharjanastapaḥsatyalokoparisusaṃsthitām || 29||

तादृगस्या विराड्रूपकिरीटवरराजिताम् ।व्योमकेशालकाकाशरहस्यं प्रवदाम्यहम् ॥ ३०॥

tādṛgasyā virāḍrūpakirīṭavararājitām |vyomakeśālakākāśarahasyaṃ pravadāmyaham || 30||

मेघभ्रुकुटिकाक्रान्तविधिविष्णुशिवार्चिताम् ।गुरुभार्गवकर्णान्तां सोमसूर्याग्निलोचनाम् ॥ ३१॥

meghabhrukuṭikākrāntavidhiviṣṇuśivārcitām |gurubhārgavakarṇāntāṃ somasūryāgnilocanām || 31||

इडापिङ्गलसूक्ष्माभ्यां वायुनासापुटान्विताम् ।सन्ध्याद्विरोष्ठपुटितां लसद्वाग्भूपजिह्विकाम् ॥ ३२॥

iḍāpiṅgalasūkṣmābhyāṃ vāyunāsāpuṭānvitām |sandhyādviroṣṭhapuṭitāṃ lasadvāgbhūpajihvikām || 32||

सन्ध्यासौ द्युमणेः कण्ठलसद्बाहुसमन्विताम् ।पर्जन्यहृदयासक्तवसुसुस्तनमण्डलाम् ॥ ३३॥

sandhyāsau dyumaṇeḥ kaṇṭhalasadbāhusamanvitām |parjanyahṛdayāsaktavasusustanamaṇḍalām || 33||

आकाशोदरवित्रस्तनाभ्यवान्तरदेशकाम् ।प्रजापत्याख्यजघनां कटीन्द्राणीति संज्ञिकाम् ॥ ३४॥

ākāśodaravitrastanābhyavāntaradeśakām |prajāpatyākhyajaghanāṃ kaṭīndrāṇīti saṃjñikām || 34||

ऊरू मलयमेरुभ्यां शोभमानासुरद्विषम् ।जानुनी जह्नुकुशिकवैश्वदेवसदाभुजाम् ॥ ३५॥

ūrū malayamerubhyāṃ śobhamānāsuradviṣam |jānunī jahnukuśikavaiśvadevasadābhujām || 35||

अयनद्वयजङ्घाद्यखुराद्यपितृसंज्ञिकाम् ।पदाङ्घ्रिनखरोमाद्यभूतलद्रुमलाञ्छिताम् ॥ ३६॥

ayanadvayajaṅghādyakhurādyapitṛsaṃjñikām |padāṅghrinakharomādyabhūtaladrumalāñchitām || 36||

ग्रहराश्यृक्षदेवर्षिमूर्तिं च परसंज्ञिकाम् ।तिथिमासर्तुवर्षाख्यसुकेतुनिमिषात्मिकाम् ॥ ३७॥

graharāśyṛkṣadevarṣimūrtiṃ ca parasaṃjñikām |tithimāsartuvarṣākhyasuketunimiṣātmikām || 37||

अहोरात्रार्धमासाख्यां सूर्याचन्द्रमसात्मिकाम् ।मायाकल्पितवैचित्र्यसन्ध्याच्छादनसंवृताम् ॥ ३८॥

ahorātrārdhamāsākhyāṃ sūryācandramasātmikām |māyākalpitavaicitryasandhyācchādanasaṃvṛtām || 38||

ज्वलत्कालानलप्रख्यां तडित्कोटिसमप्रभाम् ।कोटिसूर्यप्रतीकाशां चन्द्रकोटिसुशीतलाम् ॥ ३९॥

jvalatkālānalaprakhyāṃ taḍitkoṭisamaprabhām |koṭisūryapratīkāśāṃ candrakoṭisuśītalām || 39||

सुधामण्डलमध्यस्थां सान्द्रानन्दामृतात्मिकाम् ।प्रागतीतां मनोरम्यां वरदां वेदमातरम् ॥ ४०॥

sudhāmaṇḍalamadhyasthāṃ sāndrānandāmṛtātmikām |prāgatītāṃ manoramyāṃ varadāṃ vedamātaram || 40||

चराचरमयीं नित्यां ब्रह्माक्षरसमन्विताम् ।ध्यात्वा स्वात्मनि भेदेन ब्रह्मपञ्जरमारभेत् ॥ ४१॥

carācaramayīṃ nityāṃ brahmākṣarasamanvitām |dhyātvā svātmani bhedena brahmapañjaramārabhet || 41||

पञ्जरस्य ऋषिश्चाहं छन्दो विकृतिरुच्यते ।देवता च परो हंसः परब्रह्माधिदेवता ॥ ४२॥

pañjarasya ṛṣiścāhaṃ chando vikṛtirucyate |devatā ca paro haṃsaḥ parabrahmādhidevatā || 42||

प्रणवो बीजशक्तिः स्यादों कीलकमुदाहृतम् ।तत्तत्त्वं धीमहि क्षेत्रं धियोऽस्त्रं यः परं पदम् ॥ ४३॥

praṇavo bījaśaktiḥ syādoṃ kīlakamudāhṛtam |tattattvaṃ dhīmahi kṣetraṃ dhiyo'straṃ yaḥ paraṃ padam || 43||

मन्त्रमापो ज्योतिरिति योनिर्हंसः सबन्धकम् ।विनियोगस्तु सिद्ध्यर्थं पुरुषार्थचतुष्टये ॥ ४४॥

mantramāpo jyotiriti yonirhaṃsaḥ sabandhakam |viniyogastu siddhyarthaṃ puruṣārthacatuṣṭaye || 44||

ततस्तैरङ्गषट्कं स्यात्तैरेव व्यापकत्रयम् ।पूर्वोक्तदेवतां ध्यायेत् साकारगुणसंयुताम् ॥ ४५॥

tatastairaṅgaṣaṭkaṃ syāttaireva vyāpakatrayam |pūrvoktadevatāṃ dhyāyet sākāraguṇasaṃyutām || 45||

पञ्चवक्त्रां दशभुजां त्रिपञ्चनयनैर्युताम् ।मुक्ताविद्रुमसौवर्णां सितशुभ्रसमाननाम् ॥ ४६॥

pañcavaktrāṃ daśabhujāṃ tripañcanayanairyutām |muktāvidrumasauvarṇāṃ sitaśubhrasamānanām || 46||

वाणीं परां रमां मायां चामरैर्दर्पणैर्युताम् ।षडङ्गदेवतामन्त्रै रूपाद्यवयवात्मिकाम् ॥ ४७॥

vāṇīṃ parāṃ ramāṃ māyāṃ cāmarairdarpaṇairyutām |ṣaḍaṅgadevatāmantrai rūpādyavayavātmikām || 47||

मृगेन्द्रमृगपक्षीन्द्रमृगहंसासने स्थिताम् ।अर्धेन्दुबद्धमुकुटकिरीटमणिकुण्डलाम् ॥ ४८॥

mṛgendramṛgapakṣīndramṛgahaṃsāsane sthitām |ardhendubaddhamukuṭakirīṭamaṇikuṇḍalām || 48||

रत्नताटङ्कमाङ्गल्यपरग्रैवेयनूपुराम् ।अङ्गुलीयककेयूरकङ्कणाद्यैरलङ्कृताम् ॥ ४९॥

ratnatāṭaṅkamāṅgalyaparagraiveyanūpurām |aṅgulīyakakeyūrakaṅkaṇādyairalaṅkṛtām || 49||

दिव्यस्रग्वस्त्रसञ्च्छन्नरविमण्डलमध्यगाम् ।वराभयाब्जयुगलां शङ्खचक्रगदाङ्कुशान् ॥ ५०॥

divyasragvastrasañcchannaravimaṇḍalamadhyagām |varābhayābjayugalāṃ śaṅkhacakragadāṅkuśān || 50||

शुभ्रं कपालं दधतीं वहन्तीमक्षमालिकाम् ।गायत्रीं वरदां देवीं सावित्रीं वेदमातरम् ॥ ५१॥

śubhraṃ kapālaṃ dadhatīṃ vahantīmakṣamālikām |gāyatrīṃ varadāṃ devīṃ sāvitrīṃ vedamātaram || 51||

आदित्यपथगामिन्यां स्मरेद्ब्रह्मस्वरूपिणीम् ।विचित्रमन्त्रजनर्नीं स्मरेद्विद्यां सरस्वतीम् ॥ ५२॥

ādityapathagāminyāṃ smaredbrahmasvarūpiṇīm |vicitramantrajanarnīṃ smaredvidyāṃ sarasvatīm || 52||

त्रिपदा ऋह्मयी पूर्वामुखी ब्रह्मास्त्रसंज्ञिका ।चतुर्विंशतितत्त्वाख्या पातु प्राचीं दिशं मम ॥ ५३॥

tripadā ṛhmayī pūrvāmukhī brahmāstrasaṃjñikā |caturviṃśatitattvākhyā pātu prācīṃ diśaṃ mama || 53||

चतुष्पादयजुर्ब्रह्मदण्डाख्या पातु दक्षिणाम् ।षट्त्रिशत्तत्त्वयुक्ता सा पातु मे दक्षिणां दिशम् ॥ ५४॥

catuṣpādayajurbrahmadaṇḍākhyā pātu dakṣiṇām |ṣaṭtriśattattvayuktā sā pātu me dakṣiṇāṃ diśam || 54||

प्रत्यङ्मुखी पञ्चपदी पञ्चाशत्तत्त्वरूपिणी ।पातु प्रतीचीमनिशं सामब्रह्मशिरोऽङ्किता ॥ ५५॥

pratyaṅmukhī pañcapadī pañcāśattattvarūpiṇī |pātu pratīcīmaniśaṃ sāmabrahmaśiro'ṅkitā || 55||

सौम्या ब्रह्मस्वरूपाख्या साथर्वाङ्गिरसात्मिका ।उदीचीं षट्पदा पातु चतुःषष्टिकलात्मिका ॥ ५६॥

saumyā brahmasvarūpākhyā sātharvāṅgirasātmikā |udīcīṃ ṣaṭpadā pātu catuḥṣaṣṭikalātmikā || 56||

पञ्चाशत्तत्त्वरचिता भवपादा शताक्षरी ।व्योमाख्या पातु मे चोर्ध्वां दिशं वेदाङ्गसंस्थिता ॥ ५७॥

pañcāśattattvaracitā bhavapādā śatākṣarī |vyomākhyā pātu me cordhvāṃ diśaṃ vedāṅgasaṃsthitā || 57||

विद्युन्निभा ब्रह्मसंज्ञा मृगारूढा चतुर्भुजा ।चापेषुचर्मासिधरा पातु मे पावकीं दिशम् ॥ ५८॥

vidyunnibhā brahmasaṃjñā mṛgārūḍhā caturbhujā |cāpeṣucarmāsidharā pātu me pāvakīṃ diśam || 58||

ब्राह्मी कुमारी गायत्री रक्ताङ्गी हंसवाहिनी ।बिभ्रत्कमण्डल्वक्षस्रक्स्त्रुवान्मे पातु नैरृतीम् ॥ ५९॥

brāhmī kumārī gāyatrī raktāṅgī haṃsavāhinī |bibhratkamaṇḍalvakṣasrakstruvānme pātu nairṛtīm || 59||

चतुर्भुजा वेदमाता शुक्लाङ्गी वृषवाहिनी ।वराभयकपालाक्षस्रग्विणी पातु वारुणीम् ॥ ६०॥

caturbhujā vedamātā śuklāṅgī vṛṣavāhinī |varābhayakapālākṣasragviṇī pātu vāruṇīm || 60||

श्यामा सरस्वती वृद्धा वैष्णवी गरुडासना ।शङ्खाराब्जाभयकरा पातु शैवीं दिशं मम ॥ ६१॥

śyāmā sarasvatī vṛddhā vaiṣṇavī garuḍāsanā |śaṅkhārābjābhayakarā pātu śaivīṃ diśaṃ mama || 61||

चतुर्भुजा वेदमाता गौराङ्गी सिंहवाहना ।वराभयाब्जयुगलैर्भुजैः पात्वधरां दिशम् ॥ ६२॥

caturbhujā vedamātā gaurāṅgī siṃhavāhanā |varābhayābjayugalairbhujaiḥ pātvadharāṃ diśam || 62||

तत्तत्पार्श्वस्थिताः स्वस्ववाहनायुधभूषणाः ।स्वस्वदिक्षु स्थिताः पान्तु ग्रहशक्त्यङ्गदेवताः ॥ ६३॥

tattatpārśvasthitāḥ svasvavāhanāyudhabhūṣaṇāḥ |svasvadikṣu sthitāḥ pāntu grahaśaktyaṅgadevatāḥ || 63||

मन्त्राधिदेवतारूपा मुद्राधिष्ठान देवता ।व्यापकत्वेन पात्वस्मानापहृत्तलमस्तकी ॥ ६४॥

mantrādhidevatārūpā mudrādhiṣṭhāna devatā |vyāpakatvena pātvasmānāpahṛttalamastakī || 64||

तत्पदं मे शिरः पातु भालं मे सवितुःपदम् ।वरेण्यं मे दृशौ पातु श्रुतीर्भगः सदा मम ॥ ६५॥

tatpadaṃ me śiraḥ pātu bhālaṃ me savituḥpadam |vareṇyaṃ me dṛśau pātu śrutīrbhagaḥ sadā mama || 65||

घ्राणं देवस्य मे पातु पातु धीमहि मे मुखम् ।जिह्वा मम धियः पातु कण्ठं मे पातु यःपदम् ॥ ६६॥

ghrāṇaṃ devasya me pātu pātu dhīmahi me mukham |jihvā mama dhiyaḥ pātu kaṇṭhaṃ me pātu yaḥpadam || 66||

नःपदं पातु मे स्कन्धौ भुजौ पातु प्रचोदयात् ।करौ मे च परः पातु पादौ मे रजसेऽवतु ॥ ६७॥

naḥpadaṃ pātu me skandhau bhujau pātu pracodayāt |karau me ca paraḥ pātu pādau me rajase'vatu || 67||

असौ मे हृदयं पातु मम मध्यं सदावतु ।ॐ मे नाभिं सदा पातु कटिं मे पातु मे सदा ।ओमापः सक्थिनी पातु गुह्यं ज्योतिः सदा मम ॥ ६८॥

asau me hṛdayaṃ pātu mama madhyaṃ sadāvatu |oṃ me nābhiṃ sadā pātu kaṭiṃ me pātu me sadā |omāpaḥ sakthinī pātu guhyaṃ jyotiḥ sadā mama || 68||

ऊरू मम रसः पातु जानुनी अमृतं मम ।जङ्घे ब्रह्मपदं पातु गुल्फौ भूः पातु मे सदा ॥ ६९॥

ūrū mama rasaḥ pātu jānunī amṛtaṃ mama |jaṅghe brahmapadaṃ pātu gulphau bhūḥ pātu me sadā || 69||

पादौ मम भुवः पातु सुवः पात्वखिलं वपुः ।रोमाणि मे महः पातु रोमकं पातु मे जनः ॥ ७०॥

pādau mama bhuvaḥ pātu suvaḥ pātvakhilaṃ vapuḥ |romāṇi me mahaḥ pātu romakaṃ pātu me janaḥ || 70||

प्राणांश्च धातुतत्त्वानि तदीशः पातु मे तपः ।सत्यं पातु ममायूंषि हंसो शुद्धिं च पातु मे ॥ ७१॥

prāṇāṃśca dhātutattvāni tadīśaḥ pātu me tapaḥ |satyaṃ pātu mamāyūṃṣi haṃso śuddhiṃ ca pātu me || 71||

शुचिवत् पातु मे शुक्रं वसुः पातु श्रियं मम ।मतिं पात्वन्तरिक्षं सद्धोता दानं च पातु मे ॥ ७२॥

śucivat pātu me śukraṃ vasuḥ pātu śriyaṃ mama |matiṃ pātvantarikṣaṃ saddhotā dānaṃ ca pātu me || 72||

वेदिषत् पातु मे विद्यामतिथिः पातु मे गृहम् ।धर्मं दुरोणसत् पातु नृषत् पातु सुतान्मम ॥ ७३॥

vediṣat pātu me vidyāmatithiḥ pātu me gṛham |dharmaṃ duroṇasat pātu nṛṣat pātu sutānmama || 73||

वरसत् पातु मे भार्यां मृतसत् पातु मे सुतान् ।व्योमसत्पातु मे बन्धून् भ्रातॄनब्जाश्च पातु मे ॥ ७४॥

varasat pātu me bhāryāṃ mṛtasat pātu me sutān |vyomasatpātu me bandhūn bhrātṝnabjāśca pātu me || 74||

पशून्मे पातु गोजाश्च ऋतजाः पातु मे भवम् ।सर्वं मे अद्रिजाः पातु यानं मे पात्वृतं सदा ॥ ७५॥

paśūnme pātu gojāśca ṛtajāḥ pātu me bhavam |sarvaṃ me adrijāḥ pātu yānaṃ me pātvṛtaṃ sadā || 75||

अनुक्तमथ यत्स्थानं शरीरेऽन्तर्बहिश्च यत् ।तत्सर्वं पातु मे नित्यं हंसः सोऽहमहर्निशम् ॥ ७६॥

anuktamatha yatsthānaṃ śarīre'ntarbahiśca yat |tatsarvaṃ pātu me nityaṃ haṃsaḥ so'hamaharniśam || 76||

इदं तु कथितं सम्यङ् मया ते ब्रह्मपञ्जरम् ।सन्ध्ययोः प्रत्यहं भक्त्या जपकाले विशेषतः ॥ ७७॥

idaṃ tu kathitaṃ samyaṅ mayā te brahmapañjaram |sandhyayoḥ pratyahaṃ bhaktyā japakāle viśeṣataḥ || 77||

धारयेद्।ह्द्विजवर्यो यः श्रावयेद्वा समाहितः ।स विष्णुः स शिवः सोऽहं सोऽक्षरः स विराट् स्वराट् ॥ ७८॥

dhārayed|hdvijavaryo yaḥ śrāvayedvā samāhitaḥ |sa viṣṇuḥ sa śivaḥ so'haṃ so'kṣaraḥ sa virāṭ svarāṭ || 78||

इति वसिष्ठसंहितायां ब्रह्मनारदसंवादे सावित्रीपञ्जरस्तोत्रंअथवा गायत्रीपञ्जरस्तोत्रं सम्पूर्णम् ॥

iti vasiṣṭhasaṃhitāyāṃ brahmanāradasaṃvāde sāvitrīpañjarastotraṃathavā gāyatrīpañjarastotraṃ sampūrṇam ||