गायत्रीस्तोत्रम् २ अघनाशकगायत्री स्त्तोरम् च Gayatristotram 2

नारद उवाच ।भक्तानुकम्पिन् सर्वज्ञ हृदयं पापनाशनम् ।गायत्र्या कथितं तस्माद्गायत्र्याः स्तोत्रमीरय ॥ १॥

nārada uvāca |bhaktānukampin sarvajña hṛdayaṃ pāpanāśanam |gāyatryā kathitaṃ tasmādgāyatryāḥ stotramīraya || 1||

श्रीनारायण उवाच ।आदिशक्ते जगन्मातर्भक्तानुग्रहकारिणि ।सर्वत्र व्यापिकेऽनन्ते श्रीसन्ध्ये ते नमोऽस्तु ते ॥ २॥

śrīnārāyaṇa uvāca |ādiśakte jaganmātarbhaktānugrahakāriṇi |sarvatra vyāpike'nante śrīsandhye te namo'stu te || 2||

त्वमेव सन्ध्या गायत्री सावित्री च सरस्वती ।ब्राह्मी च वैष्णवी रौद्री रक्ता श्वेता सितेतरा ॥ ३॥

tvameva sandhyā gāyatrī sāvitrī ca sarasvatī |brāhmī ca vaiṣṇavī raudrī raktā śvetā sitetarā || 3||

प्रातर्बाला च मध्याह्ने यौवनस्था भवेत्पुनः ।वृद्धा सायं भगवती चिन्त्यते मुनिभिः सदा ॥ ४॥

prātarbālā ca madhyāhne yauvanasthā bhavetpunaḥ |vṛddhā sāyaṃ bhagavatī cintyate munibhiḥ sadā || 4||

हंसस्था गरुडारूढा तथा वृषभवाहिनी ॥ऋग्वेदाध्यायिनी भूमौ दृश्यते या तपस्विभिः ॥ ५॥

haṃsasthā garuḍārūḍhā tathā vṛṣabhavāhinī ||ṛgvedādhyāyinī bhūmau dṛśyate yā tapasvibhiḥ || 5||

यजुर्वेदं पठन्ती च अन्तरिक्षे विराजते ।सा सामगापि सर्वेषु भ्राम्यमाणा तथा भुवि ॥ ६॥

yajurvedaṃ paṭhantī ca antarikṣe virājate |sā sāmagāpi sarveṣu bhrāmyamāṇā tathā bhuvi || 6||

रुद्रलोकं गता त्वं हि विष्णुलोकनिवासिनी ।त्वमेव ब्रह्मणो लोकेऽमर्त्यानुग्रहकारिणी ॥ ७॥

rudralokaṃ gatā tvaṃ hi viṣṇulokanivāsinī |tvameva brahmaṇo loke'martyānugrahakāriṇī || 7||

सप्तर्षिप्रीतिजननी माया बहुवरप्रदा ।शिवयोः करनेत्रोत्था ह्यश्रुस्वेदसमुद्भवा ॥ ८॥

saptarṣiprītijananī māyā bahuvarapradā |śivayoḥ karanetrotthā hyaśrusvedasamudbhavā || 8||

आनन्दजननी दुर्गा दशधा परिपठ्यते ।वरेण्या वरदा चैव वरिष्ठा वरवर्णिनी ॥ ९॥

ānandajananī durgā daśadhā paripaṭhyate |vareṇyā varadā caiva variṣṭhā varavarṇinī || 9||

गरिष्ठा च वराहा च वरारोहा च सप्तमी ।नीलगङ्गा तथा सन्ध्या सर्वदा भोगमोक्षदा ॥ १०॥

gariṣṭhā ca varāhā ca varārohā ca saptamī |nīlagaṅgā tathā sandhyā sarvadā bhogamokṣadā || 10||

भागीरथी मत्यर्लोके पाताले भोगवत्ययि ।त्रिलोकवाहिनी देवी स्थानत्रयनिवासिनी ॥ ११॥

bhāgīrathī matyarloke pātāle bhogavatyayi |trilokavāhinī devī sthānatrayanivāsinī || 11||

भूर्लोकस्था त्वमेवासि धरित्री लोकधारिणी ।भुवो लोके वायुशक्तिः स्वर्लोके तेजसां निधिः ॥ १२॥

bhūrlokasthā tvamevāsi dharitrī lokadhāriṇī |bhuvo loke vāyuśaktiḥ svarloke tejasāṃ nidhiḥ || 12||

महर्लोके महासिद्धिर्जनलोकेऽजनेत्यपि ।तपस्विनी तपोलोके सत्यलोके तु सत्यवाक् ॥ १३॥

maharloke mahāsiddhirjanaloke'janetyapi |tapasvinī tapoloke satyaloke tu satyavāk || 13||

कमला विष्णुलोके च गायत्री ब्रह्मलोकदा ।रुद्रलोके स्थिता गौरी हरार्धांगनिवासिनी ॥ १४॥

kamalā viṣṇuloke ca gāyatrī brahmalokadā |rudraloke sthitā gaurī harārdhāṃganivāsinī || 14||

अहमो महतश्चैव प्रकृतिस्त्वं हि गीयसे ।साम्यावस्थात्मिका त्वं हि शबलब्रह्मरूपिणी ॥ १५॥

ahamo mahataścaiva prakṛtistvaṃ hi gīyase |sāmyāvasthātmikā tvaṃ hi śabalabrahmarūpiṇī || 15||

ततः परा पराशक्तिः परमा त्वं हि गीयसे ।इच्छाशक्तिः क्रियाशक्तिर्ज्ञानशक्तिस्त्रिशक्तिदा ॥ १६॥

tataḥ parā parāśaktiḥ paramā tvaṃ hi gīyase |icchāśaktiḥ kriyāśaktirjñānaśaktistriśaktidā || 16||

गङ्गा च यमुना चैव विपाशा च सरस्वती ।शरयुर्देविका सिन्धुर्नर्मदैरावती तथा ॥ १७॥

gaṅgā ca yamunā caiva vipāśā ca sarasvatī |śarayurdevikā sindhurnarmadairāvatī tathā || 17||

गोदावरी शतद्रुश्च कावेरी देवलोकगा ।कौशिका चन्द्रभागा च वितस्ता च सरस्वती ॥ १८॥

godāvarī śatadruśca kāverī devalokagā |kauśikā candrabhāgā ca vitastā ca sarasvatī || 18||

गण्डकी तपिनी तोया गोमती वेत्रवत्यपि ।इडा च पिङ्गला चैव सुषुम्ना च तृतीयका ॥ १९॥

gaṇḍakī tapinī toyā gomatī vetravatyapi |iḍā ca piṅgalā caiva suṣumnā ca tṛtīyakā || 19||

गान्धारी हस्तजिह्वा च पूषाऽपूषा तथैव च ।अलम्बुषा कुहूश्चैव शङ्खिनी प्राणवाहिनी ॥ २०॥

gāndhārī hastajihvā ca pūṣā'pūṣā tathaiva ca |alambuṣā kuhūścaiva śaṅkhinī prāṇavāhinī || 20||

नाडी च त्वं शरीरस्था गीयसे प्राक्तनैर्बुधैः ।हृत्पद्मस्था प्राणशक्तिः कण्ठस्था स्वप्ननायिका ॥ २१॥

nāḍī ca tvaṃ śarīrasthā gīyase prāktanairbudhaiḥ |hṛtpadmasthā prāṇaśaktiḥ kaṇṭhasthā svapnanāyikā || 21||

तालुस्था त्वं सदाधारा बिन्दुस्था बिन्दुमालिनी ॥मूले तु कुण्डलीशक्तिव्यापिनी केशमूलगा ॥ २२॥

tālusthā tvaṃ sadādhārā bindusthā bindumālinī ||mūle tu kuṇḍalīśaktivyāpinī keśamūlagā || 22||

शिखामध्यासना त्वं हि शिखाग्रे तु मनोन्मनी ।किमन्यद्बहुनोक्तेन यत्किञ्चिज्जगतीत्रये ॥ २३॥

śikhāmadhyāsanā tvaṃ hi śikhāgre tu manonmanī |kimanyadbahunoktena yatkiñcijjagatītraye || 23||

तत्सर्वं त्वं महादेवि श्रिये सन्ध्ये नमोऽस्तुते ।इतीदं कीर्तिदं स्तोत्रं सन्ध्यायां बहुपुण्यदम् ॥ २४॥

tatsarvaṃ tvaṃ mahādevi śriye sandhye namo'stute |itīdaṃ kīrtidaṃ stotraṃ sandhyāyāṃ bahupuṇyadam || 24||

महापापप्रशमनं महासिद्धिविधायकम् ।य इदं कीर्तयेत् स्तोत्रं सन्ध्याकाले समाहितः ॥ २५॥

mahāpāpapraśamanaṃ mahāsiddhividhāyakam |ya idaṃ kīrtayet stotraṃ sandhyākāle samāhitaḥ || 25||

अपुत्रः प्राप्नुयात्पुत्रं धनार्थी धनमाप्नुयात् ।सर्वतीर्थतपोदानयज्ञयोगफलं लभेत् ॥ २६॥

aputraḥ prāpnuyātputraṃ dhanārthī dhanamāpnuyāt |sarvatīrthatapodānayajñayogaphalaṃ labhet || 26||

भोगान्भुक्त्वा चिरं कालमन्ते मोक्षमवाप्नुयात् ।तपस्विभिः कृतं स्तोत्रं स्नानकाले तु यः पठेत् ॥ २७॥

bhogānbhuktvā ciraṃ kālamante mokṣamavāpnuyāt |tapasvibhiḥ kṛtaṃ stotraṃ snānakāle tu yaḥ paṭhet || 27||

यत्र कुत्र जले मग्नः सन्ध्यामज्जनजं फलम् ।लभते नात्र सन्देहः सत्यं सत्यं च नारद ॥ २८॥

yatra kutra jale magnaḥ sandhyāmajjanajaṃ phalam |labhate nātra sandehaḥ satyaṃ satyaṃ ca nārada || 28||

शृणुयाद्योऽपि तद्भक्त्या स तु पापात्प्रमुच्यते ।पीयूषसदृशं वाक्यं सन्ध्योक्तं नारदेरितम् ॥ २९॥

śṛṇuyādyo'pi tadbhaktyā sa tu pāpātpramucyate |pīyūṣasadṛśaṃ vākyaṃ sandhyoktaṃ nāraderitam || 29||

इति श्रीमद्देवीभागवते महापुराणेऽष्टादशसाहस्र्यां संहितायांद्वादशस्कन्धे श्रीगायत्रीस्तोत्रवर्णनं नाम पञ्चमोऽध्यायः ॥ ५॥

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃdvādaśaskandhe śrīgāyatrīstotravarṇanaṃ nāma pañcamo'dhyāyaḥ || 5||