उच्छिष्टगणेशकवचम् Uchchishtaganesha Kavacham

अथ श्रीउच्छिष्टगणेशकवचं प्रारम्भः ।देव्युवाचदेवदेव जगन्नाथ सृष्टिस्थितिलयात्मक ।विना ध्यानं विना मन्त्रं विना होमं विना जपम् ॥ १॥

atha śrīucchiṣṭagaṇeśakavacaṃ prārambhaḥ |devyuvācadevadeva jagannātha sṛṣṭisthitilayātmaka |vinā dhyānaṃ vinā mantraṃ vinā homaṃ vinā japam || 1||

येन स्मरणमात्रेण लभ्यते चाशु चिन्तितम् ।तदेव श्रोतुमिच्छामि कथयस्व जगत्प्रभो ॥ २॥

yena smaraṇamātreṇa labhyate cāśu cintitam |tadeva śrotumicchāmi kathayasva jagatprabho || 2||

ईश्वर उवाचश्रुणु देवी प्रवक्ष्यामि गुह्याद्गुह्यतरं महत् ।उच्छिष्टगणनाथस्य कवचं सर्वसिद्धिदम् ॥ ३॥

īśvara uvācaśruṇu devī pravakṣyāmi guhyādguhyataraṃ mahat |ucchiṣṭagaṇanāthasya kavacaṃ sarvasiddhidam || 3||

अल्पायासैर्विना कष्टैर्जपमात्रेण सिद्धिदम् ।एकान्ते निर्जनेऽरण्ये गह्वरे च रणाङ्गणे ॥ ४॥

alpāyāsairvinā kaṣṭairjapamātreṇa siddhidam |ekānte nirjane'raṇye gahvare ca raṇāṅgaṇe || 4||

सिन्धुतीरे च गङ्गायाः(गाङ्गीये) कूले वृक्षतले जले ।सर्वदेवालये तीर्थे लब्ध्वा सम्यग्जपं चरेत् ॥ ५॥

sindhutīre ca gaṅgāyāḥ(gāṅgīye) kūle vṛkṣatale jale |sarvadevālaye tīrthe labdhvā samyagjapaṃ caret || 5||

स्नानशौचादिकं नास्ति नास्ति निर्बन्धनं प्रिये ।दारिद्र्यान्तकरं शीघ्रं सर्वतत्त्वं जनप्रिये ॥ ६॥

snānaśaucādikaṃ nāsti nāsti nirbandhanaṃ priye |dāridryāntakaraṃ śīghraṃ sarvatattvaṃ janapriye || 6||

सहस्रशपथं कृत्वा यदि स्नेहोऽस्ति मां प्रति ।निन्दकाय कुशिष्याय खलाय कुटिलाय च ॥ ७॥

sahasraśapathaṃ kṛtvā yadi sneho'sti māṃ prati |nindakāya kuśiṣyāya khalāya kuṭilāya ca || 7||

दुष्टाय परशिष्याय घातकाय शठाय च ।वञ्चकाय वरघ्नाय ब्राह्मणीगमनाय च ॥ ८॥

duṣṭāya paraśiṣyāya ghātakāya śaṭhāya ca |vañcakāya varaghnāya brāhmaṇīgamanāya ca || 8||

अशक्ताय च क्रूराय गुरूद्रोहरताय च ।न दातव्यं न दातव्यं न दातव्यं कदाचन ॥ ९॥

aśaktāya ca krūrāya gurūdroharatāya ca |na dātavyaṃ na dātavyaṃ na dātavyaṃ kadācana || 9||

गुरूभक्ताय दातव्यं सच्छिष्याय विशेषतः ।तेषां सिध्यन्ति शीघ्रेण ह्यन्यथा न च सिध्यति ॥ १०॥

gurūbhaktāya dātavyaṃ sacchiṣyāya viśeṣataḥ |teṣāṃ sidhyanti śīghreṇa hyanyathā na ca sidhyati || 10||

गुरूसन्तुष्टिमात्रेण कलौ प्रत्यक्षसिद्धिदम् ।देहोच्छिष्टैः प्रजप्तव्यं तथोच्छिष्टैर्महामनुः ॥ ११॥ (प्रजप्तव्य इति शेषः)

gurūsantuṣṭimātreṇa kalau pratyakṣasiddhidam |dehocchiṣṭaiḥ prajaptavyaṃ tathocchiṣṭairmahāmanuḥ || 11|| (prajaptavya iti śeṣaḥ)

आकाशे च फलं प्राप्तं नान्यथा वचनं मम ।एषा राजवती विद्या विना पुण्यं न लभ्यते ॥ १२॥

ākāśe ca phalaṃ prāptaṃ nānyathā vacanaṃ mama |eṣā rājavatī vidyā vinā puṇyaṃ na labhyate || 12||

अथ वक्ष्यामि देवेशि कवचं मन्त्रपूर्वकम् ।येन विज्ञातमात्रेण राजभोगफलप्रदम् ॥ १३॥

atha vakṣyāmi deveśi kavacaṃ mantrapūrvakam |yena vijñātamātreṇa rājabhogaphalapradam || 13||

ऋषिर्मे गणकः पातु शिरसि च निरन्तरम् ।त्राहि मां देवि गायत्रीछन्दो ऋषिः सदा मुखे ॥ १४॥

ṛṣirme gaṇakaḥ pātu śirasi ca nirantaram |trāhi māṃ devi gāyatrīchando ṛṣiḥ sadā mukhe || 14||

हृदये पातु मां नित्यमुच्छिष्टगणदेवता ।गुह्ये रक्षतु तद्बीजं स्वाहा शक्तिश्च पादयोः ॥ १५॥

hṛdaye pātu māṃ nityamucchiṣṭagaṇadevatā |guhye rakṣatu tadbījaṃ svāhā śaktiśca pādayoḥ || 15||

कामकीलकसर्वाङ्गे विनियोगश्च सर्वदा ।पार्श्वर्द्वये सदा पातु स्वशक्तिं गणनायकः ॥ १६॥

kāmakīlakasarvāṅge viniyogaśca sarvadā |pārśvardvaye sadā pātu svaśaktiṃ gaṇanāyakaḥ || 16||

शिखायां पातु तद्बीजं भ्रूमध्ये तारबीजकम् ।हस्तिवक्त्रश्च शिरसि लम्बोदरो ललाटके ॥ १७॥

śikhāyāṃ pātu tadbījaṃ bhrūmadhye tārabījakam |hastivaktraśca śirasi lambodaro lalāṭake || 17||

उच्छिष्टो नेत्रयोः पातु कर्णौ पातु महात्मने ।पाशाङ्कुशमहाबीजं नासिकायां च रक्षतु ॥ १८॥

ucchiṣṭo netrayoḥ pātu karṇau pātu mahātmane |pāśāṅkuśamahābījaṃ nāsikāyāṃ ca rakṣatu || 18||

भूतीश्वरः परः पातु आस्यं जिह्वां स्वयं वपुः ।तद्बीजं पातु मां नित्यं ग्रीवायां कण्ठदेशके ॥ १९॥

bhūtīśvaraḥ paraḥ pātu āsyaṃ jihvāṃ svayaṃ vapuḥ |tadbījaṃ pātu māṃ nityaṃ grīvāyāṃ kaṇṭhadeśake || 19||

गं बीजं च तथा रक्षेत्तथा त्वग्रे च पृष्ठके ।सर्वकामश्च हृत्पातु पातु मां च करद्वये ॥ २०॥

gaṃ bījaṃ ca tathā rakṣettathā tvagre ca pṛṣṭhake |sarvakāmaśca hṛtpātu pātu māṃ ca karadvaye || 20||

उच्छिष्टाय च हृदये वह्निबीजं तथोदरे ।मायाबीजं तथा कट्यां द्वावूरू सिद्धिदायकः ॥ २१॥

ucchiṣṭāya ca hṛdaye vahnibījaṃ tathodare |māyābījaṃ tathā kaṭyāṃ dvāvūrū siddhidāyakaḥ || 21||

जङ्घायां गणनाथश्च पादौ पातु विनायकः ।शिरसः पादपर्यन्तमुच्छिष्टगणनायकः ॥ २२॥

jaṅghāyāṃ gaṇanāthaśca pādau pātu vināyakaḥ |śirasaḥ pādaparyantamucchiṣṭagaṇanāyakaḥ || 22||

आपादमस्तकान्तं च उमापुत्रश्च पातु माम् ।दिशोऽष्टौ च तथाकाशे पाताले विदिशाष्टके ॥ २३॥

āpādamastakāntaṃ ca umāputraśca pātu mām |diśo'ṣṭau ca tathākāśe pātāle vidiśāṣṭake || 23||

अहर्निशं च मां पातु मदचञ्चललोचनः ।जलेऽनले च सङ्ग्रामे दुष्टकारागृहे वने ॥ २४॥

aharniśaṃ ca māṃ pātu madacañcalalocanaḥ |jale'nale ca saṅgrāme duṣṭakārāgṛhe vane || 24||

राजद्वारे घोरपथे पातु मां गणनायकः ।इदं तु कवचं गुह्यं मम वक्त्राद्विनिर्गतम् ॥ २५॥

rājadvāre ghorapathe pātu māṃ gaṇanāyakaḥ |idaṃ tu kavacaṃ guhyaṃ mama vaktrādvinirgatam || 25||

त्रैलौक्ये सततं पातु द्विभुजश्च चतुर्भुजः ।बाह्यमभ्यन्तरं पातु सिद्धिबुद्धिर्विनायकः ॥ २६॥

trailaukye satataṃ pātu dvibhujaśca caturbhujaḥ |bāhyamabhyantaraṃ pātu siddhibuddhirvināyakaḥ || 26||

सर्वसिद्धिप्रदं देवि कवचमृद्धिसिद्धिदम् ।एकान्ते प्रजपेन्मन्त्रं कवचं युक्तिसंयुतम् ॥ २७॥

sarvasiddhipradaṃ devi kavacamṛddhisiddhidam |ekānte prajapenmantraṃ kavacaṃ yuktisaṃyutam || 27||

इदं रहस्यं कवचमुच्छिष्टगणनायकम् ।सर्ववर्मसु देवेशि इदं कवचनायकम् ॥ २८॥

idaṃ rahasyaṃ kavacamucchiṣṭagaṇanāyakam |sarvavarmasu deveśi idaṃ kavacanāyakam || 28||

एतत्कवचमाहात्म्यं वर्णितुं नैव शक्यते ।धर्मार्थकाममोक्षं च नानाफलप्रदं नृणाम् ॥ २९॥

etatkavacamāhātmyaṃ varṇituṃ naiva śakyate |dharmārthakāmamokṣaṃ ca nānāphalapradaṃ nṛṇām || 29||

शिवपुत्रः सदा पातु पातु मां सुरार्चितः ।गजाननः सदा पातु गणराजश्च पातु माम् ॥ ३०॥

śivaputraḥ sadā pātu pātu māṃ surārcitaḥ |gajānanaḥ sadā pātu gaṇarājaśca pātu mām || 30||

सदा शक्तिरतः पातु पातु मां कामविह्वलः ।सर्वाभरणभूषाढयः पातु मां सिन्दूरार्चितः ॥ ३१॥

sadā śaktirataḥ pātu pātu māṃ kāmavihvalaḥ |sarvābharaṇabhūṣāḍhayaḥ pātu māṃ sindūrārcitaḥ || 31||

पञ्चमोदकरः पातु पातु मां पार्वतीसुतः ।पाशाङ्कुशधरः पातु पातु मां च धनेश्वरः ॥ ३२॥

pañcamodakaraḥ pātu pātu māṃ pārvatīsutaḥ |pāśāṅkuśadharaḥ pātu pātu māṃ ca dhaneśvaraḥ || 32||

गदाधरः सदा पातु पातु मां काममोहितः ।नग्ननारीरतः पातु पातु मां च गणेश्वरः ॥ ३३॥

gadādharaḥ sadā pātu pātu māṃ kāmamohitaḥ |nagnanārīrataḥ pātu pātu māṃ ca gaṇeśvaraḥ || 33||

अक्षयं वरदः पातु शक्तियुक्तिः सदाऽवतु ।भालचन्द्रः सदा पातु नानारत्नविभूषितः ॥ ३४॥

akṣayaṃ varadaḥ pātu śaktiyuktiḥ sadā'vatu |bhālacandraḥ sadā pātu nānāratnavibhūṣitaḥ || 34||

उच्छिष्टगणनाथश्च मदाघूर्णितलोचनः ।नारीयोनिरसास्वादः पातु मां गजकर्णकः ॥ ३५॥

ucchiṣṭagaṇanāthaśca madāghūrṇitalocanaḥ |nārīyonirasāsvādaḥ pātu māṃ gajakarṇakaḥ || 35||

प्रसन्नवदनः पातु पातु मां भगवल्लभः ।जटाधरः सदा पातु पातु मां च किरीटिकः(किरीटधृक्) ॥ ३६॥

prasannavadanaḥ pātu pātu māṃ bhagavallabhaḥ |jaṭādharaḥ sadā pātu pātu māṃ ca kirīṭikaḥ(kirīṭadhṛk) || 36||

पद्मासनास्थितः पातु रक्तवर्णश्च पातु माम् ।नग्नसाममदोन्मत्तः पातु मां गणदैवतः ॥ ३७॥

padmāsanāsthitaḥ pātu raktavarṇaśca pātu mām |nagnasāmamadonmattaḥ pātu māṃ gaṇadaivataḥ || 37||

वामाङ्गे सुन्दरीयुक्तः पातु मां मन्मथप्रभुः ।क्षेत्रपः पिशितं(क्षेत्रप्रवसितः) पातु पातु मां श्रुतिपाठकः ॥ ३८॥

vāmāṅge sundarīyuktaḥ pātu māṃ manmathaprabhuḥ |kṣetrapaḥ piśitaṃ(kṣetrapravasitaḥ) pātu pātu māṃ śrutipāṭhakaḥ || 38||

भूषणाढ्यस्तु मां पातु नानाभोगसमन्वितः ।स्मिताननः सदा पातु श्रीगणेशकुलान्वितः ॥ ३९॥

bhūṣaṇāḍhyastu māṃ pātu nānābhogasamanvitaḥ |smitānanaḥ sadā pātu śrīgaṇeśakulānvitaḥ || 39||

श्रीरक्तचन्दनमयः सुलक्षणगणेश्वरः ।श्वेतार्कगणनाथश्च हरिद्रागणनायकः ॥ ४०॥

śrīraktacandanamayaḥ sulakṣaṇagaṇeśvaraḥ |śvetārkagaṇanāthaśca haridrāgaṇanāyakaḥ || 40||

पारभद्रगणेशश्च पातु सप्तगणेश्वरः ।प्रवालकगणाध्यक्षो गजदन्तो गणेश्वरः ॥ ४१॥

pārabhadragaṇeśaśca pātu saptagaṇeśvaraḥ |pravālakagaṇādhyakṣo gajadanto gaṇeśvaraḥ || 41||

हरबीजगणेशश्च भद्राक्षगणनायकः ।दिव्यौषधिसमुद्भूतो गणेशाश्चिन्तितप्रदः ॥ ४२॥

harabījagaṇeśaśca bhadrākṣagaṇanāyakaḥ |divyauṣadhisamudbhūto gaṇeśāścintitapradaḥ || 42||

लवणस्य गणाध्यक्षो मृत्तिकागणनायकः ।तण्डुलाक्षगणाध्यक्षो गोमयश्च गणेश्वरः ॥ ४३॥

lavaṇasya gaṇādhyakṣo mṛttikāgaṇanāyakaḥ |taṇḍulākṣagaṇādhyakṣo gomayaśca gaṇeśvaraḥ || 43||

स्फटिकाक्षगणाध्यक्षो रुद्राक्षगणदैवतः ।नवरत्नगणेशश्च आदिदेवो गणेश्वरः ॥ ४४॥

sphaṭikākṣagaṇādhyakṣo rudrākṣagaṇadaivataḥ |navaratnagaṇeśaśca ādidevo gaṇeśvaraḥ || 44||

पञ्चाननश्चतुर्वक्त्रः षडाननगणेश्वरः ।मयूरवाहनः पातु पातु मां मूषकासनः ॥ ४५॥

pañcānanaścaturvaktraḥ ṣaḍānanagaṇeśvaraḥ |mayūravāhanaḥ pātu pātu māṃ mūṣakāsanaḥ || 45||

पातु मां देवदेवेशः पातु मामृषिपूजितः ।पातु मां सर्वदा देवो देवदानवपूजितः ॥ ४६॥

pātu māṃ devadeveśaḥ pātu māmṛṣipūjitaḥ |pātu māṃ sarvadā devo devadānavapūjitaḥ || 46||

त्रैलोक्यपूजितो देवः पातु मां च विभुः प्रभुः ।रङ्गस्थं च सदा पातु सागरस्थं सदाऽवतु ॥ ४७॥

trailokyapūjito devaḥ pātu māṃ ca vibhuḥ prabhuḥ |raṅgasthaṃ ca sadā pātu sāgarasthaṃ sadā'vatu || 47||

भूमिस्थं च सदा पातु पातालस्थं च पातु माम् ।अन्तरिक्षे सदा पातु आकाशस्थं सदाऽवतु ॥ ४८॥

bhūmisthaṃ ca sadā pātu pātālasthaṃ ca pātu mām |antarikṣe sadā pātu ākāśasthaṃ sadā'vatu || 48||

चतुष्पथे सदा पातु त्रिपथस्थं च पातु माम् ।बिल्वस्थं च वनस्थं च पातु मां सर्वतस्तनुम्(सर्वतस्थितम्) ॥ ४९॥

catuṣpathe sadā pātu tripathasthaṃ ca pātu mām |bilvasthaṃ ca vanasthaṃ ca pātu māṃ sarvatastanum(sarvatasthitam) || 49||

राजद्वारस्थितं पातु पातु मां शीघ्रसिद्धिदः ।भवानीपूजितः पातु ब्रह्माविष्णुशिवार्चितः ॥ ५०॥

rājadvārasthitaṃ pātu pātu māṃ śīghrasiddhidaḥ |bhavānīpūjitaḥ pātu brahmāviṣṇuśivārcitaḥ || 50||

इदं तु कवचं देवि पठनात्सर्वसिद्धिदम् ।उच्छिष्टगणनाथस्य समन्त्रं कवचं परम् ॥ ५१॥

idaṃ tu kavacaṃ devi paṭhanātsarvasiddhidam |ucchiṣṭagaṇanāthasya samantraṃ kavacaṃ param || 51||

स्मरणाद्भूपतित्वं च लभते साङ्गतां ध्रुवम् । स्मरणाद्भूभुजत्वंवाचः सिद्धिकरं शीघ्रं परसैन्यविदारणम् ॥ ५२॥

smaraṇādbhūpatitvaṃ ca labhate sāṅgatāṃ dhruvam | smaraṇādbhūbhujatvaṃvācaḥ siddhikaraṃ śīghraṃ parasainyavidāraṇam || 52||

प्रातर्मध्याह्नसायाह्ने दिवा रात्रौ पठेन्नरः ।चतुर्थ्यां दिवसे रात्रौ पूजने मानदायकम् ॥ ५३॥

prātarmadhyāhnasāyāhne divā rātrau paṭhennaraḥ |caturthyāṃ divase rātrau pūjane mānadāyakam || 53||

सर्वसौभाग्यदं शीघ्रं दारिद्र्यार्णवघातकम् ।सुदारसुप्रजासौख्यं सर्वसिद्धिकरं नृणाम् ॥ ५४॥

sarvasaubhāgyadaṃ śīghraṃ dāridryārṇavaghātakam |sudārasuprajāsaukhyaṃ sarvasiddhikaraṃ nṛṇām || 54||

जलेऽथवाऽनलेऽरण्ये सिन्धुतीरे सरित्तटे ।श्मशाने दूरदेशे च रणे पर्वतगह्वरे ॥ ५५॥

jale'thavā'nale'raṇye sindhutīre sarittaṭe |śmaśāne dūradeśe ca raṇe parvatagahvare || 55||

राजद्वारे भये घोरे निर्भयो जायते ध्रुवम् ।सागरे च महाशीते दुर्भिक्षे दुष्टसङ्कटे ॥ ५६॥

rājadvāre bhaye ghore nirbhayo jāyate dhruvam |sāgare ca mahāśīte durbhikṣe duṣṭasaṅkaṭe || 56||

भूतप्रेतपिशाचादियक्षराक्षसजे भये ।राक्षसीयक्षिणीक्रूराशाकिनीडाकीनीगणाः ॥ ५७॥

bhūtapretapiśācādiyakṣarākṣasaje bhaye |rākṣasīyakṣiṇīkrūrāśākinīḍākīnīgaṇāḥ || 57||

राजमृत्युहरं देवि कवचं कामधेनुवत् ।अनन्तफलदं देवि सति मोक्षं(तथाऽमोघं) च पार्वति ॥ ५८॥

rājamṛtyuharaṃ devi kavacaṃ kāmadhenuvat |anantaphaladaṃ devi sati mokṣaṃ(tathā'moghaṃ) ca pārvati || 58||

कवचेन विना मन्त्रं यो जपेद्गणनायकम् ।इह जन्मानि पापिष्ठो जन्मान्ते मूषको भवेत् ॥ ५९॥

kavacena vinā mantraṃ yo japedgaṇanāyakam |iha janmāni pāpiṣṭho janmānte mūṣako bhavet || 59||

इति परमरहस्यं देवदेवार्चनं चकवचपरमदिव्यं पार्वतीपुत्ररूपम् ।पठति परमभोगैश्वर्यमोक्षप्रदं चलभति सकलसौख्यं शक्तिपुत्रप्रसादात् ॥ ६०॥

iti paramarahasyaṃ devadevārcanaṃ cakavacaparamadivyaṃ pārvatīputrarūpam |paṭhati paramabhogaiśvaryamokṣapradaṃ calabhati sakalasaukhyaṃ śaktiputraprasādāt || 60||

वर्(इति परमरहस्यं देवदेवार्चितस्यकवचमुदितमेतत्पार्वतीशेन देव्यै ।पठति स लभ्यते वै भक्तितो भक्तवर्यःप्रचुरसकलसौख्यं शक्तिपुत्रप्रसादात् ॥ ६०॥)

var(iti paramarahasyaṃ devadevārcitasyakavacamuditametatpārvatīśena devyai |paṭhati sa labhyate vai bhaktito bhaktavaryaḥpracurasakalasaukhyaṃ śaktiputraprasādāt || 60||)

॥ इति श्रीरुद्रयामलतन्त्रे उमामहेश्वरसंवादेश्रीमदुच्छिष्टगणेशकवचं समाप्तम् ॥

|| iti śrīrudrayāmalatantre umāmaheśvarasaṃvādeśrīmaducchiṣṭagaṇeśakavacaṃ samāptam ||