विघ्नराजस्तुतिः ममासुरेण प्रोक्ता Vighnaraja Stuti by Mamasura

॥ श्रीगणेशाय नमः ॥ममासुरः प्रसन्नात्मा काव्येन विघ्ननायकम् ।जगाम तं प्रणम्यैव पुपूजे भक्तिसंयुतः ॥ ९॥

|| śrīgaṇeśāya namaḥ ||mamāsuraḥ prasannātmā kāvyena vighnanāyakam |jagāma taṃ praṇamyaiva pupūje bhaktisaṃyutaḥ || 9||

पुनः प्रणम्य विघ्नेशं कृत्वा करपुटं प्रिये! ।तुष्टाव हर्षसंयुक्तो ज्ञात्वा तं ब्रह्मनायकम् । १०ममासुर उवाचविघ्नेशाय नमस्तुभ्यं सर्वसत्ताप्रचालिने ।अनादये परेशाय ब्रह्मेशाय नमो नमः ॥ ११॥

punaḥ praṇamya vighneśaṃ kṛtvā karapuṭaṃ priye! |tuṣṭāva harṣasaṃyukto jñātvā taṃ brahmanāyakam | 10mamāsura uvācavighneśāya namastubhyaṃ sarvasattāpracāline |anādaye pareśāya brahmeśāya namo namaḥ || 11||

गणेशाय गणानां तु चालकाय परात्मने ।आनन्दाय सदानन्ददायकाय नमो नमः ॥ १२॥

gaṇeśāya gaṇānāṃ tu cālakāya parātmane |ānandāya sadānandadāyakāya namo namaḥ || 12||

हेरम्बायैकदन्ताय शूर्पकर्णाय ढुण्ढये ।लम्बोदराय वै तुभ्यं भक्तपाल! नमो नमः ॥ १३॥

herambāyaikadantāya śūrpakarṇāya ḍhuṇḍhaye |lambodarāya vai tubhyaṃ bhaktapāla! namo namaḥ || 13||

स्वानन्दपतये तुभ्यं योगाकारस्वरूपिणे ।शान्तिभ्यः शान्तिदात्रे ते शान्तिस्थाय नमो नमः ॥ १४॥

svānandapataye tubhyaṃ yogākārasvarūpiṇe |śāntibhyaḥ śāntidātre te śāntisthāya namo namaḥ || 14||

ज्येष्ठराजाय पूज्याय सर्वेषां सर्वनायक! ।विनायकाय देवानां दैत्यानां पालकाय ते ॥ १५॥

jyeṣṭharājāya pūjyāya sarveṣāṃ sarvanāyaka! |vināyakāya devānāṃ daityānāṃ pālakāya te || 15||

आदिपूज्याय चान्ते तेऽवशिष्टाय ते नमः ।सिद्धिबुद्धिपते तुभ्यं चतुर्भुज! नमो नमः ॥ १६॥

ādipūjyāya cānte te'vaśiṣṭāya te namaḥ |siddhibuddhipate tubhyaṃ caturbhuja! namo namaḥ || 16||

शेषस्योपरि संस्थाय नागेशध्वजधारिणे ।गजाननाय देवेश! नमो दैत्येशरूपिणे ॥ १७॥

śeṣasyopari saṃsthāya nāgeśadhvajadhāriṇe |gajānanāya deveśa! namo daityeśarūpiṇe || 17||

भक्तानां विघ्नहन्त्रे ते ह्यभक्तानां विनाशिने ।योगिनां समभावाय हृदिस्थाय नमो नमः ॥ १८॥

bhaktānāṃ vighnahantre te hyabhaktānāṃ vināśine |yogināṃ samabhāvāya hṛdisthāya namo namaḥ || 18||

नानाभेदमयं ब्रह्मासद्रूपं वेदवादतः ।भेदहीनं च सद्रूपं तयोः साम्ये त्वमञ्जसा ॥ १९॥

nānābhedamayaṃ brahmāsadrūpaṃ vedavādataḥ |bhedahīnaṃ ca sadrūpaṃ tayoḥ sāmye tvamañjasā || 19||

समस्वानन्दसंस्थो यः को जानाति च तं प्रभुम् ।विघ्नराजं प्रपश्यामि प्रत्यक्षं ब्रह्मनायकम् ॥ २०॥

samasvānandasaṃstho yaḥ ko jānāti ca taṃ prabhum |vighnarājaṃ prapaśyāmi pratyakṣaṃ brahmanāyakam || 20||

तेनाऽहं कृतकृत्यश्चाऽधुना जातो न संशयः ।धन्यं मे जन्मकर्मादि येन दृष्टो गजाननः ॥ २१॥

tenā'haṃ kṛtakṛtyaścā'dhunā jāto na saṃśayaḥ |dhanyaṃ me janmakarmādi yena dṛṣṭo gajānanaḥ || 21||

किं स्तौमि त्वां गणेशान! यत्र वेदादयः प्रभो! ।शान्तिं प्राप्ता विशेषेण योगिनस्ते नमो नमः ॥ २२॥

kiṃ staumi tvāṃ gaṇeśāna! yatra vedādayaḥ prabho! |śāntiṃ prāptā viśeṣeṇa yoginaste namo namaḥ || 22||

एवं ममासुरः स्तुत्वा ननर्तासौ सुभाग्यवान् ।रोमाञ्चितशरीरश्च साश्रुनेत्रः सुरूपिणि ॥ २३॥

evaṃ mamāsuraḥ stutvā nanartāsau subhāgyavān |romāñcitaśarīraśca sāśrunetraḥ surūpiṇi || 23||

तमुवाच महाभक्त्या युतं विघ्नप्रनायकः ।वरं ब्रूहि महाबाहो दास्यामि स्तोत्रतोषितः ॥ २४॥

tamuvāca mahābhaktyā yutaṃ vighnapranāyakaḥ |varaṃ brūhi mahābāho dāsyāmi stotratoṣitaḥ || 24||

विघ्नेश उवाचत्वया कृतमिदं स्तोत्रं मदीयं सर्वदं भवेत् ।सकामेभ्यो विशेषेण नानाकामप्रदायकम् ॥ २५॥

vighneśa uvācatvayā kṛtamidaṃ stotraṃ madīyaṃ sarvadaṃ bhavet |sakāmebhyo viśeṣeṇa nānākāmapradāyakam || 25||

निष्कामेभ्यो महामोक्षदायकं प्रभविष्यति ।मम भक्तिप्रदं चैतन्मम भावहरं सदा ॥ २६॥

niṣkāmebhyo mahāmokṣadāyakaṃ prabhaviṣyati |mama bhaktipradaṃ caitanmama bhāvaharaṃ sadā || 26||

विघ्नेशवचनं श्रुत्वा तं प्रणम्य ममासुरः ।जगाद भक्तिसंयुक्तो विघ्नराजं कृताञ्जलिः ॥ २७॥

vighneśavacanaṃ śrutvā taṃ praṇamya mamāsuraḥ |jagāda bhaktisaṃyukto vighnarājaṃ kṛtāñjaliḥ || 27||

यदि प्रसन्नभावेन वरं दास्यसि विघ्नप ।तव भक्तिं स्थिरां देहि मायानाशकरीं प्रभो ॥ २८॥

yadi prasannabhāvena varaṃ dāsyasi vighnapa |tava bhaktiṃ sthirāṃ dehi māyānāśakarīṃ prabho || 28||

गाणपत्यसहावासं देहि नाथ निरन्तरम् ।स्थानं भक्ष्यादिकं ढुण्ढे तत्र स्थास्यामि यन्त्रितः ॥ २९॥

gāṇapatyasahāvāsaṃ dehi nātha nirantaram |sthānaṃ bhakṣyādikaṃ ḍhuṇḍhe tatra sthāsyāmi yantritaḥ || 29||

दासोऽहं ते गणाधीश नान्यं याचे वरं परम् ।तव दर्शनमात्रेण ज्ञानयुक्तोऽहमञ्जसा ॥ ३०॥

dāso'haṃ te gaṇādhīśa nānyaṃ yāce varaṃ param |tava darśanamātreṇa jñānayukto'hamañjasā || 30||

(फलश्रुतिः ।)विघ्नेश उवाच ।मदीया भक्तिरुग्रा ते भविष्यति ममासुर ।गाणपत्यप्रियत्वं च योगयुक्तो भविष्यसि ॥ ३१॥

(phalaśrutiḥ |)vighneśa uvāca |madīyā bhaktirugrā te bhaviṣyati mamāsura |gāṇapatyapriyatvaṃ ca yogayukto bhaviṣyasi || 31||

स्वस्थाने निर्भयो भूत्वा तिष्ठ त्वं मत्परायणः ।स्वधर्मविधिहीनं त्वं कर्म भुङ्क्ष्व जनैः कृतम् ॥ ३२॥

svasthāne nirbhayo bhūtvā tiṣṭha tvaṃ matparāyaṇaḥ |svadharmavidhihīnaṃ tvaṃ karma bhuṅkṣva janaiḥ kṛtam || 32||

यत्रादौ पूजनं मे न स्मरणं वा ममासुर ।मम भावेन सम्मोह्य राज्यं कुरु हृदि स्थितः ॥ ३३॥

yatrādau pūjanaṃ me na smaraṇaṃ vā mamāsura |mama bhāvena sammohya rājyaṃ kuru hṛdi sthitaḥ || 33||

मद्भक्तान् दासवन्नित्यं रक्षस्व स्नेहभावतः ।मम भावविहीनांश्च कुरु मे ममतायुतान् ॥ ३४॥

madbhaktān dāsavannityaṃ rakṣasva snehabhāvataḥ |mama bhāvavihīnāṃśca kuru me mamatāyutān || 34||

एवं विघ्नेश्वरस्यैव श्रुत्वा वचनमुत्तमम् ।ममासुरस्तं तथेति प्रहृष्टो वाक्यमब्रवीत् ॥ ३५॥

evaṃ vighneśvarasyaiva śrutvā vacanamuttamam |mamāsurastaṃ tatheti prahṛṣṭo vākyamabravīt || 35||

प्रणम्य तं ममो दैत्यः स्वस्थाने प्रजगाम ह ।शान्तिं धृत्वा गणेशानं भजते सर्वभावतः ॥ ३६॥

praṇamya taṃ mamo daityaḥ svasthāne prajagāma ha |śāntiṃ dhṛtvā gaṇeśānaṃ bhajate sarvabhāvataḥ || 36||

दैत्यास्तं त्यज्य सर्वे तु भययुक्ता विशेषतः ।पातालं विविशुः सद्यः सोऽपि हर्षयुतोऽभवत् ॥ ३७॥

daityāstaṃ tyajya sarve tu bhayayuktā viśeṣataḥ |pātālaṃ viviśuḥ sadyaḥ so'pi harṣayuto'bhavat || 37||

एवं ममासुरं शान्तं चकार विघ्ननायकः ।स्वाधीनं कृत्य तं स्थाने स्थापयामास मानिनि ॥ ३८॥

evaṃ mamāsuraṃ śāntaṃ cakāra vighnanāyakaḥ |svādhīnaṃ kṛtya taṃ sthāne sthāpayāmāsa mānini || 38||

इति ममासुरेणप्रोक्ता विघ्नराजस्तुतिः समाप्ता ।द्वादशस्तोत्रम्॥ मुद्गलपुराणं सप्तमः खण्डः । अध्यायः ८ । ७\।८ ११३८॥– ॥ मुद्गलपुराणं सप्तमः खण्डः । अध्यायः ८ । ७।८ ११-३८॥

iti mamāsureṇaproktā vighnarājastutiḥ samāptā |dvādaśastotram|| mudgalapurāṇaṃ saptamaḥ khaṇḍaḥ | adhyāyaḥ 8 | 7\|8 1138||– || mudgalapurāṇaṃ saptamaḥ khaṇḍaḥ | adhyāyaḥ 8 | 7|8 11-38||