गणेशस्तोत्रम् अहंकृतं Shri Ganesha Stotram Ahamkritam

॥ श्रीगणेशाय नमः ॥अहमुवाच ।नमस्ते गणनाथाय हेरम्बाय परात्मने ।सर्वेभ्यो वरदात्रे ते वरदाय नमो नमः ॥ १॥

|| śrīgaṇeśāya namaḥ ||ahamuvāca |namaste gaṇanāthāya herambāya parātmane |sarvebhyo varadātre te varadāya namo namaḥ || 1||

ब्रह्मसु ब्रह्मनाथाय निजेषु स्वस्वरूपिणे ।साङ्ख्याय ते परत उत्थानस्थेषु नमो नमः ॥ २॥

brahmasu brahmanāthāya nijeṣu svasvarūpiṇe |sāṅkhyāya te parata utthānastheṣu namo namaḥ || 2||

ज्ञानेषु बोधरूपाय सोऽहन्देहिषु ते नमः ।देहेषु बिन्दुरूपाय विघ्नेशाय नमो नमः ॥ ३॥

jñāneṣu bodharūpāya so'handehiṣu te namaḥ |deheṣu bindurūpāya vighneśāya namo namaḥ || 3||

स्रष्टृषु ब्रह्मदेवाय विष्णवे पालकेषु ते ।संहर्तृषु शिवायैवैकदन्ताय नमो नमः ॥ ४॥

sraṣṭṛṣu brahmadevāya viṣṇave pālakeṣu te |saṃhartṛṣu śivāyaivaikadantāya namo namaḥ || 4||

प्रकाशकेषु सूर्याय मोहकेषु च शक्तये ।देवेषु देवराजाय विनायकाय ते नमः ॥ ५॥

prakāśakeṣu sūryāya mohakeṣu ca śaktaye |deveṣu devarājāya vināyakāya te namaḥ || 5||

अग्नये ते दाहकेषु यमाय नीतिधारिणाम् ।रक्षःसु नैरृतायैव शूर्पकर्णाय ते नमः ॥ ६॥

agnaye te dāhakeṣu yamāya nītidhāriṇām |rakṣaḥsu nairṛtāyaiva śūrpakarṇāya te namaḥ || 6||

वायवे बलयुक्तेषु निधिषु धनपाय ते ।रुद्रेषु कालरूपाय नमो लम्बोदराय वै ॥ ७॥

vāyave balayukteṣu nidhiṣu dhanapāya te |rudreṣu kālarūpāya namo lambodarāya vai || 7||

प्रजापतिषु दक्षाय नागेशे शेषरूपिणे ।अनन्तविभवायैव किं ते स्तौमि नमो नमः ॥ ८॥

prajāpatiṣu dakṣāya nāgeśe śeṣarūpiṇe |anantavibhavāyaiva kiṃ te staumi namo namaḥ || 8||

यं स्तोतुं न समर्थाश्च वेदाद्या योगिनोऽमलाः ।तं किं स्तवीमि विघ्नेशमल्पबुद्धिप्रधारकः ॥ ९॥

yaṃ stotuṃ na samarthāśca vedādyā yogino'malāḥ |taṃ kiṃ stavīmi vighneśamalpabuddhipradhārakaḥ || 9||

धन्योऽहं कृतकृत्योऽहं सफलो मे भवः पिता ।माता कुलं तथा ज्ञानं त्वदङ्घ्रियुगदर्शनात् ॥ १०॥

dhanyo'haṃ kṛtakṛtyo'haṃ saphalo me bhavaḥ pitā |mātā kulaṃ tathā jñānaṃ tvadaṅghriyugadarśanāt || 10||

एवमुक्त्वा गणेशानं प्रणनाम महासुरः ।हर्षेण महता युक्तस्तमुवाच गजाननः ॥ ११॥

evamuktvā gaṇeśānaṃ praṇanāma mahāsuraḥ |harṣeṇa mahatā yuktastamuvāca gajānanaḥ || 11||

(फलश्रुतिः)श्रीगणेश उवाच ।त्वया कृतमिदं स्तोत्रं मदीयं सर्वदं भवेत् ।पठते शृण्वते चैव मयि भावप्रदायकम् ॥ १२॥

(phalaśrutiḥ)śrīgaṇeśa uvāca |tvayā kṛtamidaṃ stotraṃ madīyaṃ sarvadaṃ bhavet |paṭhate śṛṇvate caiva mayi bhāvapradāyakam || 12||

पुत्रपौत्रादिकं सौख्यं भुक्तिं मुक्तिं लभेन्नरः ।अस्य पठनमात्रेण मद्भक्तिं भ्रमनाशिनीम् ॥ १३॥

putrapautrādikaṃ saukhyaṃ bhuktiṃ muktiṃ labhennaraḥ |asya paṭhanamātreṇa madbhaktiṃ bhramanāśinīm || 13||

वरान् वृणु महाभाग मनेप्सितान् ददाम्यहम् ।तपसा स्तोत्रमुख्येन तुष्टोऽहं ते महादरात् ॥ १४॥

varān vṛṇu mahābhāga manepsitān dadāmyaham |tapasā stotramukhyena tuṣṭo'haṃ te mahādarāt || 14||

इति अहंकृतं श्रीगणेशस्तोत्रं सम्पूर्णम् ॥॥ मुद्गलपुराणं अष्टमः खण्डः । अध्यायः २ । ८\।२ ११४॥– ॥ मुद्गलपुराणं अष्टमः खण्डः । अध्यायः २ । ८।२ १-१४॥

iti ahaṃkṛtaṃ śrīgaṇeśastotraṃ sampūrṇam |||| mudgalapurāṇaṃ aṣṭamaḥ khaṇḍaḥ | adhyāyaḥ 2 | 8\|2 114||– || mudgalapurāṇaṃ aṣṭamaḥ khaṇḍaḥ | adhyāyaḥ 2 | 8|2 1-14||