गणेशस्तोत्रम् विघ्नहर्त्रे Shri Ganesha Stotram

ॐ नमो विघ्नहर्त्रे ।ॐ अप्रमेयगुणं नित्यं गणेशममरोत्तमम् ।वेदान्तवेद्यं सर्वज्ञं पूजितममरेश्वरैः ॥ १॥

oṃ namo vighnahartre |oṃ aprameyaguṇaṃ nityaṃ gaṇeśamamarottamam |vedāntavedyaṃ sarvajñaṃ pūjitamamareśvaraiḥ || 1||

ओङ्कारं परमंब्रह्म अक्षरं शिवमव्ययम् ।पार्वतीप्रियपुत्रं तं प्रणमामि गणेश्वरम् ॥ २॥

oṅkāraṃ paramaṃbrahma akṣaraṃ śivamavyayam |pārvatīpriyaputraṃ taṃ praṇamāmi gaṇeśvaram || 2||

ब्रह्मद्वयानवच्छेद्यं शिवाद्वयविबोधितम् ।स्वप्रकाशं परात्मानं तं प्रपद्ये विनायकम् ॥ ३॥

brahmadvayānavacchedyaṃ śivādvayavibodhitam |svaprakāśaṃ parātmānaṃ taṃ prapadye vināyakam || 3||

वैरिविघ्नप्रदं नित्यं भक्तानां सिद्धिदायकम् ।शिवसूनुं परानन्दं नमस्यामि विनायकम् ॥ ४॥

vairivighnapradaṃ nityaṃ bhaktānāṃ siddhidāyakam |śivasūnuṃ parānandaṃ namasyāmi vināyakam || 4||

मोदकाहारपरममक्षमालाकरं परम् ।त्रिनेत्रं गजवक्त्रं च तं प्रपद्ये गणेश्वरम् ॥ ५॥

modakāhāraparamamakṣamālākaraṃ param |trinetraṃ gajavaktraṃ ca taṃ prapadye gaṇeśvaram || 5||

स्वदन्तं परुशुं चैव धारयन्तं भुजद्वये ।रक्तवस्त्राम्बरधरं रक्तमालाधरं विभुम् ॥ ६॥

svadantaṃ paruśuṃ caiva dhārayantaṃ bhujadvaye |raktavastrāmbaradharaṃ raktamālādharaṃ vibhum || 6||

विघ्नराशीन्विकिरन्तं करक्षेपैर्मुहुर्मुहुः ।अनन्तं परमं तत्त्वं सारात्सारतरं परम् ॥ ७॥

vighnarāśīnvikirantaṃ karakṣepairmuhurmuhuḥ |anantaṃ paramaṃ tattvaṃ sārātsārataraṃ param || 7||

अप्रमेयगुणायापि त्र्यक्षाय वरवर्णिने ।विनायकाय देवाय भूयो भूयो नमो नमः ॥ ८॥

aprameyaguṇāyāpi tryakṣāya varavarṇine |vināyakāya devāya bhūyo bhūyo namo namaḥ || 8||

श्रीगणेशं नुमो यस्य प्रसादात्प्राप्तबुद्धयः ।प्रौढबुद्धिषु हृष्यन्ति मादृशा अपि वालिशाः ॥ ९॥

śrīgaṇeśaṃ numo yasya prasādātprāptabuddhayaḥ |prauḍhabuddhiṣu hṛṣyanti mādṛśā api vāliśāḥ || 9||

श्रीगणेश्वरं भक्तकामदं श्रीकृपानिधिं सर्वसिद्धिदम् ।ब्रह्मविष्णुदेवेन्द्रगोनुतं भक्तवत्सलं नौम्युमासुतम् ॥ १०॥

śrīgaṇeśvaraṃ bhaktakāmadaṃ śrīkṛpānidhiṃ sarvasiddhidam |brahmaviṣṇudevendragonutaṃ bhaktavatsalaṃ naumyumāsutam || 10||

वारणाननं वारणाधिपदारुणं बलात्सिद्धिकारणम् ।तारणं भवाद्विघ्नवारणं भक्तवत्सलं नौम्युमासुतम् ॥ ११॥

vāraṇānanaṃ vāraṇādhipadāruṇaṃ balātsiddhikāraṇam |tāraṇaṃ bhavādvighnavāraṇaṃ bhaktavatsalaṃ naumyumāsutam || 11||

शङ्कराङ्कतोऽवातरन्मुदा शैलजाग्रतो हर्षयन्नुभौ ।षण्मुखेन यो नृत्यते गिरौ भक्तवत्सलं तं नमाम्यहम् ॥ १२॥

śaṅkarāṅkato'vātaranmudā śailajāgrato harṣayannubhau |ṣaṇmukhena yo nṛtyate girau bhaktavatsalaṃ taṃ namāmyaham || 12||

शैलजासुतं विश्वमोहनं भक्तवत्सलं कल्मषापहम् ।सिद्धिदायकं विघ्ननाशकं नौम्यहं सुरैर्वन्द्यपादुकम् ॥ १३॥

śailajāsutaṃ viśvamohanaṃ bhaktavatsalaṃ kalmaṣāpaham |siddhidāyakaṃ vighnanāśakaṃ naumyahaṃ surairvandyapādukam || 13||

श्रीतपस्विनोऽचिन्त्यपौरुषं यं विचिन्त्य प्राक्सर्वसिद्धिदम् ।सिद्धवाञ्छितास्ते भवन्ति तं भक्तवत्सलं नौम्युमासुतम् ॥ १४॥

śrītapasvino'cintyapauruṣaṃ yaṃ vicintya prāksarvasiddhidam |siddhavāñchitāste bhavanti taṃ bhaktavatsalaṃ naumyumāsutam || 14||

यत्पदाब्जपीठासनङ्गणैर्मौलिकोटिभिर्वन्दितं मुहुः ।प्राप्तसिद्धयस्ते भवन्ति तं भक्तवत्सलं नौम्युमासुतम् ॥ १५॥

yatpadābjapīṭhāsanaṅgaṇairmaulikoṭibhirvanditaṃ muhuḥ |prāptasiddhayaste bhavanti taṃ bhaktavatsalaṃ naumyumāsutam || 15||

दैवतैर्दितेरात्मजैर्नरैर्नागचारणैर्भूतकिन्नरैः ।गुह्यकादिभिर्वन्दितं सदा भक्तवत्सलं नौम्युमासुतम् ॥ १६॥

daivatairditerātmajairnarairnāgacāraṇairbhūtakinnaraiḥ |guhyakādibhirvanditaṃ sadā bhaktavatsalaṃ naumyumāsutam || 16||

चिन्तितं नरैः सिद्धनायकैर्मुक्तयेब्जजेनापि सृष्टये ।त्रैपुरं च हन्तुं शिवेन वै भक्तवत्सलं नौम्युमासुतम् ॥ १७॥

cintitaṃ naraiḥ siddhanāyakairmuktayebjajenāpi sṛṣṭaye |traipuraṃ ca hantuṃ śivena vai bhaktavatsalaṃ naumyumāsutam || 17||

पाहि पाहि मां विघ्ननायक रक्ष रक्ष मां विघ्ननाशक ।देव देव त्वां विश्वपूजित भक्तवत्सलं नौम्युमासुतम् ॥ १८॥

pāhi pāhi māṃ vighnanāyaka rakṣa rakṣa māṃ vighnanāśaka |deva deva tvāṃ viśvapūjita bhaktavatsalaṃ naumyumāsutam || 18||

पाहि मां विभो दीनपालक रक्ष मां प्रभो दीनवत्सल ।देहि सम्पदं ह्यापदं हर भक्तवत्सलं नौम्युमासुतम् ॥ १९॥

pāhi māṃ vibho dīnapālaka rakṣa māṃ prabho dīnavatsala |dehi sampadaṃ hyāpadaṃ hara bhaktavatsalaṃ naumyumāsutam || 19||

योऽभ्यर्चितः सुरगणैर्वरसिद्धिहेतोश्छेत्तुं भयानि च करे परुशुं दधानः ।देवः स शम्भुदयितापरिवर्द्धितश्रीविघ्नान्निवारयतु वारणराजवक्त्रः ॥ २०॥

yo'bhyarcitaḥ suragaṇairvarasiddhihetośchettuṃ bhayāni ca kare paruśuṃ dadhānaḥ |devaḥ sa śambhudayitāparivarddhitaśrīvighnānnivārayatu vāraṇarājavaktraḥ || 20||

नमताशेषविघ्नौघवारणं वारणाननम् ।कारणं सर्वसिद्धीनां दुरितार्णवतारणम् ॥ २१॥

namatāśeṣavighnaughavāraṇaṃ vāraṇānanam |kāraṇaṃ sarvasiddhīnāṃ duritārṇavatāraṇam || 21||

इति गणेशस्तोत्रं सम्पूर्णम् ॥

iti gaṇeśastotraṃ sampūrṇam ||