गणेशकवचम् Sri Ganesha Kavacha

श्रीगणेशाय नमः ॥गौर्युवाच ।एषोऽतिचपलो दैत्यान्बाल्येऽपि नाशयत्यहो । (बालो दैत्यान्हन्ति बहूनपि)अग्रे किं कर्म कर्तेति न जाने मुनिसत्तम ॥ १॥

śrīgaṇeśāya namaḥ ||gauryuvāca |eṣo'ticapalo daityānbālye'pi nāśayatyaho | (bālo daityānhanti bahūnapi)agre kiṃ karma karteti na jāne munisattama || 1||

दैत्या नानाविधा दुष्टाः साधुदेवद्रुहः खलाः ।अतोऽस्य कण्ठे किञ्चित्त्वं रक्षार्थं बद्धमर्हसि ॥ २॥

daityā nānāvidhā duṣṭāḥ sādhudevadruhaḥ khalāḥ |ato'sya kaṇṭhe kiñcittvaṃ rakṣārthaṃ baddhamarhasi || 2||

मुनिरुवाच ।ध्यायेत्सिंहहतं विनायकममुं दिग्बाहुमाद्ये युगेत्रेतायां तु मयूरवाहनममुं षड्बाहुकं सिद्धिदम् ।द्वापारे तु गजाननं युगभुजं रक्ताङ्गरागं विभुम्तुर्ये तु द्विभुजं सिताङ्गरुचिरं सर्वार्थदं सर्वदा ॥ ३॥

muniruvāca |dhyāyetsiṃhahataṃ vināyakamamuṃ digbāhumādye yugetretāyāṃ tu mayūravāhanamamuṃ ṣaḍbāhukaṃ siddhidam |dvāpāre tu gajānanaṃ yugabhujaṃ raktāṅgarāgaṃ vibhumturye tu dvibhujaṃ sitāṅgaruciraṃ sarvārthadaṃ sarvadā || 3||

विनायकः शिखां पातु परमात्मा परात्परः ।अतिसुन्दरकायस्तु मस्तकं सुमहोत्कटः ॥ ४॥

vināyakaḥ śikhāṃ pātu paramātmā parātparaḥ |atisundarakāyastu mastakaṃ sumahotkaṭaḥ || 4||

ललाटं कश्यपः पातु भृयुगं तु महोदरः ।नयने भालचन्द्रस्तु गजास्यस्त्वोष्ठपल्लवौ ॥ ५॥

lalāṭaṃ kaśyapaḥ pātu bhṛyugaṃ tu mahodaraḥ |nayane bhālacandrastu gajāsyastvoṣṭhapallavau || 5||

जिह्वां पातु गणक्रीडश्चिबुकं गिरिजासुतः ।वाचं विनायकः पातु दन्तान् रक्षतु विघ्नहा ॥ ६॥

jihvāṃ pātu gaṇakrīḍaścibukaṃ girijāsutaḥ |vācaṃ vināyakaḥ pātu dantān rakṣatu vighnahā || 6||

श्रवणौ पाशपाणिस्तु नासिकां चिन्तितार्थदः ।गणेशस्तु मुखं कण्ठं पातु देवो गणञ्जयः ॥ ७॥

śravaṇau pāśapāṇistu nāsikāṃ cintitārthadaḥ |gaṇeśastu mukhaṃ kaṇṭhaṃ pātu devo gaṇañjayaḥ || 7||

स्कन्धौ पातु गजस्कन्धः स्तनौ विघ्नविनाशनः ।हृदयं गणनाथस्तु हेरंबो जठरं महान् ॥ ८॥

skandhau pātu gajaskandhaḥ stanau vighnavināśanaḥ |hṛdayaṃ gaṇanāthastu heraṃbo jaṭharaṃ mahān || 8||

धराधरः पातु पार्श्वौ पृष्ठं विघ्नहरः शुभः ।लिङ्गं गुह्यं सदा पातु वक्रतुण्डो महाबलः ॥ ९॥

dharādharaḥ pātu pārśvau pṛṣṭhaṃ vighnaharaḥ śubhaḥ |liṅgaṃ guhyaṃ sadā pātu vakratuṇḍo mahābalaḥ || 9||

गणक्रीडो जानुसङ्घे ऊरु मङ्गलमूर्तिमान् ।एकदन्तो महाबुद्धिः पादौ गुल्फौ सदाऽवतु ॥ १०॥

gaṇakrīḍo jānusaṅghe ūru maṅgalamūrtimān |ekadanto mahābuddhiḥ pādau gulphau sadā'vatu || 10||

क्षिप्रप्रसादनो बाहू पाणी आशाप्रपूरकः ।अङ्गुलीश्च नखान्पातु पद्महस्तोऽरिनाशनः ॥ ११॥

kṣipraprasādano bāhū pāṇī āśāprapūrakaḥ |aṅgulīśca nakhānpātu padmahasto'rināśanaḥ || 11||

सर्वाङ्गानि मयूरेशो विश्वव्यापी सदाऽवतु ।अनुक्तमपि यत्स्थानं धूम्रकेतुः सदाऽवतु ॥ १२॥

sarvāṅgāni mayūreśo viśvavyāpī sadā'vatu |anuktamapi yatsthānaṃ dhūmraketuḥ sadā'vatu || 12||

आमोदस्त्वग्रतः पातु प्रमोदः पृष्ठतोऽवतु ।प्राच्यां रक्षतु बुद्धीश आग्नेयां सिद्धिदायकः ॥१३॥

āmodastvagrataḥ pātu pramodaḥ pṛṣṭhato'vatu |prācyāṃ rakṣatu buddhīśa āgneyāṃ siddhidāyakaḥ ||13||

दक्षिणास्यामुमापुत्रो नैरृत्यां तु गणेश्वरः ।प्रतीच्यां विघ्नहर्ताऽव्याद्वायव्यां गजकर्णकः ॥ १४॥

dakṣiṇāsyāmumāputro nairṛtyāṃ tu gaṇeśvaraḥ |pratīcyāṃ vighnahartā'vyādvāyavyāṃ gajakarṇakaḥ || 14||

कौबेर्यां निधिपः पायादीशान्यामीशनन्दनः ।दिवाऽव्यादेकदन्तस्तु रात्रौ सन्ध्यासु विघ्नहृत् ॥ १५॥

kauberyāṃ nidhipaḥ pāyādīśānyāmīśanandanaḥ |divā'vyādekadantastu rātrau sandhyāsu vighnahṛt || 15||

राक्षसासुरवेतालग्रहभूतपिशाचतः ।पाशाङ्कुशधरः पातु रजःसत्त्वतमः स्मृतिः ॥ १६॥

rākṣasāsuravetālagrahabhūtapiśācataḥ |pāśāṅkuśadharaḥ pātu rajaḥsattvatamaḥ smṛtiḥ || 16||

ज्ञानं धर्मं च लक्ष्मीं च लज्जां कीर्ति तथा कुलम् ।वपुर्धनं च धान्यं च गृहान्दारान्सुतान्सखीन् ॥ १७॥

jñānaṃ dharmaṃ ca lakṣmīṃ ca lajjāṃ kīrti tathā kulam |vapurdhanaṃ ca dhānyaṃ ca gṛhāndārānsutānsakhīn || 17||

सर्वायुधधरः पौत्रान् मयूरेशोऽवतात्सदा ।कपिलोऽजादिकं पातु गजाश्वान्विकटोऽवतु ॥ १८॥

sarvāyudhadharaḥ pautrān mayūreśo'vatātsadā |kapilo'jādikaṃ pātu gajāśvānvikaṭo'vatu || 18||

भूर्जपत्रे लिखित्वेदं यः कण्ठे धारयेत्सुधीः ।न भयं जायते तस्य यक्षरक्षःपिशाचतः ॥ १८॥

bhūrjapatre likhitvedaṃ yaḥ kaṇṭhe dhārayetsudhīḥ |na bhayaṃ jāyate tasya yakṣarakṣaḥpiśācataḥ || 18||

त्रिसन्ध्यं जपते यस्तु वज्रसारतनुर्भवेत् ।यात्राकाले पठेद्यस्तु निर्विघ्नेन फलं लभेत् ॥ २०॥

trisandhyaṃ japate yastu vajrasāratanurbhavet |yātrākāle paṭhedyastu nirvighnena phalaṃ labhet || 20||

युद्धकाले पठेद्यस्तु विजयं चाप्नुयाद्द्रुतम् ।मारणोच्चाटकाकर्षस्तम्भमोहनकर्मणि ॥ २१॥

yuddhakāle paṭhedyastu vijayaṃ cāpnuyāddrutam |māraṇoccāṭakākarṣastambhamohanakarmaṇi || 21||

सप्तवारं जपेदेतद्दिनानामेकविंशतिम् ।तत्तत्फलवाप्नोति साधको नात्रसंशयः ॥२२॥

saptavāraṃ japedetaddinānāmekaviṃśatim |tattatphalavāpnoti sādhako nātrasaṃśayaḥ ||22||

एकविंशतिवारं च पठेत्तावद्दिनानि यः ।कारागृहगतं सद्योराज्ञा वध्यं च मोचयेत् ॥ २३॥

ekaviṃśativāraṃ ca paṭhettāvaddināni yaḥ |kārāgṛhagataṃ sadyorājñā vadhyaṃ ca mocayet || 23||

राजदर्शनवेलायां पठेदेतत्त्रिवारतः ।स राजसं वशं नीत्वा प्रकृतीश्च सभां जयेत् ॥ २४॥

rājadarśanavelāyāṃ paṭhedetattrivārataḥ |sa rājasaṃ vaśaṃ nītvā prakṛtīśca sabhāṃ jayet || 24||

इदं गणेशकवचं कश्यपेन समीरितम् ।मुद्गलाय च ते नाथ माण्डव्याय महर्षये ॥ २५॥

idaṃ gaṇeśakavacaṃ kaśyapena samīritam |mudgalāya ca te nātha māṇḍavyāya maharṣaye || 25||

मह्यं स प्राह कृपया कवचं सर्वसिद्धिदम् ।न देयं भक्तिहीनाय देयं श्रद्धावते शुभम् ॥ २६॥

mahyaṃ sa prāha kṛpayā kavacaṃ sarvasiddhidam |na deyaṃ bhaktihīnāya deyaṃ śraddhāvate śubham || 26||

(यस्यानेन कृता रक्षा न बाधास्य भवेत्क्वचित् ।राक्षसासुरवेतालदैत्यदानवसम्भवा ॥ २७॥)

(yasyānena kṛtā rakṣā na bādhāsya bhavetkvacit |rākṣasāsuravetāladaityadānavasambhavā || 27||)

इति श्रीगणेशपुराणे उत्तरखण्डे पञ्चाशीतितमोऽध्याययेगणेशकवचं सम्पूर्णम् ॥॥ श्रीगणेशपुराणं क्रीडा (उत्तर)खण्डः । अध्यायः ८५ । २\।८५ १८४२॥– ॥ श्रीगणेशपुराणं क्रीडा (उत्तर)खण्डः । अध्यायः ८५ । २।८५ १८-४२॥

iti śrīgaṇeśapurāṇe uttarakhaṇḍe pañcāśītitamo'dhyāyayegaṇeśakavacaṃ sampūrṇam |||| śrīgaṇeśapurāṇaṃ krīḍā (uttara)khaṇḍaḥ | adhyāyaḥ 85 | 2\|85 1842||– || śrīgaṇeśapurāṇaṃ krīḍā (uttara)khaṇḍaḥ | adhyāyaḥ 85 | 2|85 18-42||