ब्रह्मकमण्डलुतीर्थस्तोत्रम् Brahmakamandalutirtha Stotram

॥ श्रीगणेशाय नमः ॥देवर्षय ऊचुः ।सर्वादिभूतं त्रिगुणेषु संस्थं तीर्थेषु यत् सर्वविकारहीनम् ।तीर्थं तुरीयं च नमामहे तत्तीर्थात्मकं पापविनाशदक्षम् ॥ ४॥

|| śrīgaṇeśāya namaḥ ||devarṣaya ūcuḥ |sarvādibhūtaṃ triguṇeṣu saṃsthaṃ tīrtheṣu yat sarvavikārahīnam |tīrthaṃ turīyaṃ ca namāmahe tattīrthātmakaṃ pāpavināśadakṣam || 4||

गङ्गादिनद्यः प्रभवा यतश्च सर्वान्तरस्थं स्थितमात्मरूपम् ।नादात्मकं रूपमथो विधाय तच्चालकं यत्तु नमामहे तत् ॥ ५॥

gaṅgādinadyaḥ prabhavā yataśca sarvāntarasthaṃ sthitamātmarūpam |nādātmakaṃ rūpamatho vidhāya taccālakaṃ yattu namāmahe tat || 5||

पुराणगीतं विधिपापनाशं कमण्डलुस्थं परमप्रमेयम् ।अपारतीर्थेषु तदात्मभावं भविष्यते देहधरं नमामः ॥ ६॥

purāṇagītaṃ vidhipāpanāśaṃ kamaṇḍalusthaṃ paramaprameyam |apāratīrtheṣu tadātmabhāvaṃ bhaviṣyate dehadharaṃ namāmaḥ || 6||

नाथो विधाता च भवेन्महात्मन् पापेन युक्तश्च तथा स्थितश्चेत् ।विश्वं परं नाशमुपैष्यति त्वं प्रत्यक्षतामेहि दयाकरातः ॥ ७॥

nātho vidhātā ca bhavenmahātman pāpena yuktaśca tathā sthitaścet |viśvaṃ paraṃ nāśamupaiṣyati tvaṃ pratyakṣatāmehi dayākarātaḥ || 7||

गङ्गास्वरूपाय नमो नमस्ते ब्रह्मात्मजारूपधराय तुभ्यम् ।तुभ्यं प्रयागाय च नार्मदाय कालिन्दिकास्थाय नमो नमो वै ॥ ८॥

gaṅgāsvarūpāya namo namaste brahmātmajārūpadharāya tubhyam |tubhyaṃ prayāgāya ca nārmadāya kālindikāsthāya namo namo vai || 8||

कृष्णास्वरूपाय ककुद्मतीस्थ यद्देवनद्यै च पयोष्णिकायै ।वेणीस्वरूपाय च पुष्कराय तापीप्रभासाय च सर्वतीर्थ ॥ ९॥

kṛṣṇāsvarūpāya kakudmatīstha yaddevanadyai ca payoṣṇikāyai |veṇīsvarūpāya ca puṣkarāya tāpīprabhāsāya ca sarvatīrtha || 9||

गोदावरीरूपधराय तुभ्यं क्षिप्रास्थसिन्धुस्थ महीस्वरूप ।कावेरिकास्थं सरयूस्वरूपं पूर्णे नमस्तेऽस्तु कमण्डलुस्थम् ॥ १०॥

godāvarīrūpadharāya tubhyaṃ kṣiprāsthasindhustha mahīsvarūpa |kāverikāsthaṃ sarayūsvarūpaṃ pūrṇe namaste'stu kamaṇḍalustham || 10||

सार्धत्रिकोटीप्रवरस्थकाय तीर्थेश्वरायैव नमो नमस्ते ।अनन्ततीर्थप्रवराय नित्यं क्षेत्रे मयूरे तु समास्थिताय ॥ ११॥

sārdhatrikoṭīpravarasthakāya tīrtheśvarāyaiva namo namaste |anantatīrthapravarāya nityaṃ kṣetre mayūre tu samāsthitāya || 11||

वाराम्पतिस्थाय सरोवराय वापीस्थकूपाय नमो नमस्ते ।यद्यज्जलं भानुघनस्थरूपं तत्रस्थकायैव नमो नमस्ते ॥ १२॥

vārāmpatisthāya sarovarāya vāpīsthakūpāya namo namaste |yadyajjalaṃ bhānughanastharūpaṃ tatrasthakāyaiva namo namaste || 12||

त्वया ततं सर्वमिदं विभाति चराचरस्थं च जलं परेश ।कृपाकटाक्षामृतधारयाऽस्मान् रक्षस्व सन्दर्शय ते स्वरूपम् ॥ १३॥

tvayā tataṃ sarvamidaṃ vibhāti carācarasthaṃ ca jalaṃ pareśa |kṛpākaṭākṣāmṛtadhārayā'smān rakṣasva sandarśaya te svarūpam || 13||

(फलश्रुतिः)भृशुण्ड्युवाच ।एवं संस्तुवतां तेषां पुरस्तेजोमयं जलम् ।प्रादुर्बभूव तत् दृष्ट्वा प्रणेमुः ससुरर्षयः ॥ १४॥

(phalaśrutiḥ)bhṛśuṇḍyuvāca |evaṃ saṃstuvatāṃ teṣāṃ purastejomayaṃ jalam |prādurbabhūva tat dṛṣṭvā praṇemuḥ sasurarṣayaḥ || 14||

तानुवाच महातीर्थं हर्षयुक्तेन चेतसा ।वरं वृणुत देवेशा मुनयस्तं ददाम्यहम् ॥ १५॥

tānuvāca mahātīrthaṃ harṣayuktena cetasā |varaṃ vṛṇuta deveśā munayastaṃ dadāmyaham || 15||

भवत्कृतमिदं पुण्यं स्तोत्रं मे प्रीतिवर्धनम् ।भविष्यति न सन्देहो भुक्तिमुक्तिप्रदायकम् ॥ १६॥

bhavatkṛtamidaṃ puṇyaṃ stotraṃ me prītivardhanam |bhaviṣyati na sandeho bhuktimuktipradāyakam || 16||

पठते शृण्वते नित्यं मयि स्नानफलप्रदम् ।सर्वाघनाशनं सद्यो भविष्यति विशेषतः ॥ १७॥

paṭhate śṛṇvate nityaṃ mayi snānaphalapradam |sarvāghanāśanaṃ sadyo bhaviṣyati viśeṣataḥ || 17||

इति ब्रह्मकमण्डलुतीर्थस्तोत्रं सम्पूर्णम् ॥॥ मुद्गलपुराणं षष्टः खण्डः । अध्यायः २५ । ६\।२५ ४१७॥– ॥ मुद्गलपुराणं षष्टः खण्डः । अध्यायः २५ । ६।२५ ४-१७॥

iti brahmakamaṇḍalutīrthastotraṃ sampūrṇam |||| mudgalapurāṇaṃ ṣaṣṭaḥ khaṇḍaḥ | adhyāyaḥ 25 | 6\|25 417||– || mudgalapurāṇaṃ ṣaṣṭaḥ khaṇḍaḥ | adhyāyaḥ 25 | 6|25 4-17||