वक्रतुण्डगणेशकवचम् अथवा गणेशरक्षाकरं स्तोत्रम् Vakratunda Ganesha Kavacham or Ganesha Rakshakaram Stotram

श्री गणेशाय नमः ।मौलिं महेशपुत्रोऽव्याद्भालं पातु विनायकः ।त्रिनेत्रः पातु मे नेत्रे शूर्पकर्णोऽवतु श्रुती ॥ १॥

śrī gaṇeśāya namaḥ |mauliṃ maheśaputro'vyādbhālaṃ pātu vināyakaḥ |trinetraḥ pātu me netre śūrpakarṇo'vatu śrutī || 1||

हेरम्बो रक्षतु घ्राणं मुखं पातु गजाननः ।जिह्वां पातु गणेशो मे कण्ठं श्रीकण्ठवल्लभः ॥ २॥

herambo rakṣatu ghrāṇaṃ mukhaṃ pātu gajānanaḥ |jihvāṃ pātu gaṇeśo me kaṇṭhaṃ śrīkaṇṭhavallabhaḥ || 2||

स्कन्धौ महाबलः पातु विघ्नहा पातु मे भुजौ ।करौ परशुभृत्पातु हृदयं स्कन्दपूर्वजः ॥ ३॥

skandhau mahābalaḥ pātu vighnahā pātu me bhujau |karau paraśubhṛtpātu hṛdayaṃ skandapūrvajaḥ || 3||

मध्यं लम्बोदरः पातु नाभिं सिन्दूरभूषितः ।जघनं पार्वतीपुत्रः सक्थिनी पातु पाशभृत् ॥ ४॥

madhyaṃ lambodaraḥ pātu nābhiṃ sindūrabhūṣitaḥ |jaghanaṃ pārvatīputraḥ sakthinī pātu pāśabhṛt || 4||

जानुनी जगतां नाथो जङ्घे मूषकवाहनः ।पादौ पद्मासनः पातु पादाधो दैत्यदर्पहा ॥ ५॥

jānunī jagatāṃ nātho jaṅghe mūṣakavāhanaḥ |pādau padmāsanaḥ pātu pādādho daityadarpahā || 5||

एकदन्तोऽग्रतः पातु पृष्ठे पातु गणाधिपः ।पार्श्वयोर्मोदकाहारो दिग्विदिक्षु च सिद्धिदः ॥ ६॥

ekadanto'grataḥ pātu pṛṣṭhe pātu gaṇādhipaḥ |pārśvayormodakāhāro digvidikṣu ca siddhidaḥ || 6||

व्रजतस्तिष्ठतो वापि जाग्रतः स्वपतोऽश्नतः ।चतुर्थीवल्लभो देवः पातु मे भुक्तिमुक्तिदः ॥ ७॥

vrajatastiṣṭhato vāpi jāgrataḥ svapato'śnataḥ |caturthīvallabho devaḥ pātu me bhuktimuktidaḥ || 7||

इदं पवित्रं स्तोत्रं च चतुर्थ्यां नियतः पठेत् ।सिन्दूररक्तः कुसुमैर्दूर्वया पूज्य विघ्नपम् ॥ ८॥

idaṃ pavitraṃ stotraṃ ca caturthyāṃ niyataḥ paṭhet |sindūraraktaḥ kusumairdūrvayā pūjya vighnapam || 8||

राजा राजसुतो राजपत्नी मन्त्री कुलं चलम् ।तस्यावश्यं भवेद्वश्यं विघ्नराजप्रसादतः ॥ ९॥

rājā rājasuto rājapatnī mantrī kulaṃ calam |tasyāvaśyaṃ bhavedvaśyaṃ vighnarājaprasādataḥ || 9||

समन्त्रयन्त्रं यः स्तोत्रं करे संलिख्य धारयेत् ।धनधान्यसमृद्धिः स्यात्तस्य नास्त्यत्र संशयः ॥ १०॥

samantrayantraṃ yaḥ stotraṃ kare saṃlikhya dhārayet |dhanadhānyasamṛddhiḥ syāttasya nāstyatra saṃśayaḥ || 10||

अस्य मन्त्रः ।ऐं क्लीं ह्रीं वक्रतुण्डाय हुं ।रसलक्षं सदैकाग्र्यः षडङ्गन्यासपूर्वकम् ।हुत्वा तदन्ते विधिवदष्टद्रव्यं पयो घृतम् ॥ ११॥

asya mantraḥ |aiṃ klīṃ hrīṃ vakratuṇḍāya huṃ |rasalakṣaṃ sadaikāgryaḥ ṣaḍaṅganyāsapūrvakam |hutvā tadante vidhivadaṣṭadravyaṃ payo ghṛtam || 11||

यं यं काममभिध्यायन् कुरुते कर्म किञ्चन ।तं तं सर्वमवाप्नोति वक्रतुण्डप्रसादतः ॥ १२॥

yaṃ yaṃ kāmamabhidhyāyan kurute karma kiñcana |taṃ taṃ sarvamavāpnoti vakratuṇḍaprasādataḥ || 12||

भृगुप्रणीतं यः स्तोत्रं पठते भुवि मानवः ।भवेदव्याहतैश्वर्यः स गणेशप्रसादतः ॥ १३॥

bhṛgupraṇītaṃ yaḥ stotraṃ paṭhate bhuvi mānavaḥ |bhavedavyāhataiśvaryaḥ sa gaṇeśaprasādataḥ || 13||

॥ इति गणेशरक्षाकरं स्तोत्रं समाप्तम् ॥

|| iti gaṇeśarakṣākaraṃ stotraṃ samāptam ||